1. Ikkefa ekkewe feiéch ewe méén kepich a atoto ngenikich?

 ÁN Jesus Kraist asorun méén kepich a suuki ngeni aramas chómmóng feiéch. Áwewe chék, a suuki ngeni meinisin mwirimwirin Atam kewe mi tongei minne mi pwúng ar repwe tongeni chóni án Kot famili lón mwachkkan. Pwal eú feiéch, ina ach sipwe tongeni manaw tori feilfeiló chék fán pwapwa. Nge lap seni ena, ewe méén kepich a riri ngeni ekkewe mettóch mi fókkun lamot ngeni meinisin lón láng me wóón fénúfan.​—Ipru 1:8, 9, Testament Mi Fö.

2. (a) Ikkefa ekkewe mettóch mi lamot lón láng me wóón fénúfan Jesus a apachaalong lón an we iótek? (Ppii ewe sasing lepoputáán ei lesen.) (b) Met sipwe pwóróus wóón lón ei lesen?

² Ina epwe ruu ier me mwen án Jesus máló, a áiti ngeni néún kewe chón káé ar repwe iótek, a erá: “Semem lon läng. Itom epwe pin, Mwum epwe war, letipom epwe fis won fanüfan usun chök lon läng.” (Mat. 6:9, 10) Sipwe etittina ifa usun ewe méén kepich a riri ngeni pinilóón iten Jiowa we, án ewe Mwúún Kot nemenem, me pwénúetáán letipen Kot.

3. Met iten Jiowa we a weneiti? Ifa usun Satan a eitengawa iten Jiowa?

³ Akkomw, Jesus a iótek fán iten pinilóón iten Jiowa. Iten Jiowa we a weneiti pwisin Jiowa ren i met sókkun Kot. I emén mi pwúng me manaman lap seni meinisin wóón unuselapen láng me fénúfan. Jesus a pwal kkér ngeni I “Semei mi pin.” (Joh. 17:11) Pokiten Jiowa i emén mi pin, iwe mettóch meinisin a féri me meinisin allúk a fératá, ra pwal pin. Nge lón Eten, Satan a tipachem solá me appélúwa án Kot pwúúng le isetiw allúk fán iten aramas. A kapas chofona usun Jiowa me eitengawa itan.​—Ken. 3:1-5.

4. Ifa usun Jesus a epinaaló iten Kot we?

⁴ Nge Jesus a enletin aúcheani ewe it Jiowa me a fókkun álisatá pinilóón ena it. (Joh. 17:25, 26) Ifa usun? Ren án Jesus féffér me minne a eáni afalafal, a álisi aramas ar repwe mirititi pwe mi pwúng án Jiowa kewe allúk me mettóch meinisin a mochen ach sipwe féri, fán iten pwisin feiéchúch. (Álleani Kölfel 40:8-10.) Inaamwo ika Satan a eriáfféwú Jesus me i a máló fán watteen weires, nge a akkamwéchú an tuppwél. A ánnetatá pwe mi tufich án emén mi unuséch epwe unusen álleasochisi Jiowa.

5. Ifa usun sia tongeni epinaaló iten Jiowa we?

⁵ Ifa usun sia tongeni pwáraatá pwe sia aúcheani iten Jiowa we? Ren ach féffér. Jiowa a mochen ach sipwe pin. (Álleani 1 Petrus 1:15, 16.) Weween pwe sia fel ngeni I chék me álleasochisi ren unusen letipach. Ikaamwo sia kúna riáfféúmwáál, sia féri úkúkún ach tufich le eáni ewe sókkun manaw mi tipeeú ngeni letipen Jiowa. Ren ach féri ena sia elingaaló itan we. (Mat. 5:14-16) Sia ánnetatá pwe an kewe allúk ra múrinné me pwúng nge Satan emén chón kapas chofona. Kich sise unuséch, ina popun sipwe mwáálliló. Nge ika a fis ngenikich ena, sia aier me achocho úkúkún ach tufich le úkútiw le féfféri mettóch mi ésúfélúngawa iten Jiowa we.​—Kölf. 79:9.

