1-2. Me ren Kölfel 34:8 ifa usun sia tongeni silei usun múrinnéén Jiowa?

ANCHANGEI pwe emén a erenuk óm kopwe sótuni eú mwéngé kese mwo mwémmwéngé fán eú. Ka tongeni silei usun ena mwéngé ren óm nengeni, áfáráfára, eis resepiin, are eisini ekkewe ekkóch ika ra sani. Iwe nge, óm pwisin neni ena mwéngé, ina chék alen óm kopwe silei ika ka sani.

² Sia tongeni silei usun múrinnéén Jiowa ren ach ákkálleani ewe Paipel, me néúch kewe puk me ekkewe álillis seni Paipel, me pwal ren ach rong meefien ekkewe ekkóch ren ifa usun Jiowa a efeiéchúúr. Nge sipwe chék enletin weweiti úkúkún múrinnéén Jiowa, atun sia pwisin “neni” múrinnéén. (Álleani Kölfel 34:8, TF.) Áwewe chék, sia mochen angang ngeni Jiowa full-time, nge ren ach sipwe tikeri ach na mochen, a lamot ach sipwe ámecheresaaló nónnómun manawach. Eli fán chómmóng sia ákkálleani án Jesus we pwon pwe ika sia akkomwa ewe Mwúún Kot lón manawach, Jiowa epwe awora met ekkewe mi wesewesen lamot ngenikich. Nge sise fókkun kúna fán eú án Jiowa féri ena ngenikich. (Mat. 6:33) Nge pokiten sia lúkú án Jesus na pwon, iwe sia ekisikisaaló ach moni towu, ach angangen moni, nge sia nefótófót wóón ach angangen afalafal. Atun sia féri ena, iwe sia pwisin kúna pwe Jiowa a fókkun chúngú met mi lamot ngenikich. Iwe sia pwisin “neni” múrinnéén Jiowa.

3. Usun met Kölfel 16:1, 2 a erá, ié kewe ra feiéch seni múrinnéén Jiowa?

³ Jiowa a “murinno ngeni aramas meinisin,” pwal mwo nge ngeni chókkewe rese sissilei i. (Kölf. 145:9, TF; Mat. 5:45) Nge, Jiowa a ákkáeúin efeiéchú chókkewe iir mi tongei me angang ngeni ren unusen letiper. (Álleani Kölfel 16:1, 2.) Sipwe káé  ekkóch ekkewe mettóch mi múrinné Jiowa a fen féri fán itach.

4. Ifa usun Jiowa a pwári múrinnéén ngeni chókkewe iir mi poputá le chiechi ngeni?

⁴ Iteiten atun sia apwénúetá met sia káé seni Jiowa, sia kúna úkúkún álilliséchún lón manawach. Atun sia káé usun i, me poputá le tongei, a álisikich le okkufu ekkewe ekiek me féffér mi fen atowauakicheló seni i. (Kol. 1:21) Me atun sia fangóló manawach ngeni Jiowa me papatais, a lapóló ach kúna múrinnéén atun a fang ngenikich eú mwelien letip mi múrinné me an panikicheto pwe sipwe chiechi ngeni.​—1 Pet. 3:21.

5. Ifa usun sia pwisin kúna múrinnéén Jiowa lón ewe angangen afalafal?

⁵ Sia kúkkúna múrinnéén Jiowa atun sia fiffiti ewe angangen afalafal. En emén mi nisássáw? Chómmóng néún Jiowa kewe aramas ra nisássáw. Eli me mwen óm wiliti emén néún Jiowa chón angang, kese fókkun anchangei óm fichifich wóón asamen emén kese sissilei me fós ngeni usun ewe Paipel. Nge iei, iteitan ka féfféri ena. Me Jiowa a pwal mwo nge álisuk le pwapwa lón ewe angangen afalafal. Jiowa a pwal álisuk lón ekkóch mettóch. A álisuk óm kopwe chék mosonoson atun emén a arochongaw ngonuk lón ewe angangen afalafal. A pwal álisuk ren an áchema ngonuk eú wokisin ka mochen néúnéú ngeni ewe chón imw. A apéchékkúlok le sópweló le chék akkafalafal inaamwo ika aramas rese mochen aúseling ngonuk.​—Jer. 20:7-9.

