1. Atun sia ekieki án Eperiam lúkú, ifa ewe kapas eis eli sipwe eáni?

 INAAMWO IKÁ chómmóng aramas ra rong ussun Eperiam, nge lape ngeniir rese sissilei. Iwe nge, sia fókkun sissilei. Áwewe chék, sia silei pwe i ewe “semelapen chokewe meinisin mi lükü Kot.” (Rom 4:11) Iwe nge eli sia ekieki, ‘Úa tongeni áppirú Eperiam me eáni ewe esin lúkú a eáni?’ Ewer.

2. Pwata a lamot ach sipwe káé pwóróusen Eperiam? (James 2:​22, 23)

² Eú alen ach sipwe ámááraatá ewe esin lúkú Eperiam a eáni, ina ren ach káé pwóróusan. Fansoun meinisin Eperiam a álleasochisi Kot. A mwékút seni leenian ngeni eú fénú towaw, imweimw tento ren fite fite ier, me a tipemecheres le asoresini néún we mi áchengicheng Aisek. A féri meinisin ekkena pokiten a péchékkúl an lúkú Jiowa. Pokiten án Eperiam lúkú me féffér, a kúna án Jiowa chen me a wiliiti chiechian. (Álleani James 2:​22, 23.) Jiowa a mochen oukich meinisin, kapachelong en, ach sipwe eáni ekkena esin feiéch. Ina popun a amwékútú ekkewe soumakken Paipel Paul me Jemes ar repwe makkeei ussun án Eperiam leenien áppirú. Sipwele káé minne Rom sópwun 4 me James sópwun 2 ra apasa ussun Eperiam. Paul me Jemes ra apasa och mettóch mi aúchea ussun Eperiam.

3. Menni wokisin Paul me Jemes ra aloni?

³ Paul me Jemes ra aloni alon Keneses 15:​6, ewe mi erá: “Apram a lükü ewe Samol mi Lapalap o küna pwüng me ren  Kot pokiten an lükülük.” Me ren Jiowa, emén a pwúng pwal mwo nge unusen limeliméch iká a pwapwa ren. A ifa me amwararen án emén mi tipis a tongeni unusen limeliméch me ren Kot! Ese mwáál, ka mochen kúna pwúng me ren Kot, me a tufich ena. Iei sipwele káé pwata Jiowa a kér ngeni Eperiam emén aramas mi pwúng me met a lamot sipwe féri pwe sipwe kúna pwúng me ren.

4. Met a pinei án aramas repwe tongeni pwúng?

⁴ Lón néún Paul we taropwe ngeni ekkewe chón Rom, a erá pwe aramas meinisin chón tipis. (Rom 3:23) Iwe, epwe ifa ussun án emén epwe tongeni pwúng are unusen limeliméch me kúna chen me ren Kot? Paul a áeá pwóróusen Eperiam ren an epwe álisi meinisin Chón Kraist mi letipwenechar le silei pélúwen ena kapas eis.

5. Pwata Jiowa a kér ngeni Eperiam emén aramas mi pwúng? (Rom 4:​2-4)

⁵ Jiowa a kér ngeni Eperiam emén chón pwúng atun a nóm lón ewe fénú Kanaan. Pwata Jiowa a tongeni kér ngeni Eperiam emén mi pwúng? Pokiten a tichikin álleasochisi ewe Allúkún Moses? Aapw. (Rom 4:13) Eperiam a kúna pwúng me ren Jiowa 400 ier me mwen katowuun ena Allúk ngeni chón Israel. Iwe pwata chék Kot a kér ngeni Eperiam emén mi pwúng? Pokiten án Jiowa úméúméch mi somwoló, Eperiam a kúna pwúng me ren pokiten an lúkú.—Álleani Rom 4:​2-4.

6. Ifa ussun chón tipis ra tongeni kúna pwúng me ren Jiowa?

⁶ Paul a erá pwe atun emén a lúkú Kot, “a küna pwüng me ren pokiten an lükülük.” (Rom 4:5) A pwal erá: “Iei usun wewen met Tafit a apasa usun feiöchün ewe aramas mi küna pwüng me ren Kot, nge esap longolong won met ewe aramas a föri: ‘Feiöchün ätekewe ar pupungau a musala, nge ar tipis a mola. Feiöchün ewe aramas, ewe Samol esap chechemeni an tipis!’” (Rom 4:​6-8; Kölf. 32:​1, 2) Kot a omusaaló are amóeló tipisin chókkewe mi lúkú i. A unusen omusereló me esap chúen chechchemeni ar kewe tipis. Me ren, chókkana iir mi unusen limeliméch me pwúng pokiten ar lúkú.

