1. Met weween “än Kot kinamwe,” me ifa usun sia kúna álillis seni? (Filipi 4:6, 7)

 A WOR eú sókkun kinamwe chón ei fénúfan rese silei usun. Ina “än Kot kinamwe,” ewe sókkun kinamwe mi pop seni ach ririéch ngeni Semach na lón láng. Lupwen a nóm rech án Kot kinamwe, sia meefi núkúnúkéch. (Álleani Filipi 4:6, 7.) Sia chiechiéch ngeni chókkewe mi tongei i. Me sia ririéch ngeni “Kot, ewe mi fang ngenikich kinamwe.” (1 Tes. 5:23) Lupwen sia silei Semach Kot, lúkúlúk wóón, me álleasochisi, an we kinamwe a tongeni amasésélóói ach aúrek lón letipach atun sia nóm lón osukosuk.

2. Pwata sia tongeni lúkúlúk pwe mi tufich ach sipwe eáni án Kot kinamwe?

² Mi tufich ach sipwe eáni án Kot kinamwe atun sia nóm lón osukosuk, áwewe chék ren eú semmwen mi chéú, feiengaw watte, fitikoko, are riáfféúmwáál? Ekkena esin osukosuk, ra tongeni efisi ach sipwe niwokkus. Nge iei met Jesus a eáni éúréúr ngeni néún kewe chón káé: “Ousap lolilen lon lelukemi, ousap pwal niuokus.” (Joh. 14:27) A mmen éch pwe chienach kewe Chón Kraist ra álleasochisi án Jesus na éúréúr. Ren án Jiowa álillis, ra tongeni meefi kinamwe atun ra likiitú fán ekkewe sóssót mi áweires.

3. Ifa usun fisin eú semmwen mi chéú a tongeni atai ach kinamwe?

³ Fisin eú watteen semmwen lón eú leeni, are watteen chéúlóón, a tongeni siwili lape ngeni unusen kinikinin manawach. Áwewe chék ren met a fis ngeni chómmóng atun ewe COVID-19. Eú survey, a repotei pwe lap seni esopwun masouen chón lón ena survey, ra erá pwe a weires ngeniir ar repwe méúr atun ena pandemic. Atun ena pandemic a fókkun lapóló án aramas aúrek, semwenin letip, áeámwáálli sakaw me áeámwáálli drugs, féri féfférún akkachofesá lón famili, me ekiekin  pwisin angealó manawer. Ika a fis eú semmwen mi chéú lón leeniom we, ifa usun kopwe tongeni nemeni óm aúrek me eáni án Kot kinamwe?

4. Pwata ach silei usun án Jesus oesini usun ekkeei ránin lesópwólóón a atoto ngenikich kinamwe?

⁴ Jesus a oesini pwe atun ekkeei ránin lesópwólóón, epwe wor semmwen mi chéú “ekis meinisin.” (Luk. 21:11) Pwata ach silei ena a atoto ach kinamwe? Sise máirú ren fisin ekkewe semmwen mi chéú. Sia weweiti pwe ra fiffis usun met Jesus a fen erá. Ina popun sipwe álleasochisi an ei kapasen éúréúr ngeni chókkewe mi manaw lón ekkeei ránin lesópwólóón: “Ousap niuokus.”​—Mat. 24:6.

5. (a) Ifa usun Filipi 4:8, 9 a álisikich le silei met sipwe ióteki atun a fis eú semmwen mi chéú? (b) Ifa usun emén Chón Kraist fefin a kúna álillis seni an aúseling ngeni ekkewe álleaan Paipel mi record, me met sia tongeni káé seni?