6. Ifa usun án Jiowa akkasukulakich a pwári múrinnéén?

⁶ Jiowa a pwal pwári múrinnéén ren an akkasukulakich lón ewe angangen afalafal. (Joh. 6:45) Sia aúseling ngeni ekkewe alen pwóróusfengen lón ach kewe mwich lón weekday, me a pesepes ngenikich ach sipwe áeá lón ach we angangen afalafal. Me mwan, eli sia pireir le sótuni eú mineféén alen pwóróusfengen, nge atun sia féri ena, sipwe kúna pwe a álilliséch lón ach we leenien afalafal. A pwal pesepes ngenikich lón ach kewe mwich me mwichelap, ach sipwe sótuni ekkewe sókkopaten alen afalafal sise mwo piin fiti fán eú. Atun sia féri ena, eli epwe pwal efisi ach pireir nge atun sia sótuni ekkena mettóch, Jiowa epwe efeiéchúkich. Iei sipwele káé ekkóch mettóch mi múrinné Jiowa epwe fang ngenikich atun sia lúkúlúk wóón me atun sia sótuni ekkewe mineféén alen afalafal ren ach sipwe angang ngeni úkúkún ach tufich ese lifilifil nónnómuch. Mwirin, sipwe pwóróus wóón ifa usun sia tongeni tikeri ekkewe mettóch sia mochen achocho ngeniir.

7. Ifa ewe feiéch sipwe kúna ika sia achocho le alapaaló ach angang ngeni Jiowa?

⁷ A lallapóló ach riri ngeni Jiowa. Iei pwóróusen emén mwán mi ásimaw itan Samuel, * iir me pwúlúwan we ra álillis lón Colombia. Ena pean pwúpwúlú ra sani ar pioneer lón pwisin ar we mwichefel, nge ra mochen alapaaló ar angangen afalafal ren ar álillis lón eú mwichefel mi osupwangen chón afalafal ie. Ren ar repwe tikeri met ra mochen, a lamot ar repwe pennúkú ekkóch mettóch. Iei alon Samuel: “Aua apwénúetá Mateus 6:33, me úkútiw le kakkamé met ese lamot. Nge met a kon áweires seni meinisin, ina ám towu seni imwem we pún aua fókkun sani me ese pwal wor ám liwinimmang wóón.” Lón wisen ena pean pwúpwúlú na minefé, ra kúna pwe ese pwal lamot watteen moni ren an epwe atufichiir. Iei alon Samuel: “Aua kúna úkúkún án Jiowa ekkemmwenikem me pélúweni ám  kewe iótek. Aua meefi pwe a pwapwa rem me tongekem lón ekkewe esin napanap ause fókkun kúkkúna me mwan.” Ka pwal tongeni kútta alen óm kopwe alapaaló óm angang ngeni Jiowa? Ika ewer, ka tongeni lúkúlúk pwe epwe lallapóló óm riri ngeni, me i epwe túmúnuk.​—Kölf. 18:25.

8. Met sia tongeni káé seni meefien Ivan me Viktoria?

⁸ Sia pwapwa lón ach angang ngeni Jiowa. Iei alon Ivan me Viktoria eú pean pwúpwúlú mi pioneer lón Kyrgyzstan. Ra ámecheresaaló nónnómun manawer pwe repwe tongeni álillis lón ese lifilifil angang, kapachelong ewe angangen kaúún ekkewe imw sia áeá fán iten Jiowa. Iei alon Ivan: “Aua angang weires lón eú me eú angang mi kewis ngenikem. Inaamwo ika aua pekkus mwirin ám angang, nge aua meefi kinamwe me menemenéch pún aua silei pún aua áeá ám péchékkúl fán iten Jiowa. Aua pwal fókkun pwapwa pokiten a chómmóngóló chiechiem, me ren ekkewe mettóch mi fis lón manawem.”​—Mark. 10:29, 30.

