1. Met ekkóch ra ekieki ussun manaw tori feilfeiló?

 CHÓMMÓNG aramas ra kan túmúnú met repwe áni me achocho le exercise iteitan pwe repwe péchékkúl. Iwe nge, ra silei pwe ekkena mettóch esap eppeti seniir chinnapeló me máló. Eli ra ekieki pwe ese fókkun tufich án aramas repwe manaw tori feilfeiló. Iwe nge, Jises a erá pwe mi tufich án aramas repwe kúna “manaw esemuch,” ussun met a mak lón Jon 3:16 me 5:24.

2. Met Jon sópwun 6 a apasa ussun manaw esemuch? (Jon 6:​39, 40)

² Eú rán, Jises a féri eú manaman le awora pilawa me iik fán iten ekkewe fitengéréú aramas. a A mmen amwarar ena, nge met a apasa lón ewe rán mwirin ena a fen kon amwarar seni. Ekkewe aramas ra tapweló mwirin Kaperniom, arapakkan ngeni órossetin Kalili, ikewe a ereniir me ie pwe aramas ra tongeni manawsefál me kúna manaw esemuch. (Álleani Jon 6:​39, 40.) Ekieki ifa ussun ena a weneiti chiechiom kewe me aramasom kewe mi fen máló. Minne Jises a apasa a alúkúlúkú ngonuk pwe chómmóng chókkewe mi fen máló ra tongeni manawsefál, me en me aramasom kewe oua tongeni manaw tori feilfeiló. Iwe nge, a weires ngeni chómmóng aramas ar repwe weweiti minne Jises a pwal apasa mwirin lón  Jon sópwun 6. Sipwele ppii met ekkena a apasa.

3. Me ren Jon 6:​51, met Jises a pwáári ussun pwisin i?

³ Mwirin án Jises féri manaman le awora ewe pilawa ngeni ekkewe aramas lón Kaperniom, ra ekieki ussun ewe mana Jiowa a ngeni semelaper kewe. Ra silei pwe ekkewe Taropwe mi Pin ra eita ngeni ena mana, “pilawa seni láng.” (Kölf. 105:40; Jon 6:31) Jises a áeá ena mana pwe ina lóngólóngun met epwele asukula ngeniir. Inaamwo iká ena mana a kawor seni án Kot manaman, nge ló, ló, ló, chókkewe mi mwéngé ra máló. (Jon 6:49) Nge, Jises a eita ngeni pwisin i “ewe pilawa mi enlet seni láng,” “ewe pilawa Kot a fangoto,” me “ewe pilawaan manaw.” (Jon 6:​32, 33, 35) Jises a áweweei och mettóch mi fókkun asókkaalóói ewe mana seni pwisin i. A apasa: “Ngang ewe pilawa mi manaw mi feitiw seni láng. Iká ié a mwéngé seni ei pilawa epwe manaw tori feilfeiló chék.” (Álleani Jon 6:51.) Ekkena chón Jus ra osukosuk ren alon na. Rese tongeni weweiti pwata Jises a tongeni apasa pwe i “ewe pilawa” mi feitiw seni láng, me ena pilawa a kon múrinné seni ewe mana Kot a fang ngeni semelaper kewe. Mwirin, Jises a ereniir: “Ewe pilawa úpwe fangoló fán ásengesin manawen fénúfan ina futukei.” Epwe met weween alon na? A lamot ach sipwe weweiti weween pún pélúwan epwe affata ifa ussun a tongeni tufich ngenikich me attongeach kewe ach sipwe kúna manaw esemuch. Sipwele ppii met weween alon Jises na.

PILAWA MI MANAW ME FUTUKAN

4. Pwata ekkóch ekkewe aramas ra máirú ren met Jises a apasa?

⁴ Ekkóch me lein ekkewe aramas ra máirú atun Jises a ereniir pwe ewe pilawa repwele áni, ina futukan we a “fangoló fán ásengesin manawen fénúfan.” Ese mwáál, ra ekieki pwe a mochen ngeniir wesewesen futukan ar repwe ocheei. (Jon 6:52) Nge mwirin, Jises a ereniir pwal och mettóch neman a fen kon ámáirú ngeniir, a apasa: “Iká ousap mwéngé futuken ewe Néún aramas me únúmi chchaan, esap wor manaw lón ámi.”—Jon 6:53.

