Aapw. Ewe Tefil ese ereni Efa pwe ika a ocheei ewe irá mi pinepin me ren Kot, iwe inisin chék epwe máló nge a wor och kinikin sise tongeni kúna (ewe ekkóch lón ei fansoun ra eita ngeni ngúnún aramas esap tongeni máló) epwe chék sópwósópwóló le manaw lón pwal eú leeni. Satan, ewe mi afósa ewe serepenit, a erá pwe ika Efa a ocheei féún ena irá, iwe ‘esap fokun mäla.’ Weween alon na pwe epwe chék sópwósópwóló le manaw, me epwe fen kon pwapwaiti manawan wóón fénúfan ika a imu seni Kot.​—Ken. 2:17; 3:3-5.

Ika pwe ese pop seni Eten ewe lúkú mi chofona usun ngúnún aramas esap máló, ewe aramas ra lúkú usun lón ei fansoun, iwe ineet chék a poputá? Ese kon ffat ika ineet. Nge sia silei pwe meinisin fel mi chofona a muchúló atun ewe Noter lón ránin Noa we. Noa me chón an we famili, iir chókkewe mi manawewu seni ewe noter, me iir meinisin iir chón fel ngeni Jiowa chék, ese wor emén mi asukula lúkú mi chofona lón na fansoun.

Iwe ewe afalafal pwe a wor ngúnún aramas ese tongeni máló, a poputá mwirin ewe Noter. Atun Kot a aosukosuka án aramas fós lón ewe leeni Papel me atoropasafeili aramas “won unusen fanüfan,” iwe ese mwáál ekkena aramas ra uwei ewe lúkú pwe a wor ngúnún aramas ese tongeni máló. (Ken. 11:8, 9) Ese lifilifil ineet a poputá ena lúkú mi chofona, nge sia silei pwe Satan ewe Tefil ewe “semen chon chofona” a álisatá, me a mmen pwapwa pwe a chéúfetál ekis meinisin.​—Joh. 8:44.