1, 2. Ikkefa án aramas kewe sókkopaten ekiek usun paratis?

CHÓMMÓNG pwiich kewe seni sókkopaten fénú ra ló Seoul, Korea fán iten eú mwichelap. Lupwen pwiich kana repwele ló seni ewe stadium, ekkewe Chón Pwáraatá Jiowa lón Korea ra rongeereló. A mmen émúúmú lupwen chómmóng me leir ra kapongfengen me eráfengen: “Sipwap chu lón Paratis!” Nge menni ena paratis ra fósun?

² Mi sókkopat án aramas ekiek usun paratis. Ekkóch ra erá pwe paratis ina chék eú tutulap. Nge me ren ekkóch pwe ikewe ie ra pwapwa me ie, ina paratis me rer. Emén mwán mi fókkun echik mi móót wóón eú watteen cheepel mi chómmóng mwéngé wóón, neman epwe meefi pwe a fen nónnóm lón paratis. Fitu fitu ier a ló, emén fefin a kúna eú masies mi ur ren pénirá. A fókkun mwaar ren, me a apasa, “Mwa met, iei eú paratis!” Aramas ra chúen kér ngeni ena leeni Paratis tori ikenái inaamwo ika ppúngún sno lón ena leeni a tori úkúkún lap seni 50 fit iteiten ier. Met óm ekiek usun Paratis? Ka ápilúkúlúkú warotoon ewe Paratis?

3. Tefen lón ewe Paipel a ákkáeúin fós usun Paratis?

³ Ewe Paipel a fós usun eú paratis mi fen nóm me lóóm me eú  paratis epwe fis lón mwachkkan. Sia ákkáeúin álleani usun ewe Paratis lón ewe áeúin puk lón Paipel. Lón ewe Paipelin Katolik itan Catholic Douay Version, ewe mi afféú lón fósun Latin, iei met Keneses 2:8 a apasa: “Ewe Samol Kot a féri seni me lepoputáán eú paratis mi apwapwa: ikewe ie a eleenia ewe mwán, i a fératá.” (Pwisin kich sia féri an epwe makkechól.) Ena wokisin lón fósun Ipru a erá ewe tánipiin Eten. Ewe kapas “Eten” a wewe ngeni “Apwapwa,” me ena tánipi ina wesewesen eú leeni mi apwapwa. A fókkun ling, tepetep mwéngé lón me ra kinamwefengen aramas me man.​—Ken. 1:29-31.

4. Pwata sia tongeni erá pwe eú paratis ewe tánipiin Eten?

⁴ Ewe kapas lón fósun Ipru fán iten “tánipi” a afféú ngeni pa·raʹdei·sos lón fósun Krik. Ewe puk itan Cyclopaedia me ren M’Clintock me Strong, a erá pwe lupwen emén chón Krik a rong ewe kapas pa·raʹdei·sos, a kachitoni lón tupwuan pwe ina eú leeni mi amasawa, ling, túmún seni feiengaw, a wor watteen irá mi uwaani sókkopaten féún irá, pupu mi kúrúffat mi wor masies oroppan ikewe ekkewe pwiin man ren choweán chia me siip ra tongeni mwéngé ie.​—Apépé ngeni Keneses 2:15, 16.

5, 6. Pwata a péút seni Atam me Efa feiéchúúr we ar repwe nónnóm lón Paratis, me met ekkewe ekkóch repwe tongeni ekieki?

⁵ Jiowa a eleenia Atam me Efa lón ena sókkun tánipi, eú paratis. Nge pokiten ra álleasolapa Jiowa, a péút seniir pwisin feiéchúr na me mwirimwiriir kewe ar repwe nónnóm lón ena Paratis. (Ken. 3:23, 24) Inaamwo ika ese chúen wor aramas lón ena Paratis, nge usun itá a chúen nóm tori ewe Noter lón fansoun Noa we.

