1. Met sia mochen fán iten chón ach famili me aramasach kewe?

IEI alon emén chienach itan Pauline: * “Seni ewe atun ua silei ewe enlet, ua mochen pwe meinisin lón ai we famili repwe fitiei lón Paratis. Ua ákkáeúin mochen pwe pwúlúwei we, Wayne, me néúm we kúkkúnún át repwe fitiei le angang ngeni Jiowa.” A wor chókkewe lón óm we famili resaamwo silei Jiowa me tongei i? Ese mwáál ka meefi met Pauline a meefi usun chón an we famili.

2. Ikkefa ekkewe kapas eis sipwe pélúweniir lón ei lesen?

² Sise tongeni echchimwa chón ach famili are aramasach kewe ar repwe etiwa ewe pwóróus allim me kúna manaw esemuch, nge sia tongeni chék peseer ar repwe mwaren ekieki are aúseling ngeni ewe pwóróus seni Paipel. (2 Tim. 3:14, 15) Pwata sipwe afalafal ngeni chón ach famili me aramasach kewe? Pwata a lamot ach sipwe achocho le weweiti meefier? Met sipwe tongeni féri pwe sipwe álisiir le tongei Jiowa usun ach tongei? Me ifa usun meinisin chón ach we mwichefel repwe tongeni álillis?

3. Me ren 2 Petrus 3:9 pwata sipwe afalafal ngeni chón ach famili me aramasach kewe?

³ Ekiseló chék Jiowa epwele amóeló ei ótót. Chókkewe chék “letiper a páái ngeni ar repwe etiwa ewe enlet mi atoto manaw  esemuch” repwe kúna manaw. (Föf. 13:48) Sia áeá watteen ach fansoun me péchékkúl le afalafala chókkewe sise sissileer lón leeniach kewe, iwe sia pwal mochen féri ena ngeni chón ach kewe famili pwe repwe tongeni fitikich le angang ngeni Jiowa. Semach we mi tong, Jiowa “esap mochen pwe eman epwe pöütmwälila, nge a fen mochen pwe meinisin repwe ekieksefäl.”​—Álleani 2 Petrus 3:9.

4. Ifa usun eli sia tongeni mwáálliló lón napanapen ach afalafal ngeni chón ach kewe famili are aramasach kewe?

⁴ Mi lamot sipwe chechchemeni pwe napanapach atun sia afalafala ewe pwóróusen manaw a tongeni ésúfél are ésúfélúngaw. Áwewe chék, atun sia afalafal ngeni chókkewe sise sissileer eli sia kan kapas pwetete ngeniir, nge neman atun sia afalafal ngeni chón ach kewe famili are aramasach, sia kon tuwenewen ngeniir.

5. Met sipwe chechchemeni me mwen ach sipwe sótun afalafal ngeni futukach kewe?

⁵ Atun sia chemeni ewe fansoun sia kerán sótun afalafal ngeni futukach kewe, eli chómmóng me leich sia niamam ren napanapen ach fós ngeniir lón ena atun, me áneánei pwe sia féri fán súfél. Iei án aposel Paulus fén ngeni Chón Kraist: “Fansoun meinisin ami kapas epwe umoumoch, o epwe anno ren salt, pwe oupwe sinei meeta oupwe polueni ngeni emon me emon.” (Kol. 4:5, 6, Testament Mi Fö) A mmen éch ach sipwe chechchemeni ena fén atun sia fós ngeni futukach kewe. Ika sise, iwe neman sipwe fen atowauereló nge sisap fen álisiir.

6-7. Apwóróusa eú pwóróus mi áweweei lamoten ach sipwe achocho le weweiti meefien pwúlúwach kewe rese angang ngeni Jiowa.

