Ka fen álleaniéchú ekkewe Leenien Mas mi katowu lón ekkewe maram? Iwe, ppii ika ka tongeni pélúweni ekkeei kapas eis:

Mi mwáál án emén Chón Kraist epwe letipeta ren málóón attongean nge mi pwal lúkú ewe manawsefál?

Án emén Chón Kraist lúkú ewe manawsefál esap wewe ngeni pwe ese chúen meefi chúúpwúl. Apraham a letipeta ren málóón Sara. (Ken. 23:2) Nge ló, ló, ló, ena letipeta epwe kisikisiló.​—w16.05, p. 4.

Met sókkun tipis Jesus a fós usun lón ewe kapasen emmwen mi mak lón Mateus 18:15-17?

A fós usun ekkewe mettóch ekkewe Chón Kraist mi osukosukfengen ra tongeni chék pwisin ataweei lefiler. Nge ewe tipis a eú tipis mi chou pwe ika rese ataweei epwe tongeni emmwen ngeni án emén epwe katowu. Mi tongeni kapachelong lón ena sókkun “tipis” ewe angangen chúri are pweni aramas.​—w16.05, p. 12.

Met ka tongeni féri pwe óm álleaan Paipel epwe fókkun álilliséch ngonuk?

Ka tongeni féri ekkeei mettóch: Állea fán ekiek tekison, kútta ekkewe lesen ka tongeni apwénúetá; me pwisin eisinuk: ‘Ifa usun upwe tongeni áeá ei pwóróus le álisi ekkewe ekkóch?’; me néúnéú ekkewe puk me minen álillis ra kawor le kúttafichi pwal ekkóch pwóróus usun ekkewe ka kerán álleani.​—w16.05, p. 29-31.

Ikkefa ekkewe mettóch mi tongeni etipeféreakich pwe sisap etiwa án Jiowa emmwen?

A lamot sipwe túmúnú letipach seni ekkewe mettóch mi tongeni etipeféreai, choweán lamalamtekia, eérenaaló le féri och tipis, me nafangawen lúkú. Ika sise túmúnúéch, ekkena mettóch ra tongeni efisi ach sipwe álleasolap me ú ngeni Kot.​—w16.06, p. 11.

Met ewe mwán mi uwei eú pisekin mak me ekkewe wonomén mwán mi uwou ar pisekin ninni lón Isikiel sópwun 9 ra liosuetá?

Sia weweiti pwe ra liosuetá chókkewe mi nóm lón láng mi wor wiser lón katalóón Jerusalem me epwe pwal wor wiser lón katalóón án Satan ei fénúfan mi ngaw lón Armaketon. Lón ach ei fansoun, ewe mwán mi uwei ewe pisekin mak, a liosuetá Jesus Kraist, i epwe esissilla chókkewe repwe kúna manaw.​—w16.06, p. 16-17.

Met sókkun mettóch a itá tongeni amóeló Paipel nge ese sópwéch?

Ewe Paipel ese móróló ren (1) tatakkisilóón ekkewe taropwe a mak lón, áwewe chék ren ekkewe mi ffér seni papyrus me únúchen man; (2) ekkewe néúwisin mwú me néúwisin lamalam ra ú ngeni me sótun amóeló; me (3) án aramas sótun siwili masouan.​—w16.07, p. 4-7.

Ifa usun emén Chón Kraist epwe tongeni ámecheresaaló nónnómun manawan?

Makkeetiw met mi lamot ngeni manawom, me kosap mééni mettóch rese wesewesen lamot ngonuk. Filatá fite úkúkún moni ka tongeni néúnaaló. Fangóló, are péútaaló ekkewe mettóch kese chúen áeá me omusa óm liwinimmang. Ekisikisaaló óm fansoun fán iten angangen moni, me ekieki ifa usun kopwe alapaaló óm angangen afalafal.​—w16.07, p. 12.

Me ren ewe Paipel ifa ewe mettóch mi múrinné seni kolt are silifer?

Hiop 28:12, 15 a áiti ngenikich pwe tipachem seni Kot a múrinné seni kolt are silifer. Lón óm kútta án Kot tipachem, achocho le tipetekison fansoun meinisin me epwe péchékkúl óm lúkú.​—w16.08, p. 18-19.

Mi fich ngeni emén Chón Kraist mwán ikenái an epwe oppuku elisan wóón sapan me ngáchin?

Lón ekkóch fénú, mi tongeni fich an epwe wor elisen emén mwán nge mi ngerengeréch, me esap pwal aosukosuka aramas ar repwe mochen aúseling ngeni ewe pwóróus sia uwei ngeniir. Nge ekkóch pwiich kewe ra tongeni filatá ar resap ina usun. (1 Kor. 8:9) Nge lón eérenien ekkóch leeni, ese fich ngeni Chón Kraist mwán an epwe oppuku elisan wóón sapan me ngáchin.​—w16.09, p. 21.

Ifa sókkofesenin sile, wewe, me tipachem?

Emén mi wor an sile, i a kan akkangei pwóróus. Emén mi wor an wewe, a tongeni kúna ifa usun och pwóróus a riri ngeni pwal ekkóch pwóróus. Nge emén mi tipachem, a tongeni ochufengeni an sile me wewe me áeáfichiir lón manawan.​—w16.10, p. 18.