⁵ Fisin eú semmwen mi chéú, a tongeni efisi ach sipwe fókkun lólilen me niwokkus. Ina met a fis ngeni emén fefin Chón Kraist itan Desi. b Mwirin málóón an we uncle, an we cousin, me néún we tokter ren ewe COVID-19, a niwokkus ika epwe úri ena semmwen, me pwal tori inan we a chinnap. Pokiten ena pandemic, a pwal lólilen ika epwe katowu seni an we angang me ifa usun epwe kamé ener me mééni ar rent. A fókkun aúreki ekkena mettóch, ina popun ese tongeni akkannut lepwin. Nge Desi a meefisefáli kinamwe. Ifa usun? A tichiki ngeni Jiowa lón iótek pwe epwe álisi le eáni kinamwe me ekiek mi pwúng. (Álleani Filipi 4:8, 9.) A aúseling ngeni án Jiowa “fós” ngeni seni ekkewe álleaan Paipel mi record. Iei met a erá, “Léúwen ekkewe chón állea mi ekinamwe, a amasésétiw ai aúrek me áchchema ngeniei án Jiowa úméúméch.”​—Kölf. 94:19.

6. Ifa usun óm pwisin káé me fiffiti mwich epwe álisuk?

⁶ Atun fisin eú semmwen mi chéú, epwe weires óm kopwe féfféri ekkewe mettóch ka kan féffériir me mwan, nge kosap mut ngeni ena mettóch an epwe eppeti óm pwisin káé are fiffiti mwich. Pwóróusen chienach kewe lón néúch kewe puk me video repwe áchchema ngonuk pwe chienom kana Chón Kraist ra chék sópweló le angang ngeni Jiowa fán tuppwél, inaamwo ika ra pwal nóm lón ena esin osukosuk. (1 Pet. 5:9) Ekkewe mwich repwe álisuk le ekieki ekkewe pwóróus mi álilliséch seni ewe Paipel. Repwe pwal suuki ngonuk alen óm kopwe apéchékkúla ekkewe ekkóch me pwal pwisin en. (Rom 1:11, 12) Atun ka ekieki ifa usun Jiowa a álisi ekkewe chón fel ngeni atun ra samau, meefi niwokkus, are meefi tipitipingaw, epwe péchékkúleló óm lúkú me kopwe lúkúlúk pwe i epwe pwal álisuk.

7. Met ka tongeni káé seni aposel Johannes?

⁷ Achocho le pwóróus ngeni chienom kewe Chón Kraist. Atun fisin eú semmwen mi chéú,  eli a lamot ach sipwe ekis atowauakich seni aramas pwal mwo nge atun sia nóm ren chienach kewe Chón Kraist. Lón ena atun, eli ka meefi met ewe aposel Johannes a pwal meefi. A mochen kúna chienan we Kaius lón féúféún aramas. (3 Joh. 13, 14) Iwe nge, a mirititi pwe ese tongeni kúna Kaius ren ekis fansoun. Ina popun, a féri met a tongeni féri. A mak taropwe ngeni Kaius. Ika ese tufich óm kopwe kan ló chuuri chienom kewe Chón Kraist, iwe achocho le kériir wóón phone, video chat ngeniir, are text ngeniir. Atun ka kan achocho le pwóróus ngeni chienom kewe Chón Kraist, kopwe meefi núkúnúkéch me kinamwe. Kékkéri are mak ngeni ekkewe mwán mi ásimaw ika ka meefi watteen lólilen, me kopwe etiwa ar kapasen pesepes mi fiti tong.​—Ais. 32:1, 2.

8. Ifa usun eú feiengaw watte a tongeni atai óm kinamwe?

⁸ Ika ka riáfféú ren fisin eú watteen puu, chchechin fénú, are eú kkar, eli kopwe meefi watteen lólilen ren fansoun langattam. Ika a má sonuk attongeom, ta sonuk imwom me pisekum kewe, eli kopwe meefi chúúpwúl, ápilúkúngaw, are pwal mwo nge song. Nge esap weween pwe ka tongei pisek, are a nafangaw óm lúkú. Ka fen nóm fán watteen weires, iwe eli ekkóch repwe ekieki pwe kopwe eáni ekkewe memmeef rese pwúng. (Hiop 1:11) Inaamwo ika a fis ekkena mettóch, nge ka chúen tongeni eáni kinamwe. Ifa usun?

