DIANA a 80 som ierin me a fókkun watte an riáfféú lón ekkewe fitu ier a ló. A úri pwúlúwan we ewe semwenin tupwu itan Alzheimer me a nóm lón imwen túmún chinnap mwen an máló. Néún kewe rúúemén át ra pwal máló, me i a úri kanserin oupw. Nge atun pwiich kewe ra kúna Diana me lón ach kewe mwich are lón ewe angangen afalafal, a chék pwapwa iteitan.

John i emén chónemmwen mi wisen sáifetál ren úkúkún 43 ier. A fókkun sani an ei angang, iei met a pwapwaiti lón manawan. Iwe nge, a lamot epwe kaúló pwe epwe túmúnú emén márárin mi semmwen. Atun pwiich kewe mi sissilei John ra chuuri i me lón eú mwichelap, ra kúna pwe ese fókkun siwil. Mi chúen chék fókkun pwapwa.

Pwata Diana me John ra chúen tongeni pwapwa? Ifa usun emén mi riáfféú epwe tongeni pwapwa? Ifa usun emén a tongeni pwapwa inaamwo ika a úkútiw le féri och angang a fókkun efich? Paipel a ngenikich pélúwan. A apasa: ‘Ekewe chon pwüng repwe pwapwa ren mine Jiowa a föri.’ (Kölf. 64:10) Sipwe tongeni wewefichiti met ena itiitin kapas a weneiti ika sia silei met epwe atoto ngenikich pwapwa fóchófóch me met esap.

A wor ekkóch mettóch ra kan atoto pwapwa. Áwewe chék, ekieki usun rúúemén ra tongefengeniir, iwe ra pwúpwúlú. Are ekieki usun emén a kerán wor néún are emén a eáni eú mineféén wis lón an angang ngeni Jiowa. Ekkeei mettóch meinisin ra atoto pwapwa pokiten ra feito seni Jiowa. I a fang ngenikich ewe kókkótun pwúpwúlú, ewe tufichin néúnéú, me angang sipwe féri lón an we mwicheich.​—Ken. 2:18, 22; Kölf. 127:3; 1 Tim. 3:1.

Iwe nge, ewe pwapwa mi pop seni ekkóch mettóch a tongeni móróló. A eletipechou, pún emén a tongeni kirikiringaw ngeni pwúlúwan are má seni. (Is. 24:18; Os. 3:1) Ekkewe nau ra tongeni álleasolap ngeni semer me iner me ngeni Kot, me pwal mwo nge katowu seni mwichefel. Áwewe chék ren néún Samuel kewe át ra kul seni Jiowa. Pwal och, Tafit a kúna chómmóng osukosuk lón an famili. (1 Sam. 8:1-3; 2 Sam. 12:11) Lupwen  ekkeei esin mettóch ra fis, rese atoto pwapwa nge fen letipeta me watteen weires.

Pwal ina chék usun, fán ekkóch sise chúen tongeni sópwósópwóló lón eú wis sia eáni lón ach angang ngeni Jiowa pokiten sia semmwen, are a lamot sipwe túmúnú ach famili, are pokiten a wor ekkesiwil lón ach mwicheich. Chómmóng chókkewe mi úkútiw seni ar angang ra erá pwe ra pwosiiti ewe pwapwa ena angang a atoto ngeniir.

A ffat pwe ewe pwapwa mi pop seni ekkena esin mettóch a tongeni móróló. Iwe met, mi wor och sókkun pwapwa epwe nómoffóch pwal mwo nge atun a áweires nónnómun manaw? Ewer mi wor pwe iwe ese péút seni Samuel, Tafit, me pwal ekkóch ar pwapwa ewe atun ra nóm fán weires.

Jesus a silei met epwe atoto enletin pwapwa. Me mwen an feito fénúfan, Paipel a erá pwe i a pwapwa mwen mesen Jiowa fansoun meinisin. (SalF. 8:30) Iwe nge, atun a feito fénúfan, fán ekkóch a nóm lón watteen weires. Nge, án Jesus féri letipen Seman we a atoto ngeni pwapwa. (Joh. 4:34) Nge met, ese péút seni Jesus an pwapwa lón ekkewe fitu awa lesópwólóón manawan lupwen a fókkun riáfféú? Paipel a erá pwe “fänäsengesin ewe pwapwa mi nom mwan,” a likiitú ngeni riáfféún wóón ewe iráán ninni. (Ipru 12:2) Iwe, a chómmóng met sipwele káé seni ruu mettóch Jesus a apasa usun pwapwa enlet.

Lón eú atun, a wor 70 chón káé ra liwinto ren Jesus mwirin ar féri ewe angangen afalafal. Ra fókkun pwapwa ren ekkewe mettóch meinisin ra féri, pwal mwo nge ar asúoló ekkewe chónláng mi ngaw. Nge Jesus a ereniir: “Ousap pwapwa pwe ekewe ngününgau ra aleasochisikemi, nge oupwe pwapwa pwe itemi a mak lon läng.” (Luk. 10:1-9, 17, 20) Ewer, ach kúna chen me ren Jiowa ina met a fókkun aúchea me atoto watteen pwapwa lap seni ese lifilifil wis sia wiseni.

