Atun Jiowa a allúkú ngeni aramas ar repwe ‘achomongerelo pwe fanüfan epwe masou rer o nom fän nemenier,’ a pwári pwe unusen fénúfan epwe wikkililó ngeni eú paratis. (Ken. 1:28) A lamot ngeni chókkewe repwe manaw tori feilfeiló ar repwe pwal álleasochisi ena allúk. Ei fénúfan ese chúen eú paratis pwe ese chúen nóm ewe tánipiin Eten. Mwirin ewe Armaketon, epwe watte ewe angang sipwe féri le elimelima ekkewe leeni mi taló. A ifa me watteen ena angang!

Ena mettóch a áchchema ngenikich ewe angang ekkewe chón Israel ra féri atun ra liwin seni Papilon. Fénúer we a fen péénnúló ren úkúkún 70 ier. Nge Aisea a oesini pwe ren án Jiowa álillis, repwe tongeni amúrinnésefáli. Iei met ewe oesini a erá: “Üpwe föri pwe fanüan mi pön epwe wewe ngeni Eten, nge fanüan mi pwas epwe wewe ngeni ai tanipi.” (Ais. 51:3) Jiowa a álisi ekkena chón Israel le amúrinnésefáli ena fénú. Pwal ina chék usun, ren án Jiowa álillis, chókkewe repwe fénúeni fénúfan repwe pwal sópwéch le ewili ngeni eú paratis mi lingéch. Me pwal mwo  nge iei, ka tongeni pwári pwe ka mochen álillis lón ena angang.

Eú alen óm kopwe féri ena, ina ren óm achocho le elimelima imwom we me atorotoraéchú. Ka tongeni féri ena inaamwo ika chón órum kewe rese pwal féri ena. Ka pwal tongeni álillis lón angangen túmúnún me elimelimen ewe Leenien Mwich me ewe Leenien Mwichelap. Ika ka tufich ngeni, ka pwal tongeni apply pwe kopwe álillis lón ewe angang fán iten feiengaw watte. Ika ka féri ena, ka pwári pwe ka mochen álisi chienach kewe Chón Kraist atun ra nóm lón osupwang. Ka tongeni pwisin eisinuk, ‘Ua tongeni káé ekkóch angang ua tongeni féri ika Jiowa epwe mut ngeniei ai upwe manaw wóón fénúfan tori feilfeiló?’

Mwirin chék án Jesus amanawatá néún Jairus we nengngin, a ereni ekkewe aramas ar repwe amwéngééni. (Mark. 5:42, 43) Túmúnún ena nengngin 12 ierin, esap ina eú angang mi weires. Iwe nge, ekieki úkúkún ewe angang sipwe féri atun Jesus epwe apwénúetá an ei pwon pwe ekkewe “sotup meinisin repwe rong mwelian o towu seni peiaser.” (Joh. 5:28, 29) Inaamwo ika ewe Paipel ese pwal tichikietiw met sipwe féri, nge sia tongeni anchangei pwe a lamot mwéngé, imw, me úf ngeni chókkewe repwe manawsefál. Ka tongeni pwári pwal mwo nge iei pwe ka mmólnetá le álillis ren óm féri ekkeei fitu mettóch.

Atun a esilesil pwe ewe chónemmwen mi wisen sáifetál epwe chuuri óm we mwichefel, ka etiwa ámi oupwe mwéngéfengen lón imwom we? Atun a kewis ngeni emén chón angang lón Bethel an epwele álillis lón óm we mwichefel, are atun emén chónemmwen mi wisen sáifetál ese chúen wiseni wisan we, ka tongeni álillis le kút ia repwe nóm ie? Ika epwe fis eú regional are special mwichelap lón leeniom we, ka tongeni álillis lón ekkewe angang mwan are mwirin ekkena mwich, are álillis le etiwa pwiich kewe mi etto fiti ena mwich?

Pokiten met sia álleani seni Föför 24:15, sia ésúkúsúkú pwe epwe wor fite billion aramas repwe manawsefál. Chómmóng me leir ese suuk ngeniir ewe tufichin ar repwe silei Jiowa me mwen ar máló. Nge epwe suuk ngeniir ena mettóch mwirin ar manawsefál. a Néún Kot kewe chón angang mi tuppwél me lipwákéch, repwe fiti ena esin angangen asukula aramas. (Ais. 11:9) Charlotte, emén chón afalafal mi kan afalafal lón Europe, South America, me Afrika, a ésúkúsúkú ena mettóch. Iei met a apasa fán an pwapwa: “Ua mwétéresiti atun upwe afalafal ngeni chókkewe repwe manawsefál. Atun ua álleani pwóróusen emén a fen máló, ua kan ekieki: ‘Ika eménnei a chék silei Jiowa, iwe epwe fókkun sókkóló manawan.’ Ua atapwalato ai upwe ereni chókkewe repwe manawsefál usun Jiowa me usun múrinnéén manawer ika repwe angang ngeni.”

Epwe pwal mwo nge chómmóng met néún Jiowa kewe chón angang mi tuppwél repwe káé, chókkewe mi manaw me mwen án Jesus feitiw fénúfan. Anchangei úkúkún apwapwaan me aúchean ach sipwe áwewe ngeni Taniel pwénútáán ekkewe oesini a makkeei nge ese weweitiir. (Tan. 12:8) Are pwal apwapwaan ach sipwe álisi Rut me Naomi le silei pwe ewe Messaia a kapachelong lein mwirimwiriir kewe. A ifan me apwapwaan ach sipwe álillis lón ewe angangen asukula aramas epwe fis wóón unusen fénúfan, nge esap pwal chúen wor met epwe áweiresikich me aosukosukakich usun met sia kúna me lón ewe ótót mi ngaw!

Ifa usun ka tongeni pwári iei pwe ka mmólnetá le álillis lón ena angang? Eú alen óm féri ena, ina ren óm achocho úkúkún óm tufich le lipwákéchúló lón ewe angangen asukul me fiffiti ewe angangen afalafal iteitan. (Mat. 24:14) Inaamwo ika ierum are pwal ekkóch mettóch ra aúkúkú met ka tongeni féri iei, nge óm achocho a tongeni pwári pwe ka fókkun mochen asukula chókkewe repwe manawsefál.

A éch ach sipwe ekieki usun ekkeei kapas eis mi lamot: Ka enletin mmólnetá óm kopwe fénúeni fénúfan? Ka mwétéres óm kopwele ewili ei fénúfan ngeni paratis, me pwal túmúnú me asukula chókkewe repwe manawsefál? Kopwe pwári pwe ka mmólnetá iei ren óm álillis lón ekkewe angang mi taitap ngeni ekkewe angang mi mmólnetá fán itom atun kopwe fénúeni fénúfan!