Ka fen álleaniéchú ekkewe Leenien Mas lón ei ier? Iká ewer, ppii iká ka tongeni pélúweni ekkeei kapas eis:

Ifa ewe leenien áppirú Jiowa a isettiw ussun féfférúch ngeni ekkewe fefin?

I ese lifilifil ngeniir, a aúcheani fefin ussun chék an aúcheani mwán. Kot a aúseling ngeni ekkewe fefin, a mochen silei meefier me met ra lólileniesini. A pwal lúkúlúk wóór ar repwe féri an kewe angang.—w24.01, p. 15-16.

Ifa ussun sia tongeni apwénúetá Efisus 5:​7, ewe mi apasa: “Ousap féri met iir ra féri”?

Ewe aposel Paul a éúréúra ngenikich ach sisap chiechi ngeni ekkewe aramas mi áweiresi ach sipwe álleasochisi án Kot allúk. Ekkena sókkun chiechi ese chék weneiti chókkewe sia chiechi ngeniir lón féúféún aramas, nge pwal ekkewe wóón Internet.—w24.03, p. 22-23.

Met sókkun pwóróus mi chofona a lamot sipwe túmúnúkich seni?

A lamot ach sipwe túmúnúkich seni ekkewe pwóróus chienach kewe ra mochen share ngenikich nge rese lóóm cheki iká mi pwúng, seni ekkewe email mi feito seni aramas sise sissileer, me seni ekkewe chón rikiló mi tipin pwomweni pwe ra mochen rong ussun ewe enlet.—w24.04, p. 12.

Met sia silei me met sise fókkun silei ren ifa ussun Jiowa epwe apwúngú King Salomon me chókkewe mi máló lón Sotom me Komora me pwal lón ewe Noter?

Sise wesewesen silei iká Jiowa a likitiireló ar repwe máffócholó. Iwe nge, sia silei pwe i a unusen silei mettóch meinisin me i emén mi fókkun úméúméch.—w24.05, p. 3-4.

Ach silei pwe Kot “i ewe achau,” met a anúkúnúkú ngenikich? (Tut. 32:4)

Sia tongeni eáni Jiowa leenien op. I emén mi alúkúlúk, me fansoun meinisin a kan apwénúetá an kewe pwon. Me i ese siwil, napanapan kewe me minne a tipeni, rese fókkun siwil.—w24.06, p. 26-28.

Met a tongeni álisuk le éérenaaló ewe mineféén mwichefel ka mwékút ngeni?

Lúkúlúk wóón Jiowa, i epwe álisuk ussun chék an álisi néún kewe aramas lóóm. Kosap alélléfengeni óm mwichefel iei ngeni óm we me lóóm. Kopwe fiffiti chón óm we mwichefel, me achocho le chiechi ngeni ekkewe ekkóch.—w24.07, p. 26-28.

Ikkefa ekkewe lesen sia káé seni ekkewe úlúngát kapas áwewe mi mak lón Mattu sópwun 25?

Ewe kapas áwewe ussun ekkewe siip me ekkewe siike, a menlapei ussun túppwél. Ewe kapas áwewe ussun ekkewe fépwúl mi tipáchem me ekkewe mi tiparoch, a pwáári lamoten mmólnetá me mammasa. Me ewe kapas áwewe ussun ekkewe talent, a menlapei lamoten tinikken le angang weires.—w24.09, p. 20-24.

Ifa úkúúkún tekian ewe kengkang lón ewe imwenfel Salomon a aúetá?

Lón 2 Kronika 3:​4, ekkóch kapiin ekkewe taropwe mi pin minen lóóm ra erá pwe “120 sengen paw,” weween pwe tekian ewe kengkang a 53 meter (175 ft). Nge a pwal wor ekkóch kapi ra erá pwe “20 sengen paw,” weween tiu meter (30 ft) tekian. Iwe ussun a pwúng ena “20 sengen paw” pún a mase ngeni maanúnún etippen ewe imwenfel.—w24.10, p. 31.

Met weween án emén chónálillisin mwichefel “epwe pwúlúweni emén chék fefin”? (1 Tim. 3:12)

A wewe ngeni an epwe chék pwúlúweni emén fefin me esap féri tipisin lisowumwáál. Pwal och, esap fókkun núesik ngeni pwal emén fefin.—w24.11, p. 19.

Pwata sia tongeni apasa pwe Jon 6:53 ese áweweei met mi lamot aramas repwe féri atun ewe Fááfen Ach Samol?

Jon 6:53 a fósun lamoten án aramas repwe ocheei futuken Jises me únúmi chchaan. Jises a apasa ekkena itiitin kapas me lón Kalili lón ewe ier 32 atun a fós ngeni ekkewe chón Jus mi lamot ngeniir ar repwe lúkú i. Iwe nge, ewe Fááfen Ach Samol a poputá me lón Jerusalem eú ier mwirin ena. Me ikena ie, Jises a fós ngeni chókkewe repwe eti i le nemenem lón láng.—w24.12, p. 10-11.