1-2. (a) Met weween tipis, me ifa ussun sia tongeni okkufu tipis? (Pwal ppii “Áweween Kapas.”) (b) Met sipwele káé lón ei lesen me lón ekkewe pwal ekkóch lesen lón ei Leenien Mas? (Pwal ppii “Ngeni Chón Állea” lón ei puk.)

 KA MOCHEN silei ifa úkúúkún án Jiowa Kot tongeek? Iei eú alen óm kopwe tongeni silei pélúwan, kopwe káé met a féri pwe epwe selánuk seni tipis me máló. Tipis a ina ewe chón oputakich, sise tongeni okkufu ren pwisin ach tufich. Kich meinisin sia tittipis iteiten rán, me sia máló pokiten tipis. (Rom 5:12) Iwe nge, a wor ach ápilúkúlúk. Ren án Jiowa álillis, sia tongeni okkufu tipis. Ren enletin, sia unusen lúkúlúk pwe sia tongeni win!

² Poputá seni 6,000 ier a ló, Jiowa Kot a ákkálisi aramas le okkufu tipis. Pwata? Pún a tongekich. Jiowa a tongei aramas seni ewe fansoun a fériiretá, ina popun a féri chómmóng mettóch pwe epwe álisiir atun ra tipis. Kot a silei pún tipis a emmwen ngeni máló, me i ese mochen ach sipwe máló. A mochen ach sipwe manaw tori feilfeiló. (Rom 6:23) Ina met a mochen fán itom. Lón ei lesen, sipwe pwóróus wóón úlúngát kapas eis: (1) Ifa ewe ápilúkúlúk Jiowa a awora fán iten aramas tipis? (2) Ifa ussun aramas tipis lón fansoun lóóm ra kúna chen me ren Jiowa? (3) Met Jises a féri pwe epwe angasaaló aramas seni tipis me máló?

 IFA EWE ÁPILÚKÚLÚK JIOWA A NGENI ARAMAS TIPIS?

3. Ifa ussun popuch kewe ra wiliiti chón tipis?

³ Lupwen Jiowa a féri ewe áeménún mwán me ewe áeménún fefin, a mochen ar repwe pwapwa. A eleenier lón eú leeni mi lingéch, ngeniir ewe liffang pwúpwúlú, me ewisa ngeniir eú angang mi múrinné. Iir repwe ouraló fénúfan ren mwirimwiriir kewe me achéúaaló ewe paratis wóón unusen fénúfan pwe epwe ussun ewe tánipiin Ichen. A ngeniir eú chék allúk mi mecheres. A pwal ereniir pwe iká ra pwúkún filaatá le álleasolapa ena allúk, ar tipis epwe emmweniir ngeni máló. Sia silei met a fis mwirin. Emén chónláng mi ngaw ese tongei Kot are aramas a etipetipa Atam me If ar repwe álleasolapa Kot. Atam me If ra tipetipeló ren ena chónláng mi ngaw. Rese lúkú Semer we mi tong, iwe ra tipis. Minne Jiowa a apasa, a pwénútá. Pokiten án Atam me If álleasolap, ra riáfféú lón ánein manawer. Ra chinnapeló, me ló, ló, ló, ra máló.—Ken. 1:​28, 29; 2:​8, 9, 16-18; 3:​1-6, 17-19, 24; 5:5.

