1, 2. Pwata ekkewe Chón Kraist mi kepit ra fókkun mochen silei masouen Rom sópwun 8?

 ATUN Áchechchemen án Jesus we máló, neman sia álleani Rom 8:15-17. Ekkeei wokisin ra áweweei ifa usun ekkewe Chón Kraist mi kepit ra silei pwe ra eáni ewe ápilúkúlúkún manaw lón láng tori feilfeiló chék. Rom 8:1, a fósun ekkewe mi kepit pwe iir ra “nonom lon Kraist Jesus.” Nge met, Rom sópwun 8 a weneiti chék ekkewe mi kepit? Are a pwal tongeni álisi chókkewe mi eáni ápilúkúlúkún manaw esemuch wóón fénúfan?

² Rom sópwun 8 a ákkáeúin mak fán iten ekkewe mi kepit. Iir ra angei án Kot we manaman mi fel me ‘witiwiti pwe Kot epwe angeir pwe repwe nöün o epwe angasala unusen inisir.’ (Rom 8:23) Lón mwachkkan, iir repwe néún Kot lón láng. Jiowa a fen omusaaló ar kewe tipis ren manamanen ewe méén kepich. Ra fen kúna pwúng me ren Kot pwe repwe tongeni wiliti néún.​—Rom 3:23-26; 4:25; 8:30.

3. Pwata a lamot pwe chókkewe mi eáni ápilúkúlúkún manaw esemuch wóón fénúfan repwe pwal káé masouen Rom sópwun 8?

³ Iwe nge, lón Rom sópwun 4, Paulus a mak usun emén  mwán esap i emén mi kepit, nge me ren Jiowa i emén mwán mi pwúng. Ina i Apraham. Ena mwán mi tuppwél a manaw lóóm lóóm me mwen án Jesus fangóló manawan pwe epwe eú méén kepich. (Álleani Rom 4:20-22.) Lón ei fansoun, ekkewe Chón Kraist mi pwáraatá ar lúkú mi eáni ápilúkúlúkún manaw esemuch wóón fénúfan, ra pwal tongeni aramas pwúng me ren Jiowa. Iir ra pwal tongeni kúna álillis seni ekkewe kapasen fén mi kawor lón Rom sópwun 8.

4. Lupwen sia álleani Rom 8:21, met sipwe pwisin eisinikich?

⁴ Lón Rom 8:21, sia kúna án Jiowa kapasen alúkúlúk pwe an we ótót sefé epwe war me aramas repwe ngaseló seni tipis me máló. Ena wokisin a apasa pwe iir repwe pwapwaiti ar “ngasala me ling” usun néún Kot. Ka lúkúlúk pwe kopwe nóm lón ena ótót sefé? Iei sipwele ppii met mi lamot sipwe féri pwe sipwe nónnóm lón.

5. Met Paulus a fós usun lón Rom 8:4-13?

⁵ Álleani Rom 8:4-13. Lón Rom sópwun 8, Paulus a fós usun ruu sókkun aramas, chókkewe mi manaw “lon pekin fituk” me chókkewe mi manaw “lon pekin Ngün.” Ekkóch ra ekieki pwe Paulus a fós usun ekkewe aramas esap iir Chón Kraist me ekkewe iir Chón Kraist. Nge lón ei puken Rom, Paulus a mak ngeni ekkewe Chón Kraist, iir kewe Kot a ‘köriir pwe repwe chon pin.’ (Rom 1:7) Ina minne, chókkana mi manaw “lon pekin fituk” me chókkana mi manaw “lon pekin Ngün,” iir Chón Kraist. Iwe, met sókkofeseniir?

6, 7. (a) Ikkefa ekkóch weween ewe kapas “fituk” me lón ewe Paipel? (b) Ifa usun Rom 8:4-13 a néúnéú ewe kapas “fituk”?

⁶ Lupwen ewe Paipel a néúnéú ewe kapas “fituk,” a tongeni weneiti sókkopaten mettóch. Fán ekkóch a tongeni wewe ngeni wesewesen futuken inisich. (Rom 2:28, Testament Mi Fö; 1 Kor. 15:39, 50) A pwal tongeni weneiti ewe riri lón famili. Áwewe chék, Paulus a erá pwe ekkewe chón Jus iir ‘aramasan lon fitukan.’​—Rom 9:3.

⁷ Iwe, met weween alon Paulus we lupwen a fós usun chókkewe mi manaw  “lon pekin fituk” lón Rom 8:4-13? Ren ach sipwe silei, sia tongeni nengeni Rom 7:5. Paulus a makkeei: “Lupwen sia manau lon fitukach, ewe Allük a aselipato ekewe mochenian tipis lon inisich.” Lón ei wokisin Paulus a áweweei pwe ekkewe aramas mi manaw “lon pekin fituk,” iir chókkewe mi nefotofot wóón me fitaaló pwisin ar mochen mi ngaw me ra féfféri met chék ra mochen.

8. Pwata mi lamot án Paulus éúréúra ekkewe Chón Kraist mi kepit usun ar repwe túmúnúúr pwe resap manaw “lon pekin fituk”?

