1. Pwata a lamot án emén epwe papatais? (Ppii ewe sasing lepoputáán ei lesen.)

 ITEITEN ier, fitengeréú chón káé Paipel ra papatais. Chómmóng me leir iir kúkkún me sáráfé. Neman ra fen mááritá lón ewe enlet. En emén me leir? Ika ina, a mmen fókkun éch met ka féri. A lamot ngeni emén me emén Chón Kraist ar repwe papatais. Me a lamot papatais ren án emén epwe kúna amanaw me eáni ewe manaw tori feilfeiló chék.​—Mat. 28:19, 20; 1 Pet. 3:21.

2. Pwata itá ese wor popun óm kopwe niwokkus le fangóló manawom ngeni Jiowa?

² Lupwen ka papatais, Jiowa a poputá le efeiéchuk lón chómmóng napanap. Nge a pwal wor ekkóch minefé wisom. Ifa usun? Lón ewe rán ka papatais, ewe mi eáni ewe afalafalen papatais a eis: “Ren án Jesus Kraist asorun méén kepich, ka fen aier seni óm kewe tipis me fangóló manawom ngeni Jiowa pwe kopwe féri letipan?” Iwe ka pélúweni, ewer. Ka pwon  ngeni Jiowa pwe kopwe tongei me kopwe akkomwa óm angang ngeni lón manawom. Itá epwe wor popun kopwe niamam ren óm eáni ena pwon mi aúchea? Aapw! Kosap fókkun tongeni niamam ren óm mut ngeni Jiowa an epwe emmweni manawom. Chókkewe rese silei Jiowa, ra chóni án Satan ei fénúfan. Ewe Tefil ese tongeer me ese pwal tongeok. Ren enletin, epwe pwapwa ika a péút sonuk óm ápilúkúlúkún manaw esemuch pún weween nge ka peni i nge likitaló Jiowa.

3. Ifa usun Jiowa a fen efeiéchuk pokiten óm fangóló manawom ngeni?

³ Ekiek ifa usun Jiowa a fen efeiéchuk pokiten óm fangóló manawom ngeni me papatais. Ka fangóló manawom ngeni Jiowa, ina popun ka tongeni apasa fán lúkúlúk: “Üsap niuokus, pun ewe Samol mi Lapalap a nom rei. Met aramas repwe tongeni föri ngeniei?” (Kölf. 118:6) Ese pwal wor feiéch mi fókkun aúchea lap seni óm peni Kot me óm silei pwe a pwapwa reom.

4, 5. (a) Ifa usun ach fangóló manawach ngeni Kot ina pwisin wisach ach sipwe apwénúetá? (b) Ikkefa ekkewe sóssót meinisin Chón Kraist repwe kúna?

⁴ Pokiten en emén Chón Kraist mi papatais, iwe óm riri ngeni Jiowa esap usun óm tongeni álemwiri eú fénúen óm we famili. Nge, wisom óm kopwe anganga pwisin óm kúna amanaw, inaamwo ika ka chúen nóm ren semom kewe me inom. Pwata a lamot óm kopwe chechchemeni ena? Pún kich meinisin sise silei met sókkun sóssótun lúkú epwe torikich. Áwewe chék, neman ka papatais atun kesaamwo teenage. Nge iei, atun ka teenage a kan ppiitá ekkóch memmeef are osukosuk ese mwo fis ngonuk me lóóm. Iei alon emén teenage nengngin: “Emén kúkkún, neman ese lichippúng ren an emén Chón Pwáraatá Jiowa pokiten chék an ese mwéngé enen chienan we chón sukul cake atun ránin uputiwan. Nge mwirin fitu ier, lupwen a péchékkúleló mochenin le lisowu, a lamot epwe unusen lúkú pwe an álleasochisi án Jiowa allúk, ina ewe kefil mi fókkun múrinné iteitan.”

⁵ Esap chék ekkewe sáráfé epwe toriir ekkewe sóssót esaamwo fis ngeniir fán eú. Pwal mwo nge chókkewe ra papatais lupwen ra watte, repwe kúna sóssótun ar lúkú lón ewe sókkun napanap rese pwal ekieki. Ar sóssót epwe tongeni pop seni ar ririin pwúpwúlú, nónnómun péchékkúlen inisiir, are seni lón ar angang. Ese lifilifil ika kich watte are kúkkún, nge lupwen sia kúna sókkopaten sóssót, mi lamot emén me emén kich sipwe tuppwél ngeni Jiowa.​—Jas. 1:12-14.

