1. Met Jiowa a mut ngeni emén me emén néún kewe chón angang mi tuppwél?

FÁN tong, Jiowa a mut ngeni emén me emén néún kewe chón angang mi tuppwél ar repwe nóm lón an we mwichefel. Inaamwo ika a sókkóló án emén me emén angang lón ewe mwichefel, nge kich meinisin sia aúchea me a wor lamotach ngeni emén me emén. Ewe aposel Paulus a álisikich le mirititi ei lesen mi lamot. Ifa usun?

2. Me ren Efisos 4:16, pwata a lamot ach sipwe aúcheanifengennikich me angangfengen?

² Lón ewe wokisin ach ei lesen a lóngólóng wóón, Paulus a affata pwe ese wor emén leich a tongeni ereni pwal emén néún Jiowa chón angang “Esap wor lomotom ngeniei.” (1 Kor. 12:21) Ika sia mochen an epwe wor kinamwe lón ewe mwichefel, a lamot ach sipwe aúcheanifengennikich me angangfengen. (Álleani Efisos 4:16.) Lupwen sia angangfengen fán tipeeú, chón ewe mwichefel repwe meefi pwe a wor tongeer me repwe péchékkúletá.

3. Met sipwe káé lón ei lesen?

³ Ikkefa ekkóch alen ach sipwe súféliti chienach kewe Chón Kraist lón ewe mwichefel? Lón ei lesen sipwe káé ifa usun ekkewe mwán mi ásimaw ra tongeni súféliti chiener kewe mwán mi ásimaw. Mwirin, sipwe pwóróus wóón ifa usun oukich meinisin sipwe pwári pwe sia aúcheani chienach kewe Chón Kraist iir mi lipich. Sáingolóón, sipwe káé ifa usun sipwe tongeni pwári ach súféliti chókkewe rese kon lien sile fósun fénúach.

4. Ifa án Paulus we kapasen éúréúr lón Rom 12:10 mi lamot ekkewe mwán mi ásimaw repwe apwénúetá?

⁴ Meinisin ekkewe mwán mi ásimaw lón ewe mwichefel ra kefilitá ren án Jiowa we ngún mi fel. Nge emén me emén a sókkóló tufichiir. (1 Kor. 12:17, 18) Eli ekkóch ra kerán wiseni ena wis, ina popun sileier esap usun sileien ekkewe ekkóch mwán mi ásimaw. Are eli ekkóch a aúkúk met ra tongeni féri pokiten ra chinnap are ra apwangapwang. Iwe nge, itá úrúrún esap wor emén me leir epwe ekieki usun emén chienan mwán mi ásimaw, “Esap wor lomotom ngeniei.” Nge emén me emén epwe fen fiti án Paulus we kapasen éúréúr lón Rom 12:10.​—Álleani.

5. Ifa usun ekkewe mwán mi ásimaw ra pwári pwe ra súféliti chiener kewe mwán mi ásimaw? Me pwata a lamot ar repwe féri ena?

⁵ Ekkewe mwán mi ásimaw ra pwári pwe ra súféliti chiener kewe mwán mi ásimaw ren ar aúselingéch ngeni meefien emén me emén leir. A ákkáeúin lamot ena atun án ekkewe mwán mi ásimaw mwichfengen pwe repwe pwúngúpwúng wóón ekkewe mettóch mi chou. Pwata? Nengeni met Ewe Leenien Mas minen April 1989 a apasa, “A lamot ngeni ekkewe elder ar repwe weweiti pwe ren ewe ngun mi fel, Kraist epwe tongeni emmweni ekiekin emon elder leir fan iten an epwe awora eu kapasen emmwen seni Paipel mi lamot ngeni met ra angang won are fan iten eu mettoch repwe filata. (Fof. 15:6-15) Sap minne ewe ngun mi fel epwe nom ren emon chok elder lon ewe mwichen elder.”

6. Ifa usun ekkewe mwán mi ásimaw repwe angangfengen fán tipeeú, me ifa usun chón ewe mwichefel repwe feiéch seni ar féri ena?

⁶ Emén mwán mi ásimaw mi súféliti chienan kewe mwán mi ásimaw a túmúnú an esap kan fós akkomw iteitan lón ar kewe mwich. Ese kan nemenaló ewe mwich, me ekieki pwe epwe chék pwúng meefian iteitan. Nge epwe fen uwawu an memmeef fán tipetekison. A aúselingéch ngeni meefien ekkewe ekkóch.  Nge lap seni meinisin, a fen pwapwa le pwóróus ngeniir wóón kapasen emmwen seni Paipel me fiti emmwenien “ewe chon angang mi allükülük o tipachem.” (Mat. 24:45-47) Lupwen ekkewe mwán mi ásimaw ra pwári ar tongfengen me súfélfengen atun ra mwichfengen, iwe epwe nónnóm rer án Kot we ngún mi fel, me epwe emmweniir le féri ekkewe kefil epwe apéchékkúla ewe mwichefel.​—Jas. 3:17, 18.

