1-2. (a) Met meefien Jiowa ussun emén mi féri tipis nge ese mochen áier? (b) Ifa án Jiowa áneán fán iten chókkewe mi féri tipis?

 ESAP meinisin féffér ra ketiw me ren Jiowa. I a oputa tipis. (Kölf. 5:​4-6) A tipeni ach sipwe álleasochisi an kewe allúk lón Paipel. Iwe nge, a pwal silei pwe sise unuséch me sise tongeni unusen álleasochisi i. (Kölf. 130:​3, 4) Pwal eú, ese etiwa chókkewe rese súféliti, iir kewe mi áeá an “kirekiréch mi somwoló ngeni eú popun ar repwe féri féfférún angolossá.” (Juta 4) Ren enletin, ewe Paipel a fós ussun “ninniilóón ekkewe aramas rese silei Kot” lón an we maunen Armaketon.—2 Pit. 3:7; Pwár. 16:16.

² Iwe nge, Jiowa ese mochen án emén epwe ninniiló. Sia káé lón ei puk pwe ewe Paipel a affata pwe i “a mochen án meinisin repwe áier.” (2 Pit. 3:9) Ekkewe mwán mi ásimaw ra áppirú Jiowa le mosonottam lón ar achocho le álisi emén mi féri tipis an epwe áier me ririéchsefál ngeni Jiowa. Iwe nge, esap meinisin chókkewe mi féri tipis ra áier. (Ais. 6:9)  Ekkóch ra sópweeló lón ar féfféringaw inaamwo iká a fán fite án ekkewe mwán mi ásimaw álisiir ar repwe áier. Iwe, met a lamot án ekkewe mwán mi ásimaw repwe féri?

“OUPWE ATOWU EWE ARAMAS MI NGAW”

3. (a) Me ren ewe Paipel, met a lamot epwe fis ngeni emén mi tipis ese mochen áier? (b) Iká emén ese mochen áier, iwe pwata sia tongeni erá pwe a pwisin filaatá an epwe katowu seni ewe mwichefel?

³ Lupwen emén mi féri tipis ese mochen áier, iwe a lamot án ekkewe mwán mi ásimaw repwele fiti ei kapasen emmwen lón 1 Korint 5:​13, mi apasa: “Oupwe atowu ewe aramas mi ngaw seni me leimi.” Weween, ina met ena chón tipis a filaatá. A kini met a pwisin fótuki. (Kal. 6:7) Pwata sia tongeni apasa ena? Pún ese mochen etiwa án ekkewe mwán mi ásimaw sótun álisi fán chómmóng an epwe áier. (2 King 17:​12-15) A pwáári lón an féffér pwe ese mochen álleasochisi án Jiowa allúk.—Tut. 30:​19, 20.

4. Pwata a kan esilesil lón ewe mwichefel katowuun emén ese mochen áier?

⁴ Atun ewe emén ese mochen áier a katowu, a kan esilesil ngeni ewe mwichefel pwe ese chúen emén Chón Pwáraatá Jiowa. Ese fis ena esilesil pwe epwe ásáwa ewe mi tipis, nge a fis pwe chón ewe mwichefel repwe apwénúetá án Paipel ei allúk ar repwe “úkútiw le chichchiechi ngeni” ena emén, me ar resap pwal “mwo nge mwéngé ren.” (1 Kor. 5:​9-11) A wor popun mi múrinné án Jiowa awora ena allúk. Ewe aposel Paul a apasa: “Ekis chék iis a apwotáái unusen ewe pilawa mi éúwéú.” (1 Kor. 5:6) Ekkewe mi tipis rese mochen áier, ra tongeni apwangapwangaaló tipeppósun ekkewe ekkóch lón ar achocho le álleasochisi án Jiowa kewe allúk.—SalF. 13:20; 1 Kor. 15:33.

