LESEN 33
Jiowa A Kan Túttúmúnú Néún Aramas
“Ewe Samol mi Lapalap a mamasa chokewe mi niuokusiti.”—KÖLF. 33:18.
KÉL 4 Jiowa Kot I Ai Chón Mmas
MINNE SIPWELE KÁÉ *
1. Pwata Jesus a tingorei Jiowa an epwe túmúnú ekkewe chón tapweló mwirin?
LÓN ewe pwinin me mwen án Jesus epwele máló, a eáni eú tingor mi aúchea ngeni Seman we lón láng. A tingorei Jiowa an epwe túmúnú ekkewe chón tapweló mwirin. (Joh. 17:15, 20) Ewer, Jiowa a kan mammasa me túmúnú néún kewe aramas. Iwe nge, Jesus a silei pwe ekkewe chón tapweló mwirin repwe kúna watteen sóssót seni Satan. Jesus a pwal silei pwe epwe lamot ngeniir án Jiowa álillis ren ar repwe tongeni ú ngeni án ewe Tefil fókkun áweiresiir.
2. Pwata ese wor popun ach sipwe niwokkus atun sia nóm fán weires me ren Kölfel 33:18-20?
2 Ei fénúfan mi nóm fán nemenien Satan, a efisi chómmóng osukosuk ngeni ekkewe Chón Kraist mi enlet lón ei fansoun. A torikich ekkewe weires mi tongeni elichippúngúkich me pwal mwo nge sótuni ach tuppwél ngeni Jiowa. Nge ei lesen epwe áiti ngenikich pwe ese wor popun ach sipwe niwokkus. Jiowa a túttúmúnúkich, a kúna ekkewe weires sia nóm faar me a chék mómmólnetá le álisikich le likiitú faar. Sipwele káé ruu pwóróus lón Paipel mi pwári ifa usun Jiowa a mammasa chókkewe mi niwokkusiti.—Álleani Kölfel 33:18-20.
JIOWA A ÁLISIKICH ATUN SIA MEEFI PWE SIA CHÉK ÁLÁEMÉNÚLÓ
3. Ineet atun sia tongeni meefi pwe sia chék áláeménúló?
3 Inaamwo ika a chómmóng chiechiach kewe lón ewe mwichefel, nge eli fán ekkóch sia meefi pwe sia chék áláeménúló. Áwewe chék, eli ekkewe sáráfé me kúkkún ra meefi pwe ese wor ién a tongeni álisiir atun ra áweweei ar lúkú lón ar kewe sukul, are ese wor ién epwe áfánniir atun ra mwékút ngeni eú mineféén mwichefel. Eli ekkóch me leich sia meefi letipengaw are weires ren ach eáni ekiek ese pwúng me ekieki pwe mi lamot ach sipwe fiu ngeni ach kana memmeef wóón pwisin ach. Eli sia pireir le fós ngeni ekkewe ekkóch usun meefiach pokiten sia lólilen ika resap weweitikich. Fán ekkóch, sia pwal mwo nge ekieki ika mi fen wor ién a chúngúkich. Ese lifilifil popun ach meefi pwe sia chék áláeménúló, nge ena memmeef a tongeni efisi ach ápilúkúngaw me aúrek. Jiowa ese fókkun mochen ach sipwe meefi ena. Pwata sia silei?
4. Pwata ewe soufós Elias a erá: “Ngang echök üa chüen manau”?
4 Áwewe chék, iei pwóróusen ewe mwán mi tuppwél itan Elias. Isipel a erá pwe epwe nieló, ina popun a sú ren úkúkún lap seni 40 rán. (1 King 19:1-9) Iwe atun a op lón eú pokuwo, a sié ngeni Jiowa: “Ngang echök [soufós] üa chüen manau.” (1 King 19:10) A wor pwal ekkóch soufós lón ewe fénú. Áwewe chék, Opataia a seláni 100 soufós seni lepéún Isipel. (1 King 18:7, 13) Nge pwata chék Elias a meefi pwe a chék áláemén? Itá a ekieki pwe ekkewe soufós Opataia a selániir ra fen máló meinisin? Eli a ekieki pwe a áláeménúló pokiten ese wor a fiti le angang ngeni Jiowa mwirin án Jiowa pwári pwe I ewe Kot mi enlet me wóón ewe Chuuk Karmel? Eli a meefi pwe a chék áláeménúló pokiten ese wor emén a silei úkúkún efeiengawen manawan lón ena fansoun, are eli a ekieki pwe ese wor ién a chúngú? Ese tichikitiw meefien Elias lón pwóróusan we. Nge sia lúkú pwe Jiowa a weweiti popun án Elias meefi pwe a chék áláeménúló me a fókkun silei ifa usun epwe álisi.