4. Pwata Jiowa a oput tipis me álisikich le fiffiu ngeni? (Rom 8:​20, 21)

⁴ Jiowa a apachaalong ena pwóróus lón Paipel pwe sipwe káé seni eú lesen mi fókkun aúchea. A álisikich ach sipwe weweiti popun a fókkun oput tipis. Tipis a áimukicheló seni Semach na mi tong, me a atoto ngenikich máló. (Ais. 59:2) Ina popun Setan, ewe chón ú ngeni Kot mi poputááni meinisin ekkeei osukosuk, a fókkun sani tipis me a etipetipa aramas ar repwe pwal ina ussun. Ese mwáál a ekieki pwe a fókkun sópwéch me lón Ichen. Nge ese weweiti úkúúkún án Jiowa tong. Kot ese tongeni siwili minne a tipeni fán iten mwirimwirin Atam me If kewe. A tongeei aramas, ina minne a mwittir awora ngeniir ápilúkúlúk. (Álleani Rom 8:​20, 21.) Jiowa a silei pwe ekkóch me lein mwirimwirin Atam me If kewe repwe filaatá le tongei i me kútta álillis seni pwe repwe tongeni okkufu tipis. Pokiten i Semer me Chón Fériir, i epwe suuki ngeniir alen ar repwe tongeni ngaseló seni tipis me arap ngeni i. Met Jiowa a féri pwe epwe pwénútá meinisin ekkena mettóch?

5. Ineet Jiowa a poputá le awora ewe ápilúkúlúk ngeni aramas tipis? Áweweei. (Keneses 3:15)

⁵ Álleani Keneses 3:15. Jiowa a poputá le awora ewe ápilúkúlúk atun a apwúngaló met epwe fis ngeni Setan. Kot a erá pwe ewe ‘mwirimwir’ epwe wisen atoto ena ápilúkúlúk. Ló, ló, ló, ena mwirimwir epwe nieló Setan, me pwákini meinisin ekkewe osukosuk a efisi lón Ichen. (1 Jon 3:8) Nge akkomw, Setan epwe “küw apilipilin pechen” ena mwirimwir, are efisi ninniilóón. Ena mettóch epwe fókkun ámeteki letipen Jiowa. Nge Jiowa a tipemecheres le kúna ena riáfféú lón ena esin napanap me mut ngeni ena ‘mwirimwir’ an epwe riáfféú pwe epwe angasaaló aramas seni tipis me máló.

IFA USSUN ARAMAS TIPIS LÓÓM RA KÚNA ÁN JIOWA CHEN?

6. Met Epel, Noa, me ekkewe pwal ekkóch mi túppwél ra féri pwe repwe arap ngeni Jiowa?

⁶ Lón ekkewe fansoun mwirin ena, ekis me ekis Jiowa a affata ifa ussun aramas tipis ra tongeni arap ngeni i. Epel, néún Atam me If we át nampa ruu, i áeménún aramas a lúkú Jiowa mwirin fisin ewe osukosuk lón Ichen. Pokiten Epel a tongei Jiowa me achocho le apwapwaai i me arap ngeni, iwe a eáni asor ngeni. Epel, emén chón mmasen siip, a angei ekkóch néún kewe appanen siip, nireló, me eániir asor ngeni Jiowa. Met meefien Jiowa  ren minne a féri? I “a efich Epel me an asor.” (Ken. 4:4) Jiowa a pwapwa ren ekkewe asor ekkewe pwal ekkóch mi túppwél ra pwal eáni, áwewe chék ren Noa. (Ken. 8:​20, 21) Ren án Jiowa etiwa ekkena asor, a pwáári pwe aramas tipis ra tongeni kúna chen me ren me arap ngeni. b

7. Met sia káé seni án Eperiam tipemecheres le eáni asor néún we?

⁷ Jiowa a ereni Eperiam, ewe mwán mi watte an lúkú, an epwe féri och mettóch mi fókkun áweires. A ereni Eperiam an epwe eáni asor néún we Aisek. Ese mwáál a fókkun áweires ngeni Eperiam an epwe féri ena. Iwe nge, i a mmólnetá le féri ena. Nge atun itá epwele nieló néún na, Jiowa a eppeti. Ena pwóróus a áiti ngenikich eú lesen mi aúchea. Jiowa a tipemecheres le fangoló Néún we mi áchengicheng pwe epwe eú asor. Ina úkúúkún watteen án Jiowa tongei aramas.—Ken. 22:​1-18.