9. Ifa usun Jesus a ammólnakich ngeni feiengaw watte?

⁹ Chemeni met Jesus a fen oesini. Ekkóch aramas ra ekieki pwe esap fókkun fis ngeniir feiengaw watte. Nge kich, sia silei pwe epwe fen lapóló feiengaw watte lón ach ei fansoun, me epwe pwal pwisin fis ngenikich ekkóch me leir. Jesus a ereni néún kewe chón káé pwe epwe fis “watten chechen fanü” me pwal ekkóch feiengaw watte me mwen warotoon ewe sópwólóón. (Luk. 21:11) A pwal oesini pwe epwe “wattela föföringau” lón ach ei fansoun, áwewe chék ren féfférún atai allúk, angangen mwááneson, me angangen teroris. (Mat. 24:12) Jesus ese fókkun apasa pwe ekkena feiengaw watte epwe chék fis ngeni chókkewe Jiowa a likitiireló. Ren enletin, chómmóng me lein néún Jiowa kewe chón angang mi tuppwél, a fen toriir feiengaw watte. (Ais. 57:1; 2 Kor. 11:25) Eli Jiowa esap féri manaman pwe epwe túmúnúkich seni meinisin ekkewe feiengaw watte, nge epwe awora ngenikich met mi lamot pwe sipwe eáni kinamwe.

10. Pwata ach mmólnetá iei fán iten fisin eú feiengaw watte a pwári pwe mi wor ach lúkú? (Än Salomon Fos 22:3)

¹⁰ Epwe mecheres ach sipwe eáni kinamwe atun fisin weiweitáán osukosuk ika sia ammólnatá me mwan. Nge itá ach féri ena a ánnetatá pwe a apwangapwang ach lúkú Jiowa? Aapw esap ina. Ren enletin, ach mmólnetá ngeni eú feiengaw watte, a pwári pwe sia lúkú án Jiowa tufichin túmúnúkich. Ifa usun? An we Kapas a pesekich ach sipwe mmólnetá ngeni ekkewe feiengaw watte mi tongeni fis. (Álleani Än Salomon Fos 22:3.) Án Jiowa we mwicheich a ammólnakichetá ngeni weiweitáán osukosuk ren an akkawora pesepes seni ach kewe mwich, ekkewe magazine, me ekkewe pwóróus esilesil mi katowu lón fansoun fich. c Sia lúkúlúk wóón Jiowa? Ika ewer, iwe sipwe álleasochisi ekkewe kapasen éúréúr iei me mwen fisin eú feiengaw watte.

11. Met ka káé seni pwóróusen Margaret?

¹¹ Ekieki pwóróusen ei Chón Kraist fefin itan Margaret. Ekkewe néúwisin mwú ra ereni an  epwe ló seni imwan we pokiten a fis eú watteen kkar lón leenier we. Pokiten a chómmóng aramas ra súppék, iwe a eppetiló ekkewe al me a wesen traffic. A chék étúét fetál ekis meinisin, me Margaret a chék mwéchúlong leféén waan we. Iwe nge pokiten a mmólnetá, iwe ese máló. A kan uwei eú map lón an we pwotou pwe epwe tongeni néúnéú le kúna pwal efóch al epwe pwer ie. A pwal mwo nge drive wóón ena al me mwan pwe epwe mecheres ngeni le sa wóón ika a fis weiweitáán osukosuk. A fókkun álilliséch án Margaret mmólnetá pwe a seláni seni ena kkar.

