1, 2. (a) Ikkefa án aramas ekiek mi sókkopat usun ach tufichin pwisin filatá? (b) Met Paipel a apasa usun ach tufichin pwisin filatá, me menni kapas eis sipwe pwóróus usun?

 LUPWEN emén fefin epwe féri eú kefil, i a ereni chiechian we: “Use mochen ekiek, kele chék ereniei met upwe féri. Mi fen mecheres ena.” Ena fefin a mochen emén epwe ereni met i epwe féri nge ese mochen áeá an tufich le pwisin filatá, ina ewe liffang mi aúchea seni ewe Chón Fératá i. Nge en, ka sani óm kopwe pwisin féri óm kewe kefil, are ka mochen ekkewe ekkóch repwe wisen féri fán itom? Ifa óm ekiek usun án aramas tufich le pwisin filatá met repwe féri?

² Mi sókkopat án aramas ekiek usun ach tufichin pwisin filatá. Ekkóch ra erá pwe ese wor ena sókkun tufich pún Kot a fen filatá meinisin met sipwe féri. Ekkóch ra meefi pwe ika sise tongeni filatá meinisin met sia mochen, iwe sise wesewesen enletin ngaseló. Iwe nge, Paipel a áiti ngenikich pwe lupwen Kot a férikich a ngenikich ewe tufich me ach pwúúng  le pwisin féri ach kefil. (Álleani Josua 24:15.) Sia pwal kúna lón Paipel pélúwen ekkeei kapas eis: Mi wor aúkúkún ach tufich le pwisin filatá met sipwe féri? Itá ifa usun sipwe áeá ach tufich le féri ach kefil? Ifa usun minne sia filatá a pwáraatá úkúkún ach tongei Jiowa? Ifa usun sia tongeni pwáraatá pwe sia súféliti met ekkewe ekkóch ra filatá?

3. Ifa usun Jiowa a áeá an tufich le féri minne chék a tipeni?

³ Mi wor án Jiowa tufich le féri minne chék a tipeni nge ese wor emén epwe tongeni pinei, me sia tongeni káé seni napanapen an áeá ena tufich. Áwewe chék, Jiowa a filatá ewe mwúún Israel pwe epwe néún aramas mi kkóló aúchean. (Tut. 7:6-8) A wor popun an féri ena kefil. Jiowa a mochen apwénúetá an we pwon ngeni chiechian we Apraham. (Ken. 22:15-18) Pwal och, Jiowa a áeá an tufich fán tong me pwúng fansoun meinisin. Sia tongeni kúna ena lupwen a apwúngú ekkewe chón Israel ren ar álleasolapa i. Lupwen ra enletin niamam ren met ra fen féri, Jiowa a pwáraatá tong me úméúméch ngeniir. A erá: “Üpwe aliwinato nei aramas o tongeer seni unusen letipei.” (Os. 14:4) Jiowa a isetiw eú leenien áppirú fán itach ren an áeá an tufichin filatá le álisi aramas!

4, 5. (a) Ié we ákkáeménún Kot a fang ngeni ewe tufichin pwisin filatá, me ifa usun a áeá? (b) Menni kapas eis emén me emén leich epwe pwisin eisini?

⁴ Lupwen Jiowa a féri ekkewe chónláng me aramas a filatá le fang ngeniir ewe tufich le pwisin filatá met repwe féri. Jesus, i áeménún férien Jiowa. A ffér lón napanapen Kot me mi wor an tufich le pwisin filatá. (Kol. 1:15) Ifa usun Jesus a áeá an we tufich? Lupwen a nóm láng, Jesus a filatá le akkamwéchú an tuppwél ngeni Kot me ese fiti Satan lón an féfférún ú ngeni. Lupwen a feitiw fénúfan, a filatá an epwe fókkun ú ngeni án Satan kewe sóssót. (Mat. 4:10) Mwirin, lón ewe pwinin mwen an epwele máló, a ereni Seman we pwe a mochen féri letipan. A erá: “Semei, are ka mochen, kopwe angei seniei ei kapen riaföü, nge esap fis letipei pwe letipom.” (Luk. 22:42) Iwe met, kich mi wesewesen tongeni áppirú Jesus me áeá ach tufichin pwisin filatá le asamolu Jiowa me féri letipan?

⁵ Ewer, kich mi tongeni áppirú Jesus pokiten sia pwal ffér lón napanapen Kot. (Ken. 1:26) Iwe nge, ach tufichin pwisin filatá ese léllé ngeni án Jiowa tufich le féri minne chék a filatá. Án Kot we Kapas a apasa pwe Jiowa a isetiw ekkewe aúkúk lón ach tufich me a mochen ach sipwe álleasochisiir. Áwewe chék, lón famili, mi lamot ngeni ekkewe fin pwúpwúlú ar repwe  nóm fán nemenien pwúlúwer kewe, me ekkewe nau fán nemenien semer kewe me iner. (Ef. 5:22; 6:1) Ifa usun ekkena esin aúkúk a kkúú napanapen ach áeá ach tufichin pwisin filatá? Pélúwen ena kapas eis a tongeni kkúú met epwe fis ngenikich lón mwachkkan.

