ESE MWÁÁL, ka aúcheani ekkewe sókkopaten liffang seni Jiowa, kapachelong óm tufichin pwisin filaatá ifa ussun kopwe pwapwaiti ekkena liffang. Me ren ewe Paipel pwe wain ina eú liffang me ren Jiowa, a pwal mwo nge erá “ia a wor mongö ie, a pwal wor tatakir, nge wain a apwapwai aramas.” (SalAf. 10:19; Kölf. 104:15) Iwe nge, eli ka kúna pwe a wor chókkewe ra kon únnúmmóng sakaw. Pwal och, a sókkofesen ekiekin aramas wóón unusen fénúfan ussun únnún sakaw. Met epwe tongeni álisi Chón Kraist le kefiléch wóón ewe mettóch sakaw?

Atun sia féri kefil, a lamot ach sipwe lúkúlúk wóón án Kot kapasen emmwen, nge esap wóón ekiekin aramas. Iká sia féri ena, iwe sipwe eáni manaw mi pwapwa.

Eli ka fen kúna pwe chómmóng aramas ra únnúmmóng sakaw iteitan. Ekkóch ra ún pokiten ra meefi kinamwe mwirin. Ekkóch ra ún pwe epwe nameseniir ar kewe osukosuk. Me lón ekkóch leeni, aramas ra kan meefi pwe iká emén a tongeni únnúmmóng sakaw, iwe i emén mi tipepéchékkúl.

Iwe nge, Chón Kraist ra fiti ekkewe kapasen emmwen mi múrinné seni ewe Chón Féraatá mi tong. Áwewe chék, a fen erenikich ussun sópwongawen án emén únnúmmóng sakaw. Eli sia fen álleani lón Än Salomon Fos 23:​29-35 tichikin pwóróusen emén chón sakaw me ekkóch ekkewe osukosuk a tori. a Emén mwán mi ásimaw seni Iurop itan Daniel, a chemeni manawan me mwen an wiliiti emén Chón Kraist mi enlet. A erá: “A luluuló ái únnúmmóng sakaw, iwe úa kefilingaw mwirin. Iwe pokiten ena, a fis ngeniei chómmóng mettóch mi ngaw, me atun úa kan ekieki ussur, úa song.”

Ifa ussun sipwe tongeni eáni kefil mi múrinné ussun sakaw, me ttiisenikich ekkewe osukosuk mi pop seni únnúmmóng sakaw? A lamot sipwe mut ngeni ekiekin Kot an epwe emmweni ach kewe kefil me féffér.

Sipwele etittina met ewe Paipel a apasa ussun sakaw me ekkóch popun pwata aramas ra ún sakaw.

Án Kot we Kapas ese pinei án emén aúkúkúéchú únúman sakaw. A erá pwe a tongeni apwapwa án emén ún wain. A erá: “Kopwe chök mongö anom mongö, kopwe pwal ünümi unumom wain fän pwapwa.” (SalAf. 9:7) Fán ekkóch, Jises me pwal ekkóch néún Jiowa kewe chón angang mi túppwél lóóm, ra pwal ún wain.—Mat. 26:​27-29; Luk. 7:34; 1 Tim. 5:23.

Inaamwo iká án Kot we Kapas ese pinei án emén ún sakaw, nge a allúkú án emén pucholó. Iei met a erá: “Ousap apuchakemi ren wain.” (Ef. 5:18) Me a pwal mwo nge erá pwe “chon ünüpuch . . . resap mwüni mwün Kot.” (1 Kor. 6:10) Ewer, Jiowa a oput án emén únnúmmóng sakaw me pucholó. Sipwe féri kefil alóngólóng wóón ekiekin Kot, nge esap wóón éérenien fénúach.

Ekkóch ra meefi pwe ra tongeni únnúmmóng sakaw nge resap pucholó. Iwe nge, a mmen efeiengaw ena. Án Kot we Kapas a affata pwe án emén mwán (are fefin) “únnúmmóng wain” a efisi an epwe féri tipis watte me a atai an riri ngeni Jiowa. (Tit. 2:​3, NW; SalF. 20:1) Jises a pwal mwo nge éúréúrakich pwe án emén “ünüpuch” a tongeni eppeti an esap tolong lón án Kot we ótót séfé. (Luk. 21:​34-36) Iwe met a tongeni álisi emén Chón Kraist le ttii seni ekkewe osukosuk eselipaaen sakaw?