7. Ifa ekiekin Jesus usun ekkewe lipich?

⁷ Lón ei fansoun, a wor chókkewe mi pwúpwúlú me famili lón ewe mwichefel. Nge a pwal wor chómmóng chienach kewe Chón Kraist mi lipich. Itá epwe ifa ach ekiek usun chókkana mi lipich? Sipwe eáni án Jesus ekiek usur. Atun Jesus a afalafal wóón fénúfan, ese pwúpwúlú. A chék lipich me a áeá an fansoun lón an angang. Ese allúkú pwe Chón Kraist repwe pwúpwúlú are repwe chék lipich. Iwe nge, a erá pwe ekkóch Chón Kraist repwe filatá ar resap pwúpwúlú. (Mat. 19:11, 12) Jesus a súféliti ekkewe mi lipich. Ese ekieki pwe ekkewe mi lipich ra lamotkisikis are ese unus manawer pokiten rese pwúpwúlú.

8. Me ren 1 Korint 7:7-9, met Paulus a pesei Chón Kraist ar repwe ekieki?

⁸ Atun Paulus a féri an angangen afalafal, i emén mi lipich usun chék Jesus. Paulus ese fókkun asukula pwe a mwáál án emén Chón Kraist epwe pwúpwúlú. A mirititi pwe ina pwisin filien emén me emén. Iwe nge, Paulus a pesei Chón Kraist ar repwe ekieki ika ra tongeni angang ngeni Jiowa lón ar lipich. (Álleani 1 Korint 7:7-9.) Enlet, Paulus ese ekieki pwe ekkewe Chón Kraist iir mi lipich ra lamotkisikis. Ren enletin, a filatá emén alúwél mi lipich itan Timoty, an epwe eáni ekkewe angang mi lamot. * (Fil. 2:19-22) Iwe, a ffat pwe ese pwúng ach sipwe ekieki pwe a fich ngeni emén Chón Kraist an epwe wiseni och wis pokiten chék a pwúpwúlú are ese pwúpwúlú.​—1 Kor. 7:32-35, 38.

9. Met sia tongeni apasa usun pwúpwúlú me lipich?

⁹ Jesus me Paulus rese asukula pwe a lamot án Chón Kraist repwe pwúpwúlú are a lamot ar repwe lipich. Iwe met sia tongeni apasa usun pwúpwúlú me lipich? Iei met The Watchtower minen October 1, 2012 a pélúwen ngeni: “Ren enletin, iir me ruu ekkena mettóch  [pwúpwúlú me lipich] iir liffang seni Kot. . . . Jiowa ese ekieki pwe [án emén lipich] a ássáw are eletipechou.” Ina popun, mi lamot ach sipwe súféliti chienach kewe mi lipich lón ewe mwichefel.

10. Ifa usun sipwe pwári pwe sia súféliti chienach kewe Chón Kraist mi lipich?

¹⁰ Ifa usun sipwe pwári pwe sia súféliti meefien me nónnómun chienach kewe Chón Kraist mi lipich? A lamot ach sipwe chechchemeni pwe ekkóch Chón Kraist mi lipich ra fen filatá ar resap pwúpwúlú. Nge ekkóch, ra mochen pwúpwúlú nge rese kúna ié epwe pélúwéch ngeniir. Nge eli ekkóch a má seniir pwúlúwer. Ese lifilifil ewe popun, nge itá mi fich án chón ewe mwichefel repwe eisiniir ika pwata rese pwúpwúlú are ereniir pwe repwe álisiir le kúttengeniir pwúlúwer? Pwúngún, eli ekkóch repwe tingor ena esin álillis. Nge ika rese tingor, epwe met meefier ren ach ereniir ena? (1 Tes. 4:11; 1 Tim. 5:13) Sipwe nengeni meefien ekkóch chienach kewe Chón Kraist iir mi lipich me tuppwél.

11-12. Ifa usun sia tongeni eletipengawa ekkewe mi lipich?

¹¹ Emén chónemmwen mi wisen sáifetál mi lipich mi fókkun lipwákéch lón wisan, a meefi pwe a wor chómmóng feiéchún lipich. Nge a erá pwe a tongeni eletipengaw atun pwiich kewe mi ekiekin álisi ra eisini: “Pwata ka lipich?” Emén Chón Kraist mwán mi lipich mi angang lón eú keangen ofes a erá: “Fán ekkóch, pwiich kewe ra ámmeef ngeniei pwe ekkewe mi lipich ra mmen attong. Iwe ena mettóch a tongeni efisi ach sipwe ekieki pwe usun itá lipich a eú chourek nge esap fen eú liffang.”