6. (a) Met kopwe chechchemeni usun óm fangóló manawom ngeni Jiowa? (b) Met ka tongeni káé seni 2 Korint 4:7?

⁶ Ren óm kopwe akkamwéchú óm tuppwél ngeni Jiowa, mi lamot kopwe chechchemeni óm pwon ngeni. Ka pwonei pwe kopwe chék angang ngeni ese lifilifil met epwe fis ngonuk, ikaamwo chiechiom kewe, are semom kewe me inom repwe úkútiw lón ar angang ngeni. (Kölf. 27:10) Lón mettóch meinisin, kopwe fókkun tittingor án Jiowa álillis pwe kopwe apwénúetá óm pwon ngeni.​—Álleani 2 Korint 4:7.

7. Met weween ach sipwe anganga pwisin ach sipwe kúna amanaw “fän niuokus me chechech”?

⁷ Jiowa a mochen óm kopwe wiliti chiechian. Nge a lamot kopwe angang weires le túmúnú an epwe péppéchékkúl óm riri  ngeni, me anganga pwisin met kopwe kúna amanaw ren. Filipi 2:12 a apasa: “Oupwe achocho le anganga püsin ämi küna manau fän niuokus me chechech.” Weween pwe mi lamot sipwe ekiekifichi ifa usun sipwe akkamwéchú ach ririéch me tuppwél ngeni Jiowa, ese lifilifil met epwe fis ngenikich. Sise tongeni ekieki pwe sipwe chék tuttuppwél. Chechchemeni pwe pwal mwo nge ekkóch mi angang ngeni Kot ren fansoun langattam ra ttur me rese amwéchú ar tuppwél. Met a tongeni álisikich le anganga pwisin met sipwe kúna amanaw ren?

8. Met a kapachelong lón ach pwisin káé Paipel? Pwata a lamot ena?

⁸ A lamot ach sipwe aúseling ngeni Jiowa me fóffós ngeni ren ach sipwe wiliti chiechian. Áeúin alen ach sipwe aúseling ngeni Jiowa, ina ren ach kákkáé ewe Paipel. A kapachelong ach ákkálleani me ekkekilonei án Kot we Kapas me néúch kewe puken álillisin Paipel. Nge ach káé Paipel esap usun ach sipwe akkamwéchú ekkewe pwóróus, usun chék met sia kan féri lón ach test lón sukul. Nge, epwe usun eú sái mi ammwétéres, lón ach kúkkútta me káé mineféén pwóróus usun Jiowa. Kopwe arap ngeni Kot, iwe epwe pwal arap ngonuk.​—Jas. 4:8

9. Ikkefa ekkewe minen álillis a fen álisuk lón óm pwisin káé Paipel?

⁹ Án Jiowa we mwicheich a awora chómmóng minen álillis epwe tongeni álisuk lón óm kkótun káé Paipel. Áwewe  chék, a wor ewe minen álillis wóón jw.org itan “Bible Study Activities” fán ewe kinikin “Teenagers” epwe tongeni álisuk le apwénúetá ekkewe lesen ka káé seni ekkewe pwóróus lón Paipel. Pwal och, ka tongeni kúna wóón jw.org ekkewe study guide “What Does the Bible Really Teach?” Ekkena mettóch ra tongeni álisuk le ámááraatá óm lúkú me áwewe ngeni ekkewe ekkóch. Mi pwal wor minen álillis fán iten óm pwisin káé lón Ewe Leenien Mas NAMPA 1 2017, itelapan “Ifa Usun Kopwe Pwapwaiti me Feiéch Seni Óm Álleaan Paipel?” Mi lamot sipwe káé me ekilon lón ach anganga pwisin met sipwe kúna amanaw ren.​—Álleani Kölfel 119:105.

10. Pwata a lamot ngeni emén Chón Kraist mi papatais an epwe kan iótek?

¹⁰ Sia aúseling ngeni Jiowa lupwen sia káé ewe Paipel, nge sia fós ngeni lupwen sia iótek. Sisap ekieki pwe sia chék iótek pokiten ina met sia eérenaaló, are ekieki pwe ina ‘eú ómmung’ epwe asópwéchúkich lón minne sia féri. Iótek, ina wesewesen alen ach sipwe fós ngeni ach we Chón Fératá. Ekieki mwo: Jiowa a mochen aúseling ngeni meefiom! (Álleani Filipi 4:6.) Ina minne lupwen ka lólilen, chemeni alon Paipel ei: “Kopwe monätä won ewe Samol mi Lapalap om weires.” (Kölf. 55:22) Chómmóng pwiich kewe ra tongeni apasa pwe a mmen álilliséch ngeniir ena pesepes. A pwal tongeni álisuk!