5. Pwata sia tongeni lúkúlúk pwe met Jises a apasa ese wewe ngeni án ekkewe aramas repwe únúmi wesewesen chchaan?

⁵ Lón fansoun Noa we, Kot a allúkú ngeni aramas ar resap ún chcha. (Ken. 9:​3, 4) Ló, ló, ló, Jiowa a pwal apachaalong ena lón an we Allúk ngeni ekkewe chón Israel. Emén mi ún chcha, epwe “ninniiló.” (Lif. 7:​27, ftn, NW) Jises a álisaatá ena Allúk. (Mat. 5:​17-19) Ina popun, ese fókkun tufich án Jises epwe pesei ngeni ekkewe aramasen Jus ar repwe ocheei wesewesen futukan are únúmi wesewesen chchaan. Nge án Jises apasa ekkena itiitin kapas, a mochen áiti ngeni ekkewe aramas ifa ussun repwe kúna manaw, ina “manaw esemuch.”—Jon 6:54.

6. Pwata sia silei pwe eú chék kapas áwewe met Jises a apasa lón Jon 6:53?

⁶ A ffat pwe Jises a áeá kapas áwewe atun a fós ngeni ekkewe aramas, ussun chék an we áeá kapas áwewe atun a ereni ewe fin Sameria: “Ié mi ún seni ewe konik úpwe ngeni, esap fókkun chúen kakasefál, nge ewe konik úpwe ngeni i, epwe wiliiti eú puwachen konik mi puropuretá lón i pwe epwe ngeni manaw esemuch.” (Jon 4:​7, 14) b Jises ese apasa pwe ewe fin Sameria epwe kúna manaw esemuch ren chék an únúmi och sókkun konik  seni eú ito. Pwal ina chék ussun, i ese erá pwe ekkewe aramas a fós ngeniir me lón Kaperniom, repwe kúna manaw esemuch iká repwe ocheei wesewesen futukan me únúmi chchaan.

SÓKKOFESENIN EKKEWE RUU FANSOUN

7. Met ekkóch ra apasa ussun alon Jises we lón Jon 6:53?

⁷ Ekkóch aramas mi achocho lón lamalam ra erá pwe minne Jises a apasa lón Jon 6:​53, a wesewesen áweweei met mi lamot aramas repwe féri atun ewe Fááfen Ach Samol pokiten lón ena atun a pwal néúnéú ekkena esin kapas. (Mat. 26:​26-28) Ra erá pwe meinisin chón fiti ewe Fááfen Ach Samol repwe mwéngé ewe pilawa me ún ewe wain mi páás lein ekkewe chón fiti. Mi pwúng alor na? A lamot ngenikich ach sipwe silei iká mi pwúng are mwáál alor na, pún iteiten ier fite million aramas wóón unusen fénúfan ra fitikich le féri ena Fááfen Ach Samol. Iei sipwele ppii met sókkofesenin met Jises a apasa lón Jon 6:53 me met a apasa atun ewe Fááfen Ach Samol.