⁶ Achocho le weweiti meefier. Pauline, ewe sia fen fós usun, a erá: “Akkomwan, ua  chék mochen fós ngeni pwúlúwei we usun Kot me ewe Paipel. Ause kan fóffós usun met mi kan fiffis lón manawem.” Iwe nge, pwúlúwen Pauline we, Wayne, ese kon lien silei usun ewe Paipel me ese weweiti met Pauline a fóffós usun. Me ren Wayne, usun itá a chék lap án Pauline ekieki usun an we lamalam. Wayne a lólilen ika Pauline a fen tupuló le fiti eú lamalam mi efeiengaw.

⁷ Pauline a apasa pwe ren fitu fansoun a kan soun chiechi ngeni chienan kewe Chón Kraist lón weekend, lepwin, lón ekkewe mwich, angangen afalafal, me a fitiir le mwéngéfengen. Pauline a erá: “Fán ekkóch Wayne a wareiti imwem we nge ause nóm, iwe a meefi tipitipingaw.” Pwúngún pwe Wayne a pwosiiti pwúlúwan we me néún we át. Wayne ese sissilei ekkewe aramas ra fiffitiir, me usun itá chiechien Pauline kewe minefé ra kon aúchea lap seni. Iwe pokiten ena, Wayne a ereni pwe a mochen repwe mufesen. Ka tongeni ekieki ika epwe ifa usun án Pauline epwe achocho le weweiti meefien pwúlúwan na?

8. Me ren 1 Petrus 3:1, 2 ifa ewe mettóch epwe tongeni achchúngú futukach kewe lap seni meinisin?

⁸ Isetiw leenien áppirú mi múrinné. Fán chómmóng futukach kewe ra kon chúng ren ar kúna minne sia féri lap seni minne sia apasa. (Álleani 1 Petrus 3:1, 2.) Ina met Pauline a mirititi mwirin och fansoun. A erá: “Ua silei pwe Wayne a tongekem me saminne a mochen aupwe mufesen. Nge minne a erá a efisi ai upwe mirititi lamoten ai upwe poputá le apwénúetá minne Jiowa a apasa. A lamot upwe fen isetiw leenien áppirú mi múrinné ren ai féffér lap seni ai chék akkafalafal ngeni iteitan.” Pauline a úkútiw le echchimwa Wayne ar repwe chék fóffós usun Paipel, nge a  poputá le fóffós ngeni usun minne a fiffis lón manawer. Wayne a kúna án Pauline achocho le efisi kinamwe lefiler, me a kúna pwe néúr we át a échúló. (SalF. 31:18, 27, 28) Atun Wayne a kúna án Paipel émúrinnéló an we famili, iwe a poputá le aúseling pwóróus seni án Kot we Kapas.​—1 Kor. 7:12-14, 16.

9. Pwata sipwe akkachocho le álisi futukach kewe?

⁹ Akkachocho le álisi futukach kewe. Jiowa a isetiw leenien áppirú fán itach. A kan “soun” mut ngeni aramas ar repwe pwisin etiwa ewe pwóróus allim me kúna manaw esemuch. (Jer. 44:4) Me ewe aposel Paulus a ereni Timoty an epwe achocho le álisi ekkewe ekkóch. Pwata? Pokiten epwe amanawa pwisin i me chókkewe mi aúselinga. (1 Tim. 4:16) Sia tongei futukach kewe, ina popun sia mochen ar repwe silei ewe enlet lón án Kot we Kapas. Mwirin och fansoun, án Pauline kewe kapas me féffér ra achchúngú an we famili. Iei a pwapwa pokiten ra angangfengen me pwúlúwan we ngeni Jiowa. Iir me rúúemén ra pioneer, me Wayne a wiseni ewe wis mwán mi ásimaw.