6. Pwata sia tongeni kúna pwúng me ren Jiowa inaamwo ika sise unuséch?

⁶ Ese lifilifil ika kich emén mi kepit are chón ewe ‘ekoch sip,’ Jiowa epwe omusaaló ach kewe tipis ika sia lúkúlúk wóón ewe méén kepich. I a etiwa chókkewe mi fangóló manawer pwe chón fel ngeni i. Ekkewe Chón Kraist mi kepit ra kúna pwúng me ren Kot usun néún kewe. Ekkewe ‘ekoch sip’ ra pwal kúna pwúng me ren Kot usun chiechian kewe. (Joh. 10:16; Rom 5:1, 2; Jas. 2:21-25) Ina minne, pwal mwo nge iei, ewe méén kepich a atufichikich ach sipwe ririéch ngeni Semach na me epinaaló itan we.

7. Ikkefa ekkewe feiéch ewe méén kepich epwe atoto?

⁷ Lón ewe iótekin ach Samol, Jesus a erá: “Mwum epwe war.” Ifa usun ewe méén kepich a riri ngeni ewe Mwúún Kot? Jesus me ekkewe 144,000 mi kefilitá seni aramasen fénúfan, iir chón ewe Mwúún Kot. Ewe méén kepich a atufichi ekkeei aramas ar repwe manawsefál ngeni manaw lón láng. (Pwär. 5:9, 10; 14:1) Repwe wisen king me samol fel me eti Jesus le nemeni fénúfan úkúkún engeréú ier. Lón ena atun, Jiowa epwe áeá ewe Mwú le ewilaaló ei fénúfan ngeni eú paratis me álisi aramas ar repwe unuséchúló. Iwe, néún Jiowa kewe chón angang lón láng me wóón fénúfan repwe eú famili. (Pwär. 5:13; 20:6) Jesus epwe nieló  Satan me amóeló meinisin ekkewe osukosuk i a efisatá.​—Ken. 3:15.

8. (a) Ifa usun Jesus a álisi néún kewe chón káé le mirititi lamoten án Kot we Mwú? (b) Ifa usun sia álisatá ena Mwú lón ei fansoun?

⁸ Jesus a álisi néún kewe chón káé le mirititi lamoten ewe Mwúún Kot. Ifa usun? Mwirin chék án Jesus papatais, i a poputá le afalafala “ewe Pworausen Manau usun Mwün Kot” ekis meinisin. (Luk. 4:43) A pwal ereni néún kewe chón káé pwe repwe pwáraatá usun i “lon unusen fanüfan.” (Föf. 1:6-8) Lón ei fansoun, ren ewe angangen afalafala usun ewe Mwú, mi suuk ngeni aramas ar repwe káé pwóróusen ewe méén kepich me onómu manawer fán án Kot we Mwú. Sia pwáraatá ach tuppwél ngeni ena Mwú ren ach álisi ekkewe mi kepit le afalafala ewe kapas allim wóón unusen fénúfan.​—Mat. 24:14; 25:40.

9. Pwata sia tongeni lúkúlúk pwe Jiowa epwe apwénúetá minne a tipeni fán iten aramas?

⁹ Met weween lupwen Jesus a apasa: “Letipom epwe fis”? Lupwen Jiowa a apasa epwe fis och mettóch, iwe epwe chék fis. (Ais. 55:11) Án Satan féfférún ú ngeni esap tongeni eppeti Jiowa. Ifa letipen Jiowa fán iten fénúfan? A mochen pwe ei fénúfan epwe ur ren aramas mi unuséch, mwirimwirin Atam me Efa kewe. (Ken. 1:28) Nge, ika Atam me Efa ra máló me mwen an epwe wor néúr, iwe letipen Kot pwe fénúfan epwe ur ren mwirimwiriir kewe esap pwénútá. Ina popun, Jiowa a mut ngeniir ar repwe néúnéú. Ewe méén kepich a suuk ngeni chókkewe mi anganga ar lúkú ar repwe unuséchúló me kúna manaw esemuch. Jiowa a tongei aramas me a mochen kich sipwe eáni ewe sókkun manaw mi amwarar, ewe a tipeni me lepoputáán.

