1, 2. (a) Pwata sia kan meefi aúrek? (Ppii ewe sasing lepoputáán ei lesen.) (b) Met sipwele káé lón ei lesen?

 IKENÁI, Satan a “fetalfeil usun eman laion mi wörüwör, nge a kütta iö epwe oromala.” (1 Pet. 5:8; Pwär. 12:17) Pokiten ena, a mmen áweires manawen aramas, pwal mwo nge néún Kot chón angang ra aúrek. A wor ekkóch atun néún Kot kewe aramas lóóm ra pwal aúrek. Áwewe chék, Paipel a erá pwe fán ekkóch King Tafit a meefi aúrek. (Kölf. 13:2) Aposel Paulus a “öürek fän iten ekewe mwichefel meinisin.” (2 Kor. 11:28) Nge met sia tongeni féri lupwen sia meefi pwe usun itá sia kokoló ren ach aúrek?

² Semach we mi tong lón láng a álisi néún kewe chón angang lóóm ar repwe ngaseló seni ar meefi aúrek, me a pwal mochen álisikich ikenái. Iei án Paipel pesepes ngenikich: “Oupwe likiti ngeni Kot ämi öürek meinisin, pun i a ekieki met oupwe feiöch ren.” (1 Pet. 5:7) Nge ifa usun kopwe féri ena? Sipwe ppii rúáánú alen ach sipwe féri. Ka tongeni (1) iótek, (2) álleani me ekilonei án Kot Kapas, (3) mut ngeni án Jiowa we manaman mi fel epwe álisuk, me (4) uwawu meefiom ngeni emén ka lúkúlúk wóón. Lón ach káé ekkeei rúáánú mettóch, ekieki ifa usun ka tongeni apwénúetá lón pwisin manawom.

3. Ifa usun kopwe “monätä won ewe Samol mi Lapalap om weires”?

³ Ewe áeúin alen ach sipwe likiti ngeni Jiowa ach aúrek, ina ach sipwe iótek ngeni seni letipach. Lupwen ka aúrek, Semom we mi tong lón láng a mochen kopwe uwawu ngeni meefiom seni le alóllóólun letipom. Ewe soumakken kélfel Tafit a tingormaú ngeni Jiowa, a erá: “Ai Kot, kopwe aüselinga ai iotek.” Lón pwal ena chék kél a pwal erá: “Kopwe monätä won ewe Samol mi Lapalap om weires, pwe i epwe tümwünuk.” (Kölf. 55:1, 22) Mwirin óm féri úkúkún óm tufich le pwákini óm osukosuk, óm iótek ngeni Jiowa seni enletin letipom epwe álisuk lap seni óm kopwe aúrek. Nge, ifa usun iótek a tongeni álisikich le túmúnú pwe sisap kokoló lón ach aúrek?​—Kölf. 94:18, 19.

4. Pwata a mmen lamot iótek lupwen sia aúrek?

⁴ Álleani Filipi 4:6, 7. Ifa usun Jiowa a pélúweni ach kewe iótek sia eáni iteitan seni letipach? A álisikich ach sipwe meefi kinamwe me túmúnúkich seni ekiek me memmeef ese pwúng. Kot a álisikich ach sipwe meefi ewe sókkun kinamween letip mi alóllóól me túmúnúkich seni ach meefi aúrek me niwokkus. Chómmóng pwiich kewe ra meefi ei esin kinamwe. Ka pwal tongeni ina usun. “Än Kot kinamwe” a tongeni álisuk óm kopwe pworacho ngeni ese lifilifil weires epwe toruk! Ka tongeni unusen lúkúlúk wóón án Jiowa ei pwon: “Kosap pwal apilüküngau, pun ngang om Kot. Üpwe apöchökülok, üpwe pwal alisuk.”​—Ais. 41:10.

5. Ifa usun án Kot we Kapas a tongeni álisuk óm kopwe meefi kinamween letipom?

⁵ Ewe oruuen alen ach sipwe meefi kinamwe lón letipach, ina ach ákkállea me ekkekilonei ekkewe wokisin lón Paipel. Pwata a lamot ena? Pún ewe Paipel ina án Kot Kapas. A masou ren ekkewe kapasen fén mi tipachem me álilliséch seni ewe Chón Férikich. Fansoun meinisin lupwen ka aúrek, ka tongeni ekiekiéchú usun ekiekin Kot me ekilonei ifa usun an kewe kapasen emmwen ra tongeni apéchékkúlok. Ei mettóch a tongeni álisuk le pworacho ngeni, ekisikisaaló, are pwal mwo nge ttii sonuk aúrek. Jiowa a erá pwe ach ákkálleani an we Kapas a tongeni álisikich ach sipwe ‘pöchökül o tipepwora’ nge sisap “niuokus” me “rükö.”​—Jos. 1:7-9.