7. Pwata sia tongeni erá pwe néún Kot kewe aramas me lóóm iir mi pwúng?

⁷ Inaamwo iká Eperiam, Tafit, me ekkóch néún Kot kewe chón angang mi túppwél ra kúna pwúng me ren, nge iir mi chúen chón tipis, rese unuséch. Nge pokiten ar lúkú, me ren Kot iir mi unusen limeliméch ákkáeúin iká sipwe alélléér ngeni chókkewe rese fel ngeni. (Ef. 2:12) A fókkun lamot lúkú ren án emén epwe chiechiéch ngeni Kot, ussun met Paul a affata lón néún we taropwe. A ina ussun ren Eperiam me Tafit, me pwal ina chék ussun rech.

8-9. Ifa án ekkewe ekkóch ekiek mi mwáál ussun met Paul me Jemes ra makkeei, me pwata?

⁸ Ren fitepúkú ier, ekkewe néúwisin lamalam ra fen ánini wóón lamoten lúkú me féffér. Ekkóch néúwis ra asukula pwe met chék a lamot ren óm kopwe kúna manaw, ina óm kopwe lúkú ewe Samol Jises Kraist. Eli ka pwal rongorong ar apasa, “Kopwe etiwa Jises me kúna manaw.” Ekkewe néúwis eli repwe mwo nge aloni alon Paul keei: “Ewe aramas mi küna pwüng me ren Kot, . . . esap longolong won met ewe aramas a föri.” (Rom 4:6) Iwe nge, ekkóch ra erá pwe  ka tongeni pwisin amanawók ren óm feiló ngeni ekkewe leeni mi pin me ren lamalam, me ren óm eáni féffér mi múrinné. Neman repwe aloni alon James 2:24: “Eman aramas a küna pwüng me ren Kot ren an föför, sap ren an lükülük echök.”

⁹ Pokiten sókkofesenin ekkena ekiek, ekkóch soukáé Paipel ra meefi pwe Paul me Jemes ra tipefesen wóón met a lamot emén epwe féri ren an epwe kúna án Kot chen. Ekkóch néúwisin lamalam eli repwe apasa pwe me ren Paul, emén a tongeni kúna pwúng ren an chék lúkú nge ese pwal lóngólóng wóón féffér. Nge Jemes a asukula pwe a lamot féffér ren án emén epwe kúna chen me ren Kot. Iei met emén senseen lamalam a erá: “Jemes ese weweiti pwata Paul a menlapei pwe a chék lamot lúkú ren án emén epwe kúna pwúng me ren Kot, me ese tipeeú ngeni án Paul na áwewe.” Nge Jiowa a emmweni Paul me Jemes ar repwe makkeei ekkena pwóróus. (2 Tim. 3:16) Ina popun, ese mwáál a wor met sipwe tongeni féri ren ach sipwe etipeeúfengeni met Paul me Jemes ra apasa. Ina ren ach etittina pwal met chókkana ra makkeei lón néúr kewe taropwe.

10. Ikkefa ekkewe féffér Paul a ákkáeúin fós ussun? (Rom 3:​21, 28) (Pwal ppii ewe sasing.)

¹⁰ Ikkefa ekkewe féffér Paul a fósun lón Rom 3 me 4? A ákkáeúin fós ussun án emén “apwönüetä pwüngün ekewe Allük” ewe allúkún Moses, ewe ekkewe chón Israel ra angei. (Álleani Rom 3:​21, 28.) A weires ngeni ekkóch chón Jus Chón Kraist lón fansoun Paul we, ar repwe lúkú pwe a fen wes ewe Allúkún Moses. Ina popun Paul a áeá pwóróusen Eperiam le ánneta pwe án emén  kúna pwúng me ren Kot ese lóngólóng wóón an apwénúetá ewe Allúkún Moses, nge a áweweei pwe a lamot lúkú. A mmen éch ena pwe a áiti ngenikich pwe iká sia lúkú Kot me Kraist, iwe sipwe kúna chen me ren Kot.

11. Met sókkun “föför” Jemes a fós ussun?

¹¹ Iwe nge, ekkewe “föför” James sópwun 2 a fós ussun ese weneiti ekkewe féffér emén a féri an epwe “apwönüetä pwüngün ekewe Allük,” ewe Paul a fós ussun. Jemes a fósun ekkewe féffér Chón Kraist ra eáni iteiten rán. Ekkena esin féffér epwe pwáári iká emén Chón Kraist a enletin lúkú Kot are ese. Iei sipwele etittina ruu pwóróus Jemes a áeá.

12. Ifa ussun Jemes a áweweei ririin lúkú me féffér? (Pwal ppii ewe sasing.)

¹² Lón ewe áeúin pwóróus, Jemes a fós ussun lamoten án ekkewe Chón Kraist resap lifilifil aramas. A eáni eú kapas áwewe ussun emén mwán mi kirekiréch ngeni emén mi wéúéch nge a kirikiringaw ngeni emén mi wéúngaw. Jemes a apasa pwe eli eménna epwe erá pwe a wor an lúkú, nge féfférún a pwáári pwe ese wor. (Jas. 2:​1-5, 9) Lón ewe oruuen pwóróus, Jemes a fósun án emén kúna emén ‘pwiin souleng mwán are fefin souleng esap wor üfan, esap pwal naf anan mongö’ nge ese awora álillis. Ikáámwo eménna a erá pwe a wor an lúkú nge ese fiti féffér, iwe a lamotongaw. Iwe Jemes a makkeei, “Are epwe wor chök ämi lükülük, nge esap fiti föför, a mäla ämi lükülük.”—Jas. 2:​14-17.