6. Eáni eú kapas áwewe mi pwáraatá lamoten an epwe wor aúkúkún ach tufichin pwisin filatá met sipwe féri.

⁶ Ika a wor aúkúkún ach tufichin pwisin filatá, iwe kich mi tongeni erá pwe sia wesewesen ngaseló? Ewer, mi tongeni! Pwata? Pokiten ekkewe aúkúk iir mi tongeni minen túmún ngenikich. Áwewe chék, sia tongeni filatá ach sipwe ssá wóón waach tarakú ngeni eú telinimw towau. Nge anchangei ika ikena ie ese wor allúkún traffic, me emén me emén a tongeni pwisin filatá úkúkún mwittirin ssáán waan we me menni pekin ewe al epwe ssá wóón. Kopwe meefi kinamwe le ssá wóón ena al? Fókkun aapw. Mi lamot ekkewe allúk mi aúkúkú ekkewe mettóch pwe meinisin repwe kúna feiéchún ar enletin ngaseló. Sipwe nengeni pwal ekkóch pwóróus lón Paipel mi pwáraatá pwe ekkewe minen aúkúk Jiowa a isetiw ra tongeni álisikich.

7. (a) Ifa eú mettóch Atam me ekkewe man ra sókkofesen wóón? (b) Áweweei eú mettóch Atam a áeá an tufichin pwisin filatá lón.

⁷ Lupwen Jiowa a fératá ewe áeménún mwán, Atam, i a fang ngeni pwal ewe tufich a fang ngeni ekkewe chónláng, ina ewe tufich le pwisin filatá. Nge Kot ese fang ena tufich ngeni ekkewe man. Ifa usun Atam a áeáéchú ena tufich? Atam a pwapwaiti wisan we le eita ekkewe man. Kot a “uweereto ren ewe aramas, pun a mochen silei met epwe aita ngeniir.” Mwirin án Atam nengenifichi emén me emén ekkewe man, iwe a eita ngeniir it mi fichitiir. Jiowa ese siwili ekkewe it Atam a filatá. Ina popun, “mine ewe aramas epwe aita ngeni ekewe mönümanu, iei repwe iteni.”​—Ken. 2:19.

8. Ifa usun Atam a áeámwáálli an tufich le pwisin filatá, iwe met mwirilóón?

⁸ Jiowa a ewisa ngeni Atam an epwe féri ei fénúfan pwe epwe eú paratis, a ereni: “Oupwe nöünöü o achomongakemi pwe fanüfan epwe masou remi o nom fän nemeniemi. Oupwe nemeni ekewe ikenen leset me ekewe mansüsü me mönün won unusen fanüfan.” (Ken. 1:28) Nge Atam a filatá an epwe mwéngé ewe féún irá mi pinepin, iwe ren an féri ena a tunaló aúkúkún an we tufich, ewe Jiowa a isetiw fán itan. Pokiten a áeámwáálli an tufichin pwisin filatá, aramas ra kúna riáfféú ren fite fite ngeréú ier. (Rom 5:12) Ach ekieki watteen efeiengawen minne Atam a filatá, itá epwe amwékútúkich le áeáéchú ach we tufich le filatá  met sipwe féri, me álleasochisi ekkewe aúkúk Jiowa a isetiw fán itach.

9. Ifa ewe kefil Jiowa a ngeni néún kewe aramas, ekkewe chón Israel, me met ra pwonei ngeni?

⁹ Aramas meinisin ra álemwiri tipis me máló seni Atam me Efa. Iwe nge, mi chúen wor ach pwúúng le áeá liffangach we, tufichin pwisin filatá. Sia tongeni kúna ena ren napanapen féfférún Kot ngeni ewe mwúún Israel. Jiowa a ngeniir eú kefil ar repwe filatá ika repwe néún aramas mi kkóló aúchean are resap. (Eks. 19:3-6) Iwe ra filatá ar repwe wiliti néún Kot aramas me álleasochisi ekkewe aúkúk Kot a isetiw. Ra apasa: “Meinisin mine ewe Samol mi Lapalap a apasa aipwe föri.” (Eks. 19:8) Solapan pwe mwirin och fansoun, ekkena aramas ra filatá le atai ar pwon ngeni Jiowa. Sia tongeni káé eú lesen mi lamot seni ei pwóróus. Fansoun meinisin sipwe aúcheani liffangach, ach tufichin pwisin filatá, me sópweló le fitipachei Jiowa me álleasochisi an kewe allúk.​—1 Kor. 10:11.