Atun sia meefi pwe sia chék áláeménúló, ifa ewe lesen mi oururukich sia tongeni káé seni án Jiowa álisi Elias? (Ppii parakraf 5-6)
5. Ifa usun Jiowa a alúkúlúkú ngeni Elias pwe ese áláeménúló?
5 Jiowa a álisi Elias lón chómmóng mettóch. A pesei Elias an epwe kan fóffós. Fán ruu Jiowa a eisini Elias: “Meta ka föri ikei?” (1 King 19:9, 13) Iteitan, Jiowa a kan aúseling atun Elias a ereni meefian. Jiowa a kan pélúweni Elias ren an pwári ngeni pwe I a nóm ren me I a fókkun manaman. A pwal alúkúlúkú ngeni Elias pwe mi pwal chómmóng ekkewe chón Israel iir mi chúen feffel ngeni. (1 King 19:11, 12, 18) Ese wor tipemwaramwar pwe Elias a meefi kinamwe mwirin an iinaawu masouen letipan ngeni Jiowa, me mwirin an rong minne Jiowa a pélúwen ngeni. Jiowa a pwal ewisa ngeni Elias ekkóch wis mi aúchea. A ereni Elias an epwe epiti Hasael pwe epwe kingen Siria, an epwe epiti Jehu pwe epwe kingen Israel, me epiti Elisa pwe epwe soufós. (1 King 19:15, 16) Án Jiowa ewisa ngeni Elias ekkena wis, a álisi an epwe nefótófót wóón ekkewe mettóch mi múrinné. Kot a pwal awora ngeni emén chiechian, ina i Elisa. Iwe, ifa usun Jiowa a tongeni álisuk atun ka meefi pwe ka chék áláeménúló?
6. Met ka tongeni iótek usun atun ka meefi pwe ka chék áláeménúló? (Kölfel 62:8)
6 Jiowa a etiwok óm kopwe iótek ngeni. A kúna ekkewe osukosuk ka nóm faar, me a alúkúlúkú ngonuk pwe epwe aúseling ngeni óm kewe iótek ese lifilifil ineet. (1 Tes. 5:17) A pwapwa le aúseling ngeni án ekkewe chón fel ngeni iótek. (SalF. 15:8) Met ka tongeni ióteki atun ka meefi pwe ka chék áláemén? Iinaawu masouen letipom ngeni Jiowa, usun chék met Elias a féri. (Álleani Kölfel 62:8.) Ereni Jiowa met ekkewe ka eáni aúrek me ifa usun ra áweiresuk. Tingorei an epwe álisuk le silei met kopwe féri atun ka meefi pwe ka chék áláeménúló are atun ka meefi letipengaw. Áwewe chék, ika ka meefi pwe ka chék áláeménúló are ika ka meefi pireir atun chienom kewe chón sukul ra eisinuk usun óm lúkú, kopwe tingorei Jiowa an epwe apworaók pwe kopwe silei met kopwe apasa. Ka pwal mwo nge tongeni tingorei an epwe ngonuk ewe tipachem pwe kopwe tongeni áweweei óm lúkú fán súfél. (Luk. 21:14, 15) Ika ka meefi letipechou are lichippúng, tingorei Jiowa an epwe álisuk le fós ngeni emén Chón Kraist mi ásimaw usun meefiom. Ka pwal tongeni tingorei Jiowa an epwe álisi ena emén kopwe fós ngeni an epwe weweiti meefiom. Ereni Jiowa masouen letipom me ppii ifa usun a pélúweni óm kewe iótek, me etiwa án ekkewe ekkóch álillis. Ika ka féri ena, iwe epwe kisiló óm meefi pwe ka chék áláeménúló.
