Ka fen álleaniéchú meinisin ekkewe Leenien Mas lón ei ier? Iká ewer, ppii iká ka tongeni pélúweni ekkeei kapas eis:

Met a kapachelong lón ach ‘ekkesiwili ekiekich’? (Rom 12:2)

Ese chék wewe ngeni ach áeá unusen manawach le féri angang mi múrinné, nge a kapachelong ach etittina masouen letipach me féri ekkewe siwil mi lamot pwe sipwe etipeeú manawach ngeni án Kot kewe allúk úkúúkún ach tufich.—w23.01, p. 8-9.

Ifa ussun sia tongeni eáni ekiekéch atun sia kúkkúna met a fiffis wóón ei fénúfan?

A wor popun mi múrinné ach sipwe mochen silei ifa ussun ekkewe mettóch mi fiffis wóón ei fénúfan ra apwénúetá án Paipel kewe oesini. Sisap chék ásesser wóón met epwe fis, pwe a tongeni efisi tipefesen, nge sipwe fen alónga ach pwóróusfengen wóón ekkewe puk me pwóróus mi kawor seni án Jiowa we mwicheich. (1 Kor. 1:10)—w23.02, p. 16.

Ifa ussun án Jises papatais a sókkóló seni án chókkewe mi tapweló mwirin?

Pokiten Jises a uputiw lón eú mwú mi fen epinipiniló me ren Kot, iwe ese lamot an epwe fangoló manawan ngeni Jiowa ussun chék kich. Jises i emén mi unuséch me ese wor tipisin. Ese lamot an epwe áier seni tipis.—w23.03, p. 5.

Ifa ussun sia tongeni álisi ekkewe ekkóch le uwawu meefier lón ekkewe mwiich?

Sia tongeni amwocha ach kewe memmeef pwe epwe wor fansoun án ekkewe ekkóch repwe pwal memmeef. Sipwe pwal túmúnú ach sisap kon fós ussun chómmóng pwóróus pwe epwe wor met ekkewe ekkóch repwe pwal memmeef wóón.—w23.04, p. 23.

Met ewe “Al mi Pin” lón Aisea 35:8 a weneiti?

Ei alelap lón kapas áwewe a akkomw weneiti ikewe ekkewe chón Jus ra akkomw fetál ie seni Papilon ngeni pwúkútáán fénúer we. Nge ifa ussun lón ekkeei fansoun? Fitepúkú ier mwen ewe ier 1919, a fis angang mi lamot, áwewe chék ren chiyakúún me peresin ewe Paipel me pwal ekkóch angang. Néún Kot kewe aramas ra feffetál wóón ewe “Al mi Pin” ngeni ewe paratis lón pekin ngún mi emmwen ngeni ekkewe feiéch fán án Kot we Mwú.—w23.05, p. 15-19.

Än Salomon Fos sópwun 9 a awora ngenikich kapasen emmwen ussun menni rúúemén fefin lón kapas áwewe?

Än Salomon Fos a fós ussun emén fefin mi “tiparoch,” ewe mi eáni etiwetiw mi emmwen ngeni “ewe lenien sotup,” me a pwal fós ussun emén fefin mi “tipachem,” an kapasen etiwetiw a emmwen ngeni ‘fefeitä lon sile’ me manaw. (SalF. 9:​1, 6, 13, 18)—w23.06, p. 22-24.

Ifa ussun án Kot tipetekison me tipemecheres a pwá lón an féffér ngeni Lot?

Jiowa a éúréúra Lot an epwe towu seni Sotom me sú ngeni ekkewe leeni mi chukuchukutá. Atun Lot a tingormaw an epwe sú ngeni Soar, Kot a mut ngeni an na tingor.—w23.07, p. 21.

Met emén fefin epwe féri iká pwúlúwan we a katol sasingin me kachitoon kapasingaw?

Mi lamot epwe chemeni pwe esap tipisin. A lamot epwe nefótófót wóón an riri ngeni Kot me ekilonei pwóróusen ekkewe fefin lón Paipel iir mi kúna riáfféú nge ra kúna oururun letiper me ren Kot. Ka pwal tongeni álisi pwúlúwom we le túmúnú seni ekkewe mettóch epwe tongeni emmwenaalong lón sóssót.—w23.08, p. 14-17.

Atun emén a sótuni ach lúkú, ifa ussun mirit a tongeni álisikich le eáni tipepwetete?

Sipwe ekieki pwe án aramas eáni kapas eis ina alen ach sipwe silei ekiekin are met a aúcheani. Iká ina, iwe sipwe lipwákéch le pélúweniir fán pwetete.—w23.09, p. 17.

Met sia tongeni káé seni Meri ussun ia sia tongeni angei apéchékkúl me ie?

Mwirin án Meri kerán silei pwe epwe inen ewe Messaia, a péchékkúletá ren án ekkewe ekkóch apéchékkúla. Kapriel me Elisapet ra awora ngeni Meri kapasen apéchékkúl seni ekkewe Taropwe mi Pin. Sia pwal tongeni péchékkúletá ren chienach kewe Chón Kraist.—w23.10, p. 15.

Ifa ussun Jiowa a tongeni pélúweni ach kewe iótek?

Jiowa a pwonei ngenikich pwe epwe aúseling ngeni ach kewe iótek me ppii ifa ussun a riri ngeni letipan. (Jer. 29:12) Eli epwe pélúweni ach kewe tingor mi taitap ngeni án ekkewe ekkóch, nge lón ewe esin napanapen mi sókkofesen, nge fansoun meinisin epwe álisikich.—w23.11, p. 21-22.

Rom 5:2 a kapas ussun “lükülük,” iwe pwata wokisin 4 a pwal fóssefál ussun?

Atun emén a rong ewe pwóróus allim, eli epwe tongeni eáni ewe ápilúkúlúkún manaw lón ewe paratis wóón fénúfan. Nge atun a kúna riáfféúmwáál me likiitú faar, me kúna án Kot chen, eli epwe péchékkúleló an ápilúkúlúk me epwe fókkun aúcheani.—w23.12, p. 12-13.