1. Ifa usun ach fóffós usun ach wiliti emén Chón Pwáraatá Jiowa, a álilliséch ngenikich?

 “IFA USUN ka wiliti emén Chón Pwáraatá Jiowa?” Ese mwáál, ka pélúweni ena kapas eis fán chómmóng. Ina eú me lein ekkewe kapas eis sia kan akkomw eisini emén Chón Kraist atun sia mochen sissilei. Sia pwapwa le rong ifa usun chienach kewe Chón Kraist ra sissileeló Jiowa me tongei i, me sia pwapwa le ereniir pwata sia fókkun aúcheani ewe enlet. (Rom 1:11) Minne sia pwóróusfengen wóón, a áchema ngenikich úkúkún aúchean ewe enlet me rech. A pwal lapóló ach úppós le “manaueni ewe manauen let,” weween, ach sópweló le ákkeáni ewe esin manaw epwe atoto ngenikich án Jiowa feiéch me an chen.​—3 Joh. 4.

2. Met sipwele káé lón ei lesen?

² Lón ei lesen, sipwele enniwili ekkóch ekkewe popun sia aúcheani ewe enlet. Mwirin, sipwe káé ifa usun sia tongeni sópweló le aúcheani ena liffang mi aúchea. Ese mwáál, ach káé ei pwóróus epwe alapaaló ach kilisou ngeni Jiowa ren an panikicheto ngeni ewe enlet. (Joh. 6:44) Epwe pwal alapaaló ach mochen álisi aramas le silei ewe enlet.

3. Ifa ewe ákkáeúin popun sia aúcheani ewe enlet?

³ A wor chómmóng popun sia aúcheani ewe enlet. Nge ach tongei Jiowa, Populapen ewe enlet, ina ewe ákkáeúin popun sia aúcheani ewe enlet. Sia káé seni an we Kapas, ewe Paipel, pwe i ewe Chón Fératá láng me fénúfan mi unusen manaman, me sia pwal káé pwe i Semach we mi tong, mi enletin chúngúkich. (1 Pet. 5:7) Sia silei pwe ach na Kot a ‘ümöümöch me kirikiröch,  songomang, pwal wöün tong me allükülük.’ (Eks. 34:6) Jiowa a aúcheani pwúng. (Ais. 61:8) A letipengaw atun a kúna ach nóm lón riáfféú, me a mwétéresiti ewe atun epwe aúkatiw riáfféú meinisin. (Jer. 29:11) Sia pwal mwétéresiti ena fansoun mi amwarar! Iei eú me lein ekkewe chómmóngun popun pwata sia fókkun tongei Jiowa!

4-5. Pwata aposel Paulus a aléllééi ach ápilúkúlúk ngeni efóch angké?

⁴ Ifa pwal eú popun sia aúcheani ewe enlet? Ewe enlet a atoto ngenikich feiéch mi kkóló aúchean. Áwewe chék, ach we ápilúkúlúk fán iten mwachkkan, a kapachelong lein ekkewe pwóróus mi enlet lón Paipel. Ren ach sipwe weweiti aúchean ach na ápilúkúlúk, iei met aposel Paulus a makkeei: “Sia eäni ei apilükülüköch usun eu angkö mi allükülük o nüküchar fän iten manauach.” (Ipru 6:19) Ach na ápilúkúlúk mi lóngólóng wóón Paipel a tongeni anúkúcharakich atun a torikich sóssót, usun chék án efóch angké anúkúchara efóch mwoota.

⁵ Atun Paulus a makkeei ekkena pwóróus, i a fósun ewe ápilúkúlúkún manaw lón láng ekkewe Chón Kraist mi kepit ra aúcheani. Nge minne a apasa, a pwal weneiti ekkewe Chón Kraist mi mwétéresiti ar repwe manawffóch lón paratis wóón fénúfan. (Joh. 3:16) Ewer, ach káé usun ewe ápilúkúlúkún manaw esemuch a tongeni ámmeef ngenikich aúchean manawach.

