Ka fen álleaniéchú meinisin ekkewe Leenien Mas lón ei ier? Ika ewer, ppii ika ka tongeni pélúweni ekkeei kapas eis:

Ifa usun sipwe kúna feiéch ika sia awora fansoun le fóffós ngeni Jiowa, akkaúseling ngeni, me ekkekieki usun?

Sipwe eáni kefil mi múrinné, wiliti sense mi múrinné, epwe péchékkúleló ach lúkú, me lapóló ach tongei Jiowa.​—w22.01, p. 30-31.

Ifa usun sipwe kúna álillisin ach káé le lúkúlúk wóón Jiowa me chókkewe mi tupuni?

Iei ewe fansoun sipwe lúkúlúk pwe minne Kot a féri a pwúng fansoun meinisin, nge sisap tipemwaramwareiti án ekkewe mwán mi ásimaw emmwen me kefil. Atun epwe fis ewe riáfféú mi lapalap, sipwe mmólnetá le álleasochis inaamwo ika usun itá a weires ach sipwe weweiti me apwénúetá ekkewe kapasen emmwen repwe katowu.​—w22.02, p. 4-6.

Met weween alon ewe chónláng ngeni Sekaraia usun ewe “selin äwenewen a nóm lón pöün [Kepina] Zerubbabel”? (Sek. 4:8-10, Paipel mi Pin—Agapé)

Kúnaen Sekaraia na, a alúkúlúkú néún Kot kewe aramas pwe inaamwo ika ewe imwenfel ese usun lingen ewe minen akkomw, nge epwe wesiló lón ewe napanap Kot a tipeni.​—w22.03, p. 16-17.

Ifa usun sia tongeni isetiw eú ‘lenien apirü . . . lon ach kapas’? (1 Tim. 4:12)

Sia eáni kapas mi pwetete me ésúfél lón ach angangen afalafal, kél seni letipach, ukkuwawu meefiach lón mwich, eáni kapas enlet me kapas mi apéchékkúla ekkewe ekkóch, me ttii senikich ekkewe sókkun fós mi ámmetek.​—w22.04, p. 6-9.

Pwata nikinikin ekkewe fémén manmwacho (mwúún aramas) mi mak lón Taniel sópwun 7 ra pwá me wóón ewe chék emén manmwacho lón Pwärätä 13:1, 2?

Ewe manmwacho lón Pwärätä 13 ese liosuetá eú chék mwúún aramas, áwewe chék ren Rom. Nge a liosuetá meinisin mwúún aramas mi nemenem.​—w22.05, p. 9.

Ifa alen ach sipwe pwári pwe sia lúkúlúk wóón án Kot féfférún pwúng?

Ika emén a esiitakich, ámetekikich, are tipis ngenikich, sipwe achocho le likitaló ach song me tipengaw, nge likit ngeni Jiowa ewe osukosuk. Epwe amóeló minne mi ngaw meinisin mi popu seni tipis.​—w22.06, p. 10-11.

Met emén Chón Kraist mwán epwe chemeni atun a eáni iótek lón eú mwich?

Fansoun a iótek, esap ina ewe atun epwe áwena chón ewe mwichefel are eáni pwóróus esilesil. Ese lamot an epwe “kapas chommong” ákkáeúin lepoputáán eú mwich. (Mat. 6:7, Testament mi Fö)​—w22.07, p. 24-25.

Ifa usun “chokewe mi föri föför mi ngau repwe manausefäl o küna apwüng?” (Joh. 5:29)

Resap kúna kapwúng mi ngaw ren minne ra féri lón manawer me lóóm. Nge repwe etittin ren napanaper me féfférúr mwirin ar manawsefál.​—w22.09, p. 18.

Ifa ewe kapasen pesepes mi ámmeseik J. F. Rutherford a eáni lón ewe mwichelap mi fis lón ewe September 1922?

Iei met a eáni esilesil lón ewe mwichelap mi fis lón Cedar Point, Ohio, U.S.A: “Nengeni, ewe King a nemenem! Wisemi ámi oupwe esile ngeni aramas usun ena mettóch. Ina minne, esilefeili, esilefeili, esilefeili ewe King me an we Mwú!”​—w22.10, p. 3-5.

Ikkefa ekkewe úlúngát minen álillis Kot a áeá le álisikich le likiitú usun met Aisea sópwun 30 a menlapei?

Ena sópwun a áiti ngenikich pwe i a (1) aúselingéch ngeni ach kewe iótek me pélúweniir, (2) awora ngenikich kapasen emmwen, me (3) efeiéchúkich lón ei fansoun me lón fansoun mwach.​—w22.11, p. 9.

Pwata sia tongeni erá pwe masouen Kölfel 37:10, 11, 29 a fen pwénútá lón fansoun lóóm me epwe pwal pwénúetá lón fansoun mwach?

A fich alon Tafit kana atun a áweweei nónnóméchún ekkewe chón Israel, áwewe chék atun Salomon a nemenem. Jesus a fós usun ewe paratis lón fansoun mwach me a aloni alon wokisin 11. (Mat. 5:5; Luk. 23:43)​—w22.12, p. 8-10, 14.