11. Pwata a lamot sipwe kilisou ngeni Jiowa iteitan?

¹¹ Iwe nge, sisap chék iótek ngeni Jiowa lupwen sia osupwangen álillis. Paipel a áchema ngenikich: “Oupwe kilisou ngeni Kot.” (Kol. 3:15) Fán ekkóch, sia fókkun aúreki ach kewe osukosuk iwe sise chúen tepereni meinisin feiéchúch kewe. Ina popun sótuni le féri ei: Iteiten rán, ekieki usun úlúngát mettóch ka kilisou ren, me mwirin apasaatá óm kilisou ngeni Jiowa. Iei alon emén teenage itan Abigail, a papatais lupwen a 12 ierin: “Me rei, mi fich ngeni Jiowa ach sipwe kilisou ngeni lap seni meinisin wóón unuselapen láng me fénúfan. Mi lamot sipwe kilisou ngeni ren an liffang iteitan sia tongeni.” Fán ekkóch, Abigail a eisini pwisin i eú kapas eis a rong pwe ika a pwáátá lesor nge a péút seni mettóch meinisin ese kilisou ngeni Jiowa wóón ikenái, iwe met epwe chúen nóm ren?

12, 13. Ifa usun ka pwisin kúna án Jiowa kirekiréch ngonuk, me pwata a lamot kopwe ekieki ifa usun Jiowa a fen álisuk?

¹² Jiowa a álisi King Tafit le likiitú fán sókkopaten weires. Ina popun Tafit a erá ei ren minne a pwisin kúna lón manawan: “Oupwe neni o nengeni pwe ewe Samol mi Lapalap a kirikiröch. Ra feiöch ätekewe mi eäni i lenien op.” (Kölf. 34:8) Ena wokisin a áiti ngenikich pwe mi lamot sipwe pwisin  kúna án Jiowa kirekiréch ngenikich. Lupwen ka álleani ewe Paipel me néúch kewe puk, me fiti ach kewe mwich, ka kúna ifa usun Kot a álisi ekkewe ekkóch le akkamwéchú ar tuppwél. Nge lupwen a péchékkúleló óm riri ngeni Jiowa, mi lamot kopwe kúna ifa usun a ákkálisuk. Ka fen pwisin kúna án Jiowa kirekiréch ngonuk?

¹³ Emén me emén Chón Kraist ra fen kúna án Jiowa kirekiréch lón eú napanap mi kkóló aúchean. A etiwa emén me emén kich le arap ngeni me Néún we. Jesus a apasa: “Esap wor eman a tongeni feito rei are ewe Sam mi tinieito esap panato rei.” (Joh. 6:44) Ka meefi pwe Jiowa a emmwenuk ngeni I? Are ka eáni ei ekiek: ‘Jiowa a lukeato semei kewe me inei ngeni I, nge ngang ua chék tapweló mwiriir’? Chechchemeni pwe lupwen ka filatá le fangóló manawom ngeni Jiowa me papatais, a poputá ewe riri mi kkóló aúchean lefilóm me Jiowa. Ewe Paipel a anúkúnúkúkich: “Ewe aramas mi echeni Kot a sil me ren Kot.” (1 Kor. 8:3) Fansoun meinisin kopwe aúcheani leeniom lón án Jiowa mwicheich.

14, 15. Ifa usun ewe angangen afalafal a tongeni álisuk le apéchékkúlaló óm lúkú?

¹⁴ Ka pwal kúna án Jiowa kirekiréch lupwen a apworak le fós ngeni aramas usun óm lúkú atun óm angangen afalafal are lón óm sukul. A tongeni weires óm kopwe afalafal ngeni chienom kewe chón sukul. Neman kopwe lólilen ren met repwe apasa are féri. Eli epwe kon eniwokkus óm kopwe áweweei óm lúkú mwen mesen eú mwichen aramas. Nge met a tongeni álisuk?

¹⁵ Ekieki usun popun óm lúkú ewe enlet. Ika a wor lón pwisin óm fós ekkewe study guides wóón jw.org, iwe kopwe néúnéúéchúúr. Ra tongeni álisuk le ekieki minne ka lúkú, popun ka lúkú, me ifa usun ka tongeni áwewe ngeni ekkewe ekkóch óm lúkú. Lupwen ka wesewesen lúkú me ka fen mmólneéchútá, iwe kopwe mochen afalafal ngeni aramas usun Jiowa.​—Jer. 20:8, 9.