Ka kan kútta alen óm kopwe fiti pwal ekkewe ekkóch alen afalafal me fiti ekkewe ekkóch lón ena angang? (Ppii parakraf 7)
7. Met ka káé seni pwóróusen Mauricio?
7 Jiowa a ewisa ngenikich meinisin angang mi aúchea. Ka tongeni lúkúlúk pwe a kúna me aúcheani meinisin met ka féri lón wisom lón ewe mwichefel me lón ewe angangen afalafal. (Kölf. 110:3) Ifa usun óm apwénúetáéchú wisom lón ewe angangen afalafal a tongeni álisuk atun ka meefi pwe ka chék áláeménúló? Iei pwóróusen emén alúwél Chón Kraist itan Mauricio. * Ekiseló mwirin an papatais, emén me lein chiechian kewe a poputá le tottowauoló seni ewe enlet. Iei met Mauricio a erá: “Atun ua kúna an likitaló Jiowa, ese chúen wor ai lúkúlúk wóón pwisin ngang. Ua ekieki ika upwe tongeni apwénúetá ai pwon le angang ngeni Jiowa me ika upwe tongeni nónnóm lein chón an we famili. Ua meefi pwe ua chék áláeménúló me ese wor ié a weweiti meefiei.” Met a álisi Mauricio? Iei met a erá: “Ua alapaaló ai fiti ewe angangen afalafal. Ena mettóch a álisiei le úkútiw le ekieki chék pwisin ngang me meefiei. Ua pwapwa pwe a kisikisiló ai meefi pwe ua chék áláeménúló atun ua fiti ekkewe ekkóch lón ewe angangen afalafal. Ewer, inaamwo ika sise tongeni fiti chienach kewe lón ewe angangen afalafal lón féúféún aramas, nge sia péchékkúletá ren ach fitiir le afalafal ren ach mak taropwe me kékké wóón phone.” Met a pwal álisi Mauricio? Iei met a pwal erá: “Ua pwal alapaaló ai álillis lón ewe mwichefel. Ua fókkun achocho úkúkún ai tufich le ammólnatá me eáni ai kewe kinikin lón mwich. Ekkena mettóch ra ámmeef ngeniei pwe a wor aúcheai me ren Jiowa me ekkewe ekkóch.”
JIOWA A ÁLISIKICH ATUN SIA KOKOTIW FÁN WATTEEN WEIRES
8. Met a tongeni fis ngenikich atun sia nóm lón watteen osukosuk?
8 Sia silei pwe epwe torikich osukosuk atun ekkeei ránin lesópwólóón. (2 Tim. 3:1) Eli a tongeni weiweitá fisin eú osukosuk are ámáirú ngenikich. Eli epwe weiweitá ach osukosuken moni, eli néúch we tokter epwe erenikich pwe a úrikich eú semmwen mi chou, are eli a má senikich emén attongeach. Lón ekkena atun, eli sia meefi riáfféú me weires, ákkáeúin ika a chék akkatapw ach kana osukosuk are pwal mwo nge fisippék. Nge kopwe chemeni pwe Jiowa a silei met a fis ngenikich, me epwe álisikich ach sipwe likiitú me lúkúlúk fán ese lifilifil osukosuk sia kúna.
9. Apwóróusa ekkóch ekkewe weires a tori Hiop.
9 Ekieki ifa usun Jiowa a álisi ewe mwán mi tuppwél Hiop. A tori fitu osukosuk mi fókkun áweires me a chék akkatapw. Lón chék eú rán, emén a aronga ngeni pwe a wor a soláái meinisin néún kewe man, are nireló. Me néún kewe chón angang me néún kewe ra máló. (Hiop 1:13-19) Ekiseló mwirin, lepwolen an chúen chúúpwúl, nge a pwal úri eú semmwen mi fókkun ámmetek me anapangawaaló inisin. (Hiop 2:7) A fókkun áweires nónnómun Hiop pwe iei a erá: “Üa anioputa manauei, üsap chüen mochen manau.”—Hiop 7:16.
Jiowa a ereni Hiop úkúkún an chúngú meinisin férian kewe pwe Hiop epwe lúkú pwe I a tongei me epwe túmúnú i (Ppii parakraf 10)
10. Ifa usun Jiowa a awora ngeni Hiop met mi lamot ngeni ren an epwe likiitú fán an kewe weires? (Ppii ewe sasing wóón péén.)