6-7. Met sókkun álillis Yvonne a kúna seni an káé ewe enlet usun mwachkkan?

⁶ Iei pwóróusen emén Chón Kraist itan Yvonne. I ese mámmááritá lón ewe enlet, nge lekúkkúnún a niwokkus ika epwe máló. A chemeni an kúna eú itiitin kapas mi erá pwe eú ekkeei rán sisap silei ika sipwe manaw ngeni lesor, me ese tongeni ménúk seni. A erá: “Ekkena kapas ra efisi ai upwele chék nenneló lepwin me ekkekieki usun mwachkkan. Ua ekieki: ‘Itá manawach esap chék iei usun. Pwata ua manaw wóón ei fénúfan?’ Use fókkun mochen máló!”

⁷ Mwirin och fansoun, atun Yvonne a fépwúl a sereni ekkóch Chón Pwáraatá Jiowa. A erá: “Ua poputá le lúkú pwe ua tongeni eáni ewe ápilúkúlúkún manaw esemuch lón Paratis wóón fénúfan.” Ifa usun án Yvonne káé ewe enlet a álisi? A pwal erá: “Iei, use chúen nenneló lepwin me aúreki usun mwachkkan are aúreki máló.” A ffat ngenikich pwe Yvonne a aúcheani ewe enlet, me a fókkun pwapwa le apwóróusa ngeni ekkewe ekkóch usun an na ápilúkúlúk lón mwachkkan.​—1 Tim. 4:16.

8-9. (a) Ifa usun ewe mwán lón án Jesus we kapas áwewe, a pwári an aúcheani ewe pisek aúchea a kúna? (b) Ifa úkúkún aúchean ewe enlet me reom?

⁸ Ewe kapas allim usun án Kot we Mwú, a pwal kapachelong lein ekkewe pwóróus mi enlet lón Paipel. Jesus a aléllééi ewe enlet usun ena Mwú ngeni och pisek aúchea mi ireireló. Lón Mateus 13:44, Jesus a apasa: “Ewe Mwün Läng a pwal wewe ngeni eu pisek aüchea mi ireirela. A fis pwe eman aramas a küna o iresefäliela. Iwe, seni watten an pwapwa a feila o amömöla meinisin mine a eäni, mürin a liwinsefälila o möni ewe leni.” Ena mwán lón na kapas áwewe, saminne e kútta ena pisek mi aúchea. Nge atun a kúna, a pennúkúóló chómmóng mettóch pwe epwe tongeni angei. Ren enletin, a améméló mettóch meinisin a eáni. Pwata? Pún a silei úkúkún watteen aúchean ena pisek mi aúchea. A fókkun aúchea lap seni ekkewe mettóch a pennúkúóló.

⁹ A pwal ina esin meefiom ren ewe enlet? Fókkun ewer! Sia silei pwe ese fókkun  wor och mettóch wóón ei fénúfan mi tongeni léllé ngeni ewe pwapwa sia meefi iei seni ach angang ngeni Jiowa, me ach tufichin eáni ewe ápilúkúlúkún manaw esemuch lón mwachkkan fán nemenien ewe Mwúún Kot. Ach tufichin chiechiéch ngeni Jiowa, a aúchea lap seni ese lifilifil met sia pennúkúóló. Ach “föri mine [Jiowa] epwe pwapwa ren,” ina met a atoto ngenikich enletin pwapwa.​—Kol. 1:10.

10-11. Met a amwékútú Michael le ekkesiwili manawan?