9. Met emén fefin Chón Kraist mi áweires nónnómun a féri pwe epwe alapaaló an angang ngeni Jiowa, me met mwirilóón?

⁹ Sia kúna pwapwa lón ach angang ngeni Jiowa inaamwo ika a áweires nónnómuch. Áwewe chék, ren Mirreh emén chinnap mi má seni pwúlúwan mi nóm West Africa. Mwirin an retire seni an angangen tokter, a poputá le pioneer. Mirreh a weires ren eú samau mi fókkun ámmetek mi áweiresi an epwe fetál. A tongeni chék afalafal eú awa imw me imw. Nge, a tongeni fiti ewe angangen afalafal lein chómmóng aramas ren fitu awa. A wor chómmóng néún return visit me chón káé, iwe a káé ngeni ekkóch me leir wóón phone. Met a amwékútú Mirreh le alapaaló an angang ngeni Jiowa? A erá: “A fókkun lululó ai tongei Jiowa me Kraist Jesus. Fán chómmóng ua kan ikkiótek ngeni Jiowa an epwe álisiei le féri úkúkún ai tufich lón an angang.”​—Mat. 22:36, 37.

10. Me ren Johannes 6:45, met chókkewe mi alapaaló ar angang ngeni Jiowa repwe angei?

¹⁰ Jiowa epwe pwal akkasukulakich. Kenny emén pioneer lón Mauritius, a kúna pwúngún ena. Atun a káé ewe enlet a towu seni university, papatais, me poputá le angang ngeni Jiowa full time. A erá: “Ua achocho le apwénúetá met ewe soufós Aisea a erá: ‘Ngang üa mochen, kopwe tiniei.’” (Ais. 6:8) Kenny a álillis lón fitu angangen kaúún ekkewe imw sia áeá fán iten ach fel ngeni Jiowa, me a pwal álillis lón ewe angangen chiyakúún néúch kewe puk lón pwisin an fós. Iei alon: “Ua káé ekkewe tufich ren ifa usun upwe tongeni apwénúetá wisei kewe.” Nge esap chék ikena met a káé. A erá: “Ua pwal káé ekkewe mettóch mi weires ngeniei, me ekkewe napanap mi lamot ai upwe ámááraatá pwe upwe emén néún Jiowa chón angang mi múrinné.” (Álleani Johannes 6:45.) Pwata kese pwal etittina nónnómum me ppii ika ka tongeni féri ekkóch siwil pwe Jiowa epwe tongeni pwal ákkáituk ekkóch mettóch?

11. Met ekkóch Chón Kraist fefin lón South Korea ra achocho le féri pwe repwe fiti ewe angangen afalafal, me met mwirilóón? (Ppii ewe sasing wóón péén.)

¹¹ Pwal mwo nge chókkewe iir mi fen akkafalafal ren fite ier, a lamot ngeniir káit atun ra sótuni eú mineféén napanapen afalafal. Atun ewe COVID-19 pandemic, ekkewe mwán mi ásimaw lón eú mwichefel lón South Korea ra makkeei: “Ekkóch chókkewe iir mi ekieki pwe rese tongeni fiti ewe angangen afalafal pokiten apwangapwangen inisiir, iei ra fiti afalafal wóón Internet. Úlúmén Chón Kraist fefin lap  seni walik ieriir ra káé néúnéún computer me device, me ra poputá le fiti ewe angangen afalafal arapakkan iteiten rán.” (Kölf. 92:14, 15) Ka pwal mochen alapaaló óm angang me neni múrinnéén Jiowa? Ikkeei ekkóch mettóch ka tongeni féri pwe epwe álisuk le tikeri met ewe ka mochen achocho ngeni.

12. Met Jiowa a pwone ngeni chókkewe iir mi lúkúlúk wóón i?

¹² Káé le lúkúlúk wóón Jiowa. A pwonei pwe epwe efeiéchúkich ren chómmóng mettóch mi múrinné, atun sia lúkúlúk wóón me angang ngeni úkúkún ach tufich. (Mal. 3:10) Emén fefin Chón Kraist itan Fabiola seni Colombia, a pwisin kúna lón manawan ifa usun Jiowa a apwénúetá ena pwon. Mwirin chék an papatais a mochen pioneer. Nge a angang pwe epwe atufichi an we famili. Lupwen a tori ierin an epwele retire, a tingormaú ngeni Jiowa lón iótek an epwe álisi. A erá: “Lape ngeni a kan ttam ach apply ngeni ewe monien retire, nge nei we, a tawe mwirin chék eú maram. Me rei pwe ina eú feiéch seni láng!” Mwirin ruu maram, a poputá le pioneer. Iei, a fen lap seni fiik ierin, me a fen pioneer lap seni rúwe ier. Lón ekkena atun, a fen álisi walimén le feffeitá me papatais. A erá: “Ikaamwo ua apwangapwang fán ekkóch, nge Jiowa a álisiei iteiten rán le chék fiti ai schedule.”

