1-2. Me ren Mateus 5:11, itá epwe ifa ach ekiek usun ekkewe weires?

JESUS a pwonei ngeni ekkewe chón tapweló mwirin pwe repwe enletin pwapwa. A pwal éúréúra chókkewe ra tongei pwe repwe kúna sóssót. (Mat. 10:22, 23; Luk. 6:20-23) Sia pwapwa pwe kich néún Kraist chón káé. Nge met meefiach ika chón ach famili ra sótun pinekich seni ach angang ngeni Jiowa, ika ewe mwú a eriáfféwúmwáálikich, are ika chienach kewe chón angang are chón sukul ra etipetipakich le féri minne mi ngaw? Atun sia ekieki usun ekkena mettóch, eli epwe tongeni efisi ach sipwe aúrek.

² Lape ngeni aramas rese kan ekieki pwe ar kúna riáfféúmwáál ina eú popun ar repwe pwapwa. Nge, ina met án Kot we Kapas a erenikich ach sipwe féri. Áwewe chék, ewe chón káé James a makkeei pwe sipwe pwapwa atun sia tolong lón sókkopaten sóssót, nge sisap fen meefi pwe sia kokotiw fán ach aúrek. (Jas. 1:2, 12) Me Jesus a erá pwe sipwe pwapwa pwal mwo nge atun sia kúna riáfféúmwáál. (Álleani Mateus 5:11.) Ifa usun sipwe tongeni akkamwéchú ach pwapwa fán weires? Sia tongeni káé chómmóng mettóch ren ach pwóróus wóón ekkóch mettóch James a makke ngeni ekkewe popun Chón Kraist. Akkomw, sipwe pwóróus wóón ekkewe weires ekkena Chón Kraist ra likiitú faar.

3. Met a fis ekiseló mwirin án James wiliti néún Jesus chón káé?

³ Ekiseló mwirin án James, pwiin Jesus we me wóón inan, wiliti néún chón káé, a fis riáfféúmwáál ngeni ekkewe Chón Kraist lón Jerusalem. (Föf. 1:14; 5:17, 18) Me lupwen ewe chón káé Stefanus a ninniiló, chómmóng Chón Kraist ra sú seni ena telinimw me “ra toropasfeil lon unusen ewe fanü Jutea me Samaria,” ló, ló, ló, pwal mwo nge tori Saipros me Antiokia.  (Föf. 7:58–8:1; 11:19) Sia chék tongeni anchangei ekkewe weires ekkena chón káé ra likiitú faar. Nge ra chúen mwasangasang le afalafala ewe pwóróus allim ese lifilifil ia ra ló ie, iwe a wor ekkewe mwichefel ra kerán fférútá lón ekkewe chómmóng fénú. (1 Pet. 1:1) Nge mwirin ena, ekkena Chón Kraist repwele pwal fen kúna chómmóng weires.

4. Ikkefa pwal ekkewe ekkóch sóssót ekkewe popun Chón Kraist ra likiitú faar?

⁴ Ekkewe popun Chón Kraist ra likiitú fán sókkopaten sóssót. Áwewe chék, lón ina epwe ewe ier 50, Sisar Klautius a allúkú ngeni meinisin ekkewe chón Jus ar repwe towu seni Rom. Ina popun ekkewe chón Jus mi wiliti Chón Kraist, ra sú seni imwer kewe fán echchimw me mwékút ngeni pwal eú leeni. (Föf. 18:1-3) Lón ina epwe ewe ier 61, aposel Paulus a makkeei pwe chienan kewe Chón Kraist ra kúna turunufas mwen mesen aramas, ra kóturulong lón fétek, me aramas ra solá seniir pisekiir kewe. (Ipru 10:32-34) Me ekkewe Chón Kraist ra pwal chék usun ekkewe ekkóch, ra likiitú fán mwelele me samau.​—Rom 15:26; Fil. 2:25-27.

5. Ikkefa ekkewe kapas eis sipwe pélúweniir?

⁵ Lupwen James a makkeei néún we taropwe me mwen ewe ier 62, a silefichi ekkewe weires chienan kewe Chón Kraist ra kúkkúna. Jiowa a emmweni James an epwe makkeei ngeni ekkena Chón Kraist pwe epwe awora ngeniir kapasen éúréúr mi álilliséch pwe repwe akkamwéchú ar pwapwa pwal mwo nge atun ra kúna ekkena weires. Sipwele etittina néún James na taropwe me pélúweni ekkeei kapas eis: Ifa ewe pwapwa James a makkeei usun? Met a tongeni atai án emén Chón Kraist pwapwa? Me ifa usun tipachem, lúkú, me pwora ra tongeni álisikich le akkamwéchú ach pwapwa fán ese lifilifil sóssót sia kúna?

