Ewe pwóróus lón Tuteronomi 22:25-27 ese fós usun ánneten ika ewe mwán a tipis are ese tipis, pokiten a fen pwúngúló pwe a tipis. Nge ena allúk a nefótófót wóón letelóón ika ewe fefin a tipis are ese tipis. Sipwe ppii ekkeei epwipwiin pwóróus.

Ekkewe wokisin mwan ra fen fós usun emén mwán mi koon ren emén fépwúl mi kófót “lon eu telinimw.” Lupwen a féri ena, a tipisin lisowumwáál pokiten me ren aramas pwe ena fépwúl a fen pwúpwúlú. Nge ifa usun ren ewe fépwúl? Ese “köri eman epwe alisi, nge a fen nom lon eu telinimw.” Ika a púchérún álillis, ese mwáál epwe wor chón rong me repwe álisi. Nge ese púchér. Iwe, a álisatá ewe tipisin lisowumwáál, iwe a pwúngúló pwe iir me rúúemén ra tipis.​—Tut. 22:23, 24.

Ewe Allúk a eppiietá pwal eú mettóch, a erá: “Are eman mwän a churi eman föpwül mi kofot me lemäl, are a achomanauei o kon ren, ewe mwän chök epwe ninnila. Nge ewe föpwül ousap föri ngeni och, pun esap föri och föför epwe ninnila ren. Ei föför a usun chök än eman mwän turufi chon arun o niela. Iwe, ewe mwän a achomanauei ewe föpwül me lemäl o neminewe mi kofot a kökkö pwe eman epwe alisi, nge esap wor eman a tongeni alisi.”​—Tut. 22:25-27.

Lón ena esin atun, ekkewe soukapwúng ra lúkú ewe fépwúl. Ifa usun? Ra lúkú pwe ewe fépwúl “a kökkö pwe eman epwe alisi, nge esap wor eman a tongeni alisi.” Iwe, ese tipisin lisowumwáál. Iwe nge ewe mwán, a tipisin reip me lisowumwáál pokiten “a achomanauei o kon ren” ena fépwúl mi kófót.

Ina popun, inaamwo ika ei allúk a nefótófót wóón ewe fépwúl ese wor tipisin, nge a áweweei án ewe mwán tipisin reip me lisowumwáál. Sia lúkúlúk pwe ekkewe soukapwúng ra “achocho le ais usun” me apwúngaló met a fis nge epwe lóngólóng wóón ewe kapasen emmwen Kot a fen affata me ekkenniwili fán fite.​—Tut. 13:14; 17:4; Eks. 20:14.