¹² Emén Chón Kraist fefin mi lipich mi angang lón Bethel a erá: “Ekkóch pwiich kewe ra ekieki pwe meinisin ekkewe mi lipich ra kút pwúlúwer, are iteiten atun ra fiti eú kunoufengen, ina alen ar repwe kúnékún pwúlúwer. Fán eú ua sái ngeni pwal eú kinikinin fénúei we fán iten ai angang lón Bethel, nge a sereni pwinin eú mwich. Ewe fefin Chón Kraist mi onómuei, a ereniei pwe a wor rúúemén mwán Chón Kraist táppi lón an we mwichefel. A ereniei pwe esap weween pwe a sótun kúttengeniei pwúlúwei. Nge atun chék aua wareiti ewe Leenien Mwich, a panieiló ren ekkena rúúemén mwán Chón Kraist. Iwe, a mmen ássáw ngenikem me úlúmén.”

13. Met a apéchékkúla emén Chón Kraist fefin mi lipich?

¹³ Pwal iei alon emén fefin mi lipich mi angang lón Bethel: “Ua silei chómmóng pioneer mi lipich mi watte seniei nge ra tipemirit, nefótófót wóón met ra achocho ngeni, tipemecheres le álisi aramas, me ra pwapwa. A watte ar álillis ngeni ewe mwichefel. Ra eáni ekiek mi itepék me rúúepek usun ar lipich, rese kan meefi pwe iir mi tekia pokiten ra lipich, are rese letipengaw pokiten ese wor pwúlúwer me néúr.” Ina popun a mmen apwapwa óm nóm lón eú mwichefel mi aúcheanuk me súfélituk. Kese meefi pwe ka attong are ra lólówóituk, rese éménúngaw sonuk are rese ekieki pwe ka tekia seniir. Ka chék meefi tongom me rer.

14. Ifa usun sipwe pwári pwe sia súféliti ekkewe mi lipich?

¹⁴ Pwiich kewe mi lipich repwe pwapwa ika sia aúcheaniir pokiten napanaper kewe mi múrinné, nge esap pokiten ra lipich. Sipwe fen aúcheani ar tuppwél lap seni ach meefi pwe ra attong. Iwe pwiich kana resap meefi pwe sia ereniir: “Esap wor lomotom ngeniei.” (1 Kor. 12:21) Nge repwe fen silei pwe sia súfélitiir me aúcheaniir pokiten ra nóm lón ewe mwichefel.

15. Ikkefa ekkewe siwil ekkóch ra féri ren ar repwe alapaaló ar angangen afalafal?

¹⁵ Lón ekkewe ier, chómmóng chón afalafal ra achocho le káé eú mineféén fós pwe repwe alapaaló ar angang ngeni Jiowa. Ra siwili nónnómun manawer pwe repwe tongeni féri ena. Pwiich kana ra mwékút seni ewe mwichefel mi eáni pwúkún ar fós pwe repwe álillis lón pwal eú mwichefel mi eáni pwal eú fós mi osupwangen chón afalafal ie. (Föf. 16:9) Ekkena Chón Kraist ra pwisin féri ena kefil pwe repwe alapaaló ar angangen afalafal. Ra fókkun álilliséch ngeni ewe mwichefel inaamwo ika epwe fitu ier me mwen ar repwe silefichi ena mineféén fós. Napanaper kewe mi múrinné me sileer a anúkúchara me apéchékkúla ewe mwichefel. Sia aúcheani pwiich kana mi pennúkúóló pwisin mocheniir!

16. Met ekkewe mwán mi ásimaw repwe alónga kefilin emén mwán mi ásimaw me chónálillisin mwichefel wóón?

¹⁶ Ewe kúmiin mwán mi ásimaw itá resap pinei kefilitáán emén chienach mwán le wiliti emén mwán mi ásimaw are chónálillisin mwichefel pokiten chék ese mwo kon lien sile ewe fós chón ewe mwichefel ra eáni. Nge repwe alónga kefilin emén chienach mwán wóón ekkewe napanap itá mwán mi ásimaw me chónálillisin mwichefel repwe eáni me ren ewe Paipel, nge esap wóón úkúkún angéchún lón ewe fós chón ewe mwichefel ra eáni.​—1 Tim. 3:1-10, 12, 13; Tit. 1:5-9.