16. Met a tongeni apworak le fós usun minne ka lúkú?

¹⁶ Ikaamwo ka fen mmólneéchútá, nge ka chúen tongeni niwokkus le áweweei óm lúkú. Iei alon emén nengngin Chón Kraist 18 ierin mi papatais lón an 13 ierin: “Ua silei met ua lúkú, nge fán ekkóch a weires ai upwe apasa met ua ekieki.” Ina minne a achocho le fós usun ewe enlet fán mecheres me kinamwe. A erá: “Chienei kewe chón sukul rese pireir le apwóróusa met ra kan féri. Iwe itá usap pwal pireir. Iwe, atun aua kan pwóróusfengen usun och mettóch ua chék apachalóng ekkeei kapas, ‘Ua asukula aramas usun ewe Paipel lón ewe rán.’ Iwe, mwirin aua sópweló minne aua pwóróusfengen wóón. Inaamwo ika ewe Paipel esap ina menlapen met ua apwóróusa, nge fán chómmóng ekkóch ra mochen silei usun met ua kan féri lón ai angangen asukula aramas ewe Paipel. Fán ekkóch ra kan kapas eis ngeniei. Ai fóffós ngeniir lón ena napanap a ámecheresaaló ai fós ngeniir usun ewe Paipel. Iwe mwirin, ua fókkun pwapwa!”

17. Met a pwal tongeni álisuk le fós ngeni aramas?

 ¹⁷ Lupwen aramas ra meefi pwe ka wesewesen áfánniir me súfélitiir, iwe epwe mecheres ngeniir ar repwe pwal súfélituk me minne ka lúkú. Iei alon Olivia, 17 ierin ewe a papatais lupwen a chék kúkkún: “Ua kan niwokkus pwe ika upwe apachaalong pwóróusen Paipel lón ai fós ngeni aramas, iwe repwe ekieki pwe ua kon núwen souleng.” Nge mwirin, a poputá le siwil an ekiek. Ese chúen kon ekieki an niw, nge a fen eáni ei ekiek: “Chómmóng kúkkún me sáráfé rese silei pwóróusen Chón Pwáraatá Jiowa. Ám chék ekkewe Chón Pwáraatá Jiowa ra sissileer. Iwe, minne aua féri a tongeni efisi ar repwe etiwa are resap etiwa ám fós ngeniir. Met epwe fis ika aua nisássáw are a weires ám aupwe fós usun ám lúkú, are met repwe ekieki ika aua niwokkus le fós ngeniir usun ám lúkú? Repwe tongeni meefi pwe aua sáwásini ám lamalamen Chón Pwáraatá Jiowa. Eli repwe pwal mwo nge oput minne aua apasa pokiten usun itá ause lúkúlúk wóón met aua afalafal ngeniir. Iwe nge, ika aua fós fán kinamwe me uwonúkúnúk usun ám lúkú, ese mwáál repwe súfélitikem.”

18. Met a lamot kopwe féri pwe kopwe anganga pwisin met kopwe kúna amanaw ren?

¹⁸ Usun met sia fen káé pwe óm anganga pwisin met kopwe kúna amanaw ren, ina eú wis mi lamot. Ren óm kopwe féri ena, mi lamot kopwe álleani me ekilonei án Kot we Kapas, iótek ngeni Jiowa, me ekilonei ifa usun a fen álisuk lón pwisin manawom. Óm féri ekkena epwe anúkúnúkúk pwe Jiowa i Chiechiom. Ena mettóch epwe efisi óm kopwe mochen fós ngeni aramas usun óm kewe lúkú.​—Álleani Kölfel 73:28.

19. Pwata esap lusmwáál óm fókkun achocho le anganga pwisin met kopwe kúna manaw ren?

¹⁹ Jesus a apasa: “Are emén a mochen feito mwiri, epwe pennúkúóló pwisin manawan, mwárei an we iráán ninni me tapweló mwiri.” (Mat. 16:24, NW) Ewer, ren án emén me emén Chón Kraist repwe tapweló mwirin Jesus, a lamot repwe fangóló manawer ngeni Jiowa me papatais. Nge ina chék poputáán eú manaw mi amwarar iei, me epwe emmwen ngeni manaw esemuch lón án Kot we ótót sefé. Ina minne, kopwe féri úkúkún óm tufich le anganga pwisin met kopwe kúna manaw ren!