8. Ikkefa ekkóch mettóch ekkewe ruu fansoun ra sókkofesen wóón? (Pwal ppii ekkewe sasing.)

⁸ Iei sipwele ppii ruu mettóch ekkena fansoun ra sókkofesen wóón. Áeúin, ineet Jises a apasa minne mi mak lón Jon 6:​53-56, me ia a apasa me ie? A apasa ekkena mettóch me lón Kalili lón ewe ier 32, ina epwe eú ier me mwen an poputááni ewe Fááfen  Ach Samol lón Jerusalem. Oruuan, ié kewe Jises a fós ngeniir? A apasa ekkena mettóch ngeni ekkewe aramas lón Kalili mi kon mochen akkomwa osupwanger lón pekin áion lap seni osupwanger lón pekin ngún. (Jon 6:26) Ren enletin, lupwen Jises a apasa och mettóch mi weires ar repwe weweiti, ra úkútiw le aúseling ngeni. Pwal mwo nge ekkóch lein néún kewe chón káé, ra úkútiw le tapweló mwirin. (Jon 6:​14, 36, 42, 60, 64, 66) A fókkun sókkóló minne a fis atun Jises a poputááni ewe Fááfen Ach Samol eú ier mwirin ena, lón ewe ier 33. Lón ena atun, inaamwo iká ekkewe 11 aposel mi túppwél rese unusen weweiti met a asukula ngeniir, nge ra chék nómotiw ren. Pwal och, néún kana aposel ra sókko seni chókkewe mi nóm Kalili pún ra lúkúlúk pwe Jises i Néún Kot we mi feitiw seni láng. (Mat. 16:16) I a apúnger ren an apasa: “Ámi ekkewe oua fitipacheei lón sóssótui kewe.” (Luk 22:28) Ekkena chék mwo ruu mettóch mi sókkofesen, ra pwáári pwe met Jises a apasa lón Jon 6:​53, ese áweweei met epwe fis lón ewe Fááfen Ach Samol. Nge mi pwal wor ekkóch mettóch ekkena ruu fansoun ra sókkofesen wóón.

MET WEWEEN NGONUK ALON JISES WE?

9. Menni kúmiin aramas a weneitiir alon Jises we lón ewe Fááfen Ach Samol?

⁹ Atun ewe Fááfen Ach Samol, Jises a ngeni néún kewe aposel ewe pilawa ese lefen me a ereniir pwe a liosuetá inisin. Mwirin, a pwal ngeniir ewe wain me ereniir pwe a liosuetá “chchaan ewe pwonen etipeeú.” (Mark 14:​22-25; Luk 22:20; 1 Kor. 11:24) A mmen aúchea ena. A eita ngeni, ewe “pwonen etipeeú mi fé,” me ei pwonen etipeeú a fis lefilen Jiowa me “chón leimwen Israel,” weween chókkewe chék repwe fiti i le nemenem “lón ewe Mwúún Kot.” (Ipru 8:​6, 10; 9:15) Lón ena fansoun, ekkewe aposel resaamwo weweiti ena, nge ekiseló chék repwe kepit ren ewe ngún mi fel me chóni ewe pwonen etipeeú mi fé pwe repwe nóm ren Jises lón láng.—Jon 14:​2, 3.

10. Ifa sókkofesenin minne Jises a apasa me lón Kalili me minne a apasa atun ewe Fááfen Ach Samol? (Pwal ppii ewe sasing.)

¹⁰ Minne Jises a apasa atun ewe Fááfen Ach Samol, a weneiti ewe “mwiich kisikis.” Néún kewe aposel mi túppwél mi nóm ren lón ena atun, iir ekkewe ra akkomw chóni ena kúmi. (Luk 12:32) Iir me ekkewe pwal ekkóch repwe chóni ena kúmiin aramas, repwe mwéngé ewe pilawa me ún ewe wain. Ikkena iir ekkewe repwe nóm ren Jises lón láng. Iei pwal och sókkofesenin ewe Fááfen Ach Samol me minne a fis lón Kalili. Met a apasa ngeni néún kewe aposel lón ena atun, a chék weneiti eú kúkkúnún kúmiin aramas, nge met a apasa ngeni ekkewe aramas lón Kalili, a weneiti chómmóng aramas ese kaúk chóchóór.

11. Met Jises a apasa me lón Kalili mi pwáári pwe ese fósun eú kúmiin aramas mi kaúk chóchóór?

¹¹ Lape ngeni ekkewe aramas Jises a fós ngeniir me lón Kalili ra chék mochen an epwe awora ngeniir mwéngé. Iwe nge, a sótun álisiir le weweiti pwe mi wor och mettóch mi kon aúchea lap seni mwéngé, ewe mi tongeni atoto ngeniir manaw esemuch. Jises a pwal apasa pwe ekkewe mi máló ra tongeni manawsefál lón ewe sáingoon rán me kúna manaw tori feilfeiló. I ese fós ussun eú kúkkúnún kúmiin aramas mi kaúk chóchóór, ussun met a fós ussun mwirin ena, atun ewe Fááfen Ach Samol. Nge me lón Kalili, a fós ussun ewe manaw esemuch mi suuk ngeni aramas meinisin. Ina minne a apasa: “Iká ié  a mwéngé seni ei pilawa epwe manaw tori feilfeiló chék . . . ewe pilawa úpwe fangoló fán ásengesin manawen fénúfan ina futukei.”—Jon 6:51.