8. Met ekkewe asor man lón ewe Allúkún Moses ra áiti ngenikich? (Lifitikos 4:​27-29; 17:11)

⁸ Fitepúkú ier mwirin ena, ewe Allúkún Moses mi kawor ngeni ekkewe chón Israel a allúkú ngeni ekkewe aramas chómmóng asor repwe eáni pokiten ar tipis. (Álleani Lifitikos 4:​27-29; 17:11.) Ekkena asor ra áiti ngenikich pwe Jiowa epwe awora eú asor mi múrinné seni ekkena. Ena asor epwe unusen seláni aramas seni tipis. Néún Kot kewe soufós ra apasa pwe ewe mwirimwir mi pwonetiw, i emén Néún Kot mi kkóló aúchean, epwe kúna riáfféú me ninniiló. I epwe ussun emén siip emén a eáni asor. (Ais. 53:​1-12) Mwa met me amwararen án Jiowa fangoló Néún na mi áchengicheng an epwe angasaaló aramas seni tipis me máló, kapachelong en!

MET JISES A FÉRI PWE EPWE ANGASAALÓ ARAMAS?

9. Met Jon Papatais a affata ussun Jises? (Ipru 9:22; 10:​1-4, 12)

⁹ Lón ewe ier 29, Jon Papatais a kúna Jises ewe re Nasaret me erá: “Katol, ewe Lamen Kot, ewe a uwealó tipisin fénúfan!” (Jon 1:29) Alon na a apasa fán án Kot manaman a affata pwe Jises i ewe mwirimwir mi pwonetiw. I epwe asoresini manawan. Lón ena atun a wesewesen saramoló ewe ápilúkúlúk fán iten aramas tipis pokiten ra tongeni unusen ngaseló seni tipis.—Álleani Ipru 9:22; 10:​1-4, 12.

10. Ifa ussun Jises a pwáári pwe a ‘feito pwe epwe kéri ekkewe chón tipis’?

¹⁰ Jises a kon nefótófót wóón an álisi ekkewe aramas mi meefi riáfféún letiper ren ar tipis. A etiwer ar repwe tapweló mwirin. A silei pwe tipis ina populapen án aramas riáfféú. Ina popun, a álisi ekkewe mwán me fefin mi silleló pwe iir chón tipis. Ren an epwe áweweei ena, iei met a apasa: “Aramas mi péchékkúl ese lamot ngeniir tokter, nge fen ekkewe mi semmwen.” A pwal erá: “Úa feito pwe úpwe kéri ekkewe chón tipis, nge esap aramas mi pwúng.” (Mat. 9:​12, 13) Ina met Jises a wesewesen féri. Áwewe chék, fán pwetete a omusaaló tipisin emén fefin mi tipis mi télú pechen ngeni ssúrún chénún mesan. (Luk 7:​37-50) A pwal áiti ngeni ewe fin Sameria únúkkún ewe ito ekkewe pwóróus mi aúchea, inaamwo iká a silei pwe mi limengaw manawan. (Jon 4:​7, 17-19, 25, 26) Kot a pwal mwo nge fang ngeni Jises an manaman le amóeló ewe mettóch máló, ewe mi fis pokiten tipis. Ifa ussun? Ren an amanawasefáli mwán me fefin, kúkkún me watte, seni máló.—Mat. 11:5.

11. Pwata aramas tipis ra kinamwe le nóm ren Jises?

 ¹¹ Sia tongeni weweiti pwata ekkewe mwo aramas mi féri minne mi ngaw ra meefi kinamwe le nóm ren Jises. I a weweiti meefier me a kirekiréch ngeniir. Ina minne, rese pireir le feito ren me fós ngeni. (Luk 15:​1, 2) Jises a pwal apúnga me efeiéchú ekkena esin aramas ren ar pwáári ar lúkú i. (Luk 19:​1-10) Jises a pwáári ngeni aramas úkúúkún úméúméchún Seman we. (Jon 14:9) Lón an kapas me féffér, a pwáári pwe Seman we mi úméúméch a tongei aramas me mochen álisi emén me emén iir ar repwe win lón ar úkkú ngeni tipis. Jises a álisi aramas tipis ar repwe mochen ekkesiwili napanapen manawer me tapweló mwirin.—Luk 5:​27, 28.

