Lón ena lesen, sia káé pwe a wor eú chék mettóch mi kkóló aúchean mi weneiti aramas meinisin me chónláng. Ina pinilóón iten Jiowa we mi lap. Ese lifilifil iká napanapen án Jiowa nemenem a kon múrinné seni meinisin, are ese, nge a riri ngeni pinilóón itan we. Pwal ina chék ussun, ese lifilifil iká emén a akkamwéchú pwúngún enletin an túppwél ngeni Kot, are ese, nge a pwal riri ngeni pinilóón iten Jiowa we.

Pwata sia menlapei iei pwe ewe mettóch mi kon aúchea, ina iten Jiowa we me pinilóón? Sipwe ppii úlúngát popun.

Áeúin, lón ewe tánipiin Eten Setan a eitengawa iten Jiowa we. Ewe kapas eis Setan a eisini If, ussun itá Jiowa i emén Kot mi máicha me ekkewe kapasen emmwen a ereni Atam me If rese pwúng. Mwirin Setan a ú ngeni minne Jiowa a apasa, a apasa pwe Kot mi kapas chofona. Iwe, a pweni iten Jiowa. A wiliiti “ewe Tefil,” weween “chón pweni.” (Joh. 8:44) Pokiten If a lúkú án Setan kapas chofona, iwe a álleasolapa Kot, a pwáári pwe ese mochen án Kot epwe an Sounemenem. (Ken. 3:1-6) Tori lón ei fansoun, Setan a sópweeló le pweni iten Kot, me achéúfetálei kapas chofona ussun Jiowa. Chókkewe mi lúkú ekkena esin kapas chofona, eli repwe álleasolapa Jiowa. Ina minne, me ren néún Kot kewe aramas, ena kapasen pweni iten Jiowa we mi pin, ina och mettóch mi fókkun ngaw. Ina populapen an a fis meinisin riáfféú me minne mi ngaw wóón ei fénúfan.

Oruuan, ren án Jiowa epwe álisi meinisin aramas me ekkewe chónláng, I a tipeppós an epwe eitéchú itan we, epwe amóeló meinisin itengaw mi weneiti. Ina ewe mi fókkun aúchea me ren Jiowa. Ina minne, a apasa: “Üpwe aüöchüsefäli pinin itei mi tekia.” (Is. 36:23) Jises a pwal affataéchú met ewe epwe kon lamot lón án meinisin néún Jiowa chón angang mi túppwél iótek atun a apasa: “Itom epwe pin.” (Mat. 6:9) Ewe Paipel a kan menlapei lamoten ach sipwe elingaaló iten Jiowa we. Ikkeei ekkóch me leir: “Oupwe mwareiti lingen iten ewe Samol mi Lapalap.” (1 Kron. 16:29; Kölf. 96:8) “Oupwe kölü lingen itan.” (Kölf. 66:2) “Üpwe alinga itom tori feilfeilachök.” (Kölf. 86:12) Lón eú atun Jiowa a pwisin fósetiw seni láng, ina a fis me lón ewe imwenfel Jerusalem, ikewe Jises a apasa: “Semei, kopwe alinga itom!” Iwe, Jiowa a apasa: “Üa fen alinga itei, nge üpwe pwal alingasefäli.”—Joh. 12:28. a

Aúlúngátin, minne Jiowa a tipeni seni lepoputáán a riri ngeni itan we. Ekieki lamoten iten Jiowa we mwirin fisin ewe sáingoon sóssót mwirin án Kraist Nemenem Úkúúkún Engeréú Ier. Epwe met meefien meinisin chónláng me aramas lón ena fansoun ussun pinilóón iten Jiowa we? Ren ach sipwe silei pélúwen ena kapas eis, sipwe áchemasefáli ruu mettóch mi riri ngeni, ina án aramas pwúngún enletin túppwél me án Jiowa  pwúúng le nemeni láng me fénúfan. Lón ena atun esap chúen lamot án aramas repwe sópweeló le ánneta ar túppwél. Repwele unuséch me ra unusen pwáári ar túppwél. Repwele eáni ewe manaw esemuch. Pwal och, ese chúen lamot an epwe leteló pwe án Jiowa pwúúng le nemenem ina ewe mi kon múrinné seni nemenem meinisin. Lón ena atun, meinisin mi nóm lón láng me meinisin mi nóm wóón fénúfan repwe tipeeú me etiwa án Jiowa pwúúng le nemenem. Iwe nge, lón ena atun itá iten Jiowa we epwe chúen aúchea seni meinisin me ren néún kewe aramas?

Lón ena atun, meinisin repwele silei ewe enlet ussun Jiowa, me itan we epwele unusen piniló. Iwe nge, itan we epwe chúen aúchea seni meinisin me ren néún kewe chón angang meinisin lón láng me wóón fénúfan. Pwata? Pún repwe kúna pwe Jiowa epwe sópweeló le féri ekkewe mettóch mi amwarar. Ekieki ei: Pokiten fán tipetekison Jises epwe enniwilisefáli ngeni Jiowa meinisin nemenem, iwe “Kot epwe unusen nemeni mettoch meinisin.” (1 Kor. 15:28) Mwirin ena, aramas wóón fénúfan “repwe eáni eú manaw mi ngas.” (Rom 8:21, NW) Iwe, Jiowa epwe apwénúetá minne a tipeni seni lepoputáán, ina an epwe eáni eú famili mi tipeeúfengen mi masou ren néún kewe lón láng me néún kewe wóón fénúfan.—Ef. 1:10.

Mwirin fisin ekkena mettóch, epwe met meefien chón án Jiowa we famili lón láng me wóón fénúfan? Epwe chúen wor ach fókkun mochen mwareiti iten Jiowa we. Ewe soumakken kélfel itan Tafit, a apasa: “Sipwe mwareiti ewe Samol mi Lapalap, . . . Sipwe mwareiti itan mi ling tori feilfeilachök.” (Kölf. 72:18, 19) Sipwe sópweeló le kútta mineféén popun mi apwapwa ach sipwe mwareiti Kot tori feilfeiló chék.

Iten Jiowa we a pwáári mettóch meinisin ussun i. Itan we a áchchema ngenikich ussun an tong. (1 Joh. 4:8) Fansoun meinisin sipwe chemeni ewe tong Jiowa a pwáári ngenikich atun a férikichetá, me atun a awora ewe méén kepich. Sipwe pwal chemeni pwe napanapen an nemenem a pwúng, me a nemenem fán tong. Sipwe sópweeló le meefi ewe tong Jiowa a pwáár ngenikich. Sipwe mochen chiechiéch ngeni pokiten i Semach, me sipwe eáni kélún mwareiti itan we mi amwarar tori feilfeiló chék.—Kölf. 73:28.