KA MEEFI pwe en emén mi sile kilisou? A lamot oukich meinisin sipwe ekieki ena kapas eis. Ewe Paipel a fen oesini pwe lón ach ei fansoun, chómmóng aramas “resap sile kilisou.” (2 Tim. 3:2) Ese mwáál ka sissilei ekkóch mi ekieki pwe aramas repwe chék féfféri mettóch fán iter are repwe ngeniir mettóch. Ra pwal meefi pwe ese lamot ar repwe kilisou ren met ra angei. Ese wor tipemwaramwar pwe sise kan sani le nóm ren ekkena sókkun aramas.

Nge a sókkóló ren néún Jiowa kewe chón angang mi angei ei pesepes, mi erá: “Oupwe kilisou.” Ewer, sipwe “kilisou lon mettoch meinisin.” (Kol. 3:15; 1 Tes. 5:18) Ren enletin, ach ámááraatá ewe napanap kilisou a échitikich. A wor fitu popun pwata a ina usun.

Eú popun mi lamot ach sipwe pwári ach kilisou iteitan, pún a álisikich ach sipwe meefi pwapwa usun pwisinkich. Atun emén a apasa an kilisou ren met emén a féri fán itan, ese mwáál a meefi pwapwa usun pwisin i, me ewe emén i a kilisou ngeni a pwal pwapwa. Pwata ach pwári ach kilisou a efisi pwapwaach me pwal pwapwaan ewe emén sia kilisou ngeni? Ekieki ei: Ika ekkewe ekkóch ra tipemecheres le féri och mettóch fán itom, ra féri ena pokiten ra meefi pwe ka fich ngeni. Weween pwe ra chúnguk. Atun ka mirititi ena, iwe kopwe pwal pwapwa usun pwisin en. A pwal ina usun ren Rut. Poas a kisáseú ngeni. Ese mwáál, Rut a fókkun pwapwa atun a mirititi pwe Poas a kan chúngú.​—Rut 2:10-13.

A ákkáeúin lamot ach sipwe pwári ach kilisou ngeni Kot. Ese mwáál ka ekieki usun ekkewe chómmóngun liffang lón pekin lúkú me pekin aion a awora me sóssópweló le awora. (Tut. 8:17, 18; Föf. 14:17) Nge kosap chék ekis ekieki usun kirekiréchún Kot, kopwe awora fansoun le ekkekieki ekkewe chómmóng feiéch Kot a ninatiw wóóm me wóón chókkewe ka tongeer. Ika ka ekilonei án ewe Chón Fératá kisáseú, epwe lallapóló óm aúcheani me epwe anúkúnúkuk pwe a wesewesen tongeok me aúcheanuk.​—1 Joh. 4:9.

A lamot sipwe ekilonei wóón met Jiowa a ngenikich me sipwe kilisou ngeni fán iten an kirekiréch. (Kölf. 100:4, 5) Emén sousile a erá pwe ach apasa kilisou, ina met a apwapwaai aramas.

Pwal eú popun mi éch ach pwári ach kilisou, pokiten epwe apéchékkúlaló ewe ririin chiechi. Kich meinisin a lamot ngenikich ach sipwe meefi aúcheach. Atun ka enletin kilisou ngeni emén ren an féfférún kirekiréch, a péchékkúleló ewe riri lefilemi. (Rom 16:3, 4) Pwal och, chókkewe mi pwári ar kilisou, lape ngeni ra álilliséch ngeni ekkewe ekkóch. Ra esilla atun aramas ra kirekiréch ngeniir, iwe ra pwal mochen ar repwe pwal ina usun ngeniir. Ewer, álilliséch ngeni ekkewe ekkóch a atoto pwapwa. Usun met Jesus a erá: “Sia feiöch ren ach fang lap seni ach angei.”​—Föf. 20:35.

Emén meilap seni ewe University of California itan Robert Emmons, mi féri eú káé usun ewe mettóch kilisou, a erá pwe ren ach sipwe pwári kilisou, a lamot sipwe mirititi pwe sia lúkúlúkúfengennikich. Fán ekkóch sia fang och mettóch, me fán ekkóch sia angei mettóch seni ekkewe ekkóch. Ren enletin, manawach a lóngólóng wóón álillisin ekkewe ekkóch. Áwewe chék, eli aramas repwe ngenikich mwéngé, are repwe álisikich ren pekin sáfei. (1 Kor. 12:21) Emén mi sile kilisou a pwári an kilisou ren minne ekkewe ekkóch ra féri fán itan. Iwe, ka kan eéreni le apasa óm kilisou ngeni chókkewe mi féri mettóch fán itom?