12. Met a lamot emén epwe féri pwe epwe kúna manaw esemuch?

¹² Jises ese ereni ekkewe chón Jus lón Kalili pwe ena feiéch epwe tongeni tori meinisin aramas. Ekkewe chék repwe mwéngé ewe pilawa repwe kúna ena feiéch, iir ekkewe mi anganga ar lúkú. Chómmóng aramas lón ei fansoun ra erá pwe repwe kúna manaw iká ra chék lúkú Jises me ekieki pwe i ar chón amanaw. (Jon 6:29) Iwe nge, ekkóch me lein ekkewe aramas lón Kalili, iir kewe mi fen lúkú Jises, ra úkútiw le tapweló mwirin. Pwata?

13. Met a lamot emén epwe féri pwe epwe wiliiti néún Jises chón káé mi enlet?

¹³ Lape ngeni ekkena aramas lón Kalili ra pwapwa le tapweló mwirin Jises pokiten chék a awora ngeniir met ra mochen. Ra mochen an epwe echikarer, awora ngeniir ener mwéngé, me asukula ngeniir ekkewe mettóch ra mochen rong ussun. Iwe nge, Jises a áiti ngeniir pwe ren ar repwe wiliiti néún chón káé mi enlet, mi pwal wor met mi lamot repwe féri. I ese feito fénúfan fán iten chék an epwe fang ngeniir met ra mochen. A lamot ar repwe ‘feito ren,’ weween repwe etiwa me álleasochisi meinisin met a eáni asukul.—Jon 5:40; 6:44.

14. Met a lamot sipwe féri pwe sipwe kúna feiéch seni futuken me chchaan Jises?

¹⁴ Jises a menlapei ngeni ekkewe aramas lón Kalili lamoten ar repwe anganga ar lúkú. Lúkú met? Repwe lúkú pwe ren án Jises asoresini futukan me chchaan a atufichi ar repwe kúna manaw esemuch. A lamot ena  esin lúkú ngeni ekkena chón Jus, me a chúen lamot ngenikich lón ei fansoun. (Jon 6:40) Ewer, ren ach sipwe kúna feiéch seni futuken me chchaan Jises, ussun met Jon 6:53 a fós ussun, mi lamot sipwe anganga ach lúkú ewe méén kepich. Ena mettóch, a suuk ngeni chómmóng aramas.—Efi. 1:7.

15-16. Ikkefa ekkewe mettóch mi lamot sia káé seni Jon sópwun 6?

¹⁵ Minne a mak lón Jon sópwun 6, a fókkun lamot ngenikich me attongeach kewe. A affata meefien Jises fán iten aramas. Atun a nóm Kalili, a echikara ekkewe mi semmwen, áiti ngeni ekkewe aramas pwóróusen ewe Mwú, me awora ngeniir ener atun ra osupwangen mwéngé. (Luk 9:11; Jon 6:​2, 11, 12) Nge ewe mi kon lamot, ina an áiti ngeniir pwe i “ewe pilawaan manaw.”—Jon 6:​35, 48.

¹⁶ Chókkewe Jises a eita ngeniir ‘ekkóch siip’ rese me resap mwéngé ewe pilawa me ún ewe wain atun ewe Fááfen Ach Samol. (Jon 10:16) Nge ra chúen mwéngé seni “ewe pilawaan manaw.” Ra féri ena ren ar lúkú án Jises asoren méén kepich me ekkewe mettóch mi amwarar a tufich pokiten an asor. (Jon 6:53) Nge chókkewe mi mwéngé ewe pilawa me ún ewe wain, ra pwáári pwe ra chóni ewe pwonen etipeeú mi fé me ápilúkúlúkú pwe repwe nemenem lón ewe Mwú lón láng. Ina minne, ese lifilifil iká kich ekkewe mi kepit are kich chón ewe ekkóch siip, nge a fókkun lamot ach sipwe káé masouen Jon sópwun 6. A menlapei lamoten ach sipwe anganga ach lúkú ewe méén kepich pwe sipwe kúna manaw esemuch.