1. Ikkefa ekkewe kapas eis eli sipwe eis atun sia ekieki usun meinisin met ekkewe Jiowa a fen fériiretá?

ATUN sia ekieki usun meinisin minne Jiowa a fen fériiretá, eli sia meefi meefien Tafit, ewe soumakken kélfel lupwen a iótek ngeni Jiowa me erá: “Lupwen üa netä läng förien poum o nengeni ewe maram me ekewe fü ka anomuur lon lenier, met aüchean aramas pwe ka ekieki usun, nge met aüchean nöün aramas pwe ka tümwünü?” (Kölf. 8:3, 4) Eli sia usun Tafit le ekieki usun úkúkún kúkkúnúch ika sa aléllékich ngeni férien Jiowa kewe fúú, me sa mwaar ren án Jiowa áfánnikich. Nge sipwele káé pwe Jiowa a áfánni ekkewe popun aramas Atam me Efa, me a pwal apacherelóng lón an we famili.

2. Met Jiowa a mochen án Atam me Efa repwe féri?

² Atam me Efa iir ákkáeúin néún Jiowa wóón fénúfan. Me Jiowa, i Semer we mi tong lón láng. A mochen pwe ena pean pwúpwúlú repwe chón an we famili mi sópwéch. Kot a ereniir: “Oupwe nöünöü o achomongakemi pwe fanüfan epwe masou remi o nom fän nemeniemi.” (Ken. 1:28) A mochen ar repwe néúnéú me túmúnúéchú ei fénúfan. Ika Atam me Efa ra álleasochis me féri met Kot a ereniir ar repwe féri, ika iei nge iir me mwirimwiriir kewe, iir mi chúen chóni án Kot we famili tori feilfeiló.

3. Pwata sia tongeni erá pwe a wor aúchean Atam me Efa lón án Jiowa we famili?

³ A wor aúchean Atam me Efa lón án Jiowa we famili. Iei met Tafit a apasa usun férien Jiowa kewe aramas lón Kölfel 8:5, NW: “Ka féri i pwe epwe ekis kis seni ekkewe chónláng, me ka ámwárámwára ngeni ling me iteúéch.” Pwúngún, Jiowa ese ngeni aramas ewe manaman, tipachem, me tufich a ngeni  ekkewe chónláng. (Kölf. 103:20) Nge aramas ra chék “ekis kis seni” ekkena chónláng mi manaman. A ifa me amwararen ena! Jiowa a ngeni popunlapach kana eú manaw mi amwarar.

4. Met a fis ngeni Atam me Efa pokiten ar álleasolapa Jiowa, me met sipwe káé lón ei lesen?

 ⁴ A eletipechou pwe Atam me Efa ra álleasolapa Jiowa me rese chúen chóni an we famili. Ena mettóch a atoto watteen osukosuk ngeni mwirimwiriir kewe usun met sipwele káé lón ei lesen. Nge ese siwil minne Jiowa a fen aotaló. A mochen án chókkewe mi álleasochis repwe néún tori feilfeiló. Sipwe akkomw káé ifa usun Jiowa a pwári ngenikich pwe sia aúchea me ren. Mwirin, sipwe káé met sia tongeni féri iei pwe sipwe pwári pwe sia mochen chóni án Kot we famili. Sáingolóón, sipwe ppii ekkewe feiéch néún Jiowa kewe wóón fénúfan repwe kúna tori feilfeiló.

5. Ifa usun sia tongeni pwári ngeni Kot ach kilisou ren an férikichetá pwe sipwe eáni ekkewe napanap i a eáni?

⁵ Jiowa a pwári pwe a aúcheanikich ren an férikichetá pwe sipwe eáni ekkewe napanap a eáni. (Ken. 1:26, 27) Pokiten Kot a férikich pwe sipwe eáni ekkewe napanap a eáni, sia tongeni ámááraatá me pwári chómmóng napanapan kewe mi echipwér, áwewe chék ren tong, úméúméch, tuppwél, me pwúng. (Kölf. 86:15; 145:17) Atun sia ámááraatá ekkena esin napanap, sia elingaaló Jiowa me pwári pwe sia kilisou ngeni. (1 Pet. 1:14-16) Atun sia féri met mi apwapwaai Semach we lón láng, sia pwapwa me menemenéch. Pwal pokiten sia napanapeni ekkewe napanap mi nóm ren Jiowa, sia tongeni wiliti ewe sókkun aramas a mochen fán iten chón an we famili.