6. Me ren Lukas 6:22, 23, pwata emén Chón Kraist a tongeni pwapwa atun a nóm fán weiresin sóssót?

⁶ Neman aramas ra ekieki pwe ra chék tongeni pwapwa ika a péchékkúl inisiir, watte néúr moni, me ika a wor kinamwe lón ar famili. Nge ewe sókkun pwapwa James a fós usun, ina kinikinin uwaan án Kot we ngún mi fel, me ese lóngólóng wóón met a fiffis lón manawach. (Kal. 5:22) Emén Chón Kraist a tongeni eáni ewe pwapwa, are eáni ewe enletin pwapwa, ren an silei pwe a apwapwaai Jiowa me áppirú Jesus. (Álleani Lukas 6:22, 23; Kol. 1:10, 11) Ach pwapwa a tongeni léllé ngeni ngeten eú lamp. Ngetan na a túmún seni ásepwál me púngún rán, iwe a tongeni chék ngengnget. Sia tongeni sópweló le pwapwa ese lifilifil met a fiffis lón manawach. Ach pwapwa ese mwóchóóchóló atun sia semmwen are osupwangen moni. Me ach pwapwa ese pwal kunuló pokiten esiit are koput seni chón ach famili are ekkewe ekkóch. Ach pwapwa ese kunuló, nge a fen tittinéchúló iteiten án aramas sótun atai. Ekkewe sóssót sia kúkkúna pokiten ach lúkú ra ánnetatá pwe kich néún Jesus chón káé mi enlet. (Mat. 10:22; 24:9; Joh. 15:20) Ina popun, James a tongeni makkeei ei: “Ämi pwii kana, oupwe fokun ekiekin pwapwa lupwen oupwe tolong lon sokopaten sosot.”​—Jas. 1:2.

7-8. Met a fis ngeni ach lúkú lupwen sia kúna sóssót?

⁷ James a apasa pwal eú popun án Chón Kraist tipemecheres le likiitú fán watteen weiresin sóssót. A erá: “Mine a sotuni ämi lükülük a afisätä ämi tipeppos.” (Jas. 1:3) Ekkewe sóssót ra usun chék ewe ekkei aramas ra áeá le anapanapa mecháán efóch ketilas. Lupwen ewe ketilas a pwichikkar me a pateló, iwe mecháán na a péchékkúleló. Pwal ina chék usun, lupwen sia likiitú fán sóssót, ach lúkú a péchékkúleló. Ina popun James a makkeei: “Ämi tipeppos epwe chöchöla lon föförümi meinisin, pwe oupwe mirit o unusöchüla.” (Jas. 1:4) Lupwen sia kúna pwe ach kewe sóssót ra efisi péchékkúlen ach lúkú, iwe sia tongeni likiitú faar fán pwapwa.

⁸ Lón néún James we taropwe, a pwal apasa ekkóch weires mi tongeni atai ach pwapwa. Ikkefa ekkena mettóch, me ifa usun sia tongeni okkufuur?

9. Pwata a lamot ngenikich tipachem?

⁹ Met a tongeni atai ach pwapwa? Atun sise silei met sipwe féri. Lupwen sia nóm fán sóssót, sia mochen seppiti Jiowa fán iten álillis pwe sipwe tongeni féri ekkewe kefil mi apwapwaai i, álisi pwiich kewe, me mi álisikich le akkamwéchú ach tuppwél ngeni. (Jer. 10:23) A lamot ngenikich tipachem ren ach sipwe silei met sipwe féri me met sipwe apasa atun chón oputakich ra ú ngenikich. Sia tongeni meefi letipengaw  pokiten sise silei met sipwe féri, me a tongeni mwittir péút senikich ach pwapwa.

10. Ren ach sipwe angei tipachem, met James 1:5 a erenikich pwe a lamot ach sipwe féri?

¹⁰ Met sipwe tongeni féri pwe sipwe akkamwéchú ach pwapwa? Tingorei Jiowa an tipachem. Ren ach sipwe chék pwappwapwa atun sia likiitú fán ach kewe weires, mi lamot sipwe akkomw tingorei Jiowa lón iótek an epwe ngenikich ewe tipachem mi lamot pwe sipwe féri kefil mi múrinné. (Álleani James 1:5.) Met sipwe féri ika sia meefi pwe Jiowa ese mwittir pélúweni ach iótek? Lón ewe popun kapas, James a erá pwe sipwe kan tittingor ngeni Kot. Jiowa esap mángaw atun sia kan tittingor an tipachem. Esap song rech. Semach we lón láng a “fangafangöch” lupwen sia tingor an tipachem lón iótek pwe sipwe likiitú fán ach kewe sóssót. (Kölf. 25:12, 13) A kúna ach kewe sóssót, me a meefi letipechou atun sia riáfféú me a mochen álisikich. Ena mettóch a efisi pwapwaach! Iwe nge, ifa usun Jiowa a fang ngenikich tipachem?

