1. Ifa ewe feiéch sia pwapwaiti?

A IFA me feiéchúch ren ach chóni án Jiowa we mwichefel! Sia nóm lón eú paratis lón pekin ngún mi ur ren aramas mi kinamwe me pwapwa. Menni wis are angang ka eáni lón ewe mwichefel?

2. Ifa ewe kapas áwewe aposel Paulus a áeá lón néún kewe fitu taropwe a makkeei fán emmwenien Kot?

² Sia tongeni káé chómmóng mettóch usun wisach lón ewe mwichefel seni eú kapas áwewe aposel Paulus a áeá lón néún kewe fitu taropwe a makkeei fán emmwenien Kot. Lón eú me eú ekkena taropwe, Paulus a apépééi ewe mwichefel ngeni inisin aramas. A pwal apépééi emén me emén lón ewe mwichefel ngeni kifetin ewe inis.​—Rom 12:4-8; 1 Kor. 12:12-27; Ef. 4:16.

3. Ikkefa ekkewe úlúngát lesen sipwele pwóróusfengen wóón?

³ Iei sipwele káé úlúngát lesen mi aúchea sia tongeni káé seni án Paulus we kapas áwewe. Áeúin, sipwe káé pwe emén me emén kich a wor wisach * lón án Jiowa we mwichefel. Oruuan, sipwe pwóróusfengen wóón met sia tongeni féri ika a weires ngenikich ach sipwe silei met wisach lón ewe mwichefel. Me aúlúngátin, sipwe pwóróusfengen wóón pwata a lamot ach sipwe akkachocho lón ach féri ewe angang Jiowa a ewisa ngeni emén me emén kich lón ewe mwichefel.

4. Met sia káé seni Rom 12:4, 5?

⁴ Iei ewe áeúin lesen sia tongeni káé seni án Paulus we kapas áwewe, emén me emén kich a wor ach angang are wisach mi aúchea lón án Jiowa we famili. Paulus a poputááni an we kapas áwewe ren an apasa: “A wor chomong kifetin inisich, nge ekei kifet meinisin ra sokofesen lon en me an angang. Inamwo ika kich chomong sokun aramas, nge sia eu chök inis lon Kraist. Iwe, eman me eman leich sia chufengen usun ekewe sokopaten kifet lon eu chök inis.” (Rom 12:4, 5) Met weween alon Paulus na? Emén me emén kich a sókkofesen en me wisach lón ewe mwichefel, nge emén me emén sia aúchea.

5. Ikkefa ekkewe ‘lifang’ Jiowa a awora ngeni ewe mwichefel?

⁵ Atun ka kan ekieki usun chókkewe mi wor wiser lón ewe mwichefel, eli ka mwittir ekieki pwe iir chókkewe mi wisen emmweni ewe mwichefel. (1 Tes. 5:12; Ipru 13:17) Pwúngún pwe ren Kraist, Jiowa a awora ekkewe mwán mi usun ‘lifang’ ngeni an we mwichefel. (Ef. 4:8) Ekkena mwán mi usun ‘lifang,’ a kapachelong chón ewe Mwichen Soupwúngúpwúng, chókkewe mi álisi ewe Mwichen Soupwúngúpwúng, ewe Kúmiin Chón Túmúnú Keangen Ofesilap, chónemmwen mi wisen sáifetál, mwán mi ásimaw lón ekkewe mwichefel, me chónálillisin mwichefel. Meinisin ekkena mwán ra kefilitá ren ewe ngún mi fel pwe repwe túmúnú néún Jiowa kewe siip mi aúchea me apéchékkúla ewe mwichefel.​—1 Pet. 5:2, 3.

6. Me ren 1 Tesalonika 2:6-8, met ekkewe mwán mi kefilitá me ren ewe ngún mi fel ra achocho le féri?

⁶ Ekkewe Chón Kraist mwán ra kefilitá me ren ewe ngún mi fel pwe repwe apwénúetá sókkopaten wis. A pwal ina usun ren ekkewe sókkopaten kifetin inis, áwewe chék ren ekkewe paw me peche, anganger a álisi unusen ewe inis, iwe pwal ina usun ren ekkewe Chón Kraist mwán mi kefilitá ren ewe ngún mi fel, ar angang weires a efeiéchú unusen ewe mwichefel. Rese kútta pwisin itéchúr. Nge, ra achocho le apéchékkúla chiechier kewe Chón Kraist. (Álleani 1 Tesalonika 2:6-8.) Sia fókkun kilisou ngeni Jiowa ren ekkena mwán mi lipwákéch mi akkomwa osupwangen ekkewe ekkóch lap seni pwisin iir!

