Ewe aposel Paul a mak ngeni chiechian we mwán mi ásimaw Timoty, me apasa: “Úa allúkúchou ngonuk mwen mesen Kot me Kraist Jises me ekkewe chónláng mi fil óm kopwe apwénúetá ekkeei kapasen emmwen, nge kosap aapaap are eimwumwu.”—1 Tim. 5:21.

Ren ach sipwe silei ié ekkena chónláng, sipwe akkomw ppii ié kewe rese kapachelong lón ena kúmiin chónláng. A ffat pwe esap iir seni me lein ekkewe 144,000. Lupwen Paul a mak ngeni Timoty, esaamwo poputá án ekkewe Chón Kraist mi kepit manawsefál ngeni manaw lón láng. Ekkena aposel me ekkewe pwal ekkóch mi kepit resaamwo wiliiti ngún, ina popun “ekkewe chónláng mi fil” ese tongeni weneitiir.—1 Kor. 15:​50-54; 1 Tes. 4:​13-17; 1 Jon 3:2.

Pwal och, “ekkewe chónláng mi fil” ese tongeni weneiti ekkewe chónláng mi álleasolap atun ewe Noter. Ekkena chónláng ra peni Setan me wiliiti ekkewe timon, chón koputen Jises. (Ken. 6:2; Luk 8:​30, 31; 2 Pit. 2:4) Lón fansoun mwach, repwe kalapus lón apis úkúúkún 1,000 ier, me mwirin repwe ninniiló fitifengen me ewe Tefil.—Juta 6; Pwár. 20:​1-3, 10.

Ese mwáál “ekkewe chónláng mi fil” Paul a fós ussun, iir ekkewe chónláng mi fen nónnóm lón láng mi álisaatá “Kot me Kraist Jises.”

A wor fite fitengéréú chónláng mi túppwél. (Ipru 12:​22, 23) Sisap ekieki pwe a chék taitap ekkewe sókkun angang emén me emén ekkewe chónláng ra féri. (Pwár. 14:​17, 18) Áwewe chék fán eú, emén chék chónláng a nieló 185,000 soufiun Asiria. (2 King 19:35) Nge eli a chómmóng chónláng ra kewis ar repwe “ionawu seni [án Jises] we Mwú chókkewe mi efisi án ekkewe ekkóch repwe tipis me aramas mi féfféri minne mi ngaw.” (Mat. 13:​39-41) Nge eli a pwal wor ekkóch ra kewis le “ionfengeni néún kewe mi kefilitá” ngeni manaw lón láng. (Mat. 24:31) Nge pwal ekkóch ra kewis ar repwe mammasakich ‘won ekewe al meinisin ia sipwe feila ie.’—Kölf. 91:11; Mat. 18:10; apépé ngeni Mattu 4:11; Luk 22:43.

“Ekkewe chónláng mi fil” 1 Timoty 5:21 a fós ussun, ese mwáál iir ekkewe chónláng ra kewis ngeni ekkewe angang mi aúchea mi riri ngeni ewe mwichefel. Lón ekkewe wokisin lón sópwun 5, Paul a awora kapasen emmwen ren ifa ussun ekkewe mwán mi ásimaw repwe féri wiser kewe me ifa ussun chón ewe mwichefel repwe pwáári súfél ngeniir. Paul a apasa pwe ekkewe mwán mi ásimaw resap féri wiser fán “aapaap are eimwumwu,” me resap féri kefil nge rese akkomw ekiekifichi. Eú popun mi fókkun aúchea ar repwe álleasochisi án Paul éúréúr ngeniir, pún iir ra féri ar angang “mwen mesen Kot me Kraist Jises me ekkewe chónláng mi fil.” Iwe, a ffat pwe ekkóch me lein ekkewe chónláng, ra kewis ngeni ekkewe angang mi riri ngeni ewe mwichefel, áwewe chék ra túmúnú néún Kot kewe aramas, álisiir lón ewe angangen afalafal, me atoura ngeni Jiowa met ra kúna.—Mat. 18:10; Pwár. 14:6.