⁶ Ekkóch neman repwe ekieki, ‘Epwe chúen fissefál Paratis wóón fénúfan?’ Met ekkewe pwóróus lón Paipel ra pwáraatá? Ika ka áneánei óm kopwe nóm lón Paratis fengen me chókkewe ka tongeer, iwe itá mi wor popun mi anúkúnúk óm kopwe tongeni eáni ena ápilúkúlúk? Ka tongeni áweweei pwata sia tongeni lúkúlúk pwe epwe wor eú paratis lón mwachkkan?

7, 8. (a) Met Kot a pwonei ngeni Apraham? (b) Met Apraham a tongeni ekieki ren án Kot we pwon ngeni?

⁷ Sia tongeni wesewesen kúna pélúwen ekkena kapas eis usun Paratis lón ewe Paipel pokiten ena puk a feito seni Jiowa, ewe a fératá ewe popun Paratis. Ekieki minne Kot a ereni chiechian we Apraham. Kot a erá pwe epwe achommongaaló mwirimwirin Apraham kewe usun chék “pien aroset.” Mwirin Jiowa a eáni ei pwon mi fókkun lamot ngeni Apraham: “Chon ekewe mwü won unusen fanüfan repwe feiöch me ren mwirimwirum kana, pun en ka aleasochis ngeni ai kapas.” (Ken. 22:17, 18) Mwirin Kot a pwal eánisefáli ena pwon ngeni néún Apraham we me néún néún na.​—Álleani Keneses 26:4; 28:14.

⁸ Ese wor pwóróus lón ewe Paipel mi erá pwe Apraham a ekieki pwe aramas repwe angei ar sáingoon feiéch lón eú paratis lón láng. Ina minne lupwen Kot a pwon ngeni pwe “chon ekewe mwü won unusen fanüfan repwe feiöch,” eli Apraham epwe ekieki pwe ekkena feiéch repwe fis wóón fénúfan. Nge itá ina chék ewe pisekin ánnet lón Paipel mi pwáraatá pwe epwe fis paratis wóón fénúfan?

9, 10. Ikkefa pwal ekkewe ekkóch pwon ra ngenikich popun ach sipwe lúkú pwe epwe fis paratis lón mwachkkan?

 ⁹ Kot a emmweni Tafit emén me lein mwirimwirin Apraham kewe an epwe fós usun eú fansoun lón mwachkkan lupwen “ekewe aramasangau resap chüen nom.” (Kölf. 37:1, 2, 10) Nge, “ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.” Tafit a pwal oesini: “Ekewe chon pwüng repwe fanüeni ewe fanü o nonom won tori feilfeilachök.” (Kölf. 37:11, 29; 2 Sam. 23:2) Iwe met óm ekiek, ifa usun ekkena esin pwon epwe achchúngú chókkewe mi mochen féri letipen Kot? Epwe wor popun ar repwe ekieki pwe epwe wor eú atun lupwen aramas mi pwúng chék repwe nónnóm wóón fénúfan, me lón ena atun ei fénúfan epwe eú paratis sefál usun chék ewe tánipiin Eten.

¹⁰ Ló, ló, ló, lape ngeni ekkewe chón Israel mi erá pwe ra angang ngeni Jiowa, ra likitaló i me ewe fel mi enlet. Ina minne, Kot a mut ngeni ekkewe chón Papilon ar repwe okkufu néún kewe aramas, ataieló fénúer we, me uwealó chómmóng me leir ar repwe eoló. (2 Kron. 36:15-21; Jer. 4:22-27) Nge néún Kot kewe soufós ra oesini pwe néún kewe aramas repwe liwinsefáliti pwúkún fénúer we mwirin 70 ier. Iwe ekkena oesini ra pwénútá. Nge ekkena oesini a pwal wor weweer fán itach lón ei fansoun. Atun sia pwóróusfengen wóón ekkóch me leir, nengeni ifa usun ra ngenikich popun ach sipwe ápilúkúlúkú pwe epwe fis ewe paratis wóón fénúfan lón mwachkkan.