10. Menni pwóróus a mak lón Ipru sópwun 11 mi pwáraatá pwe aramas rese unuséch ra tongeni áeá ar tufichin pwisin filatá le asamolu Kot? (Ppii ewe sasing lepoputáán ei lesen.)

¹⁰ Lón puken Ipru sópwun 11, a mak iten 16 mwán me fefin mi tuppwél, mi filatá le súféliti ekkewe aúkúk Jiowa a isetiw. Iwe pokiten ena, ra kúna chómmóng feiéch me eáni eú ápilúkúlúk mi múrinné fán iten mwachkkan. Áwewe chék, Noa a pwáraatá péchékkúlen an lúkú me a filatá le álleasochisi án Kot kewe kapasen éúréúr le falei ewe waimw pwe epwe amanawa pwisin an famili me ekkewe táppin aramas repwe up mwirin. (Ipru 11:7) Apraham me Sara ra tipemecheres le álleasochisi Kot me feiló ngeni ewe fénú I a pwonei ngeniir pwe repwe fénúeni. Mwirin, inaamwo ika a “wor fansoun ar repwe liwinsefäl ngeni” ewe telinimw Ur, nge ra nefotofot wóón án Kot kewe pwon fán iten mwachkkan. Ewe Paipel a apasa pwe “ra ösüküsükü eu fanü mi mürina.” (Ipru 11:8, 13, 15, 16) Moses a likitaló wéún chón Isip me filatá an “epwe eti nöün Kot kewe aramas le riaföü, lap seni an epwe pwapwaiti tipis lon ekis chök fansoun.” (Ipru 11:24-26) Sipwe áppirú án ekkena mwán me fefin lúkú me aúcheani liffangach we, ach tufichin pwisin filatá, me áeá ena tufich le féri letipen Kot.

11. (a) Ifa eú feiéch mi fókkun watte sia kúna ren ach áeá ach tufichin filatá? (b) Met a amwékútuk le áeáéchú óm tufichin pwisin filatá?

¹¹ Usun itá mi fen mecheres án emén epwe wisen féri kefil fán itach, nge ika sia ina usun sisap kúna eú watteen feiéch mi feito seni liffangach we, tufichin pwisin filatá. Menni? Sipwe ppii met a mak lón Tuteronomi 30:19, 20. (Álleani.) Lón wokisin 19, a mak pwe Kot a ngeni ekkewe chón Israel eú kefil. Lón wokisin 20, sia kúna pwe Jiowa a suuk ngeniir ar repwe pwáraatá úkúkún ar tongei i. Kich sia pwal tongeni filatá le fel ngeni Jiowa. Mi pwal suuk ngenikich ach sipwe áeá liffangach, ach tufichin pwisin filatá, le asamolu Jiowa me pwáraatá úkúkún ach tong ngeni!

12. Met sisap fókkun féri ngeni liffangach we, ach tufichin pwisin filatá?

¹² Ekieki pwe ka liffang ngeni chiechiom we och mettóch mi aúchea. Epwe ifa meefiom ika chienom na a kápichieló óm na liffang,  are fen ngaw seni ena, a áeá le efeiengawa emén? Kopwe letipengaw. Jiowa a fen liffang ngenikich ewe tufich le pwisin filatá. Ina minne, ese mwáál Jiowa a letipengaw lupwen a kúna án aramas áeámwáálli ar tufich me féri kefil mi ngaw are efeiengawa ekkewe ekkóch. Ewe Paipel a apasa pwe lón “ekewe ränin lesopolan” aramas “resap sile kilisou.” (2 Tim. 3:1, 2) Iwe, ifa usun sia tongeni pwáraatá ach kilisou ren liffangach we mi aúchea seni Jiowa? Me ifa usun sipwe túmúnú pwe sisap áeámwáálli ena liffang?

13. Ifa eú mettóch kich Chón Kraist sipwe túmúnú seni pwe sisap áeámwáálli ach tufichin pwisin filatá?

¹³ Kich meinisin mi wor ach pwúúng le pwisin filatá chiechiach, úfach, foutach me ach minen apwapwa. Iwe nge, sia tongeni áeá ach tufichin pwisin filatá pwe eú minen kúnetipingen ren ach féri mettóch Kot ese pwapwaiti are fitaaló féfférún me ekiekin fénúfan. (Álleani 1 Petrus 2:16.) Sisap áeá ach tufichin pwisin filatá le féri minne mi mwáál, nge sipwe fen áeá le “föri meinisin pwe Kot epwe ling ren.”​—1 Kor. 10:31; Kal. 5:13.