11. Met a lamot sipwe pwal féri pwe sipwe angei tipachem?

¹¹ Jiowa a fang ngenikich tipachem ren an we Kapas. (SalF. 2:6) Ren ach sipwe angei ena tipachem, a lamot ach sipwe káé án Kot we Kapas me néúch kewe puk mi lóngólóng wóón ewe Paipel. Nge ese chék naf ach sipwe alapaaló ach sile. A lamot ach sipwe apwénúetá an kewe kapasen emmwen lón manawach. James a makkeei: “Oupwe chon föri kapasen Kot, nge ousap chon rong chök.” (Jas. 1:22) Lupwen sia apwénúetá án Kot kewe kapasen emmwen, epwe lapóló ach sipwe eáni tipepwetete, kinamwe, me kirekiréch. (Jas. 3:17) Ekkena napanap repwe álisikich le likiitú fán ese lifilifil sóssót nge sipwe chúen pwapwa.

12. Pwata a lamot ach sipwe silefichi ewe Paipel?

¹² Án Kot we Kapas, a usun eú kilasen oori, mi álisikich le kúna met a lamot sipwe féri me  ifa usun sipwe féri. (Jas. 1:23-25) Áwewe chék, mwirin ach káé án Kot we Kapas, eli sia mirititi lamoten ach sipwe nemeni ach song. Ren án Jiowa álillis, sia káé ifa usun sipwe tipepwetete atun aramas are atun a fis ekkóch osukosuk mi tongeni asongakich. Pokiten sia tipepwetete, iwe sisap mwittir song atun a wor ach osukosuk. A tongeni fataffatéch ach ekiek me sipwe kefiléch. (Jas. 3:13) A ifa me watteen lamoten ach sipwe silefichi ewe Paipel!

13. Pwata sipwe káé án ekkewe ekkóch leenien áppirú lón ewe Paipel?

¹³ Fán ekkóch, sia káé met sisap féri mwirin chék ach sia fen féri eú féffér ese pwúng. Nge a weires ach sipwe káé lón ena esin napanap. A fen éch ach sipwe angei tipachem seni ach káé pwóróusen ekkewe ekkóch ren ifa usun ra sópwéch lón met ra féri me ifa usun ra sópwongaw. Esap pwata iwe James a pesekich ach sipwe káé usun ekkewe leenien áppirú lón ewe Paipel, áwewe chék ren Apraham, Rahap, Hiop, me Elias. (Jas. 2:21-26; 5:10, 11, 17, 18) Néún Jiowa kana chón angang mi tuppwél ra tufichin likiitú fán ekkewe sóssót mi tongeni atai ar pwapwa. Pwóróusen ar likiitú a pwári pwe sia pwal tongeni féri ena ren án Jiowa álillis.

14-15. Pwata a lamot ach sisap tunaló ach kewe tipemwaramwar?

¹⁴ Met a tongeni atai ach pwapwa? Atun sia tipemwaramwar wóón minne sia lúkú. Fán ekkóch, eli a weires ach sipwe weweiti och pwóróus seni Paipel. Are neman Jiowa ese pélúweni ach kewe iótek lón ewe esin napanap sia mochen. Ekkena mettóch ra tongeni efisi ach tipemwaramwar. Ika sia chék tunaló ach kewe tipemwaramwar, iwe epwe apwangapwangaaló ach lúkú me atai ach riri ngeni Jiowa. (Jas. 1:7, 8) Me ra pwal mwo nge tongeni efisi péútúlóón ach ápilúkúlúk fán iten mwachkkan.

¹⁵ Ewe aposel Paulus a aléllééi ach ápilúkúlúk fán iten mwachkkan ngeni efóch angké. (Ipru 6:19) Efóch angké a annúkatiw efóch siip atun eú mélúmél pwe ete fanetá wóón faú. Nge efóch angké a tongeni chék lamot ika ewe sein mi féfé ngeni ewe siip ese mu. Ekkewe tipemwaramwar sia tunaló, epwe apwangapwangaaló ach lúkú usun chék án paarang apwangapwangaaló seinen efóch angké. Atun emén a kúna sóssót ren án aramas ú ngeni, nge ika a wor an tipemwaramwar, iwe a tongeni péút seni an lúkú pwe Jiowa epwe apwénúetá an kewe pwon. Ika a péút senikich ach lúkú, iwe esap chúen wor ach ápilúkúlúk. James a apasa pwe emén chón tipemwaramwar a “wewe ngeni eu noon lematau, a mwökütüküt o nono ren asepwäl.” (Jas. 1:6) Ese mwáál, emén mi ina usun esap fókkun tongeni pwapwa!

