Ika pwe mei pwúng ena mettóch, ekieki ifa usun epwe kkúú manawach. Áwewe chék, néún emén pwiich a pwisin nieló. Ewe sam a fókkun letipeta. A ekieki ika mei pwúng pwe Jiowa a fen nennengeni met epwe fis lón mwach, iwe mwirin a apwúngaló pwe i me pwúlúwan we ra tongeni likiitú fán ei esin watteen osukosuk a toriir. Lón ei ótót, epwe tori chómmóng leich watteen osukosuk. Iwe met, sipwe lúkú pwe Jiowa a nemeni mettóch meinisin mi fis lón manawach?

Lón ach etittina 1 Korint 10:13, sipwe kúna pwe Paipel ese apasa pwe Jiowa a silei me mwan met sia tongeni likiitú ngeni, iwe mwirin a filatá met sókkun sóssót epwe torikich. Pwata sia tongeni apasa ena? Sipwe nengeni rúáánú popun.

Áeúin, Jiowa a fang ngeni aramas ar tufichin pwisin filatá met ra mochen féri. A mochen ach sipwe féri pwisin ach kewe kefil. (Tut. 30:19, 20; Jos. 24:15) Ika sia féri kefil mi apwapwaai Jiowa, sia tongeni lúkúlúk pwe I epwe emmwenikich. (SalF. 16:9) Nge ika sia féri ekkewe kefil mi ngaw, sipwe kúna pwúnúngawen minne sia filatá. (Kal. 6:7) Iwe, ika Jiowa a fen filatá met sókkun sóssót epwe torikich, sia tongeni apasa pwe mi nóm rech ena tufichin pwisin filatá?

Oruuan, Jiowa ese eppeti senikich ekkewe mettóch mi chék weiweitá an fis. (SalAf. 9:12) A tongeni fis watteen ákseten ngeni emén pokiten a chék serengaw. Jesus a fós usun eú feiengaw lupwen 18 aramas ra máló atun eú imw tekia a turutiw wor. Jesus a affata pwe esap efisien Kot ewe popun ra máló. (Luk. 13:1-5) Ese pwúng ach sipwe ekieki pwe me mwen an epwe fis eú ákseten, Kot a kan filatá ié epwe manaw are máló.

Aúlúngátin, a suuk ngeni emén me emén kich ach sipwe pwáraatá ach tuppwél ngeni Jiowa. Satan a apasa pwe néún Jiowa kewe aramas ra chék angang ngeni pokiten I a efeiéchúúr. Satan a apasa pwe sisap amwéchú ach tuppwél ngeni Jiowa ika sia kúna sóssót mi áweiresikich. (Hiop 1:9-11; 2:4; Pwär. 12:10) Ika Jiowa epwe túmúnúkich seni ekkóch sóssót, iwe, epwe tongeni ámmeef ngeni aramas pwe usun itá a fen pwúng met Satan a tipimwáál ngenikich.

Arúáánún, Jiowa a filatá an esap silei mettóch meinisin epwe fis ngenikich lón mwachkkan. Pwúngún, mi wor án Jiowa tufich le silei met epwe fis lón mwachkkan ika a mochen. (Ais. 46:10) Nge ewe Paipel a áiti ngenikich pwe Jiowa ese filatá an epwe silei mettóch meinisin epwe fis lón mwachkkan. (Ken. 18:20, 21; 22:12) Jiowa, i emén mi tong me pwúng, ina minne a súféliti ach pwúúng le féri pwisin ach kewe kefil.​—Tut. 32:4; 2 Kor. 3:17.

Iwe, ika ina, met weween án Paulus apasa pwe Jiowa “esap mwütätä ngenikemi pwe oupwe tolong lon sokun sosot mi lap seni ämi tufich”? Lón ei wokisin, Paulus a áweweei met Jiowa a féri atun sia nóm fán sóssót, nge esap me mwan. Ika sia lúkúlúk wóón Jiowa, I epwe álisikich lón ese lifilifil sóssót mi torikich lón manawach. (Kölf. 55:22) Iei sipwe nengeni ruu popun pwata Paulus a tongeni apasa ena.

Áeúin, ekkewe sóssót sia kúkkúna, ikkena “sosotun aramas” mi kan tottorikich meinisin. Lón án Satan ei ótót, kich meinisin sipwe kúna osukosuk, neman pwal mwo nge ekkewe esin osukosuk mi fókkun chou. Nge ika sia lúkúlúk wóón Jiowa, sipwe tongeni likiitú fán ekkena sóssót me akkamwéchú ach tuppwél. (1 Pet. 5:8, 9)  Lepoputáán 1 Korint sópwun 10, Paulus a mak usun ekkóch sóssót chón Israel ra kúna lón ewe fénúpéén. (1 Kor. 10:6-11) Ekkewe chón Israel mi lúkúlúk wóón Jiowa ra tongeni likiitú ngeni ekkena sóssót. Nge ekkóch leir ra álleasolapa Jiowa. Rese akkamwéchú ar tuppwél pokiten rese lúkúlúk wóón I.

Oruuan, “Kot a apwönüetä an pwon.” Lupwen sia ekieki ifa usun Jiowa a túmúnú néún kewe chón angang seni lóóm tori ikenái, sia kúna pwe i a tuppwél le álisi chókkewe mi “echeni o aleasochisi an allük.” (Tut. 7:9) Sia káé pwe Jiowa a apwénúetá an kewe pwon fansoun meinisin. (Jos. 23:14) Sia tongeni lúkúlúk pwe (1) Jiowa esap mut ngeni eú sóssót epwe fókkun luló áweiresin pwe sisap chúen tongeni likiitú ngeni, me (2) “i epwe föri efoch alen towu” fán itach.

Ifa usun Jiowa “epwe föri efoch alen towu” fán iten chókkewe mi lúkúlúk wóón? Pwúngún, i a tongeni amóeló ach sóssót. Nge chechchemeni, Paulus a apasa pwe Jiowa epwe “föri efoch alen towu, pwe oupwe tongeni pwora ngeni.” Ina minne, fán chómmóng Jiowa epwe féri efóch alen towu fán itach ren an apéchékkúlakich pwe sipwe tongeni akkamwéchú ach tuppwél. Sipwe ppii ifa usun Jiowa a féri ei.

• Jiowa a “akachipakich lon ach riaföü meinisin.” (2 Kor. 1:3, 4) A tongeni ekinamwei ekiekich, letipach, me meefiach ren ewe Paipel, an we manaman mi fel, me ewe chón angang mi alúkúlúk.​—Mat. 24:45; Joh. 14:16, Testament Mi Fö; Rom 15:4.

• Jiowa a tongeni áeá an we manaman mi fel le emmwenikich. (Joh. 14:26) An we manaman mi fel a tongeni áchema ngenikich ekkóch pwóróus me kapasen emmwen lón Paipel repwe atufichikich le féri kefil mi múrinné.

• Jiowa a tongeni néúnéú ekkewe chónláng le álisikich.​—Ipru 1:14.

• Jiowa a tongeni néúnéú pwiich kewe le álisikich. Ra tongeni apéchékkúlakich ren minne ra apasa me féri.​—Kol. 4:11.

Iwe, met sia káé seni minne Paulus a apasa lón 1 Korint 10:13? Jiowa ese kan filatá menni sóssót epwe torikich. Nge ika sia lúkúlúk wóón i, sia tongeni likiitú ngeni ese lifilifil sóssót. Sia silei pwe fansoun meinisin Jiowa epwe féri alen ach sipwe tongeni pworacho ngeni ach sóssót pwe sipwe tongeni akkamwéchú ach tuppwél ngeni.