Atun Jesus a nóm láng, a napanapeni ekkewe napanap mi efisi an epwe emén chón angang mi múrinné lón ar angangfengen me ekkewe ekkóch. Iwe atun a nóm fénúfan, a isetiw leenien áppirú mi múrinné lón ar angangfengen me ekkewe ekkóch. Met sia káé seni án Jesus leenien áppirú? Atun sia etittina an leenien áppirú, sia tongeni kúna úlúngát kapasen emmwen repwe álisikich lón ach angangfengen me ekkewe ekkóch fán kinamwe. Ekkena kapasen emmwen repwe álisikich le alapaaló ach tipeeúfengen me chienach kewe Chón Kraist.

Emén chienach chón angang mi múrinné, a tipetekison. A aúcheani chienan kewe chón angang me ese eingaaretá. Jesus a káé tipetekison seni Seman we. Inaamwo ika a chék fich ngeni Jiowa ewe itelap Chón Fératá, nge a mochen án ekkewe ekkóch repwe silei usun ewe angang mi aúchea Néún we a féri. Sia kúna ena lón met ei Kot a erá: “Sipwe föri aramas mi wewe ngenikich.” (Ken. 1:26) Atun Jiowa a erá ena, Jesus a silei pwe Seman na a fókkun tipetekison.​—Kölf. 18:35, NW.

Atun Jesus a nóm fénúfan, a pwal tipetekison. Atun aramas ra mwareiti ren ekkewe mettóch a féri, a elingaaló Kot. (Mark. 10:17, 18; Joh. 7:15, 16) Jesus a achocho le efisi kinamwe  lefiler me néún kewe chón káé me a ekieki pwe iir chiechian, nge esap iir néún slave. (Joh. 15:15) A pwal mwo nge télú pecher pwe epwe asukula ngeniir ewe napanap tipetekison. (Joh. 13:5, 12-14) Sipwe usun chék i me aúcheani chienach kewe Chón Kraist, me sisap fen akkomwa mochenich. A chómmóng met sia tongeni féri ika sia asamolu ekkewe ekkóch me sise mochen ar repwe chék mwamwareitikich.​—Rom 12:10.

Emén mi tipetekison a mirititi pwe “are a wor chomong chon öüröür, a fisiöch mine ra ekiekietä.” (SalF. 15:22) Inaamwo ika a watte sileach are tufichich, nge a lamot ach sipwe chechchemeni pwe ese wor emén a silei mettóch meinisin. Pwal mwo nge Jesus a affata pwe a wor ekkóch mettóch i ese silei usur. (Mat. 24:36) A pwal mochen silei usun met néún kewe chón káé rese unuséch ra ekieki are silei. (Mat. 16:13-16) Ina popun, chókkewe mi tapweló mwirin ra kinamwe ren! Pwal ina chék usun, atun sia tipetekison me chemeni pwe sise silei mettóch meinisin, me aúseling ngeni meefien ekkewe ekkóch, sipwe álisatá ach kinamwefengen, iwe epwe ‘fisiöch mine sia ekiekietä.’

A ákkáeúin lamot ngeni ekkewe mwán mi ásimaw ar repwe áppirú Jesus lón ar angangfengen. A lamot repwe chechchemeni pwe án Jiowa we ngún mi fel a tongeni emmweni ese lifilifil mwán mi ásimaw leir. Atun ra mwichfengen, ra ámmeef ngeni emén me emén leir pwe ra tongeni chék uwawu meefier fán kinamwe, me iir meinisin repwe pwúngúpwúngfengen wóón met epwe asopwéchú meinisin lón ewe mwichefel.

Emén chón angang mi múrinné, a angang ren ekkewe ekkóch fán tipepwetete are kinamwe. Ese tichik nge a tipemecheres. Ese mwáál, fán chómmóng Jesus a kúna tipemecheresin Seman we. Áwewe chék, ren án Jiowa tiinaato ngeni fénúfan pwe epwe seláni aramas seni máló, liwinin tipisiir we.​—Joh. 3:16.

Jesus a pwal tipemecheres atun mi fich are lamot. Chemeni ifa usun a álisi ewe fin Kanaan, inaamwo ika a titiiló pwe epwe chék álisi ekkewe chón Israel. (Mat. 15:22-28) A pwal tipepwetete lón met a mochen seni néún kewe chón káé. Mwirin án Petrus, chiechian we amamesini i mwen mesen aramas, Jesus a mmólnetá le omusaaló tipisin. Mwirin, a ewisa ngeni eú wis mi lap. (Luk. 22:32; Joh. 21:17; Föf. 2:14; 8:14-17; 10:44, 45) Án Jesus leenien áppirú a affata pwe a lamot ach sipwe “tipepwetete ngeni aramas  meinisin” ren ach sipwe tipemecheres ngeniir.​—Fil. 4:5.