6. Ifa usun án Jesus kewe kapas ra tongeni álisuk?

⁶ Sia álleani lón án Kot we Kapas usun napanapen án Jesus fós ngeni aramas. Ra pwapwaiti le aúseling ngeni pún an kapas a oururuur me ekinamweer, ákkáeúin chókkewe mi apwangapwang are letipechou. (Álleani Mateus 11:28-30.) Jesus a fókkun áfánni meefien aramas. (Mark. 6:30-32) I a pwon pwe epwe álisi néún kewe aposel, chienan kewe lón an sáifetál, iwe, epwe pwal álisikich ikenái. Ese pwal lamot ach sipwe wesewesen nóm ren Jesus ren ach sipwe kúna feiéch. Jesus, ach we King lón láng a chék sópweló le pwáraatá an tong ngenikich. Ina minne, lupwen ka aúrek, ka tongeni lúkúlúk pwe epwe nónnóm reom me álisuk lón fansoun mi fich. Jesus a ngenikich ápilúkúlúk me pwora pwe sipwe tongeni pworacho ngeni aúrek.—Ipru 2:17, 18; 4:16.

7. Ifa usun án Kot we manaman mi fel a álisikich?

⁷ Jesus a pwon pwe Semach we epwe fang ngenikich an we manaman mi fel lupwen sia tingor. (Luk. 11:10-13) Ifa usun  ei aúlúngátin alen ach sipwe ekisikisaaló ach aúrek epwe álisikich? Án Kot we manaman mi fel a álisikich le ámááraatá ekkewe napanap mi múrinné a nóm ren ach we Kot mi manaman. (Kol. 3:10) Lón Paipel, ekkeei napanap ra iteni “uän Ngün.” (Álleani Kalatia 5:22, 23.) Lupwen sia ámááraatá ekkena napanap mi múrinné, epwe échúló ach riri ngeni ekkewe ekkóch, me sipwe ttii senikich ekkewe mettóch epwe tongeni efisatá aúrek. Sipwe ppii ifa usun uwaan án Kot we manaman mi fel epwe álisikich lón ekkóch mettóch.

8-12. Ifa usun uwaan án Kot we manaman mi fel a tongeni álisuk?

⁸ “Chen, pwapwa, kinamwe.” Lupwen ka súféliti aramas, kopwe kúna pwe epwe kisikisiló óm aúrek. Ifa usun? Lupwen ka pwáraatá tong me asamolu ekkewe ekkóch, fán chómmóng kopwe ttii sonuk ekkewe mettóch mi efisatá ekkewe memmeef ren choweán song, lichippúng, me weires. Ach féri ei epwe ámecheresi an epwe wor kinamwe lefilach me ekkewe ekkóch.​—Rom 12:10.

⁹ “Mosonotam, kirikiröch, aramasöch.” Ewe Paipel a erá: “Oupwe eäni kirikiröch o leluköch lefilemi, oupwe amusamusfengen.” (Ef. 4:32) Lupwen sia apwénúetá ena emmwen, sipwe tongeni kinamwefengen me túmúnúkich seni ekkewe mettóch mi tongeni efisi aúrek. Pwal och, epwe álisikich le ataweei ekkewe osukosuk mi ppiitá pokiten sise unuséch.

¹⁰ “Allükülük.” Ikenái, fán chómmóng sia aúrek usun moni me pisek. (SalF. 18:11) Ifa usun sipwe ttii senikich ena sókkun aúrek? Mi lamot sipwe apwénúetá án aposel Paulus ei kapasen fén, a erá: “Oupwe menemenöch ren mine oua eäni.” Péchékkúlen ach lúkú Jiowa epwe álisikich le lúkúlúk pwe i epwe tongekich me awora minne sia osupwangan. Iei an pwon: “Ngang üsap fokun likituk, üsap pwal tümwününgau ngonuk.” Ina popun, sia pwal tongeni aloni alon Paulus ei: “Ewe Samol i ai Soualilis, üsap fokun niuokus, met aramas repwe tongeni föri ngeniei?”​—Ipru 13:5, 6.