12. Met Jises a apasa ussun an máló?

¹² Jises a silei met epwele fis ngeni i. Fán fite a ereni néún kewe chón káé pwe aramas repwe afangemá i me nieló wóón efóch irá. (Mat. 17:22; 20:​18, 19) A silei pwe an we asor epwe amóeló tipisin aramas wóón fénúfan, ussun chék met Jon me ekkewe soufós ra fen affata. Jises a pwal erá pwe mwirin an máló, epwe ‘óófaato ren meinisin sókkun aramas.’ (Jon 12:32) Aramas tipis ra tongeni apwapwaai Jiowa ren ar etiwa Jises an epwe ar Samol me tapweló mwirin lón ipwan. Iká ra féri ena, ló, ló, ló, repwe “ngaseló seni tipis.” (Rom 6:​14, 18, 22; Jon 8:32) Iwe, Jises a tipemecheres me pwora le mááli ewe sókkun máló mi fókkun eriáfféú.—Jon 10:​17, 18.

13. Ifa ussun Jises a máló, me met an máló a áiti ngenikich ussun Jiowa Kot? (Pwal ppii ewe sasing.)

 ¹³ Aramas ra afangemá Jises, aresini, turunufasa, pweni, apwúngaló an epwe ninniiló, me pwal mwo nge awata. Mwirin, ekkewe soufiu ra chúfélaatá wóón efóch iráán ninni. Atun an fis ngeni meinisin ekkena riáfféú, a wor Emén mi fen kon riáfféú lap seni. Ina i Jiowa Kot. A amwéchú an manaman me ese eppeti met a fis ngeni. Jiowa a fókkun tongei Néún na, iwe pwata chék a mut ngeni an epwe riáfféú me máló? Pokiten a tongekich. Iei met Jises a apasa: “Pokiten Kot a fókkun tongei fénúfan a fangoló Néún áláemén pwe meinisin mi anganga ar lúkú lón i resap péútmwááliló nge repwe kúna manaw esemuch.”—Jon 3:16.

14. Met ka káé seni án Jises fangoló manawan?

¹⁴ Án Jises asor a unusen ánnetatá úkúúkún watteen án Jiowa tongei mwirimwirin Atam me If kewe. A pwáári úkúúkún án Jiowa tongeek. A fangoló Néún we mi áchengicheng me likiitú fán watteen riáfféú pwe epwe angasaakoló seni tipis me máló. (1 Jon 4:​9, 10) Ewer, i a mochen álisi emén me emén kich pwe sipwe win lón ach fiffiu ngeni tipis.

15. Met a lamot sipwe féri pwe sipwe kúna feiéch seni ewe méén kepich?

¹⁵ Ewe méén kepich néún Kot we áláemén a awora, ina án Kot we liffang mi atufichi an epwe musoló ach kewe tipis. Nge ren an epwe musoló ach tipis, mi wor met mi lamot sipwe féri. Met ena? Jon Papatais me pwal Jises Kraist pwisin ra pélúweni ena kapas eis: “Oupwe áier pwe ewe Mwúún láng a arapoto.” (Mat. 3:​1, 2; 4:17) Iwe, mi lamot sipwe áier seni ach kewe tipis iká sia mochen akkarap ngeni Jiowa me kúna musolóón ach kewe tipis. Nge met weween áier, me ifa ussun a álisikich le úkkú ngeni tipis? En lesen mwirin ei epwe áiti ngenikich pélúwan.