A mmen efeiengaw án emén mut ngeni éérenien fénúan an epwe emmweni ekiekin ussun sakaw. A lamot Chón Kraist repwe apwapwaai Jiowa lón ekkewe mettóch mi weneiti mwéngé me minen ún. Ewe Paipel a áchchema ngenikich: “Are oua momongö ika ükün, ika met oua föri, oupwe föri meinisin pwe Kot epwe ling ren.” (1 Kor. 10:31) Ikkeei ekkóch kapas eis me án Paipel kapasen emmwen sipwe ekieki ussur:

Úa kan ún sakaw pwe ekkewe ekkóch repwe saniei? Ekistos 23:2 a apasa: “Kosap eti eu mwichemongun aramas le föri mine a ngau.” Jiowa a éúréúra ekkewe chón Israel ar resap áppirú ekkewe aramas rese apwapwaai I. Ena kapasen emmwen a pwal weneiti ekkewe Chón Kraist lón ei fansoun. Iká sia mut ngeni táppich kewe ar repwe etipetipa ach ekiek me ach kewe kefil ussun sakaw, a tongeni atowawaakicheló seni Jiowa me an kewe kapasen emmwen.—Rom 12:2.

Úa kan ún sakaw pwe aramas repwe ekieki pwe ngang emén mi tipepéchékkúl? Lón ekkóch fénú, a ketiw me chéú án aramas soun ún sakaw me únnúmmóng. (1 Pet. 4:3) Nge nengeni met ei pwóróus mi múrinné lón 1 Korint 16:13 a apasa: “Oupwe mamasa, oupwe üppos lon ämi lükülük, oupwe eäni sokun mwän, oupwe pöchökülela.” Nge itá sakaw a tongeni álisi emén an epwe péchékkúleló? Aapw ese. Sakaw a tongeni affataffatangawaaló án emén ekiek me efisi an esap eáni kefil mi múrinné. Ina popun án emén únnúmmóng sakaw ese ánnetatá pwe i emén mi péchékkúl, nge a fen pwáári pwe i emén mi umwes. Aisea 28:7 a áweweei pwe emén mi tarópworop pokiten sakaw, a mwaroro me turufetál.

Péchékkúl mi enlet a feito seni Jiowa me a kapachelong ach sipwe mammasa me úppós lón ach lúkúlúk. (Kölf. 18:32) Sia féri ena ren ach túmúnú senikich minen efeiengaw me eáni ekkewe kefil esap atai ach riri ngeni Jiowa. A núkúchar án Jises riri ngeni Jiowa, me chómmóng aramas ra súféliti pokiten a pwora me úppós le féri minne mi pwúng.

Úa ún sakaw pwe úsapw aúreki ái kewe osukosuk? Emén soumakken kélfel a makkeei ei fán emmwenien Kot: “Lupwen a wor chomong ai öürek, en [Jiowa] ka achipaei o apwapwai  lelukei.” (Kölf. 94:19) Iká ka aúreki eú mettóch, lúkúlúk wóón án Jiowa álillis nge esap wóón sakaw. Óm ikkiótek ngeni Jiowa fán chómmóng, ina eú mettóch mi múrinné epwe álisuk le ekisaaló óm aúrek. Pwal och, chómmóng ra kúna pwe a álilliséch ach kútta emmwen seni emén chienach mi ásimaw lón ewe mwichefel. Ren enletin, án emén ún sakaw ren an epwe likiitú fán an weires a fen tongeni angawaaló an úppós le féri minne mi pwúng. (Os. 4:11) Daniel, ewe sia fós ussun me mwan, a apasa: “Úa weires ren aúrek me memmeefin mengiringir. Úa kan ún sakaw pwe úpwe tongeni likiitú fán ái kana osukosuk, nge a fen lallapoló, me a ta ái ririin chiechi me ese chúen wor ésúfélúi.” Iwe met a álisi Daniel? Iei met a erá: “Úa mirititi pwe a lamot ái úpwe lúkúlúk wóón Jiowa, nge esap wóón sakaw. Atun úa féri ena, iwe úa tufichin likiitú fán ái kewe osukosuk me pworacho ngeniir.” Ren enletin, Jiowa a chék mómmólnetá le álisikich pwal mwo nge atun sia meefi pwe esap pwák ach we osukosuk.—Fil. 4:​6, 7; 1 Pet. 5:7.