5. Epwe ifa ekiekich ussun emén mi katowu, me pwata?

⁵ Epwe ifa ekiekich ussun emén chón ewe mwichefel atun a katowu? Inaamwo iká sise chúen tongeni chiechi ngeni, nge sipwe chemeni pwe a chúen tongeni siwil. A ussun emén siip mi mwálecheló. Ewe siip mi mwálech seni ewe pwiin siip, a pwal tongeni liwin. Chemeni pwe ena emén a fangoló manawan ngeni Jiowa. Nge a solap pwe ese apwénúetá an pwon ngeni Jiowa, me a alólilen ena. (Is. 18:31) Iwe nge, atun mi chúen wor fansoun me Jiowa mi chúen mochen pwáári an úméúméch, sia ápilúkúlúkú pwe ena emén epwe ekkesiwil. Iwe, ifa ussun ekkewe mwán mi ásimaw repwe álisi emén mi katowu?

IFA USSUN EKKEWE MWÁN MI ÁSIMAW RA ÁLISI EKKEWE MI KATOWU?

6. Met ekkewe mwán mi ásimaw repwe féri ren ar repwe álisi emén mi katowu?

⁶ Atun emén a katowu seni ewe mwichefel, itá ekkewe mwán mi ásimaw ra úkútiw le álisi le liwiniti Jiowa? Aapw! Atun ra esile ngeni pwe epwele katowu seni ewe mwichefel, ra pwal ereni ekkewe mettóch mi lamot epwe féri pwe epwe tongeni liwinsefál. Nge ekkewe mwán mi ásimaw ra pwal féri met mi lap seni ena. Lape ngeni, ra kan ereni ewe mi tipis pwe ra mochen chuursefáli mwirin fitu maram me ppii iká a siwil. Iká ena emén a tipeeú ngeni ar repwe chufengen, iwe ekkewe mwán mi ásimaw repwe pesei an epwe áier me liwinsefál. Inaamwo iká esaamwo áier lón ena atun, nge repwe achocho le chuursefáli lón ekkan fansoun me pesei an epwe áier.

7. Ifa ussun ekkewe mwán mi ásimaw ra áppirú án Jiowa tong lón ar álisi ewe mi katowu? (Jeremaia 3:12)

⁷ Ekkewe mwán mi ásimaw ra achocho le  áppirú án Jiowa tong lón féfférúr ngeni ewe mi katowu. Áwewe chék, lón fansoun ekkewe chón Israel lóóm, Jiowa ese witi ar repwe akkomw mwékút le áier iwe epwap álisiir. A tiinaaló rer néún kewe soufós pwal mwo nge me mwen ar resaamwo pwáári pwe ra ekkesiwil. Ussun met sia fen káé lón ewe oruuen lesen lón ei puk, Jiowa a pwáári an tong atun a ereni ewe soufós Osea an epwe omusaaló tipisin pwúlúwan we mi chúen féfféri tipis. (Os. 3:1; Mal. 3:7) Ekkewe mwán mi ásimaw ra áppirú Jiowa ren ar enletin mochen án ewe mi tipis epwe liwinsefál ngeni ewe mwichefel, me rese áweiresi an epwe féri ena.—Álleani Jeremaia 3:12.

8. Ifa ussun án Jises we kapas áwewe ussun ewe naw mi mwálecheló a álisikich le weweéchúti meefien Jiowa ussun chókkewe mi katowu? (Luk 15:7)

⁸ Chemeni án Jises we kapas áwewe ussun ewe naw mi mwálecheló, ewe sia káé ussun lón ewe oruuen lesen. Atun ewe sam a kúna me towaw án néún we liwinsefál, “a ssá me turufaaló i me kisi i fán pwetete.” (Luk 15:20) Nengeni pwe ewe sam ese witi án néún na epwe akkomw omusomus ngeni, nge fen pwisin ena sam a akkomw mwékút pokiten a tongei. Ina meefien Jiowa ngeni chókkewe mi likitaaló i, me ekkewe mwán mi ásimaw ra achocho le áppirú Jiowa. Ra mochen án chókkewe mi likitaaló Jiowa repwe liwiniti i. (Luk 15:​22-24, 32) Atun emén mi tipis a liwinsefál, Jiowa, Jises, ekkewe chónláng, me unusen ewe mwichefel ra fókkun pwapwa!—Álleani Luk 15:7.