¹⁰ Chómmóng me leich sia pennúkúóló chómmóng mettóch pwe sipwe tongeni apwapwaai Jiowa. Ekkóch ra likitaló ar angang mi watte peioffun lón ei ótót. Ekkóch ra úkútiw seni ar achocho ngeni ar repwe wéúéchúló. Nge ekkóch, ra unusen ekkesiwili manawer atun ra káé usun Jiowa. Ina met Michael a féri. I ese mámmááritá lón ewe enlet. Lealúwélún, a fiti sukulen karate. Iei met a erá: “Ua fókkun aúcheani án inisi epwe chék péppéchékkúl. Fán ekkóch, ua meefi pwe ese wor ié a tongeni okkufuei.” Nge atun Michael a poputá le káé Paipel, a silei meefien Jiowa usun féfférún akkachofesá. (Kölf. 11:5) Iei met Michael a erá usun ewe pean pwúpwúlú mi káé ngeni: “Esap fán eú ar ereniei pwe a lamot ai upwe úkútiw le káé karate. Ra chék sópweló le ákkáiti ngeniei ewe enlet seni Paipel.”

¹¹ Án Michael alapaaló an silei Jiowa, a pwal ina lapólóón an tongei i. A fókkun chúng letipen Michael ren úkúkún watteen án Jiowa úméúméch ngeni néún chón angang. Mwirin och fansoun, a mirititi pwe a lamot an epwe féri watteen ekkesiwil lón manawan. A erá: “Ua silei pwe epwe fókkun áweires ngeniei ai upwe úkútiw le fiti karate.” A pwal erá: “Nge, ua pwal silei pwe Jiowa epwe pwapwa ren ai na kefil, me ua fókkun lúkú pwe aúchean met ekkewe ua pennúkúróló, rese akkarap ngeni aúchean ai filatá le angang ngeni.” Michael a fókkun aúcheani ewe enlet a kúna, me ina met a amwékútú le féri eú watteen siwil lón manawan.​—Jas. 1:25.

12-13. Ifa usun ewe enlet lón ewe Paipel a álisi Mayli?

¹² Ewe Paipel a pwári úkúkún aúchean ewe enlet. A aléllééi ewe enlet ngeni eú lamp mi asarama kiroch. (Kölf. 119:105; Ef. 5:8) Mayli, seni Azerbaijan, a enletin kilisou ren ewe álillis a angei seni án Kot we Kapas. A sókkofesen án seman kewe me inan lamalam. Seman we a fiti ewe lamalamen Muslim, nge inan we a fiti ewe lamalamen chón Jus. A erá: “Use tipemwaramwar ika mei wor Kot, nge a wor chómmóng ai kapas eis. Ua kan ekieki, ‘Pwata Kot a féri aramas, me pwata emén epwe riáfféú lón ánein manawan, iwe mwirin riáfféúfóchofóch lón ekkein ell?’ Pokiten aramas ra erá pwe mettóch meinisin, ina letipen Kot, iwe ua ekieki, ‘Kot a kan nemeni aramas, me pwapwa le kakkatol ar kúna riáfféú?’”

¹³ Mayli a sópweló le kútta pélúwen an kana kapas eis. Mwirin och fansoun, a káé Paipel me wiliti emén Chón Pwáraatá Jiowa. A erá: “Weweéchún masouen ewe Paipel a álisiei ai upwe wiliti emén mi pwapwa.” A pwal erá: “Ekkewe pwóróus mi fataffatéch lón ewe Paipel, ra atoto ngeniei enletin kinamwe.” Oukich meinisin sia usun Mayli le mwareiti Jiowa, ‘ewe mi körikichewu seni rochopwak, pwe sipwe tolong lon an saram mi amwarar.’​—1 Pet. 2:9.

14. Ifa usun sia tongeni alapaaló ach aúcheani ewe enlet? (Ppii ewe pwóór “ Pwal Ekkóch Mettóch ewe Enlet lón Paipel A Tongeni Léllé Ngeni.”)

¹⁴ Ikkeei chék ekkóch me lein ekkewe pwóróus mi pwári aúchean ewe enlet. Ese mwáál, ka tongeni ekieki pwal ekkóch. Pwata kese féri eú kókkótun káé óm kopwe kútta pwal  ekkóch popun pwata sia aúcheani ewe enlet? Ika a lapóló ach aúcheani ewe enlet, epwe pwal lapóló ach kúna ifa usun sipwe pwári pwe sia aúcheani.