10. Pwata a lamot ach sipwe mosonottam?

¹⁰ Sipwe mosonottam. Atun sia filatá le álleasochisi Kot, a siwil manawach me ach lúkú. Epwe tongeni weires ngeni futukach kewe ar repwe etiwa ekkena esin siwil. Fán chómmóng, ewe áeúin mettóch ra esilla, ina ach sise chúen fiffitiir lón ekkewe sókkun apwapwa mi weneiti lamalam me sise chúen angolong lón mwékútúkútún politics. Me lepoputáán eli ekkóch me leir repwe song rech. (Mat. 10:35, 36) Nge sisap ekieki pwe resap tongeni siwil. Ika sia úkútiw le álisiir le weweiti minne sia lúkú, iwe usun itá sia fen apwúngaló pwe ese fich ngeniir manaw esemuch. Jiowa ese ewisa ngenikich ach sipwe apwúngú aramas, nge a fen ewisa ngeni Jesus ena. (Joh. 5:22) Ika sia mosonottam, iwe ló, ló, ló, neman futukach kewe repwe tipemecheres le aúseling ngeni ewe pwóróus allim.​—Ppii ewe pwóór “ Áeá Ach Kewe Website le Asukula Aramas.”

11-13. Met sia káé seni féfférún Alice ngeni seman kewe me inan?

¹¹ Úppós nge kapas pwetete. (SalF. 15:2) Ekieki pwóróusen Alice. A káé usun Jiowa atun a towau seni seman kewe me inan rese lúkú Kot me ra péchékkúl lón politics. A mirititi pwe a mmen lamot an epwe mwittir ereniir usun ekkewe mettóch mi éch a kákkáé. Alice a erá: “Ika ka mwittir ereni chón óm we famili ekkewe mineféén mettóch ka lúkú me féfféri, iwe resap kon máirú.” Alice a mak taropwe ngeni seman kewe me inan, me a eisiniir usun ekkóch pwóróus seni Paipel a áneánei pwe repwe sani, áwewe chék ren ewe napanap tong. (1 Kor. 13:1-13) A kilisou ngeniir ren ar túmúnú me ámáári, me a kan pwal titiiló an liffang ngeniir. Atun a kan ló ren imwer we, a achocho úkúkún an tufich le álisi inan we ren an kewe angangen lón imw. Atun Alice a ereni seman kewe me inan usun an minefé lúkú, me mwan rese sani.

¹² Atun Alice a nóm lón imwen seman kewe me inan, a kan ákkálleani ewe Paipel iteiten rán. Alice a erá: “Ai féri ena a álisi inei we le weweiti pwe ewe Paipel a mmen aúchea me rei.” Nge seman we a filatá le káé och mettóch usun ewe Paipel pwe epwe weweiti pwata néún we nengngin a siwil. A pwal ppii met epwe esiita ewe Paipel wóón. Alice a erá: “Ua ngeni semei we eú néún Paipel me ua makkeei lón och pwóróus fán itan.” Met mwirilóón? Semen Alice we ese tongeni kúna met epwe tongeni esiita ewe Paipel wóón, nge a fókkun chúng letipan ren met a álleani lón án Kot we Kapas.

 ¹³ A lamot ach sipwe úppós, nge sipwe kapas pwetete pwal mwo nge fán weires. (1 Kor. 4:12b) Áwewe chék, Alice a likiitú fán án inan we áweiresi. Alice a erá: “Atun ua papatais inei we a kér ngeniei ‘nau mi lúkúmach.’” Met Alice a féri? A erá: “Use sáw le fós usun ai we mineféén lamalam, nge fán súfél ua áwewe ngeni pwe ua fen filatá ai upwe wiliti emén Chón Pwáraatá Jiowa, me usap siwili ai kefil. Ua achocho le alúkúlúkú inei we pwe ua mmen tongei. Ám me rúúemén aua kechiw, me ua kuku och anan mwéngé mi anné. Seni ena atun, inei we a erá pwe ewe Paipel a émúrinnéeiló.”