13. Ifa ussun Jemes a áweweei lamoten lúkú me féffér? (James 2:​25, 26)

¹³ Jemes a fósun Reap pwe i emén, mi pwáári an lúkú ren féfférún. (Álleani  James 2:​25, 26.) A rong ussun Jiowa me a mirititi pwe a álisi ekkewe chón Israel. (Jos. 2:​9-11) Minne a féri a pwáári pwe a wor an lúkú. Pokiten an lúkú, iwe a túmúnú ekkewe rúúemén spai chón Israel seni feiengaw. Iwe pokiten ena, a kúna pwúng me ren Jiowa ussun Eperiam, inaamwo iká ese unuséch me esap i chón Israel. Sia káé seni Reap pwe a fókkun lamot sipwe pwáári ren ach féffér pwe mi wor ach lúkú.

14. Ifa ussun makkeien Paul me Jemes ra tipeeúfengen?

¹⁴ Ekkewe rúúemén soumakken Paipel Paul me Jemes ra áweweei lúkú me féffér lón ruu napanap. Paul a ereni ekkewe Chón Kraist chón Jus pwe resap fókkun kúna chen me ren Jiowa iká ra chék álleasochisi ewe Allúkún Moses. Jemes a menlapei lamoten án Chón Kraist meinisin repwe pwáári ar lúkú ren ar féfféréch ngeni ekkewe ekkóch.

15. Ikkefa ekkóch alen sipwe tongeni pwáári ach lúkú ren féfférúch? (Pwal ppii ekkewe sasing.)

¹⁵ Jiowa ese erá pwe iká sia mochen kúna pwúng me ren, mi lamot sipwe tichikin féri met Eperiam a féri. Ren enletin, a chómmóng alen ach sipwe tongeni pwáári ach lúkú ren féfférúch kewe. Sia tongeni awasélaéchú ekkewe mineféto lón ewe mwichefel, álisi pwiich kewe iir mi fókkun osupwang, me féfféréch ngeni chón ach kewe famili, meinisin ekkena epwe apwapwaai Kot me epwe efeiéchúkich. (Rom 15:7; 1 Tim. 5:​4, 8; 1 Joh. 3:18) Ach tinikken le afalafala ewe kapas allim, ina eú angang mi fókkun múrinné mi pwáári ach lúkú. (1 Tim. 4:16) Kich meinisin sia tongeni pwáári lón féfférúch pwe sia lúkú pwe án Jiowa kewe pwon repwe pwénútá, me féfférún meinisin ra múrinné. Iká sia féri ena, sia tongeni lúkúlúk  pwe sipwe kúna pwúng me ren Kot me wiliiti chiechian.

16. Ifa ussun ápilúkúlúk a riri ngeni án Eperiam lúkú?

¹⁶ Rom sópwun 4 a menlapei pwal eú lesen mi lamot sia tongeni káé seni Eperiam, ina ach sipwe mwétéresiiti pwénútáán minne sia ápilúkúlúkú. Jiowa a pwonei pwe “chomong ainang” repwe kúna feiéch pokiten Eperiam. A ifa me amwararen án Eperiam na ápilúkúlúk! (Ken. 12:3; 15:5; 17:4; Rom 4:17) Iwe nge, Eperiam a fen 100 ierin me Sara a 90 ierin, nge ese mwo wor néúr. Me ren ekiekin aramas, ussun esap tufich án Eperiam me Sara repwe néúni emén át. A ina eú watteen sóssót ngeni Eperiam, nge “a lükü Kot o apilükülük ngeni, . . . iei mine a wiliti ‘semelapen aramasen chomong mwü.’” (Rom 4:​18, 19) Iwe ló, ló, ló, minne a ápilúkúlúkú a pwénútá. A wiliiti semen Aisek, ewe a fen wikkiti.—Rom 4:​20-22.

17. Pwata sia silei pwe kich mi tongeni kúna pwúng me ren Kot me wiliiti chiechian?

¹⁷ Sia tongeni kúna án Kot chen me kúna pwúng me ren, me wiliiti chiechian ussun chék Eperiam. Ina met Paul a menlapei atun a makkeei: “Ekei kapas ‘a küna pwüng’ resap makketiu fän iten Apraham chök. Ra pwal makketiu fän itach mi küna pwüng, kich mi lükü Kot ewe mi amanauasefäli Jesus.” (Rom 4:​23, 24) Mi lamot sipwe eáni lúkú me féffér, me sipwe pwal eáni ápilúkúlúk ussun chék Eperiam. Paul a pwal sópweeló le fósun ach we ápilúkúlúk lón Rom sópwun 5, ina met sipwele káé lón ewe lesen mwirin ei.