6. Ifa usun Jiowa a pwári pwe a aúcheani aramas atun a fératá fénúfan?

⁶ Jiowa a fératá eú leeni mi kkóló aúchean fán itach. Me mwen án Jiowa esaamwo fératá ewe áeménún mwán, a fen ammólnatá ewe fénúfan fán iten aramas. (Hiop 38:4-6; Jer. 10:12) Pokiten Jiowa a kirekiréch me kisáseú, a fératá chómmóng mettóch mi múrinné mi efisi pwapwaach. (Kölf. 104:14, 15, 24) Fán ekkóch, Jiowa a kan awora fansoun le ekieki usun ekkewe mettóch a fen fériiretá, me a “küna pwe a öch meinisin.” (Ken. 1:10, 12, 31) A pwári pwe a aúcheani aramas ren an ewisa ngeniir ar repwe wisen “nemeni” meinisin férian kewe mi amwarar wóón fénúfan. (Kölf. 8:6) Letipen Kot pwe aramas mi unuséch repwe pwapwa lón ar túmúnú férian kana tori feilfeiló. Ka kan kikkilisou ngeni Jiowa ren ena pwon mi amwarar?

7. Ifa usun Josua 24:15, a pwári pwe a wor án aramas tufichin pwisin filatá?

⁷ Jiowa a fen ngenikich ewe tufichin pwisin filatá. Sia tongeni filatá met sipwe féri lón manawach. (Álleani Josua 24:15.) Ach we Kot mi tong a pwapwa atun sia filatá le angang ngeni. (Kölf. 84:11; SalF. 27:11) Sia tongeni áeá ach na tufichin pwisin filatá le eáni chómmóng kefil mi múrinné. Sipwe káé ifa usun Jesus a áeá an we tufichin pwisin filatá.

8. Ifa usun Jesus a áeá an we tufichin pwisin filatá?

⁸ Sia tongeni áppirú Jesus ren ach filatá le akkomwa met mi échiti ekkewe ekkóch lap seni pwisinkich. Lón eú atun, lupwen Jesus me néún kewe aposel ra fókkun pekkus, ra ló ngeni eú leeni mi mosonoson pwe ra ekiekin ar repwe ekis asésé. Iwe nge, rese asésé. Eú pwiin aramas ra kúner me ra fókkun mochen án Jesus epwe asukuler. Nge Jesus ese mángaweitiir, nge a fen tongeer. Iwe, met a féri? “A popuetä le afalafala ngeniir chomong mettoch.” (Mark. 6:30-34) Atun sia  áppirú Jesus ren ach pennúkúóló ach fansoun me péchékkúlach le álisi aramas, sia elingaaló Semach we lón láng. (Mat. 5:14-16) Sia pwal pwári ngeni Jiowa pwe sia mochen chóni an we famili.

9. Ifa ewe liffang mi kkóló aúchean Jiowa a fen ngeni ekkewe sam me in?

⁹ Jiowa a fen ngeni aramas ar tufichin néúnéú me pwal wiser le asukula néúr kewe ar repwe tongei i me angang ngeni. Ika en emén sam are in, ka aúcheani liffangom na mi kkóló aúchean? Ikaamwo Jiowa a fókkun efeiéchú ekkewe chónláng, nge ese fang ngeniir ewe tufichin néúnéú. Ika en emén sam are in, kopwe kilisou ren wisom le túmúnú noum kewe. Jiowa a fen ewisa ngeni ekkewe sam me in eú wis mi aúchea ar repwe túmúnú néúr kewe ‘fän ar fönöör o öüröürer lon ach Samol.’ (Ef. 6:4; Tut. 6:5-7; Kölf. 127:3) Ren án Kot epwe álisi ekkewe sam me in, an we mwicheich a awora chómmóng álillis seni Paipel, áwewe chék ren ekkewe puk, video, kél, me pwóróus wóón ach we website. A ffat pwe Semach we lón láng me Néún we, ra tongei néúch kewe kúkkún me sáráfé. (Luk. 18:15-17) Jiowa a pwapwa atun ekkewe sam me in ra lúkúlúk wóón me achocho úkúkún ar tufich le túmúnú néúr kewe mi aúchea. Me ekkena sókkun sam me in ra álisi néúr kewe le eáni ewe ápilúkúlúkún ar repwe wiliti chón án Jiowa we famili tori feilfeiló!

10-11. Met Jiowa a fen atufichi fán itach ren an awora ewe méén kepich?

¹⁰ Jiowa a fang néún we mi aúchea seni meinisin pwe sipwe tongeni chónisefááli an we famili. Usun met a fen ffat lón  parakraf 4 pwe Atam me Efa me mwirimwir kewe rese chúen chóni án Jiowa we famili. (Rom 5:12) Atam me Efa ra pwisin filatá le álleasolapa Kot, ina popun a fich ngeniir an epwe atorowu seni an we famili. Nge ifa usun ren mwirimwiriir kewe? Fán tong, Jiowa a mwuuti ekkóch lein mwirimwiriir kana mi álleasochis pwe repwe chóni an we famili. A féri ena ren án néún we áláemén Jesus Kraist asor. (Joh. 3:16; Rom 5:19) Pokiten án Jesus we asor, Jiowa a tongeni mwuuti 144,000 aramas mi tuppwél pwe repwe néún.​—Rom 8:15-17; Pwär. 14:1.