12. Pwata a lamot ach sipwe álleasochisi ekkewe kapasen emmwen usun túmúnúch?

¹² Ren án ekkewe néúwisin mwú repwe túmúnúkich me ekkewe ekkóch seni feiengaw, eli repwe erenikich ach sipwe fiti eú curfew, sú ngeni eú leeni, are álleasochisi pwal ekkóch kapasen emmwen. Ekkóch aramas rese mochen álleasochisi ekkena kapasen emmwen pwe rese mochen likitaló pisekiir kewe. Nge ifa usun ren kich Chón Kraist? Iei met Paipel a apasa: “Fänäsengesin ach we Samol oupwe aleasochisi nöüwisen ekewe mwü: Oupwe aleasochisi ewe king, pun i ewe samol mi lap, pwal ngeni ekewe kepina, i a awiser.” (1 Pet. 2:13, 14) Án Kot we mwicheich a pwal awora kapasen emmwen pwe epwe túmúnúkich seni feiengaw. A kan ákkáchema ngenikich ach sipwe ngeni ekkewe mwán mi ásimaw néúch nampaan phone me ia sia nóm ie pwe repwe tour ngenikich atun weiweitáán osukosuk. Ka fen féri ena? Eli a pwal torikich kapasen emmwen ren ach sipwe chék nómwotiw lón eú leeni, sú ngeni pwal eú leeni, angei álillis, are ifa usun me ineet sipwe álisi ekkewe ekkóch. Ika sise fiti ekkena emmwen, iwe sia tongeni atolongakich me ekkewe mwán mi ásimaw lón feiengaw. Chemeni pwe ekkena mwán mi tuppwél ra kan wisen túttúmúnúkich. (Ipru 13:17) Margaret a erá, “Ua unusen lúkú pwe ai fiti án ekkewe mwán mi ásimaw me án ewe mwicheich kapasen emmwen, a seláni manawei.”

13. Met a álisi chienach kewe mi likitaló imwer ar repwe akkamwéchú ar pwapwa me kinamwe?

¹³ Chómmóng chienach kewe Chón Kraist mi likitaló imwer pokiten fisin eú feiengaw watte, maun are fitikoko, ra fókkun achocho le eérenaaló siwililóón nónnómur me alapaaló ar angang ngeni Jiowa. Ra sópweló le “afalafala ewe kapasen Kot” usun chék ekkewe Chón Kraist lóóm mi parasfetál pokiten ar kúna riáfféúmwáál. (Föf. 8:4) Ewe angangen afalafal a  álisiir le nefótófót wóón án Kot we Mwú nge esap wóón weiresin nónnómur. Ina minne ra chék akkamwéchú ar pwapwa me kinamwe.

14. Ifa usun riáfféúmwáál a tongeni atai ach kinamwe?

¹⁴ Riáfféúmwáál a tongeni uwei senikich chómmóng mettóch mi kan atoto ngenikich kinamwe. Sia meefi pwapwa me menemenéch atun sia kan mwichfengen, afalafalfetál, me féri ekkewe mettóch sia kan féfféri nge sise pwal lólilen ika sipwe ares. Ika sise chúen tongeni féri ekkena mettóch, eli sipwe meefi aúrek me niwokkus ren met epwe fis mwirin. Ese wor ngawen ach meefi ekkena esin memmeef. Nge a lamot sipwe túmúnúéch. Jesus a erá pwe riáfféúmwáál a tongeni efisi án néún kewe chón káé repwe chepetek. (Joh. 16:1, 2) Iwe, ifa usun sia tongeni akkamwéchú ach kinamwe atun sia kúna riáfféúmwáál?

15. Pwata sisap niwokkus atun sipwe kúna riáfféúmwáál? (Johannes 15:20; 16:33)

¹⁵ Iei met án Kot we Kapas a erenikich: “Aramas meinisin mi mochen manaueni eu manauen souläng lon Kraist Jesus repwe tolong lon ninni.” (2 Tim. 3:12) A weires ngeni emén Chón Kraist mwán itan Andrei an epwe lúkú pwe meinisin néún Jiowa kewe chón angang repwe kúna riáfféúmwáál mwirin an pinepin ewe angangen afalafal lón leenian we. A erá: ‘A mmen chómmóng Chón Pwáraatá ikeei. Epwe tufich án ekkewe néúwis repwe aresinikem meinisin?’ Ena esin ekiek a efisi án Andrei epwe chék lóllólilen, nge ese fen ekinamwei. Ekkóch Chón Kraist ra lúkúlúk wóón Jiowa me rese pwal ekieki pwe resap tongeni ares. Ra silei pwe eli ra tongeni ares, nge rese kon lólilen usun Andrei. Ina popun Andrei a filatá an epwe áppirú chókkana me a unusen lúkúlúk wóón Jiowa. Ekiseló mwirin a meefi kinamwe, me iei a pwapwa inaamwo ika a chúen fiffis chómmóng osukosuk. A pwal tongeni fis ngenikich ena. Inaamwo ika Jesus a erenikich pwe sipwe kúna riáfféúmwáál, nge a pwal alúkúlúkúkich pwe sia tongeni akkamwéchú ach tuppwél.​—Álleani Johannes 15:20; 16:33.