7. Ikkefa ekkewe feiéch chómmóng mi angang ngeni Jiowa full-time ra kúna?

⁷ Ekkóch lón ewe mwichefel eli ra kefilitá ar repwe fiti ewe angangen misineri, special pioneer, are regular pioneer. Ren enletin pwiich kewe wóón unusen fénúfan ra filatá ar repwe fiffiti ewe angangen afalafal full-time. Pokiten ena, ra fen álisi chómmóng le wiliti néún Jesus Kraist chón káé. Inaamwo ika lape ngeni chókkewe mi angang ngeni Jiowa full-time rese wéúéch, nge Jiowa a efeiéchúúr ren chómmóng mettóch mi múrinné. (Mark. 10:29, 30) Sia aúcheani pwiich kana mi áchengicheng, me sia kilisou pwe ra chóni ewe mwichefel!

8. Pwata meinisin chón afalafala ewe kapas allim ra aúchea me ren Jiowa?

⁸ Itá ekkewe Chón Kraist mwán mi wor wiser me chókkewe mi fiti ewe angangen afalafal full-time, iir chék a wor wiser lón ewe mwichefel? Aapw! Meinisin chón afalafala ewe kapas allim ra aúchea me ren Kot me ngeni ewe mwichefel. (Rom 10:15; 1 Kor. 3:6-9) Ewe ákkáeúin mettóch chón ewe mwichefel ra achocho le féri, ina ar álisi aramas le wiliti néún ach Samol Jesus Kraist chón káé. (Mat. 28:19, 20; 1 Tim. 2:4) Meinisin chókkewe mi fiti ewe angangen afalafal, ese lifilifil ika iir mi papatais are iir chón afalafal resaamwo papatais ra achocho le akkomwa ena angang lón manawer.​—Mat. 24:14.

9. Pwata sia aúcheani ekkewe Chón Kraist fefin?

 ⁹ Jiowa a aúcheani ekkewe Chón Kraist fefin ren an ngeniir wiser mi lamot lón ewe mwichefel. A aúcheani ekkewe fefin mi pwúpwúlú, ekkewe inelap, ekkewe fefin mi má seniir pwúlúwer, me ekkewe fefin mi lipich, iir kewe mi angang ngeni fán tuppwél. Ewe Paipel a fós usun chómmóng fefin mi aúchea iir mi apwapwaai Kot. Ewe Paipel a mwareitiir ren ar leenien áppirú usun ar pwári tipachem, lúkú, tinikken, pwora, kisáseú, me pwal ekkóch angang mi múrinné. (Luk. 8:2, 3; Föf. 16:14, 15; Rom 16:3, 6; Fil. 4:3; Ipru 11:11, 31, 35) A ifa me kilisouch ngeni Jiowa pwe a wor lón ach kewe mwichefel, ekkewe Chón Kraist fefin, iir kewe mi eáni ekkena esin napanap mi múrinné!

10. Pwata sia aúcheani ekkewe chinnap?

¹⁰ Sia pwal pwapwa pwe a wor chómmóng chinnap lón ewe mwichefel. Lón ekkóch ekkewe mwichefel a wor chienach kewe Chón Kraist chinnap mi angang ngeni Jiowa ren unusen manawer fán tuppwél. Nge eli ekkóch ra kerán chék káé ewe enlet. Chómmóng me leir a apwangapwang inisiir pokiten ra chinnapeló. Pokiten ena, neman a aúkúk met ra tongeni féri lón ewe mwichefel me lón ewe angangen afalafal. Nge, ekkena chinnap ra fiti ewe angangen afalafal úkúkún ar tufich, me ra áeá unusen ewe péchékkúl mi nóm rer le apéchékkúla me áiti ekkewe ekkóch! Me sia kúna feiéch seni pwóróuseer. Chókkana ra enletin lingéch me ren Jiowa me kich.​—SalF. 16:31.

11-12. Ifa usun ekkewe kúkkún me sáráfé lón óm we mwichefel ra apéchékkúlok?

¹¹ Pwal ekieki usun ekkewe kúkkún me sáráfé. Ra kúkkúna chómmóng sóssót pokiten ra mámmááritá lón ei ótót mi nóm fán nemenien Satan ewe Tefil me an kewe ekiek mi fókkun ngaw. (1 Joh. 5:19) Iwe nge, sia péchékkúletá atun sia kúna ar uwawu meefier lón ekkewe mwich, fiti ewe angangen afalafal, me pwora le penaatá minne ra lúkú. Ewer, ámi kana kúkkún me sáráfé a wor wisemi mi aúchea lón án Jiowa we mwichefel!​—Kölf. 8:2.

¹² Iwe nge, a weires ngeni ekkóch me lein  chienach kewe Chón Kraist ar repwe lúkú pwe ra aúchea me lón ewe mwichefel. Met a tongeni álisi emén me emén kich le meefi pwe mi wor wisach mi aúchea lón ewe mwichefel? Sipwe ppii.