11. Ifa usun a áeúin pwénútá Aisea 11:6-9, nge ifa ewe kapas eis eli sipwe chúen eáni?

¹¹ Álleani Aisea 11:6-9. Kot a néúnéú ewe soufós Aisea le oesini pwe epwe wor kinamwe lón ewe fénú lupwen ekkewe chón Israel ra liwinsefáliti pwúkún fénúer. Ese wor emén epwe niwokkusiti án ekkewe man are aramas efeiengawer. Ekkewe kúkkún me chinnap repwe núkúnúkéch. Esap pwe ekkena esin mettóch ra áchema ngonuk usun ewe kinamwe mi fis lón ewe tánipiin Eten? (Ais. 51:3) Aisea a pwal oesini usun án chón fénúfan unus “silei ewe Samol mi Lapalap epwe alolol usun chök alololun matau,” nge esap chék án chón ewe mwúún Israel. Nge ineet epwe fis ena? A ffat pwe ena mettóch a weneiti mwachkkan.

12. (a) Ikkefa ekkewe feiéch ekkewe mi liwinsefál seni ar eoló lón Papilon ra kúna? (b) Met a pwáraatá pwe Aisea 35:5-10 epwe pwal pwénútá lón mwachkkan?

¹² Álleani Aisea 35:5-10. Nengeni pwe Aisea a oesinisefál pwe aramas are man resap efeiengawa ekkewe chón Israel mi liwinsefál seni Papilon. A erá pwe fénúer we epwe uwaéch ren chómmóng mwéngé mi múrinné pokiten epwe wor watteen konik, usun chék lón ewe tánipiin Eten. (Ken. 2:10-14; Jer. 31:12) Itá ena oesini a chék pwénútá lón fansoun ekkena chón Israel? Nengeni pwe ena oesini a pwal apasa pwe ekkewe mi mesechun, pechemá, me selingepúng repwe pwáák. Nge ena mettóch  ese fis ngeni ekkewe chón Israel mi liwinsefál seni Papilon. Iwe nge Kot a pwáraatá pwe epwe amóeló samau meinisin lón mwachkkan.

13, 14. Ifa usun Aisea 65:21-23 a pwénúetá ngeni ekkewe chón Israel lupwen ra liwin me Papilon, nge menni kinikin lón ena oesini epwe chúen pwénútá? (Ppii ewe sasing lepoputáán ei lesen.)

¹³ Álleani Aisea 65:21-23. Lupwen ekkewe chón Israel ra liwiniti fénúer, rese kúnékún imwer mi núkúnúkéch are ar atake me ataken wain mi fen ffot. Nge pokiten Kot a efeiéchúúr, mwirin och fansoun a siwil nónnómur. Anchangei pwapwaan ekkena chón Israel lupwen ra aúetá imwer kewe me nónnóm lóór, me lupwen ra pwapwaiti ener mi anné pwisin fótukier!

¹⁴ Nengeni pwe me ren ena oesini pwe manawach “epwe usun chök ierin manauen efoch irä.” Ekkóch irá ra manaw ren fitengeréú ier. Ren án aramas repwe manaw ina úkúkún, mi lamot epwe fókkun péchékkúl inisiir. Me ika ra tongeni manaw lón ewe esin leeni Aisea a oesini usun, ewe mi ekinamwe me ling, iwe epwe wesewesen amwarar, ina eú paratis! Me ena oesini epwe pwénútá!

15. Ikkefa ekkóch ekkewe feiéch ra mak lón ewe puken Aisea?

¹⁵ Ekieki ifa usun ekkewe pwon sia kerán pwóróus wóór a pwári pwe epwe fis paratis lón mwachkkan. Unusen fénúfan epwe ur ren aramas Kot a efeiéchúúr. Ese wor emén epwe aúreki án aramas mi akkachofesá are man epwe efeiengawa. Ekkewe mi mesechun, selingepúng, me pechemá repwe chikar. Aramas repwe aúetá pwisin imwer, me pwapwaiti ar ffot pwisin ener. Repwe manawattam lap seni ekkewe irá. Ewer, ewe Paipel a awora ekkewe pisekin ánnet pwe ena esin paratis epwe fis. Nge ekkóch aramas sia fós ngeniir neman repwe apasa pwe ekkena oesini ese erá pwe epwe fis paratis wóón fénúfan. Iwe, met kopwe ereniir? Mi wor popun mi anúkúnúk óm kopwe lúkú pwe epwe fis wesewesen eú paratis wóón fénúfan? Jesus, a awora ngenikich eú popun mi anúkúnúk, i ewe mwán mi lap seni meinisin aramas mi fen manaw wóón fénúfan.