Pwal eú popun kopwe sile kilisou, pokiten ach féri ena epwe álisuk le nefótófót wóón minne mi éch nge esap fen wóón minne mi ngaw. Ekiekum a usun eú mworomwor lón kapas áwewe. A álisuk óm kopwe nefótófót wóón met mi múrinné me tunaló chék minne mi ngaw. Kopwe eéreni le ekieki ekkewe mettóch mi múrinné nge esap óm kewe osukosuk. Lapólóón óm kilisou, epwe pwal ina lallapólóón óm nefótófót wóón minne mi múrinné, iwe epwe pwal atoto pwapwaóm. Ika ka nefótófót wóón ekkewe mettóch ka kilisou fán itan, epwe álisuk óm kopwe féri minne ewe aposel Paulus a eáni pesepes: “Oupwe pwapwa lon ach Samol fansoun meinisin.”​—Fil. 4:4.

Ika ka kan kilisou, iwe epwe álisuk óm kosap eáni ekiek ese pwúng. A mmen weires ach sipwe kilisou ika a nóm rech memmeefin lólówó, letipengaw, are song. Chókkewe mi sile kilisou, rese kon pwal chei pisek. Ra aúcheani minne mi wor rer me rese achocho le achómmóngaaló pisekiir.​—Fil. 4:12.

Pokiten en emén Chón Kraist, ka mirititi pwe Satan a mochen óm kopwe letipengaw me lichippúng ren meinisin ekkewe weires ka nóm fan lón ekkeei ránin lesópwólóón. Epwe pwapwa ika ka ngúnúngúnúngaw me eáni ekiek ese pwúng usun mettóch meinisin. Ika ka ina usun, iwe epwe weires án ekkewe ekkóch repwe aúselinga óm afalafala ewe kapas allim. Ren enletin pwe ach pwári kilisou a riri ngeni uwaan án Kot we ngún mi fel. Áwewe chék, sia pwapwa le kúna ekkewe mettóch mi múrinné Kot a fang ngenikich me sia lúkú ekkewe mettóch a pwonei usun mwachkkan.​—Kal. 5:22, 23.

Pokiten en emén me lein néún Jiowa kewe aramas, iwe ese mwáál ka tipeeú ngeni met ka álleani lón ei lesen usun kilisou. Nge ka chúen mirititi pwe saminne a mecheres ach sipwe kikkilisou me eáni ekiek mi múrinné. Nge kosap mut ngeni ena an epwe elichippúnguk. Ka tongeni ámááraatá me sóssópweló chék le pwári óm kilisou. Ifa usun? Awora fansoun iteiten rán óm kopwe ekieki usun ekkewe kinikin lón manawom ka kilisou ren. Lallapólóón óm féri ena, pwal ina lallapólóón óm kopwe pwári óm kilisou. Ika ka féri ena, epwe lap óm pwapwa seni chókkewe mi nefótófót wóón weiresin manawer. Ekkekieki wóón ekkewe mettóch mi múrinné Kot me ekkewe ekkóch ra féri nge a apwapwaok me pwal apéchékkúlok. Eli ka tongeni poputá le makkeretiw. Lón eú rán ka tongeni makkeetiw ruu ika úlúngát mettóch ka kilisou ren.

Ekkóch sousile mi káé ena esin mettóch, ra erá pwe atun sia eérenaaló le kilisou ngeni ekkewe ekkóch, a tongeni siwili napanapen tupwuach pwe a mecheresiló ach meefi pwapwa usun manawach. Emén mi sile kilisou, epwe pwal lapóló an pwapwa. Ina popun ekieki usun meinisin ekkewe mettóch mi múrinné ka angei, pwapwaiti ekkewe mettóch mi múrinné mi fis ngonuk me kilisou fansoun meinisin! Sisap fen aúcheangawa mettóch nge sipwe fen “kilisou ngeni ewe Samol mi Lapalap, pun i a kirikiröch.” Ewer sipwe “kilisou lon mettoch meinisin.”​—1 Kron. 16:34; 1 Tes. 5:18.