¹¹ “Tipetekison me tipepwora.” Ekieki álilliséchún ach sipwe pwáraatá tipetekison me tipepwora, are pwisin nemeniéchúkich. Ekkeei napanap repwe túmúnúkich ach sisap féri are apasa mettóch epwe tongeni efisi ach sipwe aúrek. Kopwe pwal feiéch ika ka atowauakoló seni “sokun koum, chou me song,” kosap pwal “akürang ngeni aramas ika turunufaser.”​—Ef. 4:31.

¹² Mi lamot óm kopwe tipetekison pwe kopwe lúkúlúk wóón “pöün Kot mi manaman” me ‘likiti ngeni Kot om öürek meinisin.’ (1 Pet. 5:6, 7) Ika ka tipetekison, Jiowa epwe álisuk me túmúnuk. Lupwen ka mirititi met ka tongeni féri me met kese tongeni féri, iwe epwe álisuk óm kosap lúkúlúk wóón pwisin en. Epwe kisikisiló óm aúrek pún kopwe lúkúlúk wóón Kot.​—Mik. 6:8.

13. Met weween alon Jesus ei lupwen a apasa: “Ousap öürek”?

¹³ A mak lón Mateus 6:34 (álleani) án Jesus kapasen fén mi fókkun múrinné, a erá: “Ousap öürek.” Usun a mmen weires ngenikich ach sipwe apwénúetá ei fén. Nge met weween alon Jesus na? Sia fen silei pwe Tafit me Paulus ra meefi aúrek fán ekkóch. Ina minne, alon Jesus na ese wewe ngeni pwe emén néún Kot chón angang esap fán eú an epwe meefi aúrek. Nge a álisi néún kewe chón káé ar repwe weweiti pwe án emén epwe kon ssenúkúló  an meefi aúrek esap tongeni áwesaaló an kewe osukosuk. Iteiten rán epwe torikich och osukosuk are weires, ina popun ekkewe Chón Kraist itá resap pwal awatteelóói ar aúrek ren ar ekkekieki usun ar kewe osukosuk a fen fis lóóm are ekkewe osukosuk ra ekieki pwe epwe fis lón mwach. Ifa usun án Jesus kapasen fén a tongeni álisuk le ekisikisaaló watteen aúrek?

14. Ifa usun ka tongeni ekisikisaaló óm aúrek usun chék Tafit?

¹⁴ Fán ekkóch aramas ra aúrek pokiten ar kewe féfférmwáál lóóm. Ra tongeni meefi watteen mengiringir ren met ra féri inaamwo ika a fen fis lóóm lóóm. Fán ekkóch a kon watte án King Tafit aúrek pokiten an kewe féfférmwáál. A apasa: “Üa ngüngü pokiten riaföün lelukei.” (Kölf. 38:3, 4, 8, 18) Lón ena atun, Tafit a féri eú mettóch mi fókkun tipachem. A lúkúlúk wóón án Jiowa úméúméch me an omusaaló tipis. Iwe Tafit a meefi pwapwa ren an silei pwe Kot a fen omusaaló tipisin.​—Álleani Kölfel 32:1-3, 5.

15. (a) Met sia pwal tongeni káé seni Tafit? (b) Met ka tongeni féri pwe epwe kisikisiló óm aúrek? (Ppii ewe pwóór “ Mettóch Epwe Ekisikisaaló Aúrek.”)

¹⁵ Lón pwal ekkóch atun, neman kopwe aúreki manawom iei. Áwewe chék, lupwen Tafit a makkeei Kölfel 55, a niwokkus pwe epwe tongeni ninniiló. (Kölf. 55:2-5) Nge, ese mut ngeni an aúrek an epwe atai an lúkúlúk wóón Jiowa. Tafit a tingormaú ngeni Jiowa an epwe álisi lón an kewe osukosuk, nge a silei pwe mi lamot i epwe pwal angang wóór. (2 Sam. 15:30-34) Ka tongeni káé eú lesen seni Tafit. Kosap mut ngeni aúrek an epwe akokokoló, nge kopwe fen achocho úkúkún óm tufich le pwákini óm osukosuk me lúkú pwe Jiowa epwe túmúnuk.