10. Ifa usun ewe méén kepich a atoto feiéch ngeni ekkewe aramas mi fen máló?

¹⁰ Nge ifa usun ekkewe chómmóng aramas ra fen máló nge resaamwo silei Jiowa? Jiowa a mochen án aramas repwe manaw. Ina minne, I epwe pwal mwo nge amanawasefáli ekkewe mi fen máló. Pokiten ewe méén kepich, a tufich ar repwe manawsefál. Mwirin, repwe tongeni káé usun Jiowa me kúna manaw esemuch. (Föf. 24:15) Jiowa, I ewe Populapen manaw. Lupwen Jiowa epwe amanawasefáli ekkewe mi máló, i epwe wiliti Semer. (Kölf. 36:9) Lón án Jesus we iótek, i a apasa: “Semem lon läng.” (Mat. 6:9) Jiowa a ewisa ngeni Jesus eú wis mi fókkun lamot lón ewe angangen amanawasefáli ekkewe mi máló. Jesus a apasa: “Ngang ewe manausefäl me ewe manau.”​—Joh. 6:40, 44; 11:25.

11. Met letipen Kot fán iten ewe “mwich mi fokun chocho”?

¹¹ Jesus a pwal apasa: “Iö kana ra föri letipen Kot, ir pwii me fefinei me inei.” (Mark. 3:35) Letipen Kot pwe aramas seni sókkopaten mwú, einang, me kapas repwe wiliti chón fel ngeni i. Iir “eu mwich mi fokun chocho, esap wor eman aramas a tongeni aleaniir.” Ra lúkúlúk wóón ewe méén kepich me ra mochen álleasochisi Kot. Ra mwareiti I me apasa: “Sia küna manau me ren ach we Kot, ewe mi mot won ewe lenien motun king, pwal me ren ewe Lam.”​—Pwär. 7:9, 10.

12. Lón án Jesus we iótek, met sia káé usun letipen Jiowa fán iten aramas?

¹² Sia fen káé chómmóng mettóch usun Jiowa me minne a tipeni fán iten aramas  seni ewe iótekin ach Samol. Áeúin, mi lamot sipwe achocho úkúkún ach tufich le epinaaló iten Jiowa we me asamolu i. (Ais. 8:13) Án Jesus asorun méén kepich, ewe a atufichi aramas ar repwe kúna manaw, a pwal elingaaló iten Kot. Pwúngún pwe iten Jesus we a wewe ngeni “Jiowa A Amanawa.” Oruuan, Jiowa epwe áeá an we Mwú le awora ngeni aramas mi álleasochis ekkewe feiéch meinisin ewe méén kepich a atoto. Aúlúngátin, sia fókkun lúkúlúk pwe ese wor met epwe tongeni eppeti pwénúetáán letipen Jiowa.​—Kölf. 135:6; Ais. 46:9, 10.

13. Pwata sia papatais?

¹³ Eú mettóch mi lamot sia féri pwe sipwe pwáraatá ach kilisou ren ewe méén kepich, ina ach fangóló manawach ngeni Jiowa me papatais. Ren ach féri ena, sia pwáraatá pwe sia lúkúlúk wóón ewe méén kepich me “sia nöün ach Samol.” (Rom 14:8) Lupwen sia papatais, sia tingorei Jiowa an epwe fang ngenikich ‘eu mwelien letip mi limöch.’ (1 Pet. 3:21) Jiowa a pélúweni ach na tingor ren an fang ngenikich ekkewe feiéch seni ewe méén kepich. Me sia fókkun lúkúlúk pwe i epwe ngenikich mettóch meinisin a pwonei.​—Rom 8:32.