15. Ifa eú alen ach sipwe tongeni pwári pwe sia aúcheani ewe enlet?

¹⁵ Sia tongeni pwári ach aúcheani ewe enlet ren ach kákkáé ewe Paipel me ekkewe pwal ekkóch minen álillis mi lóngólóng wóón Paipel. Ren enletin, ese lifilifil ttamen ach sia fen emén Chón Pwáraatá Jiowa, nge a chúen wor chómmóng met sipwe káé. Ewe áeúin Watch Tower a erá: “A chómmóng pwóróus mi chofona lón ei ótót, iwe a weires ach sipwe esilla pwóróus mi enlet. Ren óm kopwe esilla menni pwóróus mi enlet, a lamot óm kopwe túmúnúéch. . . . Ika ka mochen silei ewe enlet, iwe kopwe fókkun achocho le kúttafichi. Kosap chék menemenéch ren ekis pwóróus mi enlet. . . . Kopwe fen tinikken le kúkkútta pwal chómmóng pwóróus mi enlet lón Paipel.” Káé, a weires, nge a atoto ngenikich chómmóng feiéch.

16. Met sókkun kókkótun káé ka kúna pwe a álilliséch ngonuk? (Än Salomon Fos 2:4-6)

¹⁶ Esap kich meinisin sia kan sani le állea me  káé. Nge Jiowa a etiwakich ach sipwe kan achocho le “kütta” ekkewe pwóróus mi enlet pwe epwe tongeni lapóló ach weweéchútiir. (Álleani Än Salomon Fos 2:4-6.) Sipwe feiéch iteitan atun sia fókkun achocho le féri ena. Corey a apasa pwe atun a kan állea Paipel, a nefótófót wóón eú me eú wokisin. A erá: “Ua kan álleani meinisin ekkewe footnote, katol ekkewe wokisin mi riri ngeni eú me eú wokisin, me ua pwal research. . . . Ua fókkun kúna álilliséchún ei esin kókkótun káé!” Ese lifilifil ika sia eáni ei esin kókkótun káé are pwal och sókkun, nge sia pwári ach aúcheani ewe enlet atun sia awora fansoun me fókkun achocho le káé.​—Kölf. 1:1-3.

17. Met weween ach manaweni ewe manawen let? (James 1:25)

¹⁷ Ewer, sia silei pwe ese naf ach sipwe chék káé ekkewe pwóróus mi enlet lón Paipel. Ren ach sipwe unusen feiéch seni, a lamot ach sipwe manaweni ewe manawen let, weween, sipwe apwénúetá met sia káé lón manawach. Ika sia féri ena, iwe ewe enlet epwe atoto ngenikich enletin pwapwa. (Álleani James 1:25.) Met sipwe féri pwe sipwe silei ika sia manaweni ewe manawen let? Emén Chón Kraist mwán a pese ngenikich ach sipwe etittina manawach me ppii ika sia apwénúetá met sia káé, me met a pwal lamot ach sipwe achocho ngeni. Iei met ewe aposel Paulus a erá: “Ousipwe chök fefetal ngeni mwach lon pwüngün ekewe allük sia fen aleasochisi tori iei.”​—Fil. 3:16.

18. Pwata sipwe fókkun achocho le “manaueni ewe manauen let”?

¹⁸ Ekieki úkúkún watteen feiéchúch ren ach “manaueni ewe manauen let”! Ese chék émúrinnéló pwisin manawach, nge a pwal apwapwaai Jiowa me chienach kewe Chón Kraist. (SalF. 27:11; 3 Joh. 4) Ikkena ekkewe popun mi fókkun aúchea ach sipwe aúcheani ewe enlet me apwénúetá lón manawach!