16. Ifa ewe kapasen emmwen mi lamot ach sipwe álleasochisi atun sia kúna riáfféúmwáál?

¹⁶ Atun a pinepin are aúkúk ach angangen fel ngeni Jiowa, eli epwe torikich ekkewe kapasen emmwen seni ewe keangen ofesilap me seni ekkewe mwán mi ásimaw. Ra kawor ekkena kapasen  emmwen pwe repwe túmúnúkich, alúkúlúkú an epwe chék tottorikich anach mwéngé lón pekin ngún, me álisikich le sópweló lón ach angangen afalafal ika mi tufich. Kopwe achocho úkúkún óm tufich le álleasochisi ekkena kapasen emmwen mi toruk, inaamwo ika kese unusen weweiti popun an kawor. (Jas. 3:17) Pwal eú, kosap fókkun akkaffat ekkewe pwóróus usun mwékútúkútún ewe mwichefel are usun pwiich kewe ngeni chókkewe ese wor ar pwúúng le silei.​—SalAf. 3:7.

17. Met sipwe tipeppós le féri usun chék met ekkewe aposel lóóm ra féri?

¹⁷ Eú me lein populapen án Satan mammaunei néún Kot kewe aramas, pún iir ra “allükülük lon ewe let Jesus a pwärätä.” (Pwär. 12:17) Kosap mut ngeni Satan me an ei ótót ar repwe eniwokkusuk. Ach afalafal me asukula aramas pwal mwo nge lón fansoun weires, a atoto ach pwapwa me kinamwe. Lón fansoun ekkewe aposel, atun ekkewe néúwisin Jus ra allúkú ngeniir ar repwe úkútiw le afalafal, ekkena mwán mi tuppwél ra filatá ar repwe álleasochisi Kot. Ra sópweló le afalafal, me ena angang a atoto ngeniir pwapwa. (Föf. 5:27-29, 41, 42) Mei pwúng, atun a aúkúk ach angangen afalafal, a lamot ach sipwe eáni mirit atun sia afalafal. (Mat. 10:16) Nge ika sia achocho úkúkún ach tufich, sipwe eáni ewe kinamwe mi pop seni ach apwapwaai Jiowa me ach ereni aramas eú pwóróus epwe seláni manawer.

18. Ié we sia tongeni angei kinamwe mi enlet seni?

¹⁸ Sipwe lúkúlúk pwe sia tongeni eáni kinamwe pwal mwo nge lón ekkewe fansoun mi kon áweires. Lón ekkena atun, a lamot sipwe chemeni pwe ewe kinamwe mi lamot ngenikich, ina ewe kinamwe seni Kot, weween ewe kinamwe Jiowa chék a tongeni awora. Kopwe lúkúlúk wóón i atun a fis eú semmwen mi chéú, eú feiengaw watte, are riáfféúmwáál. Fitipachei an we mwicheich. Nennelóói ekkewe mettóch mi amwarar mi mmólnetá ngonuk lón mwachkkan. Atun ka féri ena, ‘Kot ewe mi ngenikich kinamwe epwe nonom reom.’ (Fil. 4:9) Lón en lesen mwirin, sipwe káé ifa usun sia tongeni álisi chienach kewe Chón Kraist iir mi kúna riáfféúmwáál, ar repwe eáni ewe kinamwe seni Kot.