13-14. Pwata ekkóch ra tongeni meefi pwe rese aúchea ngeni ewe mwichefel?

¹³ Ewe oruuen lesen lón án Paulus we kapas áwewe a efisi ach sipwe ekieki usun eú osukosuk chómmóng ra kúkkúna ikenái. A weires ngeni chómmóng ar repwe lúkú pwe ra aúchea me lón ewe mwichefel. Paulus a apasa: “Are pechech epwe apasa, ‘Pokiten ngang üsap efoch pau, üsap chu ngeni ewe inis,’ ei esap tongeni imwüwu seni an epwe eu kifetin inisich. Nge are selingach epwe apasa, ‘Pokiten ngang üsap eföü mas, üsap chu ngeni ewe inis,’ ei esap tongeni imwüwu seni an epwe eu kifetin inisich.” (1 Kor. 12:15, 16) Met weween alon Paulus na?

¹⁴ Ika ka apépéok ngeni ekkewe ekkóch lón ewe mwichefel, eli kopwe poputá le ekieki pwe kese aúchea ngeni ewe mwichefel. Ekkóch lón ewe mwichefel eli ra lipwákéch le asukul, angéch le akkót, are lipwákéch le oururu me apéchékkúla ekkewe ekkóch. Eli ka meefi pwe kese lipwákéch usun lipwákéchúúr. Ena mettóch a pwári pwe ka tipetekison. (Fil. 2:3) Nge kopwe túmúnúéch. Ika ka chék soun apépéok ngeni chókkewe mi lipwákéch, iwe kopwe letipengaw. Eli kopwe pwal mwo nge meefi pwe ese fókkun wor aúcheaom are wisom lón ewe mwichefel, usun met Paulus a fen fós usun. Met a tongeni álisuk le pworacho ngeni ena sókkun memmeef?

15. Me ren 1 Korint 12:4-11 met a lamot ach sipwe mirititi usun tufichich kewe?

¹⁵ Ekieki ei: Jiowa a fang ngeni ekkóch ekkewe popun Chón Kraist ewe liffang, ngún mi fel, nge esap iir meinisin a chék taitap liffanger. (Álleani 1 Korint 12:4-11.) Jiowa a ngeni ekkena Chón Kraist sókkopaten liffang me tufich, nge emén me emén a aúchea. Lón ei fansoun, ese nóm rech ena esin liffang mi  amwarar mi pop seni ewe ngún mi fel. Nge ei pwóróus a chúen weneitikich, pún inaamwo ika ese taitap tufichich kewe, nge sia chúen aúchea me ren Jiowa.

16. Ifa án Paulus we kapasen fén mi lamot ach sipwe apwénúetá?

¹⁶ A lamot ach sipwe apwénúetá án Paulus ei kapasen fén lap seni ach sipwe apépékich ngeni ekkewe ekkóch Chón Kraist. A apasa: “Eman me eman epwe püsin apwüngü an föför. Are a mürina, mürin a tongeni pwapwa ren met a föri, nge esap awewei met i a föri ngeni met eman a föri.”​—Kal. 6:4.

17. Ifa usun sipwe kúna feiéch ika sia apwénúetá án Paulus we kapasen fén?

¹⁷ Ika sipwe apwénúetá án Paulus na kapasen fén me etittina féfférúch kewe, eli sipwe poputá le kúna pwe mi nóm rech ekkewe sókkun tufich mi kkóló aúchean ese nóm ren ekkewe ekkóch. Áwewe chék, eli emén mwán mi ásimaw ese kon lien angéch le afalafal lón mwich, nge neman a fókkun lipwákéch lón ewe angangen afalafal. Are neman ese kon lien kókkótéch epwe usun ekkewe ekkóch mwán mi ásimaw, nge neman i emén mi kirekiréch me tong me chón ewe mwichefel ra meefi kinamwe le tingor an álillis ren kapasen emmwen seni Paipel. Are neman a silleló ren an awasélaéchú aramas. (Ipru 13:2, 16) Atun sia mirititi pwe mi pwisin wor tufichich, epwe wor popun ach sipwe pwapwa ren met sia tongeni féri le álisatá ewe mwichefel. Iwe sisap lólówóiti chiechiach kewe mi sókkóló tufichiir seni tufichich.

18. Ifa usun sipwe elipwákéchúkicheló lón ach we angangen asukula aramas?

¹⁸ Ese lifilifil met wisach are ach angang lón ewe mwichefel, nge a lamot oukich meinisin sipwe fókkun elipwákéchúkicheló lón ewe angangen afalafal me émúrinnéló pwisin tufichich kewe. Jiowa a awora álillis mi múrinné seni an we mwicheich pwe epwe álisikich le lipwákéchúló. Áwewe chék, lón ach we mwich lón weekday sia kan káé ifa usun sipwe lipwákéchúló lón ach angangen afalafal. Ka kan achocho le apwénúetá ena káit ka angei seni ena mwich?