13-14. Ikkefa ekkewe pwóróus ra tongeni álisikich le lúkúlúk wóón Jiowa me alapaaló ach angang ngeni?

¹³ Káé seni pwóróusen chókkewe iir mi lúkúlúk wóón Jiowa. A chómmóng lón ewe Paipel pwóróusen chókkewe iir mi angang  weires ngeni Jiowa. A chómmóng pwóróusen chókkana atun Jiowa a efeiéchúúr mwirin chék ar féri och mettóch mi pwári ar lúkúlúk wóón. Áwewe chék, mwirin án Apraham ló seni imwan we, ina chék atun Jiowa epwap efeiéchú inaamwo ika “esap silei ia epwe feila ie.” (Ipru 11:8) Mwirin án Jakop aúlap ngeni ewe chónláng, ina chék atun epwap angei eú feiéch mi kkóló aúchean. (Ken. 32:24-30) Atun chón ewe mwúún Israel repwele tolong lón ewe fénúen pwon, ra chék tongeni pwereló epek ewe Chénúpupu Jortan mwirin chék án ekkewe souasor ipwelong lón ena chénúpupu mi péchékkúl.​—Jos. 3:14-16.

¹⁴ Ka pwal tongeni káé seni pwóróusen néún Jiowa kewe chón angang lón ei fansoun iir mi lúkúlúk wóón i me alapaaló ar angang ngeni. Áwewe chék, emén mwán Chón Kraist itan Payton me pwúlúwan we Diana ra kan sani le álleani pwóróusen pwiich kewe iir mi alapaaló ar angang ngeni Jiowa, áwewe chék ren chókkewe mi mak pwóróuseer lón ekkewe lesen itelaper, “Ra Fangóló Pwisin Iir Seni Letiper.” * Iei alon Payton: “Atun aua álleani pwóróuseer kana aua meefi pwe usun itá nge aua katol án emén meseikeiti eú anan mwéngé mi anné. Nge atun aua kakkatol meseikan, a lapóló ám mochen ‘neni o nengeni pwe ewe SAMOL mi murinno!’” Ló, ló, ló, Payton me Diana ra mwékút pwe repwe álillis ikewe mi osupwangen chón álillis ie. Ka fen álleani ekkena lesen, me katol ekkewe video Witnessing in Isolated Territory​—Australia, me Witnessing in Isolated Territory​—Ireland wóón jw.org? Ekkena pwóróus ra tongeni álisuk le kútta alen óm kopwe alapaaló óm angang ngeni Jiowa.

15. Ifa usun ach kefiléch chiechiach a tongeni álisikich?

¹⁵ Kefiléch chiechiach. A mecheres ach sipwe mwéngé eú mwéngé sise mwo mwémmwéngé, atun sia mwéngéfengen me ekkóch iir mi sani ena mwéngé. Pwal ina chék usun, ika sia chiechi ngeni chókkewe iir mi akkomwa ar angang ngeni Jiowa lón manawer, sipwe pwal mochen kútta alen ach sipwe alapaaló ach angang ngeni. Ina met a fis ngeni Kent me Veronica. Iei alon Kent: “Chiechiem kewe me chón ám famili ra pesekem ám aupwe sótuni ekkewe sókkopaten angang fán iten Jiowa. Aua mirititi pwe ren ám chiechi ngeni chókkewe iir mi akkomwa ewe Mwú, a alapaaló ám lúkúlúk le sótuni mineféén mettóch.” Iei, Kent me Veronica ra special pioneer lón Serbia.

