Pwata ese fókkun mumutá ach sipwe postuni néún Chón Pwáraatá Jiowa kewe puk, video me metakkan wóón pwal ekkóch website?

Ekkóch aramas ra meefi pwe pokiten ese kamé ach anéúnéú ngeni aramas néúch kewe puk me minen álillisin Paipel, iwe ra tongeni chék kapiini are postuni wóón pwal ekkóch website are wóón social media. (Social media a weneiti ekkewe website wóón ewe Internet are eú app ikewe aramas ra tétá wóón eú website ie me chiechifengen me pwóróusfengen.) Nge ar postuni lón pwal ekkóch website epwe tongeni efisi watteen osukosuk, me a pwal atai Allúkún Áeáán * (Terms of Use) ach kewe website. (Ppii ewe pwóróus fan.) Ekkena Allúk ra affata pwe ese mumutá án emén postuni sasing, chúnga, puk, video, nikáttik, are pwóróus seni ei website wóón pwal eú website ese lifilifil are social network wóón ewe Internet. Pwata a lamot ekkena allúk?

Meinisin masouen ach kewe website ra copyrighted, weween pwe mi nóm fán túmúnúen allúkún mwú. Mi lamot ena pokiten a túmúnú ekkena website seni án aramas áeámwáálli masouer. Fán ekkóch ekkewe chón rikiló me pwal ekkóch aramas mi mochen aosukosuka ach angang repwe postuni néúch kewe puk, video me metakkan wóón pwisin ar kewe website ren ar ekiekin lukeato Chón Pwáraatá Jiowa are pwal ekkóch aramas ngeni ar kena website. Nge lón ekkena website, ra pwal apachaalong ekkewe esin pwóróus mi efisi tipemwaramwar lón ekiekin aramas. (Kölf. 26:4; SalF. 22:5) Ekkóch ra fen néúnéú masouen ach kewe website are ewe sign jw.org wóón pwisin ar kewe minen advertise, wóón ar kewe apps, me wóón ar kewe pisekin amémé. Nge pokiten ach na sign me masouen ach kana website ra nóm fán túmúnúen allúkún mwú, iwe sia tongeni atolonger lón kapwúng pwe repwe úkútiw seni met ra féri. (SalF. 27:12) Nge ika sia mut ngeni ekkóch aramas, pwal mwo nge pwiich kewe ar repwe postuni masouen ach kewe website lón pwal ekkóch website are áeá ewe sign jw.org le amémé mettóch, iwe neman ekkewe imwen kapwúng resap álisikich.

Epwe tongeni efeiengaw ach kapiinawu néúch kewe puk, video me metakkan seni pwal ekkóch website me lúkún jw.org. Jiowa a awora ngenikich mwéngé lón pekin lúkú me ren chék “ewe chon angang mi allükülük o tipachem.” (Mat. 24:45) Ena “chon angang” a pwisin áeá ach kewe website le awora ewe mwéngé lón pekin lúkú, ikkeei ekkewe website​—www.pr418.com, tv.pr418.com, me ewe wol.pr418.com. Pwal eú, mi chék wor úlúngát ach kewe apps fán iten néúch kewe mechá, ikkeei​—JW Language^®, JW Library^®, me JW Library Sign Language^®. Wóón ekkena website me apps sisap kúna och minen advertise are mettóch seni án Satan ei fénúfan. Nge ika sipwe kapiinawu néúch kewe puk, video me metakkan seni pwal ekkóch website are apps, iwe mi tongeni fis pwe ekkena website ra fen féri och siwil lón néúch kewe puk, video me metakkan.​—Kölf. 18:26; 19:8.

Pwal och, ika sia postuni masouen ach we website wóón pwal eú website ikewe aramas ra tongeni memmeef wóón ie, iwe a suuk ngeni ekkewe chón rikiló me pwal ekkóch ar repwe esiita án Jiowa we mwicheich. Iwe, ekkóch pwiich kewe ra tongeni ánini ngeni ekkena aramas wóón ekkena website. Iwe a pwal eitengawa Jiowa. Ekkena sókkun pwóróusfengen wóón Internet esap ina alen ach sipwe áwena ekiekin emén me álisi le weweiti ewe enlet. (1 Tim. 6:3-5; 2 Tim. 2:23-25) Pwal och, ekkóch aramas ra mwakenetá le fératá ekkóch website me suuki ekkóch account wóón social media me enikinikiir pwe itá kan minen ach we mwicheich are án chón ewe Mwichen Soupwúngúpwúng. Nge mi chék mwaken. Emén me emén chón ewe Mwichen Soupwúngúpwúng ese wor pwisin ar Web page are account wóón ese lifilifil social media.

Lupwen sia emmweni aramas ngeni ewe jw.org, sia álisatá ewe angangen afalafala ewe “Pworausen Manau.” (Mat. 24:14) Ach kewe website me ekkewe apps ra chék ékkéchúló. Sia mochen meinisin repwe feiéch seniir. Ina popun, mi mumutá ach sipwe e-mail ngeni aramas kapiin masouen ach website are tiinaaló ngeniir ewe link pwe repwe tongeni katol ach we website. Ren ena, sia emmweniir ngeni “ewe chon angang mi allükülük o tipachem,” ewe chék alen án Jiowa awora ewe mwéngé lón pekin lúkú.