10 Jiowa a túttúmúnú Hiop. Pokiten Jiowa a tongei Hiop, iwe a awora ngeni met mi lamot pwe epwe tongeni likiitú fán an kewe weires, me chék tuttuppwél ngeni. Jiowa a fós ngeni Hiop me áchema ngeni usun an tipachem ese wor kaúkún, me usun an túmúnú férian kewe fán tong. A fós usun chómmóng man mi amwarar. (Hiop 38:1, 2; 39:9, 13, 19, 27; 40:15; 41:1, 2) Jiowa a pwal néúnéú emén alúwél mi tuppwél itan Elihu an epwe apéchékkúla me oururu Hiop. Elihu a alúkúlúkú ngeni pwe Jiowa a kan efeiéchú chókkewe mi fel ngeni pokiten ar likiitú. Jiowa a pwal amwékútú Elihu an epwe éúréúra Hiop fán tong. A álisi Hiop le úkútiw le kon ekieki pwisin i ren an áchema ngeni úkúkún kisikisin aramas me lúkún Jiowa, ewe Chón Fératá láng me fénúfan. (Hiop 37:14) Jiowa a pwal ereni Hiop an epwe féri och mettóch. A ereni an epwe ióteki chienan kewe úlúmén mi tipis. (Hiop 42:8-10) Ifa usun Jiowa a álisikich lón ei fansoun atun sia nóm fán watteen weires?
11. Ifa usun ewe Paipel a álisikich atun sia nóm fán weires?
11 Jiowa ese fós ngenikich usun chék an fós ngeni Hiop, nge a fós ngenikich me ren an we Kapas, ewe Paipel. (Rom 15:4) A oururukich ren an fang ngenikich ewe ápilúkúlúk fán iten mwachkkan. Ikkeei ekkóch ekkewe wokisin lón Paipel mi tongeni oururukich atun sia nóm fán weires. Jiowa a alúkúlúkúkich me lón an we Kapas pwe ese wor och mettóch, kapachelong ekkewe sóssót mi fókkun áweires “epwe tongeni aimwüfesenikich seni [an] we chen.” (Rom 8:38, 39) A pwal alúkúlúkú ngenikich pwe “a arap ngeni ir meinisin mi köri” lón iótek. (Kölf. 145:18) Jiowa a erenikich pwe ika sia lúkúlúk wóón i, iwe sia tongeni likiitú fán ese lifilifil weires sipwe kúna, me sipwe pwal pwapwa inaamwo ika sia nóm lón riáfféú. (1 Kor. 10:13; Jas. 1:2, 12) Án Kot we Kapas a pwal áchema ngenikich pwe ach kewe weires ra chék temporary me ra chék mwoch ika sipwe aléllé ngeni ekkewe feiéch Jiowa epwe fang ngenikich tori feilfeiló chék. (2 Kor. 4:16-18) Jiowa a ngenikich eú ápilúkúlúk mi núkúchar pwe epwe nieló chókkewe mi efisi meinisin ach kewe weires, ina i Satan ewe Tefil me chókkewe mi ngaw usun chék i. (Kölf. 37:10) Ka fen amwéchúlúkú ekkóch ekkewe wokisin epwe oururuk me álisuk le likiitú fán ekkewe sóssót kopwe kúna lón fansoun mwach?
12. Met Jiowa a mochen ach sipwe féri ika sia mochen unusen feiéch seni an we Kapas?
12 Jiowa a mochen ach sipwe awora fansoun le kákkáé an we Kapas ewe Paipel iteitan me ekilonei met sia álleani. Atun sia apwénúetá met sia káé, epwe lapóló ach lúkú me sipwe ririéch ngeni Semach na lón láng. Mwirilóón, sipwe péchékkúl le likiitú fán ach kewe sóssót. Jiowa a pwal fang an we ngún mi fel ngeni chókkewe mi lúkúlúk wóón an we Kapas. Me an na ngún mi fel a tongeni fang ngenikich ewe “tufich mi somwola” pwe sipwe likiitú fán ese lifilifil weires sia kúna.—2 Kor. 4:7-10.
13. Ifa usun ekkewe mwéngé lón pekin ngún “ewe chon angang mi allükülük o tipachem” a awora, a álisikich le likiitú fán ach kewe weires?
13 Ren án Jiowa álillis, “ewe chon angang mi allükülük o tipachem” a awora chómmóng lesen, video, kél, me nikáttik epwe tongeni álisikich le apéchékkúlaló ach lúkú me akkamwéchú ach ririéch ngeni Jiowa. (Mat. 24:45) A lamot ach sipwe alamota meinisin ekkena mettóch Jiowa a awora ngenikich. Kukkuto chék, emén Chón Kraist fefin seni Merika a erá pwe a fókkun aúcheani meinisin ekkewe mwéngé lón pekin ngún. A apasa: “Lón ekkewe 40 ier ua akkangang ngeni Jiowa lón, fán chómmóng ua kúna sóssótun ai tuppwél ngeni.” Ena Chón Kraist fefin a nóm fán watteen weires. Emén chón sakaw mi ssá wóón waan we a purei seman we chinnap, me a máló. A úri seman kewe me inan eú semmwen mi alólilen, me ra máló. Me a pwal pwisin úri kanser fán ruu. Met a álisi le likiitú? Iei met a erá: “Jiowa a kan chék túttúmúnúei. Ekkewe mwéngé lón pekin ngún a awora me ren ewe chón angang mi alúkúlúk o tipachem, a álisiei le likiitú. Pokiten ena, ua meefieni meefien Hiop ei, ewe mi erá: ‘Tori ai máló, usap fangetá ai tuppwél.’”—Hiop 27:5, NW.