¹¹ Pwal och, a wor fite million chókkewe mi tuppwél iir mi álleasochis le féfféri letipen Kot. Ra ápilúkúlúk pwe repwe wiliti chón án Kot we famili mwirin ewe sáingoon sóssót wesilóón ewe Engeréú Ier. (Kölf. 25:14; Rom 8:20, 21) Pokiten ra eáni ena ápilúkúlúk, pwal mwo nge lón ei fansoun ra kér ngeni Jiowa ‘Semer,’ ar we Chón Fératá. (Mat. 6:9) Chókkewe repwe manawsefál, repwe pwal tufichin káé met Jiowa a mochen ar repwe féri. Chókkewe mi filatá le álleasochisi an emmwen repwe pwal wiliti chón an we famili.

12. Ifa ewe kapas eis sipwe pélúweni iei?

¹² Usun met sia fen káé pwe Jiowa a fen féri chómmóng mettóch mi pwári pwe a aúcheani aramas. A fen mwuuti ekkewe mi kepit pwe repwe néún me a fang ngeni chón ewe “mwich mi fokun chocho” ewe ápilúkúlúkún ar repwe wiliti néún lón ewe ótót séfé. (Pwär. 7:9) Met sia tongeni féri iei pwe sipwe pwári ngeni Jiowa pwe sia mochen chóni an we famili tori feilfeiló?

13. Met sia tongeni féri pwe sipwe wiliti chón án Kot we famili? (Markus 12:30)

¹³ Pwári óm tongei Jiowa ren óm akkangang ngeni ren unusen letipom. (Álleani Markus 12:30.) Fán tong, Kot a fang ngenikich chómmóng liffang. Nge eú me lein ekkena liffang mi kon aúchea, ina ach tufichin fel ngeni. Sia pwári pwe sia tongei Jiowa ren ach  “aleasochisi an kewe allük.” (1 Joh. 5:3) Eú me lein ekkena allúk Jiowa a mochen ach sipwe álleasochisi, ina án Jesus we allúk ach sipwe álisi aramas le wiliti néún chón káé mi papatais. (Mat. 28:19) A pwal allúkú ngenikich ach sipwe tongfengen lefilach. (Joh. 13:35) Jiowa a etiwa chókkewe mi álleasochisi an kewe allúk ar repwe chóni an we familien chón fel ngeni wóón unusen fénúfan.​—Kölf. 15:1, 2.

14. Ifa usun sia tongeni pwári pwe sia tongei aramas? (Mateus 9:36-38; Rom 12:10)

¹⁴ Pwári pwe ka tongei aramas. Tong, ina napanapen Jiowa we mi fókkun lap seni meinisin. (1 Joh. 4:8) Jiowa a pwári an tongekich me mwen ach sisaamwo fen sissilei i. (1 Joh. 4:9, 10) Sia áppirú i atun sia pwal pwári ach tongei aramas. (Ef. 5:1) Eú me lein ach pwári pwe sia tongei aramas, ina ren ach ákkálisiir le káé usun Jiowa atun mi chúen suuk ngeniir. (Álleani Mateus 9:36-38.) Atun sia álisiir, ra tongeni káé met a lamot ar repwe féri pwe repwe wiliti chón án Kot we famili. Mwirin án emén papatais, a lamot ach sipwe sópweló le tongei me súféliti. (1 Joh. 4:20, 21) Ifa usun sipwe féri ena? Áwewe chék, sipwe lúkú pwe a wor popun mi múrinné an féri ekkóch mettóch. Iwe, ika sise weweiti popun an féri och mettóch, sisap ekiekingaw ngeni. Nge sipwe fen súféliti chienach na me ekieki pwe a múrinné lap senikich.​—Álleani Rom 12:10; Fil. 2:3.

15. Ié kewe a lamot sipwe úméúméch me kirekiréch ngeniir?

¹⁵ Pwári úméúméch me kirekiréch ngeni aramas meinisin. Ika sia mochen kapachelong lón án Jiowa we famili tori feilfeiló, a lamot ach sipwe apwénúetá alon an we Kapas lón manawach. Áwewe chék, Jesus a áiti ngenikich pwe a lamot ach sipwe úméúméch me kirekiréch ngeni aramas meinisin, pwal mwo nge ngeni chón oputakich. (Luk. 6:32-36) Neman a weires fán ekkóch ach sipwe féri ena. Ika ina, iwe a lamot ach sipwe káé le áppirú Jesus lón an ekiek me féffér. Atun sia achocho úkúkún ach tufich le áppirú Jesus me álleasochisi Semach we lón láng Jiowa, sia pwári ngeni pwe sia mochen chóni an we famili tori feilfeiló.