14. Pwata a lamot sipwe lúkúlúk wóón Jiowa lupwen sia áeá ach tufichin pwisin filatá?

¹⁴ Jiowa a apasa: “Ngang ewe Samol mi Lapalap om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won.” (Ais. 48:17) Mi lamot sipwe lúkúlúk wóón Jiowa me álleasochisi ekkewe aúkúk i a isetiw pwe sipwe tongeni féri kefil mi múrinné. Fán tipetekison sia mirititi pwe “aramas resap püsin  nemeni manauer, resap pwal tongeni akota mine repwe föri.” (Jer. 10:23) Atam me ekkewe chón Israel mi álleasolap ra filatá le tunaló ekkewe aúkúk Jiowa a isetiw nge ra fen lúkúlúk wóón pwisin iir. Sisap áppirúúr. Sisap lúkúlúk wóón pwisin kich nge sipwe fen ‘lükü ewe Samol mi Lapalap ren unusen lelukach.’​—SalF. 3:5.

15. Met sia káé seni ewe kapasen emmwen a mak lón Kalatia 6:5?

¹⁵ Mi lamot sipwe pwal súféliti án aramas pwúúng le féri pwisin ar kefil lón manawer. Pwata? Pokiten kich meinisin mi wor ach tufichin pwisin filatá met sipwe féri, iwe ese tufich an epwe chék léllé met emén me emén kich epwe filatá. Ach kefil mi pwal tongeni weneiti ach kewe féffér me ach fel ngeni Kot. Chechchemeni ewe kapasen emmwen a mak lón Kalatia 6:5. (Álleani.) Lupwen sia mirititi pwe emén me emén Chón Kraist epwe “püsin mwärei wosan wosochou,” iwe sipwe súféliti an pwúúng le áeá an we tufich le pwisin féri an kefil.

16, 17. (a) Ifa usun a ppiitá osukosuk lón Korint mi weneiti án emén tufichin pwisin filatá? (b) Ifa usun Paulus a álisi ekkena Chón Kraist, me ifa ewe lesen fán itach?

¹⁶ Sipwe nengeni eú pwóróus lón Paipel mi pwáraatá lamoten ach sipwe súféliti án pwiich kewe tufichin pwisin filatá. Chón ewe mwichefelin Korint ra ánini wóón án ekkóch mwéngé ekkewe fituk ra kamé lón market, ewe sókkun neman mi fen piin asor ngeni ululun. Mwelien letipen ekkóch Chón Kraist a mut ngeniir ar repwe mwéngé ena fituk pokiten ra silei pwe ululun mi lamotongaw. Iwe nge, chókkewe ra fen piin chón fel ngeni ululun ra meefi pwe ika ra mwéngé usun ra pwal fel ngeni ululun. (1 Kor. 8:4, 7) Iei eú osukosuk mi chou pún a tongeni etipefeseni chón ewe mwichefel. Ifa usun Paulus a álisi ekkewe Chón Kraist le pwákini ei osukosuk?

¹⁷ Akkomw, Paulus a áchema ngeniir meinisin pwe mwéngé ese tongeni apéchékkúla ar riri ngeni Kot. (1 Kor. 8:8) Mwirin, Paulus a éúréúrer ar repwe túmúnú pwe minne ra filatá le féri lón ar “ngasala” esap áchepeteki mwelien letipen chókkewe mi apwangapwang. (1 Kor. 8:9) Mwirin, a ereni chókkewe mwelien letiper ese mut ngeniir ar repwe mwéngé ena esin fituk ar resap apwúngú chókkewe mi filatá le mwéngé. (1 Kor. 10:25, 29, 30) Ina minne, mi lamot emén me emén Chón Kraist epwe féri pwisin an kefil lón ekkewe mettóch mi weneiti an fel ngeni Kot. Iwe ika ina, itá esap pwal lamot ach sipwe súféliti án pwiich kewe pwúúng le pwisin filatá met repwe féri lón pwal mwo nge ekkewe mettóch mi kisikis?​—1 Kor. 10:32, 33.

18. Ifa usun kopwe pwáraatá pwe ka aúcheani liffangom we, óm tufichin pwisin filatá?

¹⁸ Jiowa a fen fang ngenikich ach tufichin pwisin filatá, ewe mettóch mi atoto ngenikich enletin ngaseló. (2 Kor. 3:17) Sia aúcheani ei liffang pokiten a suuk ngenikich ach sipwe féri pwisin ach kewe kefil mi pwáraatá úkúkún ach tongei Jiowa. Ina minne, sipwe sópweló le féri ekkewe kefil mi asamolu Jiowa, me sipwe súféliti án ekkewe ekkóch pwúúng le pwisin filatá áeáán ena liffang mi aúchea.