19. Met kopwe féri pwe kopwe tufichin fiti ewe Sukulen Chón Afalafala ewe Mwú?

¹⁹ Pwal eú minen káit mi fókkun múrinné, ina ewe Sukulen Chón Afalafala ewe Mwú. Ekkewe mi tongeni fiti ena sukul, iir chókkewe mi fiti ewe angangen afalafal full-time me ieriir epwe 23 ngeni 65. Eli usun itá me reom kosap fókkun tongeni fiti ena sukul. Kosap fen eiteitaatiw ekkewe popun pwata kese tongeni fiti, nge kopwe fen eiteitaatiw ekkewe popun pwata ka mochen fiti. Mwirin, féri eú kókkót epwe álisuk le féri ekkewe mettóch mi lamot pwe epwe fich ngonuk óm kopwe fiti ena sukul. Ren án Jiowa álillis me pwisin óm achocho, ka tongeni féri met ewe ka ekieki pwe kese tufichin féri.

20. Met sia tongeni káé seni Rom 12:6-8?

²⁰ Ewe aúlúngátin lesen sia tongeni káé seni án Paulus we kapas áwewe, a mak lón Rom 12:6-8. (Álleani.) Lón ei wokisin Paulus a pwal affatasefáli pwe a wor ren emén me emén lón ewe mwichefel sókkopaten tufich. Nge iei a menlapei lamoten ach sipwe áeá ese lifilifil tufich mi nóm rech le apéchékkúlatá ewe mwichefel.

21-22. Met sia tongeni káé seni pwóróusen Robert me Felice?

²¹ Ekieki pwóróusen chienach ei mwán itan Robert. * Mwirin an álillis lón eú fénúen ekis, a kewis an epwe angang lón ewe Bethel lón pwisin leenian we. Inaamwo ika ekkewe mwán  mi ásimaw ra alúkúlúkú ngeni pwe an fis ewe siwil esap ren an féri minne ese pwúng, nge iei met a erá: “Ren fite maram use pwapwa pokiten ua meefi pwe ngang mi sópwongaw lón wisei we. A wor ekkóch atun ua mochen úkútiw seni ai angang lón Bethel.” Met a álisi Robert le pwapwasefál? Emén chienan mwán mi ásimaw a áchema ngeni pwe Jiowa a kan áitikich lón ewe wis sia eáni me mwan pwe epwe pwal tongeni néúnéú kich lón ewe wis sia eáni iei. Robert a mirititi lamoten an epwe úkútiw le lesékúrú met a féfféri lón wisan we me lóóm, nge epwe fen poputá le nefótófót wóón met a tongeni féri iei.

²² Emén mwán Chón Kraist itan Felice Episcopo a pwal kúna ena esin weires. Iir me pwúlúwan we ra sochungio seni ewe Sukulen Gilead lón ewe 1956 me ra fiti ewe angangen sáifetál le chuuri ekkewe mwichefel lón Bolivia. Lón ewe 1964 ra néúnéú. Felice a apasa: “A mmen áweires ám aupwe likitaló wisem we aua fókkun sani. Ren enletin, ren úkúkún eú ier ua fókkun letipengaw. Nge ren án Jiowa álillis ua ekkesiwili ekieki me ua nefótófót wóón wisei minefé, emén sam.” Ka pwal meefieni meefien Robert are Felice? Ka letipengaw pokiten iei kese chúen wiseni ekkewe wis ka wiseni me lóóm? Ika ina, epwe fen lapóló óm pwapwa ika ka ekkesiwili minne ka kan ekieki usun me fen nefótófót wóón met ka tongeni féri iei lón óm angang fán iten Jiowa me chienom kewe Chón Kraist. Akkachocho lón óm áeá tufichum kewe le álisi ekkewe ekkóch, iwe kopwe pwapwa lón óm apéchékkúlatá ewe mwichefel.

23. Met sipwe awora fansoun le féri, me met sipwe káé lón en lesen mwirin ei?

²³ Emén me emén kich sia aúchea me ren Jiowa. A mochen ach sipwe chóni an we famili. Ika sia awora fansoun le ekieki wóón met sia tongeni féri le apéchékkúlatá chienach kewe Chón Kraist me achocho le apwénúetá ena, iwe epwe kisikisiló ach meefi pwe ese wor aúcheach me lón ewe mwichefel! Nge epwe ifa ach ekiek usun chienach kewe lón ewe mwichefel? Ifa usun sia tongeni pwári pwe sia tongeer me súfélitiir? Lón ewe lesen mwirin ei, sipwe káé ena pwóróus mi lamot.