16, 17. Ineet atun Jesus a fós usun Paratis?

¹⁶ Inaamwo ika Jesus ese tipis, nge a kúna kapwúng me ra eitiwaatá wóón efóch irá pwe epwe máló. A nóm lukanapen rúúemén chón atai allúk iir re Jus. Emén me leir a mirititi pwe Jesus i ewe king me ereni: “Jesus, kose mochen chechemeniei lupwen om kopwe tolong lon mwumw.” (Luk. 23:39-42) Minne Jesus a pwon ngeni ena chón atai allúk a kkúú met epwe fis ngonuk lón mwachkkan. Alon Jesus kana ra mak lón Lukas 23:43. Ekkóch soukáé ra waalong ewe esissil comma (,) mwen ewe kapas “ikenai” me iei usun ar afféúni: “Enlet, üpwe ürenuk, ikenai kopwe etiei lon Paratis.” A sókkopat án aramas ekiek usun ia itá ewe comma epwe nóm ie lón ena sentence. Nge met weween alon Jesus lupwen a apasa “ikenai”?

¹⁷ Lón chómmóng fósun fénú ikenái, ewe esissil comma a affataéchú weween eú pwóróus lón eú sentence. Nge, lón ekkewe kapiin Tesin Krik minen lóóm mi nóm rech ikenái, rese kan néúnéú ekkeei esissil: period (.), comma (,), esissillen kapas eis (?), exclamation point (!) me metakkan. Ina minne, neman sia tongeni ekieki: Itá Jesus a apasa: “Upwe erenuk, ikenái kopwe etiei lón Paratis”? Are itá  a apasa, “Upwe erenuk ikenái, kopwe etiei lón Paratis”? Ekkewe chón chiyakúúni Paipel ra waalong ewe comma mwen are mwirin ewe kapas “ikenái” ren met ra ekieki pwe itá ina weween alon Jesus na, iwe sia tongeni kúna ekkena ruu itiitin lón ekkewe Paipel lón ei fansoun.

18, 19. Met a álisikich le weweiti weween alon Jesus we?

¹⁸ Iwe nge, chechchemeni alon Jesus we ngeni ekkewe chón tapweló mwirin, usun an máló. A erá: “Nöün Aramas epwe nom leutun fanüfan lon ükükün ülüngat rän me ülüngat pwin.” A pwal apasa: “Nöün Aramas epwe tolong lepöün aramas. Ir repwe niela, nge mürin ülüngat rän epwe manausefälitä.” (Mat. 12:40; 16:21; 17:22, 23; Mark. 10:34) Aposel Petrus a pwal apwóróusa pwe a fis ena. (Föf. 10:39, 40) Ina minne, Jesus ese ló lón ewe Paratis lón ewe rán iir me ena chón atai allúk ra máló lón. Ewe Paipel a erá pwe Jesus a nóm “lon lenien ekewe mi mäla” ren fitu rán tori án Kot amanawatá.​—Föf. 2:31, 32. *

¹⁹ Jesus a eáni ei itiitin kapas, “Enlet upwe erenuk ikenái” ren an epwe poputááni an pwon ngeni ewe chón atai allúk. Chómmóng ra eáni ena sókkun itiitin kapas pwal mwo nge lón fansoun Moses we. Fán eú Moses a  erá: “Ekei kapas üa allük ngonuk ikenai repwe nom lon lelukom.”​—Tut. 6:6; 7:11; 8:1, 19; 30:15.