Lón pwal eú atun, lupwen Jesus a fós ngeni eú mwichen aramas, emén fin Jus a fókkun mwaar ren an asukul me a erá pwe ese mwáál inan we a fókkun pwapwa ren an néúni ena sókkun nau. Nge Jesus a erá: “Ewer, nge ra feiöch chokewe mi rong kapasen Kot o aleasochis ngeni.” (Luk. 11: 27, 28) Lupwen néúch kewe ra féri minne mi múrinné, a tongeni atoto ach pwapwa. Nge met a atoto ngenikich ewe pwapwa fóchófóch ina ach álleasochis ngeni Jiowa me ririéch ngeni i.

Ach meefi pwe sia nóm fán án Jiowa chen, a atoto ngenikich watteen pwapwa. Me inaamwo ika ekkewe sóssót rese apwapwa, nge rese uwei senikich ei memmeef. Ren enletin, lupwen sia akkamwéchú ach tuppwél fán sóssót, a fen ina lapólóón ach pwapwa. (Rom 5:3-5) Pwal och, Jiowa a fang an we manaman ngeni chókkewe mi lúkúlúk wóón i, me pwapwa ina kinikinin uwaan. (Kal. 5:22) Ena a álisikich le weweiti pwata Kölfel 64:10 a apasa: ‘Ekewe chon pwüng repwe pwapwa ren mine Jiowa a föri.’

Ena a pwal áiti ngenikich pwata Diana me John ra chúen tongeni meefi pwapwa atun ra nóm lón weires. Diana a apasa: “Ua op ren Jiowa usun emén semirit mi eáni leenien op seman me inan.” A pwal apasa: “Ua meefi pwe i a efeiéchúei ren an atufichiei pwe upwe sópwósópwóló le afalafal iteitan fán ai mese pwapwa.” Nge John, met a álisi an epwe akkamwéchú an pwapwa me achocho lón ewe angangen afalafal mwirin an towu seni wisan we? A apasa: “Seni ewe ier 1998 atun ua ketiw ai upwe wisen sense fán iten ewe Ministerial Training School, a lapóló ai fansoun pwisin káé lap seni me lóóm.” A erá pwe a fen mecheres ngeniir me pwúlúwan we ena siwil pokiten ra tipemecheres iteitan le féri met chék Jiowa a ewisa ngeniir. A pwal apasa: “Ause niamam ren minne aua féri.”

A pwal wor chómmóng ra kúna pwe a mmen enlet met Kölfel 64:10 a apasa. Áwewe chék, iei pwóróusen eú pea pwúpwúlú mi angang Bethel lón Merika úkúkún 30 ier. Ewe mwicheich a ewisa ngeniir ar repwe special pioneer. Ra apasa: “Sia kan pwisin letipeta atun a péút senikich och mettóch sia fókkun sani,” nge ra pwal apasa: “Sise tongeni nónnóm lón ach letipeta tori feilfeiló chék.” Atun chék ar wareiti ewe leeni ra titiiló ngeni, ra poputá le fiti ewe mwichefel le afalafal. Ra pwal apasa: “Aua tichiki lón ám iótek ekkóch mettóch. Iwe, ám kúna pélúwen ám kewe iótek a apéchékkúlakem me atoto ám pwapwa. Ekiseló mwirin ám wareiti ewe mwichefel, ekkóch chón ewe mwichefel ra poputá pioneer, me aua pwapwa pún a wor rúúemén néúm chón káé mi feffeitá.”

Pwúngún, saminne fansoun meinisin epwe mecheres ach sipwe akkamwéchú ach pwapwa. Epwe wor ekkóch atun sipwe meefi letipechou. Nge Jiowa a alúkúlúkú letipach ren ekkewe kapas mi mak lón Kölfel 64:10. Pwal mwo atun sia letipechou, sia tongeni lúkúlúk pwe ika sipwe akkamwéchú ach tuppwél ese lifilifil met epwe torikich, sipwe ‘pwapwa ren mine Jiowa a föri.’ Sia pwal tongeni mwétéresiti ewe fansoun lupwen epwe pwénúetá án Jiowa we pwon fán iten “eu läng mi fö me eu fanüfan mi fö.” Lón ena fansoun, meinisin aramas repwe unuséch me repwe “pwapwa o mwänek fochofoch” pokiten ekkena mettóch meinisin Jiowa epwe féri.​—Ais. 65:17, 18.

Anchangei met epwe fis lón ena atun. Esap fókkun chúen wor semmwen me sipwe pwáátá iteiten rán fán péchékkúlen inisich. Ese lifilifil met sókkun riáfféú sia kúna me lóóm, esap chúen atoto metekin letipach. Jiowa a alúkúlúkú ngenikich pwe “esap chüen wor eman epwe chechemeni ekewe mettochun lom o ekieki usun.” Sipwe souni attongeach kewe mi máló me sipwe meefi meefien semen me inen ewe nengngin 12 ierin, ewe Jesus a amanawasefáli. Paipel a erá pwe “rese chúen tongeni amwéchú meefier ren lululóón ar pwapwa.” (Mark. 5:42, NW) Ló, ló, ló, iteiten emén me emén aramas wóón fénúfan epwe enletin emén chón pwúng me epwe “pwapwa” tori feilfeiló chék ren minne Jiowa a féri.