1. Met a tongeni fis mwirin án emén féri eú tipis mi chou?

 LÓN ewe lesen mwen ei, sia káé ussun met Paul a ereni chón ewe mwichefelin Korint ar repwe féri ngeni ewe mwán mi tipis watte. A lamot ena mwán ese áier epwe katowu seni ewe mwichefel. Iwe nge, Kot a tongeni emmweni emén an epwe áier ussun met ewe wokisin ach ei lesen a lóngólóng wóón a erá. (Rom 2:4) Ifa ussun a néúnéú ekkewe mwán mi ásimaw le álisi emén an epwe áier?

2-3. Met a lamot sipwe féri iká sia silei pwe emén chienach a féri eú tipis mi chou, me pwata?

² Iká ekkewe mwán mi ásimaw rese silei pwe emén a féri eú tipis mi chou, rese tongeni álisi. Iwe, met a lamot ach sipwe féri iká sia silei pwe emén chienach a féri eú tipis mi chou? A lamot sipwe pesei an epwe kútta álillis seni ekkewe mwán mi ásimaw.—Ais. 1:18; Féf. 20:28; 1 Pit. 5:2.

³ Iwe nge, ifa ussun iká ewe mi féri tipis ese mochen fós ngeni ekkewe mwán mi ásimaw? A lamot sipwe fen fós ngeniir pwe epwe angei ewe álillis mi lamot ngeni. Atun sia féri ena, sia pwáári ach tongei pwe sia silei pwe ekkewe mwán mi ásimaw repwe álisi. Nge iká ese mochen áier, iwe a tongeni ta an riri ngeni Jiowa me epwe pwal tongeni eitengawa ewe mwichefel. Ina minne, inaamwo iká epwe áweires, sipwe ló fós ngeni ekkewe mwán mi ásimaw pokiten sia tongei Jiowa me chienach na mi féri tipis.—Kölf. 27:14.

 USSUN ÁN EKKEWE MWÁN MI ÁSIMAW ÁLISI CHÓKKEWE MI FÉRI TIPIS MI CHOU

4. Met ekkewe mwán mi ásimaw ra achocho ngeni atun ra chuuri ewe mi féri eú tipis mi chou?

⁴ Atun emén lón ewe mwichefel a féri eú tipis mi chou, ekkewe mwán mi ásimaw repwe filaatá úlúmén me leir ar repwe chuuri ena mi féri tipis. a A lamot án ekkena mwán repwe tipetekison le mirititi pwe inaamwo iká repwe achocho le álisi ewe mi féri tipis, nge rese tongeni oumwesi an epwe siwil. (Tut. 30:19) Ra silei pwe esap meinisin repwe ussun King Tafit le áier. (2 Sam. 12:13) Ekkóch eli resap mochen aúseling ewe kapasen apwúng seni Jiowa. (Ken. 4:​6-8) Iwe nge, ekkewe mwán mi ásimaw ra achocho le álisiir ar repwe áier. Met a lamot repwe chemeni atun ra chuuri ewe mi féri tipis?

5. Epwe ifa napanapen ekkewe mwán mi ásimaw atun ra chuuri ewe mi féri tipis? (2 Timoty 2:​24-26) (Pwal ppii ewe sasing.)

⁵ Ekkewe mwán mi ásimaw ra silei pwe inaamwo iká emén a féri eú tipis mi chou, nge a chúen aúchea me ren Jiowa. (Luk 15:​4, 6) Ina popun, atun ra chuuri ewe mi féri tipis, resap kapas péchékkúl are song ngeni. Resap pwal meefi pwe wiser ar repwe chék etittina minne a fis me apwúngaló met epwe fis ngeni ewe mi tipis. Nge repwe fen pwáári ekkewe napanap mi mak lón 2 Timoty 2:​24-26. (Álleani.) Repwe tipepwetete, mosonoson, me kirekiréch atun ra achocho le achchúngú letipen ewe mi féri tipis.

