Ren enletin, esap ina met ena wokisin a fós usun. Nge a weneiti emén mi chék tuttur lón ekkewe osukosuk are weires nge a chék likiitú me pwáátásefál.

Ekieki usun ekkeei epwipwiin wokisin: “Kosap operi imwen ewe chon pwüng usun eman aramasangau, kosap pwal tolong lon o angei pisekin fän pöchökül. Pun inamwo ika eman chon pwüng a turula fän fisu, a chök pwätäsefäl. Nge feiengau epwe tori ekewe aramasangau. Kosap meseik ren chon oputom, lupwen a tolong lon feiengau [“turuló,” NW], kosap pwal pwapwa, lupwen a chepetek.”​—SalF. 24:15-17.

Ekkóch aramas ra ekieki pwe wokisin 16 a weneiti emén mi tipis nge a aier me a ririéchsefál ngeni Kot. Rúúemén néúwisin lamalam seni Britain ra makkeei pwe “ekkewe chón afalafal me lóóm me lón ei fansoun, ra áweweni ena wokisin” lón ena itiitin. Ekkena néúwisin lamalam ra pwal erá pwe ena sókkun ekiek a wewe ngeni pwe “emén aramas mi múrinné a tongeni ttur lón . . . tipis mi chou, nge epwe chék tottongei Kot, me epwe pwáátásefál ren an aier iteitan.” Emén ese mochen fiu ngeni tipis a sani ena esin ekiek. Eli epwe ekieki pwe inaamwo ika a tipis fán fite, nge Kot epwe chék okkomusaló.

Nge esap ina enletin weween wokisin 16.

Ewe kapasen Ipru mi afféú ngeni “turula” lón wokisin 16 me 17, sia tongeni néúnéú lón sókkopaten napanap. A tongeni wewe ngeni wesewesen ttur, áwewe chék ren án emén kou turutiw lepekin efóch al, are án emén turutiw me wóón osun imwan we. (Tut. 22:4, 8) Nge sia tongeni néúnéú ena kapas lón pwal och weween, áwewe chék ren ei: “Ewe Samol mi Lapalap a emweni eman aramas won ewe al epwe fetal won, a pwal anüküchara i, pun a pwapwa ren. Are epwe tur, esap turuchapala, pun ewe Samol mi Lapalap a kamwöch pöün.”​—Kölf. 37:23, 24; SalF. 11:5; 13:17; 17:20.

Iwe nge nengeni met ei professor itan Edward H. Plumptre a apasa: “Esap fán eú án ewe kapasen Ipru mi afféú ngeni [“ttur”] epwe wewe ngeni ttur lón tipis.” Ina popun, pwal emén soukáé a áweweei wokisin 16 iei usun: “A chék lamotongaw án emén epwe kirikiringaw ngeni néún Kot kewe aramas pokiten repwe chék sóssópwéch, nge ekkewe aramasangaw rese kan ina usun!”

Ina minne, meinisin ekkena pwóróus ra áiti ngenikich pwe Än Salomon Fos 24:16 ese wewe ngeni án emén ttur lón tipis, nge a wewe ngeni án emén kúkkúna osukosuk are weires pwal mwo nge fán fite lón manawan. Lón ei ótót mi ngaw, a tongeni fis ngeni emén aramas mi pwúng osukosuken apwangapwangen inis are pwal ekkóch weires. A pwal mwo nge tongeni kúna riáfféúmwáál seni mwú pokiten an lúkú. Nge a tongeni lúkúlúk pwe Kot epwe álisi, elikiitú, me asopwéchú. Pwisin eisinuk, ‘Usele fen piin kúna pwe inaamwo ika néún Kot kewe aramas ra nóm fán weires nge fán chómmóng ra sópwéch?’ Pwata? Pún ewe Paipel a alúkúlúkúkich pwe “ewe Samol mi Lapalap a aütäi ir meinisin mi turula, a awenätä sokürün ir mi pworotiu.”​—Kölf. 41:1-3; 145:14-19.

“Eman chon pwüng” ese pwapwa ren án ekkewe ekkóch nóm lón osukosuk. Nge a fen péchékkúletá ren an silei pwe “chokewe mi niueiti Kot o meniniti repwe feiöch.”​—SalAf. 8:11-13; Hiop 31:3-6; Kölf. 27:5, 6.