16. Ifa usun weween iten Kot we a apéchékkúla óm lúkú?

¹⁶ Fán ekkóch, emén Chón Kraist neman epwe aúreki met epwe tongeni fis lón mwach. Nge, ese lamot óm kopwe aúreki ekkewe mettóch resaamwo fis. Pwata? Pún fán chómmóng, sia aúreki watteen ngawen och mettóch epwe fis, nge lupwen a fis, ese kon ngaw usun met sia ekieki. Pwal och, chechchemeni pwe ese wor och mettóch ese tufich ngeni Kot an epwe nemeni. Pwisin itan we a wewe ngeni “A Efisi An Epwe Wiliti.” (Eks. 3:14, NW) Ina minne, ese wor popun ach sipwe aúreki met epwe fis lón mwach, pokiten weween iten Kot we a pwáraatá pwe meinisin minne a tipeni fán iten aramas epwe pwénútá. Ka tongeni lúkúlúk pwe Kot epwe efeiéchú néún kewe aramas mi tuppwél me álisiir le ekisikisaaló ar aúreki ekkewe mettóch lóóm, ikenái, me lón mwach.

17, 18. Ifa usun ewe sókkun pwóppwóróusfengen fán wenechar epwe tongeni álisuk lupwen ka aúrek?

¹⁷ Ewe arúáánún alen ach sipwe kúna álillis  lupwen sia aúrek, ina ach pwóppwóróus ngeni emén sia lúkúlúk wóón fán wenechar. Pwúlúwom, chiechiom, are emén mwán mi ásimaw lón ewe mwichefel a tongeni álisuk le weweéchúti met a fiffis lón manawom. Ewe Paipel a erá: “Än eman aramas öürek lon lelukan a afisätä lolilen, nge eu kapas pwetete a apwapwai i.” (SalF. 12:25) Ewe Paipel a pwal apasa: “Are esap wor kapasen öüröür, esap fis mine aramas ra ekiekietä. Nge are a wor chomong chon öüröür, a fisiöch mine ra ekiekietä.”​—SalF. 15:22.

¹⁸ Ach kewe mwich lón ach mwichefel a pwal tongeni álisikich le ekisikisaaló ach aúrek. Iteiten wiik lón ekkewe mwich, ka chiechi ngeni pwiium kewe chón lúkú, chókkewe mi tongeok me mochen apéchékkúlok. (Ipru 10:24, 25) Ach “apöchökülafengenikich” epwe álisuk me ámecheresi óm okkufu ese lifilifil mettóch ka aúreki.​—Rom 1:12.

19. Pwata ka tongeni lúkúlúk pwe óm riri ngeni Kot epwe apéchékkúlok?

¹⁹ Emén mwán mi ásimaw lón Canada a kúna úkúkún lamoten an epwe likiti ngeni Jiowa an aúrek. A mmen weires an angang lón sukul usun emén sense me emén counselor. A pwal úri och semmwen mi efisi an epwe meefi aúrek. Met a álisi an epwe péchékkúl? A angang weires le apéchékkúla an riri ngeni Jiowa, ina met a ákkáeúin álisi. Pwal och, chiechian kewe mi enlet ra fókkun álilliséch ngeni lón fansoun weires. A pwal suuk alen ar pwóppwóróusfengen me pwúlúwan we me a kan ereni enletin meefian. Pwal och, chienan kewe mwán mi ásimaw me ewe chónemmwen mi wisen sáifetál ra álisi an epwe eáni án Jiowa ekiek usun nónnómun manawan. Emén tokter a pwal álisi le weweiti an semmwen, iwe a féri ekkesiwil lón manawan pwe epwe tongeni wor an fansoun asésé me exercise. Ekis me ekis, a silei ifa usun an epwe nemeni manawan me an kewe memmeef. Lupwen a fis ngeni mettóch ese tongeni nemeni, a lúkúlúk wóón Jiowa an epwe álisi.

20. (a) Ifa usun sia tongeni likiti ngeni Kot ach aúrek? (b) Met sipwe pwóróus wóón lón en lesen mwirin ei?

²⁰ Lón ei lesen, sia káé usun lamoten ach sipwe likiti ngeni Kot ach aúrek ren ach ikkiótek ngeni, me ákkálleani an we Kapas me ekkekilonei. Sia pwal káé lamoten ach sipwe mut ngeni án Jiowa we manaman mi fel epwe álisikich, fós ngeni emén sia lúkúlúk wóón, me fiti án Chón Kraist kewe mwich. Lón en lesen mwirin ei, sipwe káé ifa usun Jiowa a álisikich ren an awora ngenikich ewe ápilúkúlúk ach sipwe kúna feiéch lón mwachkkan.​—Ipru 11:6.