6. Ifa ussun ekkewe mwán mi ásimaw ra awora fansoun le eáni ekiekin Jiowa me mwen ar chuuri ewe mi féri tipis? (Rom 2:4)

⁶ Ekkewe mwán mi ásimaw ra awora fansoun le kútta emmwen seni Jiowa. Fansoun meinisin ra achocho le áppirú Jiowa atun ra chuuri ewe mi féri tipis, me ra chemeni alon Paul ei: “Lón [án Kot] kirekiréch a sótun emmwenuk ngeni óm kopwe áier.” (Álleani Rom 2:4.) A lamot án ekkewe mwán mi ásimaw repwe chemeni pwe iir chón mmasa ekkewe siip fán emmwenien Kraist. (Ais. 11:​3, 4; Mat. 18:​18-20) Me mwen ar repwe chuuri ewe mi féri tipis, ra iótek ngeni Jiowa pwe repwe tongeni álisi an epwe áier. Repwe research lón ewe Paipel me lón néúch kewe puk. Me repwe iótek ngeni Jiowa pwe epwe álisiir le weweiti ewe emén me minne a féri. Repwe etittina nónnómun manawan pwe repwe tongeni silei met a kan ekieki me met a efisi an epwe féri ewe tipis.—SalF. 20:5.

7-8. Ifa ussun ekkewe mwán mi ásimaw repwe áppirú án Jiowa mosonottam atun ra chuuri ewe mi féri tipis?

 ⁷ Ekkewe mwán mi ásimaw ra áppirú án Jiowa mosonottam. Ra kan ekieki ussun án Jiowa álisi ekkewe mi féri tipis lón fansoun lóóm. Áwewe chék, Jiowa a mosonottam ngeni Ken. A ereni met epwe fis ngeni iká ese siwil nge iká a álleasochis, iwe epwe kúna feiéch. (Ken. 4:​6, 7) Jiowa a tiinaaló ewe soufós Natan an epwe áwena Tafit. Natan a eáni eú kapas áwewe mi álisi Tafit le áier. (2 Sam. 12:​1-7) Me Jiowa a kan “titinala” néún kewe soufós ngeni ewe mwúún Israel mi mwálecheló. (Jer. 7:​24, 25) Ese chék witi án néún kewe aramas repwe áier iwe epwap álisiir, nge atun ra chúen féfféri tipis, a peseer ar repwe áier.

⁸ Ekkewe mwán mi ásimaw ra áppirú Jiowa atun ra álisi chókkewe mi féri tipis mi chou. Ra “unusen . . . mosonottam” ngeniir ussun met 2 Timoty 4:2 a erá. Ina popun iká ra mochen álisi ewe mi féri tipis le féri minne mi pwúng, iwe a lamot repwe mosonoson me mosonottam fansoun meinisin. Nge iká ra song are mángaw, eli eménnewe esap aúseling ngeni ewe kapasen emmwen are esap mochen áier.

9-10. Ifa ussun ekkewe mwán mi ásimaw ra tongeni álisi ewe emén le ekieki ussun ekkewe kefil a eáni mi emmwen ngeni an epwe féri tipis?

⁹ Ekkewe mwán mi ásimaw ra achocho le silei met a efisi an epwe féri ewe tipis. Áwewe chék, itá ewe Chón Kraist a apwangapwangoló pokiten a túmúnúngaw ngeni an pwisin káé me angangen afalafal? A úkútiw le iótek ngeni Jiowa? A úkútiw le fiffiu ngeni mocheniangaw? Ié kewe a kan chiechi ngeni? Met sókkun minen apwapwa me kunou a eáni? Ifa ussun ekkena kefil ra etipetipa ekiekin me mochenin? Itá a ekieki meefien Jiowa ussun an kewe kefil?

¹⁰ Ekkewe mwán mi ásimaw ra tongeni eisini ewe emén ekkewe sókkun kapas eis epwe álisi an epwe ekieki ussun ekkewe mettóch mi apwangapwangaaló an riri ngeni Jiowa me emmwen ngeni an epwe féri tipis. Ra féri ena fán kirekiréch me rese pwal tichikin eis ussun ekkewe pwóróus ese pwal lamot ar repwe silei ussun. (SalF. 20:5) Pwal och, eli ra pwal tongeni áeá kapas áwewe epwe álisi ewe emén le ekieki ussun féfférún me mirititi pwe minne a féri a mwáál, ussun chék met Natan a féri ren Tafit. Eli atun ar áeúin chufengen, ewe emén epwe poputá le meefi enletin letipechou ren minne a féri me an ekiek mi mwáál. Eli epwe pwal mwo nge áier.