20. Met a álisatá ach weweiti alon Jesus we?

²⁰ Emén chón chiyakú Paipel seni ewe ia Jesus a piin nóm ie, a erá: “Ewe menlapen pwóróus lón ei wokisin ina ewe kapas ‘ikenái’ me itá epwe iei usun án aramas repwe álleani, ‘Enlet upwe erenuk ikenái, kopwe etiei lón Paratis.’ Ena pwon a fis lón ena rán me epwap pwénútá lón eú fansoun.” Ena chón afféú a pwal erá pwe a ina usun án aramas fós lón ena leeni me a wewe ngeni pwe “ena pwon a fis lón eú rán me epwe fókkun fis.” Eú Paipel lón fósun Syriac minen lap seni 1,600 ier lóóm, a afféúni ena wokisin iei usun: “Amen, ua erenuk ikenái pwe kopwe fitiei lón ewe Tánipiin Eten.” Itá oukich meinisin sipwe péchékkúletá ren ena pwon.

21. Met ese fis ngeni ewe chón atai allúk me pwata?

²¹ Atun Jesus a fós ngeni ena chón atai allúk usun ewe Paratis, ese fós usun eú paratis lón láng. Ifa usun sia silei ena? Eú popun pwe ena chón atai allúk ese mwo nge silei usun ewe pwonen etipeeú Jesus a eáni lefiler me néún kewe aposel mi tuppwél ar repwe eti le nemenem lón láng. (Luk. 22:29) Pwal eú, ena chón atai allúk ese pwal mwo nge papatais. (Joh. 3:3-6, 12) Ina popun a ffat pwe ena chón atai allúk ese kefil an epwe feitá láng. Iwe atun Jesus a eáni ena pwon ngeni, a wesewesen fós usun eú paratis wóón fénúfan. Fite ier mwirin, ewe aposel Paulus a fós usun eú lángipwi usun emén “mwän a feitä o nom lon Paratis.” (2 Kor. 12:1-4) Inaamwo ika Paulus me ekkewe ekkóch aposel ra filitá ar repwe fiti Jesus le nemenem lón láng, nge Paulus a fós usun eú paratis lón mwachkkan. * Ena paratis epwe nóm wóón fénúfan? Ka tongeni nóm lón?

22, 23. Met ka tongeni ápilúkúlúkú?

²² Chechchemeni pwe Tafit a fós usun eú fansoun lupwen “ekewe chon pwüng repwe fanüeni ewe fanü.” (Kölf. 37:29; 2 Pet. 3:13) Tafit a fósun ewe atun aramas meinisin wóón fénúfan repwe álleasochisi án Kot kewe kapasen emmwen mi pwúng. Ewe oesini lón Aisea 65:22 a erá: “Ierin manauen nei aramas epwe usun chök ierin manauen efoch irä.” Ena mettóch a pwári pwe aramas mi angang ngeni Jiowa lón ewe ótót sefé repwe manaw fitengeréú ier. Ka tongeni lúkú ena? Ewer, pokiten me ren Pwärätä 21:1-4, Kot epwe efeiéchú aramas meinisin, me eú me lein ekkena feiéch ina an “esap chüen wor mäla.”

²³ A ffat met Paipel a áiti ngenikich usun ewe Paratis. A péút seni Atam me Efa ar tufichin manawffóch lón Paratis, nge ewe fénúfan epwe chúen wilisefáliti eú paratis. Kot epwe efeiéchú aramas wóón fénúfan usun met a fen pwonei. Tafit a erá pwe ekkewe mi tipetekison me chón pwúng repwe fénúeni fénúfan me nónnóm wóón tori feilfeiló chék. Me ekkewe oesini lón ewe puken Aisea ra álisikich le mwétéresiti ewe fansoun lupwen sipwe pwapwaiti manawach lón ewe paratis mi ling wóón fénúfan. Ineet epwe fis? Atun epwe pwénútá án Jesus we pwon ngeni ewe chón atai allúk. Ka tongeni nóm lón ena Paratis. Lón ena fansoun, epwe pwénútá minne pwiich kewe lón Korea ra erá atun ewe mwichelap: “Sipwap chu lón Paratis!”