Ach tipepwetete epwe álisikich le tipemecheres le angangfengen me aramas ese lifilifil. Jesus a kirekiréch ngeni meinisin pwe iwe chón oputan kewe mi lólówóiti ra esiita pwe a “chiechi ngeni ekewe chon ioni takises me chon tipis” iir kewe mi etiwa an afalafal. (Mat. 11:19) Itá sia tongeni usun Jesus me kinamwe lón ach angangfengen me chókkewe mi sókkóló senikich? Iei alon emén Chón Kraist mwán itan Louis mi angangfengen me chómmóng lón an angangen sáifetál me lón Bethel: “Ach angangfengen me chókkewe rese unuséch, a usun ach aúetá eú ttit nge sia áeá faú mi sókkopat saisiir. Pokiten a sókkopat saisin ekkena faú, iwe a lamot ach sipwe angang weires pwe ena ttit epwe tongeni wenewen. Ua achocho le pwisin émúrinnéeiló pwe aupwe tongeni angangfengen me ekkewe ekkóch fán kinamwe me ataweei ewe angang.” A ifa me múrinnéén ekiekin!

Ineet atun sia tongeni pwári pwe sia angangfengen me ekkewe ekkóch fán kinamwe lón ach mwichefel? Sia tongeni féri ena lón pwisin ach we kúmiin mwichen afalafal. Ousia tongeni mwin me emén me emén chón lón eú famili are chókkewe mi watte are kúkkún senikich. Sia tongeni tipemecheres ren ach ekkesiwili ach kókkót are met sia mochen féri pwe epwe alapaaló án chienach na pwapwa lón ewe angangen afalafal.

Emén chón angang mi múrinné a “fangafangoch.” (1 Tim. 6:18, Testament mi Fö) Atun Jesus a angang ren Seman we, ese mwáál a kúna pwe Jiowa ese aopa seni i mettóch. Atun Jiowa a “anomu ekewe läng lon lenier,” Jesus a “fen nom” me a tongeni káé seni. (SalF. 8:27) Mwirin, Jesus a ereni néún kewe chón káé fán pwapwa “meinisin mine [a fen] rongorong me ren” Seman we. (Joh. 15:15) Sia tongeni áppirú Jiowa ren ach ereni pwiich kewe minne sia káé. Emén chón angang mi múrinné ese nemeni aramas ren an amonomona seniir ekkewe pwóróus mi lamot repwe rong are ekkewe pwóróus epwe álilliséch ngeniir. A pwapwa le ereni ekkewe ekkóch minne a káé.

Sia pwal tongeni apéchékkúla chienach kewe Chón Kraist. Atun emén a áfánni ach achocho me kilisou ngenikich, esap pwe sia pwapwa? Jesus a ereni chienan kewe ekkewe mettóch mi múrinné a kúna seniir. (Apépé ngeni Mateus 25:19-23; Lukas 10:17-20.) A pwal mwo nge ereniir pwe repwe “föri föför mi lap seni” minne a féri. (Joh. 14:12) Lón ewe pwinin mwen an we epwele máló, a apúnga néún kewe aposel mi tuppwél ren an ereniir: “Ämi oua etiei lon ai kewe riaföü meinisin.” (Luk. 22:28) Anchangei péchékkúletáár ren an kana kapas mi achchúngúúr! Ika sia apúnga chienach kewe Chón Kraist, repwe pwapwa me repwe fériéchú ar angang.

Emén Chón Kraist mwán itan Kayode a apasa: “Ese lamot án emén chón angang mi múrinné epwe unuséch, nge epwe achocho le efisi pwapwaan chienan kewe me mecheresin ar angang.” A pwal ina usum? Eli ka tongeni eisini chienom kewe Chón Kraist ika en met sókkun chón angang. Ika ra pwapwa le angang reom, usun án néún Jesus kewe chón káé pwapwa le angang ren, iwe ka tongeni aloni alon aposel Paulus ei, mi erá: “Sia chök angangfengen fänäsengesin ämi pwapwa.”​—2 Kor. 1:24.