11. Ifa féfférún Jises ngeni ekkewe mi féri tipis?

¹¹ Ekkewe mwán mi ásimaw ra achocho le áppirú Jises. Jises a álisi Saul seni Tarsus ren an eisini ei kapas eis: “Saul, Saul, pwata ka eriáfféwúmwááli ei?” Án Jises eáni ena kapas eis a álisi an epwe mirititi pwe minne a féri a mwáál. (Féf. 9:​3-6) Me ren pwóróusen ewe fefin “Jesepel,” iei met Jises a erá ussun: “Úa mut ngeni fansoun an epwe áier.”—Pwár. 2:​20, 21.

12-13. Ifa ussun ekkewe mwán mi ásimaw ra mut ngeni ewe mi féri tipis fansoun an epwe áier? (Pwal ppii ewe sasing.)

¹² Ekkewe mwán mi ásimaw ra áppirú Jises ren ar rese mwittir apwúngaló pwe ewe mi féri tipis ese tongeni áier. Eli ekkóch repwe áier lón ewe áeúin atun ekkewe mwán mi ásimaw ra chuuriir, nge ren ekkewe ekkóch neman epwe lamot ngeniir pwal och fansoun. Ina popun, ekkewe mwán mi ásimaw ra tongeni akkóta le chuchchuuriir lap seni fán eú. Eli mwirin ewe áeúin chufengen, ewe mi féri tipis epwe poputá le ekiekifichi met ekkewe mwán mi ásimaw ra ereni. Eli epwe seppiti  Jiowa lón iótek fán tipetekison. (Kölf. 32:5; 38:18) Ina popun, lón ar oruuen chufengen, eli a ekkesiwil ekiekin seni ewe atun ra áeúin chufengen.

¹³ Ekkewe mwán mi ásimaw ra álisi ewe mi féri tipis an epwe áier ren ar kirekiréch ngeni me meefieni meefian. Ra tingorei Jiowa an epwe efeiéchú ar achocho me ra áneánei pwe chiener na mi féri tipis epwe ekieksefál me áier.—2 Tim. 2:​25, 26.

14. Ié a wesewesen álisi ewe mi féri tipis an epwe áier, me pwata ka erá ena?

¹⁴ Atun emén chón féri tipis a áier, sia fókkun pwapwa! (Luk 15:​7, 10) Iwe itá ié a wesewesen álisi ewe mi féri tipis le ekkesiwil? Ekkewe mwán mi ásimaw? Chemeni met ei Paul a makkeei ussun ekkewe mi féri tipis: “Eli Kot epwe mut ngeniir ar repwe áier.” (2 Tim. 2:25) Jiowa i ewe a álisi emén Chón Kraist an epwe ekkesiwili an ekiek me féfférún, nge esap emén aramas. Paul a áweweei ekkewe mettóch mi múrinné a fis mwirin án emén áier. A lapóló an silei ewe enlet, a miritsefál, me a sú seni án Setan kewe ssár.—2 Tim. 2:26.

15. Ifa ussun ekkewe mwán mi ásimaw repwe sópweeló le álisi ewe mi áier?

¹⁵ Atun emén chón féri tipis a áier, ekkewe mwán mi ásimaw repwe sópweeló le chuchchuuri pwe a tongeni sópweeló le angei ewe álillis mi lamot ngeni pwe epwe tongeni úkkú ngeni án Setan kewe ssár me féri minne mi pwúng. (Ipru 12:​12, 13) Ewer, ekkewe mwán mi ásimaw resap apwóróusa ngeni ekkewe ekkóch met ewe chón tipis a féri. Nge met a lamot chón ewe mwichefel repwe silei?

“KOPWE APWÚNGÚ MWEN MESEN ARAMAS”

16. Ié ekkewe “aramas” Paul a fós ussur lón 1 Timoty 5:20?

¹⁶ Álleani 1 Timoty 5:20. Paul a ereni Timoty, pwal emén mwán mi ásimaw, an epwe apwúngú chón féri tipis “mwen  mesen aramas.” Met weween alon Paul na? A fós ussun ekkewe mi silei ussun ewe tipis, áwewe chék ren chókkewe mi kúna ewe tipis, are chókkewe ewe mi tipis a fós ngeniir ussun minne a féri. Lón ekkóch atun, a chék wor fitemén mi silei, nge esap unusen ewe mwichefel. Ekkewe mwán mi ásimaw repwe ereni chókkana chék pwe ra fen áwena ewe mi féri tipis.