Iká ka kan ún sakaw fán ekkóch, pwata kese etittina iká a lamot óm kopwe féri siwil ren úkúúkún únúmom sakaw. Pwisin eisinuk: ‘Emén chón ái famili are chiechiei a fen ereniei an lólilen ren napanapen ái ún sakaw?’ Iká ewer, iwe eli ina eú esissil mi pwáári pwe ka poputá le éérenaaló le ún sakaw are a wor óm osukosuken sakaw nge kese fen tepereni. ‘A lapóló úkúúkún únúmei lap seni me mwan?’ Eli ina ussun ekiekin emén nge ese tepereni pwe epwe emmwen ngeni an epwe umwesimwesin sakaw. ‘Úa meefi pwe a weires ngeniei ái úsapw ún sakaw ren fitu rán are lap seni?’ Iká ewer, iwe óm ún sakaw eli a fen wiliiti eú ééreniom are ka fen wiliiti emén mi umwesimwesin sakaw. Eli epwe lamot ngonuk álillis seni ekkewe sousile pwe kopwe tongeni pworacho ngeni óm na osukosuk.

Pokiten ún sakaw a tongeni atoto chómmóng osukosuk, iwe ekkóch Chón Kraist ra filaatá ar resap fókkun ún sakaw. Ekkóch ra filaatá ar resap ún pokiten rese sani nennan. Iká a ina esin filien chiechiom kewe, iwe ka tongeni pwáári  kirekiréch ren óm súféliti ar kefil nge kosap fen esiiter.

Eli ka filaatá óm kopwe aúkúkú únúmom sakaw. Are eli ka isettiw eú allúk wóón ineet kopwe ún, eli fán eú lón eú wiik, are ka aúkúkú únúmom atun ka mwéngé. Ekkóch ra féri allúkún ar resap ún ekkóch sókkun sakaw, áwewe chék ra tongeni aúkúkú únúmer wain are pié, nge resap ún ekkewe sakaw mi kon péchékkúl are resap pwal mwo nge ún mi nofit. Atun a fen ffat ngeni emén met a tongeni ún me met ese tongeni ún, iwe a mecheres ngeni an epwe fitipachei. Me ese lamot emén Chón Kraist mi ásimaw epwe lólilen ren met ekkewe ekkóch repwe ekieki pokiten a filaatá an epwe féri ena me a úppós le apwénúetá.

Atun sia féri kefil ussun sakaw, a lamot sipwe ekieki meefien ekkewe ekkóch. Rom 14:21 a erá: “Esap mürina om kopwe ochoch fituk ika ün wain ika föri och sokun föför mine epwe afisätä än pwiüm we epwe chepetek ren.” Ifa ussun sia tongeni apwénúetá ena kapasen emmwen? Pwáári tong. Iká ka meefi pwe óm ún sakaw epwe áchepeteki emén, esap pwe tong epwe amwékútuk le pennúkúóló pwisin óm pwúúng? Óm féri ena, a pwáári pwe ka súféliti meefien ekkewe ekkóch me ka pwáári óm chúngúúr lap seni pwisin en.—1 Kor. 10:24.

Pwal och, eli a wor án ewe mwú allúk ussun sakaw. Ewer, emén Chón Kraist epwe álleasochisi ekkena allúk. Áwewe chék, eli a wor allúk mi affata fite ierin emén mwen an epwe tongeni ún sakaw are a eppeti án emén esap sakaw atun a drive are atun a uwei pwal och sókkun waa.—Rom 13:​1-5.

Jiowa a fen fang ngenikich chómmóng liffang mi amwarar, eú me leir, ina ach tufichin pwisin filaatá ifa ussun sipwe áeá ekkena liffang. A kapachelong ach kefil wóón met sipwe áni me únúmi. Amwo ach kewe kefil repwe pwáári pwe sia aúcheani ach tufichin pwisin filaatá ren ach áeá le apwapwaai Semach we lón láng.