14. Pwata sisap fókkun mut ngeni futukach kewe ar repwe siwili ach kefil le angang ngeni Jiowa?

¹⁴ Eli epwe ttam me mwen án chón óm we famili repwe unusen weweiti úkúkún aúchean me lamoten óm angang ngeni Jiowa. Áwewe chék, inen Alice we a kechiwsefál atun Alice a filatá an epwe pioneer lap seni an epwe eáni ewe angang seman kewe me inan ra mochen an epwe eáni. Nge Alice a úppós. A erá: “Ika ka mut ngeni chón óm we famili repwe ekkesiwili eú kefil ka fen filatá, ese mwáál repwe sótun siwili óm kefil wóón pwal ekkóch mettóch. Nge ika ka kirekiréch fiti úppós, eli ekkóch me leir repwe aúseling ngonuk.” Ina met a fis ngeni Alice. Iei seman kewe me inan ra pioneer, me seman we a wiseni ewe wis mwán mi ásimaw.

15. Me ren Mateus 5:14-16 me 1 Petrus 2:12, ifa usun án pwiich kewe “föför mürina” a tongeni álisi futukach kewe?

¹⁵ Jiowa a lukeato aramas ngeni i ren án néún kewe chón angang “föför mürina.” (Álleani Mateus 5:14-16; 1 Petrus 2:12.)  Pwúlúwom we esap emén Chón Pwáraatá Jiowa a fen chuuri chón óm we mwichefel? Pauline ewe sia fen fósun, a etiwa pwiich kewe lón imwan we pwe Wayne epwe tongeni sissileer. Wayne a chemeni eú rán emén Chón Kraist mwán a álisi le weweéchúti wesewesen napanapen Chón Pwáraatá, a erá: “A asésé seni an angang pwe epwe tongeni etto me fitiei le katol eú urumwot wóón TV.” Wayne a mirititi pwe chienach na a pwal pwapwaiti ekkóch mettóch me lúkún lamalam.

16. Pwata sipwe etiwa futukach kewe ar repwe fiti ach kewe mwich?

¹⁶ Eú alen ach sipwe tongeni álisi futukach kewe, ina ren ach etiwer ar repwe fitikich le mwich. (1 Kor. 14:24, 25) Ewe áeúin mwich Wayne a fiti ina ewe Áchechchem, pokiten a fis sárin an angang me ese kon ttam. Wayne a erá: “Use kon lien weweiti unusen ewe afalafal, nge ua chechchemeni ekkewe aramas. Ra etiwaéchúei me kapong ngeniei fán kirekiréch. Ua esilla pwe iir aramaséch.” Eú pean pwúpwúlú ra fókkun kirekiréch ngeni Pauline ren ar álisiir me néún we át lón ekkewe mwich me lón ewe angangen afalafal. Iwe atun Wayne a filatá an epwe alapaaló an silei usun minne pwúlúwan we a lúkú, a tingorei pwúlúwen ena fefin na an epwe káé ngeni.

17. Itá met sisap pwisin tipi ngenikich, nge pwata sisap fangetá le álisi futukach kewe?

¹⁷ Sia mochen pwe meinisin futukach kewe repwe fitikich le angang ngeni Jiowa. Iwe nge, inaamwo ika sia fókkun achocho le álisiir le wiliti néún Kot chón angang, nge neman resap tolong lón ewe enlet. Ika a fis ena, sisap ekieki pwe tipisich ar kefil. Ren enletin sise tongeni echchimwa emén an epwe etiwa ach lúkú. Nge ika chón óm famili are aramasom kewe ra kúna úkúkún óm pwapwa pokiten óm angang ngeni Jiowa, epwe tongeni achchúngúúr. Kopwe iótekiir. Fós ngeniir fán pwetete. Kosap úkútiw lón óm ákkálisiir! (Föf. 20:20) Lúkúlúk pwe Jiowa epwe efeiéchú óm achocho. Me ika chón óm we famili me aramasom kewe ra filatá le aúseling ngonuk, iwe repwe kúna manaw!