17. Iká a fen chéú lón ewe mwichefel are epwele lón mwach pwe emén a féri eú tipis mi chou, met ekkewe mwán mi ásimaw repwe apioni, me pwata?

¹⁷ Fán ekkóch, chómmóng lón ewe mwichefel ra fen silei pwe emén a féri eú tipis mi chou, are repwap silei ekiseló. Iwe, lón na atun alon Paul we “mwen mesen aramas” a weneiti unusen chón ewe mwichefel. Iwe emén mwán mi ásimaw epwe apioni lón ewe mwichefel pwe ewe mi féri tipis a fen kapwúng. Pwata? Paul a erá “pwe epwe eú minen éúréúr ngeni meinisin” ar resap turulong lón eú tipis mi chou.

18. Met ekkewe mwán mi ásimaw repwe féri iká emén mi kis seni 18 ierin a féri eú tipis mi chou? (Pwal ppii ewe sasing.)

¹⁸ Met ekkewe mwán mi ásimaw repwe féri atun emén mi papatais kis seni 18 ierin a féri eú tipis mi chou? Repwe akkóta án rúúemén me leir repwe chuuri fengen me seman kewe me inan Chón Kraist. b Repwe eisini ekkewe sam me in iká met ra fen féri le álisi néúr we le áier. Iká néúr na a aúseling ngeni án seman kewe me inan kapasen emmwen me a féri siwil lón an ekiek me féffér, iwe ekkewe rúúemén mwán mi ásimaw ra tongeni apwúngaló  pwe repwe chék likiti ngeni ekkewe sam me in ar repwe wisen sópweeló le álisi néúr na. Ekkewe mwán mi ásimaw ra silei pwe Jiowa a ewisa ngeni ekkewe sam me in ewe wis le áwena néúr kewe fán tong. (Tut. 6:​6, 7; SalF. 6:20; 22:6; Efi. 6:​2-4) Fán ekkóch, ekkewe mwán mi ásimaw repwe fós ngeni ekkewe sam me in me ppii iká néúr we a angei ewe álillis mi lamot ngeni. Iwe nge, ifa ussun iká néúr na mi papatais ese mochen áier? Iká ina, úlúmén mwán mi ásimaw repwe chuuri fengen me seman kewe me inan Chón Kraist.

“JIOWA I EMÉN KOT MI UREN TONG ME ÚMÉÚMÉCH”

19. Ifa ussun ekkewe mwán mi ásimaw ra achocho le áppirú Jiowa atun ra álisi emén mi féri tipis?

¹⁹ Jiowa a mochen án ekkewe mwán mi ásimaw repwe túmúnú ewe mwichefel seni chókkewe rese mochen álleasochisi an kewe allúk. (1 Kor. 5:7) Ra pwal mochen álisi emén mi féri tipis an epwe áier iká epwe tufich. Me atun ra álisi eménna, ra áneánei pwe epwe siwil. Pwata? Pokiten ra mochen áppirú Jiowa ewe “mi uren tong me úméúméch.” (Jem. 5:11) Ppii ifa ussun ewe aposel Jon a pwal pwáári ena esin napanap. A makkeei: “Ámi nei kana mi áchengicheng, úa makkeei ekkeei mettóch ngenikemi pwe oute féri tipis. Iwe nge, iká emén a féri tipis, a wor emén chón álillis a nóm ren ewe Sam, i Jises Kraist, ewe chón pwúng.”—1 Jon 2:1.

20. Met sipwe pwóróus wóón lón ewe enimuen lesen?

²⁰ A mmen eletipechou pwe fán ekkóch emén Chón Kraist ese mochen áier. Iká ina, iwe a lamot epwe katowu seni ewe mwichefel. Met ekkewe mwán mi ásimaw ra féri iká a fis ena? Sipwe pwóróus wóón ena lón ewe enimuen lesen.