16. Met mi lamot ach sipwe féri ika a wor ach tipemwaramwar?

¹⁶ Met sipwe tongeni féri pwe sipwe akkamwéchú ach pwapwa? Ataweei óm kewe tipemwaramwar, me apéchékkúla óm lúkú. Kosap tiperúerú. Lón fansoun ewe soufós Elias, néún Jiowa kewe aramas ra tiperúerú. Iwe Elias a ereniir: “Ifa ükükün fansoun ämi oupwe tipemwaramwar won ruu ekiek? Are ewe Samol mi Lapalap i Kot, oupwe fel ngeni, nge are ewe anü Paal i Kot, oupwe chök fel ngeni.” (1 King 18:21) A pwal ina usun lón ei fansoun. A lamot ach sipwe research pwe sipwe ánneta ngeni pwisinkich pwe Jiowa i ewe Kot, pwe ewe Paipel ina an we Kapas, me Chón Pwáraatá Jiowa iir néún kewe aramas. (1 Tes. 5:21) Ach féri meinisin ekkena mettóch epwe aúkatiw ach kewe tipemwaramwar me apéchékkúla ach lúkú. Ika a lamot ngenikich álillis le ataweei ach kewe tipemwaramwar, iwe sia tongeni fós ngeni ekkewe mwán mi ásimaw. A lamot ach sipwe mwittir mwékút ika sia mochen akkamwéchú ach pwapwa lón ach angang ngeni Jiowa!

17. Met epwe fis ika a péút senikich ach pwora?

 ¹⁷ Met a tongeni atai ach pwapwa? Atun sia ápilúkúngaw. Án Kot we Kapas a erá: “Are ka apilükingau lon fansoun riaföü, om pöchökül a kisikis.” (SalF. 24:10) Ewe kapasen Ipru mi afféú ngeni “apilükingau” a tongeni wewe ngeni “péútúlóón pwora.” Ika a péút sonuk óm pwora, iwe epwe mwittir péút sonuk óm pwapwa.

18. Met weween án emén epwe likiitú?

¹⁸ Met sipwe tongeni féri pwe sipwe akkamwéchú ach pwapwa? Lúkúlúk wóón Jiowa an epwe apworaók le likiitú. A lamot ngenikich pwora ika sipwe likiitú fán ach kewe sóssót. (Jas. 5:11) Ewe kapas “likitü” James a néúnéú, a wewe ngeni emén mi chék ppós lón leenian. Eli sia ekieki usun emén soufiu mi pwora mi chék úkkúútá lón leenian nge ese sú atun chón oputan ra fiu ngeni.

19. Met sia tongeni káé seni án aposel Paulus we leenien áppirú?

¹⁹ Ewe aposel Paulus a isetiw eú leenien áppirú mi múrinné ren an pwora me likiitú. Fán ekkóch a meefi apwangapwang. Nge a tongeni likiitú pokiten a lúkúlúk wóón Jiowa pwe epwe ngeni ewe péchékkúl mi lamot ngeni. (2 Kor. 12:8-10; Fil. 4:13) Sia tongeni eáni ena sókkun péchékkúl me pwora ika sia tipetekison le esilla pwe a lamot ngenikich án Jiowa álillis.​—Jas. 4:10.

20-21. Met sia tongeni lúkúlúkú?

²⁰ Sia fókkun lúkú pwe ekkewe sóssót sia kúkkúna esap iir kapwúngúch seni Jiowa. James a alúkúlúkú ngenikich: “Are eman aramas a tolong lon sosot, esap fokun apasa, ‘Ei sosot a feito seni Kot.’ Pun Kot esap tongeni küna sosotingau, i esap pwal sotuningauei eman.” (Jas. 1:13) Ika sia fókkun lúkú ena, iwe sia arap ngeni Semach we mi tong lón láng.​—Jas. 4:8.

²¹ Jiowa “esap siwil.” (Jas. 1:17) A álisi ekkewe popun Chón Kraist lón ar kewe weires, me epwe pwal álisi emén me emén kich lón ei fansoun. Tingormaú ngeni Jiowa an epwe álisuk le eáni tipachem, lúkú, me pwora. Epwe pélúweni óm kewe iótek. Iwe mwirin, ka tongeni fókkun lúkú pwe epwe álisuk le akkamwéchú óm pwapwa lón óm likiitú fán weires.