16. Me ren án Jesus we kapas áwewe lón Lukas 12:16-21, pwata a lamot sipwe tipemecheres le pennúkú ekkóch mettóch?

¹⁶ Pennúkú ekkóch mettóch fán iten Jiowa. Sap weween pwe sipwe fangetááni mettóch meinisin sia sani ren ach sipwe apwapwaai Jiowa. (SalAf. 5:19, 20) Iwe nge, ika sia filatá ach sisap alapaaló ach angang ngeni Kot pokiten chék ach sise mochen fangetááni ekkóch mettóch, iwe sia usun ewe mwán lón án Jesus we kapas áwewe mi angang weires an epwe eáni chómmóng mettóch mi múrinné nge ese pwal ekieki Kot. (Álleani Lukas 12:16-21.) Iei alon emén Chón Kraist mwán itan Christian seni France: “Use ngeni Jiowa me ai we famili unusen ai fansoun me péchékkúl.” Christian me pwúlúwan we ra filatá le pioneer. Nge ren ar repwe tikeri met ra mochen achocho ngeni, a lamot repwe towu seni ar kewe angang. Ren ar repwe atufichiir, ra poputááni eú ar moni tolong ren ar elimelim, me ra káé le chék menemenéch ren ena ekis moni tolong. Itá ra pwapwa ren ar fangetááni  ekkóch mettóch pwe repwe tongeni pioneer? Christian a erá: “Aua sassanaaló ewe angangen afalafal, me aua pwapwa le kúna án néúm kewe chón káé me return visit káé usun Jiowa.”

17. Pwata a tongeni weires ngenikich ach sipwe sótuni eú mineféén napanapen alen afalafal?

¹⁷ Tipemecheres le sótuni ekkewe mineféén napanapen alen afalafal. (Föf. 17:16, 17; 20:20, 21) A lamot án emén pioneer itan Shirley lón Merika epwe siwili napanapen an afalafal atun ewe COVID-19 pandemic. Me mwan, a pireir le sótuni le afalafal wóón phone. Nge mwirin an angei emmwen atun an we circuit visit, a poputá le afalafal wóón phone iteitan. A erá: “Lepoputáán ua niwokkus, nge iei ua fókkun sani. Aua tikeri chómmóng aramas lap seni lón ewe angangen afalafal imw me imw!”

18. Met a tongeni álisikich ika a wor met a áweiresikich le alapaaló ach angangen afalafal?

¹⁸ Isetiw eú mettóch ka mochen achocho ngeni me apwénúetá. Atun sia kúna weires, sia tingor álillis lón iótek, me ekiekiéchú met sia tongeni féri le ataweer. (SalF. 3:21) Sonia emén regular pioneer mi álillis lón eú kúmi mi eáni fósun Romany lón Europe, a erá: “Ua kan sani le makkeetiw lón taropwe met ekkewe ua mochen féri me onómu ikewe ie ua tongeni kúna me ie. A wor eú nei chúnga wóón ai we cheepel, chúngaan ruuofóch al mi aleló ngeni ruu leeni. Atun a kan wor ai kefil ua nengeni ekkena ruuofóch al, me ekieki ika ai we kefil epwe álisiei le tikeri met ewe ua achocho ngeni, are esap.” Sonia a achocho le eáni ekiek mi pwúng usun ekkewe weires a kúkkúna. A erá: “Iteiten a ppiitá eú osukosuk, ua ekieki ika epwe usun eú etiip mi eppetiei le tikeri met ewe ua mochen achocho ngeni, are epwe usun efóch piriis mi álisiei le tikeri.”

19. Met a lamot ach sipwe tipeppós le féri?

¹⁹ Jiowa a efeiéchúkich lón chómmóng mettóch. Sia tongeni pwári úkúkún ach aúcheani ekkena feiéch ren ach achocho le elingaaló Jiowa. (Ipru 13:15) Eli sia tongeni angang ngeni Jiowa lón sókkopaten napanap, iwe epwe lapóló án Jiowa efeiéchúkich. Iteiten rán ousipwe kútta alen ach sipwe “neni o nengeni pwe ewe SAMOL mi murinno!” Mwirin, sipwe usun Jesus ewe mi erá: “Anei mongö ai üpwe aleasochisi letipen ewe mi tiniei o awesala ewe angang a awisa ngeniei pwe üpwe föri.”​—Joh. 4:34.