Ifa usun sia tongeni álisi ekkewe ekkóch lón ewe mwichefel? (Ppii parakraf 14)
14. Ifa usun Jiowa a néúnéú chienach kewe lón ewe mwichefel le álisikich atun fansoun weires? (1 Tesalonika 4:9)
14 Jiowa a fen ákkáiti néún kewe aramas ar repwe tongefengeniir me oururufengeniir atun fansoun weires. (2 Kor. 1:3, 4; álleani 1 Tesalonika 4:9.) Chienach kewe Chón Kraist ra áppirú Elihu ren ar fókkun mochen álisikich le akkamwéchú ach tuppwél atun a torikich weires. (Föf. 14:22) Áwewe chék ren ifa usun chón án Diane we mwichefel ra apéchékkúla me álisi le sópweló le ririéch ngeni Jiowa mwirin an úri pwúlúwan we eú watteen semmwen. Diane a apasa: “A weires, nge aua meefi án Jiowa fókkun álisikem fán tong lón ekkewe fitu maram mi fókkun áweires. Chón ám we mwichefel ra álisikem lón chómmóng mettóch. Ar áámwakem, kérikem wóón phone, me foropachekem, ina met a álisikem le likiitú. Pokiten use kan drive, iwe chienem kewe lón ewe mwichefel ra nochchei ai upwe tour ngeni ekkewe mwich me fiti ewe angangen afalafal atun ua tufich ngeni.” A ifa me feiéchúch ren ach chóni ei esin famili lón pekin ngún mi eáni tong!
SIA KILISOU REN ÁN JIOWA TÚMÚN MI FITI TONG
15. Pwata sia lúkúlúk pwe sia tongeni likiitú fán ach weires?
15 Kich meinisin sipwe kúna eú sókkun weires. Iwe nge, usun met sia fen káé, pwe a wor ié epwe álisikich. Jiowa a usun emén sam mi tong, fansoun meinisin a kan mammasakich me túmúnúkich. A nónnóm rech me mmólnetá le aúseling ach sién álillis me a fókkun mochen álisikich. (Ais. 43:2) Sia lúkúlúk pwe sia tongeni likiitú fán ach weires pokiten i a kisáseú le awora ngenikich mettóch meinisin met mi lamot pwe sipwe likiitú. A fang ngenikich ewe mettóch iótek, ewe Paipel, chómmóng mwéngé lón pekin lúkú, me ach mwicheichen pwipwi ren an epwe álisikich lón fansoun weires.
16. Ifa usun sia tongeni chék nónnóm fán án Jiowa túmún fán tong?
16 Sia fókkun kilisou ren án Semach we lón láng túmúnúkich. “Lelukach a pwapwa ren Kot.” (Kölf. 33:21) Sia tongeni pwári ngeni Jiowa pwe sia aúcheani an túmún fán tong ren ach alamota meinisin met ekkewe a awora pwe epwe álisikich. A pwal lamot ach sipwe féri wisach le nónnóm chék fán án Kot túmún. Weween, ika sia sópweló le achocho úkúkún ach tufich le álleasochisi Jiowa me féri met mi pwúng mwen mesan, iwe i epwe mammasakich me túmúnúkich tori feilfeiló.—1 Pet. 3:12.
KÉL 30 Semei, Ai Kot me Chienei
^ A lamot ngenikich án Jiowa álillis ren ach sipwe likiitú fán ekkewe osukosuk sia kúkkúna lón ei fansoun. Ei lesen epwe alúkúlúkú ngenikich pwe Jiowa a mammasa néún kewe aramas. A silei ekkewe weires mi tori emén me emén kich, me a awora met mi lamot ngenikich pwe sipwe tongeni likiitú faar.
^ Ekkóch ekkeei it ra siwil.