⁸ Pwata Paulus a éúréúra ekkewe Chón Kraist mi kepit ar repwe túmúnúúr pwe resap manaw “lon pekin fituk”? Me pwata mi pwal lamot ngeni meinisin Chón Kraist ikenái? Pún ese lifilifil ika en emén chón angang mi tuppwél ngeni Kot, nge ka tongeni poputá le akkomwa lón manawom pwisin mochenum kewe. Áwewe chék, Paulus a makkeei pwe ekkóch me lein ekkewe Chón Kraist lón Rom “ra angang ngeni püsin inisir.” Minne a erá a tongeni weneiti ekkewe mettóch ra akkomwa lón manawer, choweán féfférún lisowu, mwéngé, me pwal ekkóch minen apwapwa. (Rom 16:17, 18; Fil. 3:18, 19; Jut. 4, 8, 12) Pwal och, ren och fansoun, emén Chón Kraist mwán lón ewe mwichefelin Korint a pwúlúweni “pwülüen saman” we. (1 Kor. 5:1) A ffat pwe mi lamot ngeni ekkewe popun Chón Kraist án Paulus na kapasen éúréúr usun ar repwe túmúnúúr pwe resap manaw “lon pekin fituk.”—Rom 8:5, 6.

9. Met án Paulus we kapasen éúréúr lón Rom 8:6 ese weneiti?

⁹ Ena kapasen éúréúr a pwal weneitikich ikenái. Pún pwal mwo nge chókkewe ra fen angang ngeni Jiowa ren fite fite ier ra tongeni poputá le manaw “lon pekin fituk.” Iwe, alon Paulus na a itá wewe ngeni ach sisap fókkun ekieki choweán mwéngé, angangen moni, minen kunou, are pwúpwúlú? Esap ina weween. Ekkena mettóch ikkena pwisin kinikinin manawen aramas. Pwal mwo Jesus a pwapwaiti mwéngé me a pwal amwéngééni ekkewe ekkóch. A pwal mirititi lamoten an epwe asésé. Paulus a pwal erá pwe ewe féfférún lisowu mi wor lamotan lón pwúpwúlú.

10. Met weween ewe itiitin kapas, “nonom fän nemenien”?

 ¹⁰ Iwe, met weween án Paulus we erá “nonom fän nemenien fituk”? Ewe kapasen Krik Paulus a néúnéú a weneiti án emén unusen ánnefota ekiekin me an kewe kókkót wóón och mettóch. Emén sousile a áweweei pwe ei mwuten kapas a weneiti ekkewe aramas “ra kon pwapwaiti, fóffós usun,” me nefotofot wóón pwisin mocheniir kewe. Ra mut ngeni mocheniir kana an epwe nemeni manawer.

11. Ikkefa ekkewe mettóch ra tongeni kon nampa eú me rech?

¹¹ A lamot ngeni ekkewe Chón Kraist lón Rom ar repwe etittina pwisin iir me ppii ika met ra akkomwa lón manawer. Ra akkomwa ekkewe mettóchun “fituk”? Lón ei fansoun, a pwal lamot ngenikich ach sipwe ekieki ika met a kon nampa eú lón manawach. Met sia kon sani le fóffós usun? Met sia wesewesen sani le féfféri? Ekkóch neman repwe mirititi pwe ra chék ekkekieki le sótuni sókkopaten wain, elinga imwer, mééni mineféén úf, kútta alen an epwe wor manawen néúr moni, are akkóta le ló kukkunou ekis. Ekkena mettóch ese fókkun wor ngawer. Neman ikkena kinikinin manawach. Áwewe chék, Jesus a pwal mwo nge féri wain atun eú apwúpwúlú, me Paulus a pesei Timoty an epwe “ünümi ekis wain” fán iten péchékkúlen inisin. (1 Tim. 5:23; Joh. 2:3-11) Nge sap minne wain ina ewe mettóch Jesus me Paulus ra kon aúcheani lón manawer. Nge ifa usun kich? Met sia kon aúcheani lón manawach?

12, 13. Pwata a lamot sipwe túmúnú minne sia nefotofot wóón?

¹² Iei án Paulus éúréúr: “Are sia nonom fän nemenien fituk, sopolan mäla.” (Rom 8:6) Met weween alon na? Ika sia manaw “lon pekin fituk,” epwe tongeni péút senikich ach riri ngeni Jiowa iei me ewe ápilúkúlúkún manaw esemuch lón mwachkkan. Nge itá epwele chék ina sópwólóón? Aapw, pún emén aramas a tongeni ekkesiwili manawan. En mi chemeni ewe mwán mi limengaw manawan lón Korint, ewe a katowu? I a ekkesiwili manawan me úkútiw le fitaaló mocheniaingawen inisin. Iwe, a angangsefál ngeni Jiowa fán limeliméch.​—2 Kor. 2:6-8.