14. Pwata Jiowa a allúk ngenikich ach sipwe tongei aramas?

¹⁴ Jiowa a féri mettóch meinisin fán tong. I a mochen pwe ekkewe chón fel ngeni repwe áppirú i me tongefengeniir. (1 Joh. 4:8-11) Lupwen sia tongei aramas, sia pwáraatá pwe sia mochen sipwe ‘nöün Samach mi nom läng.’ (Mat. 5:43-48) Ikkeei ekkewe ruu allúk mi lamot seni meinisin, áeúin, sipwe tongei Jiowa, me oruuan, sipwe tongei aramas. (Mat. 22:37-40) Eú alen ach sipwe pwáraatá tong ngeni aramas, ina ach áiti ngeniir kapas allimen ewe Mwúún Kot. Ika sia álleasochisi án Jiowa allúk ach sipwe tongei aramas, ákkáeúin pwiich kewe Chón Kraist, ach tong ngeni epwe “unusöchüla.”​—1 Joh. 4:12, 20.

15. (a) Ikkefa ekkewe feiéch sia angei seni Jiowa iei? (b) Ikkefa ekkewe feiéch sipwe angei lón mwachkkan?

¹⁵ Jiowa a alúkúlúkú ngenikich pwe pokiten  ach lúkúlúk wóón ewe méén kepich, ach kewe tipis “epwe mola.” A tongeni unusen omusaaló ach kewe tipis. (Álleani Föför 3:19-21.) Usun met sia fen pwóróus wóón akkomw, pokiten ena méén kepich, Jiowa a tongeni mwuuti ekkóch aramas ar repwe wiliti néún kewe lón láng. Iir ekkewe mi kepit. (Rom 8:15-17) A pwal etiwa ekkewe ‘ekoch sip’ ar repwe chóni an famili wóón fénúfan. Lupwen ra unuséchúló, epwe wor eú sáingoon sóssót. Ika ra akkamwéchú ar tuppwél ngeni Jiowa, I epwe mwuutiir pwe repwe pwal néún kewe. (Rom 8:20, 21; Pwär. 20:7-9) Jiowa epwe tongei néún kewe meinisin tori feilfeiló chék. Ewe méén kepich epwe sópweló le awora ekkewe feiéch tori feilfeiló chék. (Ipru 9:12) Jiowa a fen ngenikich ena liffang mi aúchea, me ese wor emén a tongeni angei senikich.

16. Ifa usun ewe méén kepich a álisikich ach sipwe ngaseló?

¹⁶ Ika sia aier seni ach kewe tipis, ewe Tefil esap tongeni eppetikich seni ach wiliti chón án Jiowa we famili lón mwachkkan. Jesus a feito fénúfan me a máló “fän eu chök, nge a naf ngeni fansoun meinisin.” A fen unusen kamétiw liwinin ena méén kepich. (Ipru 9:24-26) Atam a atoto ngenikich máló, nge án Jesus asor epwe atoto manaw esemuch. Ena méén kepich a tongeni angasakicheló seni án Satan ei ótót me seni ach niwokkusiti máló.​—Ipru 2:14, 15.

17. Met meefiom usun án Jiowa tong?

¹⁷ Án Kot kewe pwon epwe chék pwénúetá fansoun meinisin. Jiowa esap tongeni siwil, usun an esap pwal tongeni siwil ekkewe allúk a fératá fán iten masouen láng me fénúfan. I esap tongeni elichippúngúkich. (Mal. 3:6) Jiowa ese chék liffang ngenikich manaw, nge a pwal ngenikich eú liffang mi fen watte seni ena, ina an tong. “Kich sia silei o lükü ewe chen Kot a eäni ngenikich. Kot chen.” (1 Joh. 4:16) An kewe pwon meinisin a chék pwénúetá. Ekiseló chék, ei fénúfan epwe wiliti eú paratis mi ling. Meinisin repwe áppirú Jiowa me tongefengeniir. Iwe mwirin, meinisin néún kewe chón angang lón láng me wóón fénúfan repwe apasa: “Feiöch, ling, tipachem, kilisou, iteüöch, manaman me pöchökül än ach Kot tori feilfeilachök! Amen!”​—Pwär. 7:12.