17. Ikkefa ekkewe kapas eis ekkóch famili repwe ekieki lupwen ra mwékút ngeni pwal eú fénú?

¹⁷ Ekkóch famili Chón Kraist ra mwékút ngeni pwal eú fénú pwe repwe kút ar angang are ra sú seni pwúkún fénúer pokiten osukosuk. Iwe néúr kewe eli repwe fiti ekkewe sukul mi eáni fósun ena mineféén fénú. Iwe eli a pwal lamot án ekkewe sam me in repwe káé ena mineféén fós ren ar repwe kúnékún ar angang. Nge ifa usun ika a wor eú mwichefel are kúmi lón ena leeni mi eáni pwúkún ar fós? Menni mwichefel itá ewe famili repwe fiti? Itá repwe fiti ewe mwichefel mi eáni fósun ewe mineféén fénú, are ewe mwichefel mi eáni pwúkún ar fós?

18. Me ren Kalatia 6:5, ifa usun sipwe pwári pwe sia súféliti filien mékúren ewe famili?

¹⁸ Ewe mékúren famili epwe filatá menni mwichefel an we famili epwe fiti. Pokiten ena kefil ina filien emén me emén, iwe mi lamot epwe ekieki met epwe fókkun échiti chón an we famili. (Álleani Kalatia 6:5.) Mi lamot ach sipwe súféliti filien ewe mékúren famili. Ese lifilifil met a filatá, nge sipwe súféliti an kefil me etiwer lón ewe mwichefel me tongeer.​—Rom 15:7.

19. Met a lamot ekkewe mékúren famili repwe ekiekifichi me iótek usun?

¹⁹ Ekkóch sam me in fengen me néúr kewe eli ra nóm lón eú mwichefel mi eáni án ekkena  sam me in fós, nge neman néúr kana rese kon lien sile ena fós. Ika ena mwichefel ra fiti, a nóm lón eú fénú mi eáni fósun ena fénú, neman epwe weires ngeni ekkewe nau ar repwe weweiti ekkewe mwich me resap feffeitá lón pekin lúkú. Pwata? Pokiten eli ekkewe nau ra fiti eú sukul mi eáni fósun ena fénú, nge esap ewe fós semer kewe me iner ra eáni. Iwe ika a fis ena, a lamot ekkewe mékúren famili repwe ekiekifichi me tingor án Jiowa tipachem pwe epwe álisiir le filatá met mi lamot repwe féri lón ar álisi néúr kewe le ririéch ngeni Jiowa me néún kewe aramas. Iwe a lamot án ekkewe sam me in repwe álisi néúr kewe ar repwe silefichi ar na fós, are repwe ekieki le mwékút ngeni eú mwichefel mi eáni eú fós néúr kewe ra wesewesen weweiti. Ese lifilifil met ewe mékúren famili a filatá, nge chón ewe mwichefel i a filatá ar repwe fiti, itá repwe ámmeef ngeni i me chón an we famili pwe ra súfélitiir me aúcheaniir.

20. Ifa usun sipwe pwári pwe sia súféliti chienach kewe mi kákkáé eú mineféén fós?

²⁰ Seni met sia fen pwóróus usun, a ffat pwe epwe wor pwiich kewe lón chómmóng mwichefel iir mi fókkun achocho le kákkáé eú mineféén fós. Eli epwe weires ngeniir ar repwe pwáraawu meefier lón ena fós. Nge ika sia túmúnú ach sisap chék nefótófót wóón napanapen ar eáni ena mineféén fós, iwe sipwe kúna ar tongei Jiowa me ar mochen angang ngeni. Ika sia kúna ekkena mettóch mi echipwér, iwe sipwe unusen aúcheani me súféliti pwiich kana. Sisap apasa “Esap wor lomotom ngeniei,” pokiten chék rese kon lien silefichi ach fós.

21-22. Ifa ewe feiéch mi amwarar mi nóm rech?

²¹ Sia fókkun kilisou ngeni Jiowa ren an ewisa ngenikich angang mi aúchea lón an we mwichefel. Ese lifilifil ika kich mwán are fefin, lipich are mi pwúpwúlú, kúkkún are chinnap, are sia angéch lón eú sókkun fós are sise, nge Jiowa a aúcheanikich me sia aúcheanifengennikich.​—Rom 12:4, 5; Kol. 3:10, 11.

²² Amwo sipwe sópweló le apwénúetá ekkewe chómmóng lesen mi amwarar sia fen káé seni án Paulus we kapas áwewe usun kifetin inisin aramas. Iwe, ena mettóch epwe álisikich le silei ifa usun sipwe tongeni apéchékkúla pwiich kewe, aúcheaniir, me súfélitiir fansoun meinisin.