Ewe aposel Paul a mak ngeni ekkewe Chón Kraist lón Tesalonika ei: “Iká emén leimi ese álleasochisi ám kapas mi mak lón ei taropwe, iwe oupwe esissilla ena emén.” (2 Tes. 3:14) Me lóóm, ekkewe mwán mi ásimaw repwe eáni eú afalafal lón ewe mwichefel iká a wor emén a sópweeló le tunaaló ekkewe emmwen lón án Kot we Kapas. Iwe mwirin, emén me emén chón afalafal resap chúen chiechi ngeni emén na mi ‘esissil’ me lúkún chék atun mwiich are lón ewe angangen afalafal.

Iwe nge, a lamot epwe wor siwil. Iei sia weweiti pwe án Paul kapasen emmwen a weneiti ewe kefil emén me emén lón ewe mwichefel repwe apwúngaló alóngólóng wóón ekkóch popun. Iwe ese chúen lamot án ekkewe mwán mi ásimaw repwe eáni eú afalafal ussun emén lón ewe mwichefel mi tunaaló ekkewe emmwen lón án Kot we Kapas. Pwata a fis ena siwil? Iei met Paul a fós ussun atun a erá ena kapasen emmwen.

Paul a erá pwe ekkóch lón ena mwichefel rese “álleasochis.” Ra álleasolapa emmwen seni Kot. Lón ewe atun a chuuriir, a ngeniir ei kapasen fén: “Iká emén ese mochen angang, iwe esap pwal mwéngé.” Nge a chúen wor ekkóch rese mochen angang le atufichi pwisin iir, inaamwo iká ra tongeni. Pwal och, ra angolong lón manawen ekkewe ekkóch. Epwe ifa féfférún ekkewe Chón Kraist ngeni chókkana rese álleasochis?—2 Tes. 3:​6, 10-12.

Paul a erá, “oupwe esissilla ena emén.” Me ren ewe popun kapasen Krik, sipwe esilla ena sókkun aramas me túmúnúkich seni pwe esap etipetipakich. Paul a ngeni meinisin chón ewe mwichefel ena kapasen fén nge esap chék ekkewe mwán mi ásimaw. (2 Tes. 1:1; 3:6) Iwe a lamot emén me emén Chón Kraist repwe filaatá iká repwe “úkútiw le chiechi ngeni” pwal emén Chón Kraist ra esilla pwe mi álleasolapa án Kot kewe emmwen.

Itá féfférúch ngeni ena sókkun aramas epwe ussun ach féffér ngeni emén mi katowu seni ewe mwichefel? Aapw, pún iei met Paul a pwal erá: “Oupwe sópweeló le fénéú pwe i emén pwiimi.” Iwe, emén me emén Chón Kraist ra chúen tongeni chiechi ngeni “ena emén” atun mwiich me lón ewe angangen afalafal, nge me lúkún ekkena resap chiechi ngeni. Pwata? Paul a erá, “pwe epwe sáw.” Pokiten sia úkútiw le chichchiechi ngeni, eli epwe meefi sáw ren minne a féri, iwe siwili féfférún.—2 Tes. 3:​14, 15.

Ifa ussun Chón Kraist repwe apwénúetá ena kapasen emmwen lón ei fansoun? Akkomw, sipwe ffat iká ena emén ese wesewesen álleasochis ussun met Paul a áweweei. Ese fósun chókkewe mi féri ekkewe sókkun mettóch mwelien letipach ese tipeeú ngeni nge ese ú ngeni án Paipel kewe kapasen emmwen. Are ese pwal fósun chókkewe mi kkóló minne ra sani senikich. Me ese pwal fósun chókkewe mi ámetekikich. Nge Paul a fen fósun chókkewe mi filaatá le álleasolapa án Kot kewe emmwen mi fataffatéch.

Lón ei fansoun, iká sia kúna pwe emén chienach Chón Kraist a sópweeló le álleasolapa án Kot emmwen, a iwe sipwe filaatá ach sisap chiechi ngeni atun ekkewe fansoun kukkunou. Pokiten ina pwisin filiach, iwe sisap apwóróusa ngeni ekkóch me lúkún chón ach famili. Me sipwe chúen chiechi ngeni atun ach kewe mwiich me lón ewe angangen afalafal. Atun a ekkesiwili ekiekin me féfférún, sipwe tongeni chiechi ngeni sefál lón ekkewe pwal ekkóch atun.