16. Ifa usun sia tongeni túmúnú itéchún án Jiowa we famili?

¹⁶ Túmúnú itéchún án Jiowa we famili. Lón eú famili, a kan fis pwe ewe kúkkún át a áppirú pwiin we watte. Ika ewe watte a apwénúetá án Paipel kewe kapasen emmwen lón manawan, epwe eú leenien áppirú mi múrinné ngeni pwiin we kúkkún. Ika ewe watte a féri minne mi ngaw, iwe eli ewe kúkkún epwe pwal áppirú. A pwal ina usun ren án Jiowa we famili. Ika emén Chón Kraist mi piin tuppwél a wiliti chón rikiló are féri met mi ngaw, eli ekkóch repwe áppirú me féri met mi ngaw. Chókkewe mi féri ena, ra eitengawa án Jiowa we famili, familien chón fel ngeni. (1 Tes. 4:3-8) A lamot ach sisap áppirú ekkewe leenien áppirú mi ngaw, me sisap mut ngeni ese lifilifil met an epwe atai ach riri ngeni Semach we mi tong lón láng.

17. Ifa ewe sókkun ekiek mi lamot ach sipwe túmúnú senikich, me pwata?

¹⁷ Lúkúlúk wóón Jiowa nge esap mettóchun aion. Jiowa a pwonei pwe epwe awora ngenikich anach, úfach, me imwach, ika sia akkomwa an we Mwú me álleasochisi an kewe allúk mi pwúng. (Kölf. 55:22; Mat. 6:33) Atun sia lúkú ena pwon, sisap ekieki pwe mettóchun aion lón ei fénúfan epwe túmúnúkich me apwapwakich. Sia silei pwe ach féri letipen Jiowa, ina chék met epwe atoto enletin kinamween letipach. (Fil. 4:6, 7) Inaamwo ika sia tufichin mééni chómmóng mettóch, nge a lamot sipwe ekieki ika epwe naf ach fansoun me péchékkúl le áeá me túmúnú ekkena pisek. Itá  epwe tongeni fis pwe sipwe kon aúcheani pisekich kewe? A lamot ach sipwe chemeni pwe Kot a fen ewisa ngenikich angang sipwe féri lón an we famili. Weween pwe a lamot ach sisap mut ngeni och mettóch an epwe orukorukakich. Sise mochen usun ewe alúwél mi pépéén seni an tufichin angang ngeni Jiowa me án Jiowa mwuuti pwe epwe emén néún, pokiten chék a fókkun aúcheani pisekin kewe!—Mark. 10:17-22.

18. Ifa ewe feiéch mi lap seni meinisin, me ikkefa ekkewe feiéch me lúkún ena, aramas mi álleasochis repwe eáni tori feilfeiló?

¹⁸ Aramas mi álleasochis repwe eáni ewe feiéch mi lap seni meinisin, ina ar repwe tottongei me feffel ngeni Jiowa tori feilfeiló! Chókkewe mi eáni ápilúkúlúkún ar repwe manaw wóón fénúfan, repwe pwal pwapwa le túmúnú ei fénúfan mi lingéch Jiowa a fen fératá pwe leenier mi unuséch. Ekiseló chék, ei fénúfan me meinisin mi manaw wóón, repwe séfésefál fán nemenien án Kot we Mwú. Jesus epwe ataweei meinisin ekkewe osukosuk mi fis seni án Atam me Efa filatá le likitaló án Kot we famili. Jiowa epwe amanawatá fite million aramas me epwe suuki ngeniir ewe tufichin manaw esemuch fán inisiir mi unuséch wóón ei fénúfan mi wilingeni eú paratis. (Luk. 23:42, 43) Atun chón án Jiowa we familien chón fel ngeni wóón fénúfan ra ukkunuséchúló, emén me emén epwe pwári ewe “ling me iteúéch” Tafit a makkeei usun.​—Kölf. 8:5, NW.

19. Met a lamot ach sipwe chechchemeni?

¹⁹ Ika en emén chón lón ewe “mwich mi fokun chocho,” iwe ka eáni eú ápilúkúlúk mi amwarar. Kot a tongeok me a mochen óm kopwe chóni an we famili. Iwe, kopwe achocho úkúkún óm tufich le apwapwaai i. Iteiten rán kopwe chemeni me lechúni án Jiowa kewe pwon. Aúcheani feiéchum le feffel ngeni Semach we mi aúchea lón láng, me aúcheani óm we ápilúkúlúkún mwareiti tori feilfeiló!