9. Met Jiowa a pesei ngeni ekkewe mi féri tipis ar repwe féri?

⁹ Sia fen káé pwe Jiowa ese mut ngeni chókkewe rese mochen áier seni ar tipis ar repwe nóm lón ewe mwichefel. Iwe nge, a chúen mochen álisiir. A mochen ar repwe liwiniti. Meefien Jiowa ngeni chókkewe mi áier, a pwá lón Osea 14:​4, a apasa: “Üpwe aliwinato nei aramas o tongeer seni unusen letipei, pun üsap chüen song ngeniir.” Án ekkewe mwán mi ásimaw silei meefien Jiowa ussun chókkewe mi likitaaló, a álisiir le esilla sókkun siwil ra féri mi pwáári pwe ra áier. Ena wokisin a pwal alúkúlúkú ngeni ena emén pwe Jiowa a tongei me a mochen an epwe liwiniti.

10-11. Ifa ussun ekkewe mwán mi ásimaw repwe álisi chókkewe mi katowu ren fite fite ier?

¹⁰ Ifa ussun ekkewe mwán mi ásimaw repwe álisi ekkewe mi katowu ren fite fite ier? Eli chókkana rese chúen féri ewe tipis ra katowu fán itan. Eli ekkóch me leir rese mwo nge chúen chemeni popun ar katowu. Ese lifilifil ifa úkúúkún ttamen án chókkana katowu seni ewe mwichefel, nge ekkewe mwán mi ásimaw repwe achocho le kútter me chuuriir. Atun ra chuuriir, repwe pwal mwo nge iótekfengen, me tingorer ar repwe liwiniti ewe mwichefel. Iká emén a fen towaw seni ewe mwichefel ren fite fite ier, ese mwáál a fókkun apwangapwang lón pekin ngún. Ina minne, iká a pwáári pwe a mochen liwiniti ewe mwichefel, iwe eli ekkewe mwán mi ásimaw repwe akkóta án emén epwe wisen káé ngeni inaamwo iká esaamwo katolongsefál. Ekkewe chék mwán mi ásimaw repwe wisen akkóta án emén epwe káé ngeni emén mi katowu.

¹¹ Ren án ekkewe mwán mi ásimaw repwe áppirú án Jiowa tong, ra mochen kútta meinisin chókkewe mi likitaaló i me peseer ar repwe liwiniti. Atun emén mi féri tipis a pwáári pwe a áier me lúkúsékúrú féfférún kewe, ekkewe mwán mi ásimaw ra tongeni mwittir atolongasefál lón ewe mwichefel.—2 Kor. 2:​6-8.

12. (a) Ineet atun a lamot án ekkewe mwán mi ásimaw repwe ákkáeúin túmúnúéch lón? (b) Pwata sisap ekieki pwe ese fókkun tufich án chókkewe mi féri ekkóch sókkun tipis repwe angei án Jiowa úméúméch? (Pwal ppii ewe footnote.)

 ¹² A wor ekkóch atun a lamot án ekkewe mwán mi ásimaw repwe ákkáeúin túmúnúéch lón mwen ar repwe atolongasefáli emén. Áwewe chék, iká emén a katowu ren an kirikiringaw ngeni semirit, wiliiti chón rikiló, are féri angangen otuputup ren an epwe wes seni pwúlúwan, iwe ekkewe mwán mi ásimaw repwe fókkun nengeniéchú iká ena emén a enletin áier. (Mal. 2:14; 2 Tim. 3:6) A lamot repwe túmúnú chón ewe mwichefel. Iwe nge, a pwal lamot ach sipwe mirititi pwe Jiowa epwe etiwa emén mi piin eáni féffér mi ngaw nge a enletin áier me úkú seni an féfféri minne mi ngaw. Ina popun, inaamwo iká ekkewe mwán mi ásimaw ra mochen nochchei iká ena emén mi otupwaaló ekkewe ekkóch a enletin áier, nge resap  pwal ekieki pwe ena sókkun aramas esap fókkun tongeni angei án Jiowa úméúméch. a—1 Pit. 2:10.