¹³ Ika a tufich ngeni ena mwán an epwe siwil, iwe a pwal tufich ngeni ekkewe Chón Kraist ikenái, ákkáeúin ika rese kon manaweni manawen futuk epwe usun ena mwán lón Korint. Iwe lupwen emén Chón Kraist ikenái a poputá le fitaaló an mochenian tipis lap seni án Jiowa emmwen, i mi pwal tongeni ekkesiwil. Ach chechchemeni án Paulus we éúréúr a tongeni amwékútúkich le féri ekkesiwil ika pwe mi lamot sipwe féri.

14, 15. (a) Met Paulus a pesei ngenikich ach sipwe nónnóm fán nemenian? (b) Met “nonom fän nemenien Ngünmifel” ese wewe ngeni?

¹⁴ Mwirin án Paulus fós usun efeiengawen ach sipwe “nonom fän nemenien fituk,” i a pwal erá: “Are sia nonom fän nemenien Ngünmifel, sopolan manau me kinamwe.” A ifa me amwararen ena sókkun feiéch epwe tongeni torikich!

¹⁵ Nge án emén “nonom fän nemenien Ngünmifel,” án Kot we manaman mi fel, ese wewe ngeni an ese fókkun ekieki manawan.  Ese wewe ngeni pwe a chék ekieki me fós usun Jiowa are ewe Paipel. Áwewe chék, ekkewe Chón Kraist lemanawen ekkewe aposel iir pwal usun chék aramas meinisin. Iir ra mwéngé me ún, pwúpwúlú, túmúnú ar famili, me angang.​—Mark. 6:3; 1 Tes. 2:9.

16. Ifa ewe mettóch Paulus a akkomwa lón manawan?

¹⁶ Nge Paulus me ekkewe popun Chón Kraist rese mut ngeni ekkena esin mettóch ar repwe akkomw lón manawer. Áwewe chék, sia silei pwe ren án Paulus epwe atufichi manawan, i a ffér tento. Nge an na angang esap ina met a kon akkomwa lón manawan. An angang ngeni Kot ina met a akkomwa lón manawan. Paulus a nefotofot wóón an angangen afalafal me asukula aramas. (Föför 18:2-4; 20:20, 21, 34, 35.) A lamot ekkewe Chón Kraist lón Rom repwe áppirú Paulus, iwe pwal ina usun kich.​—Rom 15:15, 16.

17. Ikkefa ekkewe feiéch sipwe kúna ika “sia nonom fän nemenien Ngünmifel”?

¹⁷ Epwe ifa usun nónnómun manawach ika sipwe nefotofot wóón ach angang ngeni Jiowa? Rom 8:6 a apasa: “Are sia nonom fän nemenien Ngünmifel, sopolan manau me kinamwe.” Ach féri ena a kapachelong ach sipwe mut ngeni ekiekich an epwe nóm fán emmwenien án Jiowa we manaman me káé ach sipwe eáni pwal an ekiek. Jiowa a pwonei ngenikich eú manaw mi pwapwa sipwe kúna iei me ewe manaw esemuch lón mwachkkan.

18. Ifa usun sia tongeni meefi kinamwe atun “sia nonom fän nemenien Ngünmifel”?

¹⁸ Met weween alon Paulus we pwe ika “sia nonom fän nemenien Ngünmifel” sia tongeni meefi kinamwe? Meinisin aramas ra mochen meefi kinamwe, ákkáeúin ewe kinamween ekiek, iwe nge fitemén chék ra kúna. Sia kilisou ngeni Jiowa pwe sia tongeni meefi ewe enletin kinamween ekiek. Sia pwal tongeni kinamwefengen me chón ach famili me chón ewe mwichefel. Pokiten kich aramas tipis, fán ekkóch sia osukosukfengen me pwiich kewe. Nge lupwen a ppiitá ena esin osukosuk, sia fiti án Jesus ei kapasen éúréúr: “Kopwe achä ngonuk pwiüm.” (Mat. 5:24) Chechchemeni pwe pwiium kewe ra pwal angang ngeni Jiowa Kot, “i popun ach kinamwe.”​—Rom 15:33; 16:20.

19. Ifa ewe sókkun kinamwe mi kkóló aúchean sia tongeni eáni?

¹⁹ Ika sia “nonom fän nemenien Ngünmifel,” sipwe pwal kinamwefengen me Kot. Ewe soufós Aisea a apasa: “[Jiowa] ka ngeni chokewe mi kamwöchünük womw kinamwe, pun ra anomu ar apilükülük womw.”​—Ais. 26:3; álleani Rom 5:1.

20. Pwata ka kilisou ren ewe kapasen pesepes lón Rom sópwun 8?

²⁰ Ese lifilifil ika sia eáni ewe ápilúkúlúkún manaw esemuch lón láng are wóón fénúfan, nge kich meinisin sia tongeni kúna feiéch seni án Kot we kapasen éúréúr lón Rom sópwun 8. Sia fókkun kilisou pwe ewe Paipel a pesekich ach sipwe nefotofot wóón ach angang ngeni Jiowa nge esap wóón pwisin mochenich kewe. Sia silei pwe ren ach “nonom fän nemenien Ngünmifel,” sia tongeni kúna eú liffang seni Kot mi amwarar, ewe Paulus a mak usun, ina ewe “manau esemüch lon Kraist Jesus ach Samol.”​—Rom 6:23.