MINNE EWE MWICHEFEL A TONGENI FÉRI

13. Ifa sókkofesenin féfférúch ngeni emén mi angei kapwúng me féfférúch ngeni emén mi katowu seni ewe mwichefel?

¹³ Ussun met sia fen káé lón ewe lesen mwen ei pwe fán ekkóch a kan esilesil pwe emén a kapwúng. Iká ina, iwe sia chúen tongeni sópweeló le chiechi ngeni pún a áier me lúkúsékúrú an féffér mi ngaw. (1 Tim. 5:20) A chúen chóni ewe mwichefel me a lamot ngeni kapasen apéchékkúl seni chienan kewe Chón Kraist. (Ipru 10:​24, 25) Iwe nge, a fókkun sókkóló ena seni emén mi katowu. Sia “úkútiw le chichchiechi ngeni” ena emén, me sisap pwal “mwo nge mwéngé ren ena esin aramas.”—1 Kor. 5:11.

14. Ifa ussun ekkewe Chón Kraist repwe áeá miritin letiper mi káit me ren Paipel lón féfférúr ngeni emén mi katowu? (Pwal ppii ewe sasing.)

¹⁴ Itá ewe kapasen emmwen lón 1 Korint 5:​11, a wewe ngeni pwe sise tongeni etiwa emén mi katowu an epwe fiti mwiich are kapwong ngeni iká a fiti mwiich? Aapw. Nge sisap chiechi ngeni. Chón Kraist ra tongeni áeá miritin letiper mi káit me ren ewe Paipel le filaatá iká repwe etiwa emén mi katowu, eli aramaser are chiechier me mwen an katowu, an epwe fiti mwiich. Nge ifa ussun iká a fiti? Me lóóm, sise kan kapwong ngeni ena esin aramas. Iwe nge, emén me emén Chón Kraist epwe áeá miritin letipan mi káit me ren ewe Paipel le filaatá iká epwe kapwong ngeni. Eli ekkóch repwe meefi kinamwe le kapwong ngeni eménna are etiwa atun a etto mwiich. Iwe nge, sisap attama ach fós ngeni are sisap pwal chiechi ngeni.

15. Ié kewe chón tipis 2 Jon 9-11 a fós ussur? (Pwal ppii ewe pwóór “ A Chék Léllé ewe Tipis Jon me Paul Ra Fós Ussun?”)

¹⁵ Eli ekkóch repwe erá, ‘Esap pwe ewe  Paipel a erá pwe emén Chón Kraist mi kapwong ngeni ena esin aramas, a álisaatá lón an féffér mi ngaw?’ (Álleani 2 Jon 9-11.) Unusen ewe pwóróus lón 2 Jon, a pwáári pwe ena kapasen emmwen lón wokisin 9 ngeni 11 a weneiti ekkewe chón rikiló me chókkewe mi achocho le álisaatá féffér mi ngaw. (Pwár. 2:20) Ina minne, iká emén a kan ákkálisatá án ekkewe chón rikiló afalafal are pwal ekkóch féfféringaw, iwe ekkewe mwán mi ásimaw resap akkóta ar repwe chuuri. Iwe nge, a chúen tufich án ena esin aramas epwe áier. Nge iká esaamwo áier, sisap kapwong ngeni are etiwa an epwe fiti mwiich.

ÁPPIRÚ ÁN JIOWA TONG ME ÚMÉÚMÉCH

16-17. (a) Met Jiowa a mochen án ekkewe mi tipis repwe féri? (Isikiel 18:32) (b) Ifa ussun ekkewe mwán mi ásimaw ra tongeni angangfengen me Jiowa atun ra álisi ekkewe mi féri tipis?

¹⁶ Met sia káé seni ekkeei nimu lesen? Jiowa ese mochen án emén epwe ninniiló! (Álleani Isikiel 18:32.) A mochen án ekkewe mi féri tipis repwe chásefál ngeni. (2 Kor. 5:20) Ina popun, Jiowa a kan soun pesei néún kewe chón angang mi likitaaló i ar repwe áier me liwiniti. Ekkewe mwán mi ásimaw lón ewe mwichefel ra angangfengen me Jiowa le álisi ekkewe mi féri tipis mi chou ar repwe áier.—Rom 2:4; 1 Kor. 3:9.

¹⁷ Anchangei úkúúkún ewe pwapwa lón láng atun ekkewe chón tipis ra áier! Semach we lón láng, Jiowa, a fókkun pwapwa iteiten án emén néún kewe siip mi mwálecheló liwiniti ewe mwichefel. Ach tongei Jiowa a lallapoló atun sia ekilonei ussun an tong, úméúméch, me kirekiréch mi somwoló.—Luk 1:78.