1, 2. Menni ewe mwich epwe fis lón 2018 mi etipeeúfengeni aramas lón ewe napanap mi kkóló aúchean, me pwata? (Ppii ewe sasing lepoputáán ei lesen.)

LÓN March 31, 2018, fite million aramas wóón unusen fénúfan repwe fiti eú mwich mi kan fis fán eú lón eú ier. Mwirin tuputiwen ewe akkar, Chón Pwáraatá Jiowa me pwal ekkóch repwe mwichfengen pwe repwe chechchemeni án Jesus we asor a eáni fán ásengesich. Iteiten ier, Áchechchemenien án Jesus máló a etipeeúfengeni aramas lón ewe napanap mi amwarar, lap seni ekkewe pwal ekkóch mwich mi kan fis wóón unusen fénúfan.

² Ese mwáál Jiowa me Jesus ra fókkun pwapwa atun ra kúna án fite million aramas wóón unusen fénúfan fiti ena mwich mi kkóló aúchean. Ewe Paipel a oesini usun “eu mwich mi fokun chocho, esap wor eman aramas a tongeni aleaniir. Ra feito seni sokopaten mwich, ainang, mwü me kapas meinisin.” Iwe “ra kökkö ren mwelier mi leüömong, ‘Sia küna manau me ren ach we Kot, ewe mi mot won ewe lenien motun king, pwal me ren  ewe Lam.’” (Pwär. 7:9, 10) A mmen amwarar pwe iteiten ier atun ewe Áchechchem, chómmóng aramas ra asamolu Jiowa me Jesus ren ekkewe chómmóng mettóch ra fen féri!

3. Ikkefa ekkewe kapas eis sipwe pélúweniir lón ei lesen?

³ Lón ei lesen, kopwe kúna pélúwen ekkeei rúáánú kapas eis: (1) Ifa usun upwe ammólnatá fán iten ewe Áchechchem pwe upwe fókkun feiéch seni? (2) Ifa usun ewe Áchechchem a álisatá tipeeúin néún Kot kewe aramas? (3) Met upwe tongeni féri pwe upwe álisatá ewe tipeeú lein néún Kot kewe aramas? (4) Itá epwe fis eú sáingoon Áchechchem? Ika ina, iwe ineet epwe fis?

4. Pwata a lamot ach sipwe fiti ewe Áchechchem

⁴ Pwata a lamot ach sipwe fiti ewe Áchechchem? Eú popun pwe ach fiti ekkewe mwich ina alen ach fel ngeni Jiowa. Sia tongeni lúkú pwe Jiowa me Jesus ra kúna chókkewe iir mi achocho úkúkún ar tufich le fiti ewe mwich mi fókkun aúchea seni meinisin lón ei ier. Sia mochen án Jiowa me Jesus repwe kúna pwe sia fiti ewe Áchechchem me lúkún chék ika sise fókkun tufichin fiti pokiten áweiresin nónnómuch. Lupwen sia pwáraatá lón ach féffér pwe sia fókkun aúcheani ach kewe mwich, iwe sia ngeni Jiowa pwal eú popun an epwe onómu itach lón néún we “puken achechem.” Ena puk a pwal iteni “ewe puken iten chon manau.” A mak iten meinisin chókkewe Jiowa a mochen ngeniir manaw esemuch.​—Mal. 3:16; Pwär. 20:15.

5. Fitu wiik me mwen ewe Áchechchem, ifa usun sipwe tongeni ánnetatá ika sia wesewesen nónnóm lón ewe lúkú?

⁵ Fitu wiik me mwen ewe Áchechchem, sia tongeni alapaaló ach fansoun le ikkiótek me ekiekifichi úkúkún péchékkúlen ach riri ngeni Jiowa. (Álleani 2 Korint 13:5.) Ewe aposel Paulus a ereni ekkewe Chón Kraist: “Oupwe püsin sotunikemi . . . pwe oupwe silei ika oua wesewesen lükü.” Ifa usun sipwe féri ena? Sia tongeni pwisin eisinikich: ‘Ua wesewesen lúkú pwe iei chék ewe mwicheich Jiowa a filatá pwe epwe apwénúetá letipan? Ua achocho úkúkún ai tufich le afalafal me esile ngeni aramas ewe kapas allim? Ua pwáraatá ren ai féffér pwe ua enletin lúkú pwe sia nónnóm lón ei ránin lesópwólóón me a chék arapakkan sópwólóón án Satan nemenem? Péchékkúlen ai lúkúlúk wóón Jiowa me Jesus iei, a usun péchékkúlan lupwen ua kerán poputá le angang ngeni Jiowa?’ (Mat. 24:14; 2 Tim. 3:1; Ipru 3:14) Ach ekkekieki pélúwen ekkena kapas eis epwe álisikich le ‘apwüngükich’ ika ifa usun ach lúkú.

6. (a) Ifa chék ewe alen ach sipwe kúna manaw esemuch? (b) Ifa usun emén mwán mi ásimaw a ammólnatá fán iten ewe Áchechchem iteiten ier, me ifa usun kopwe áppirú?

⁶ Eú mettóch sia tongeni féri ren ach sipwe ammólnatá ngeni ewe Áchechchem, ina ren ach ákkálleani me ekkekieki ekkewe lesen mi áweweei úkúkún lamoten ena mwich. (Álleani Johannes 3:16; 17:3.) Ach silei  Jiowa me lúkú Néún we Jesus, ina chék alen ach sipwe kúna manaw esemuch. Ren ach sipwe mmólnetá, sia tongeni féri eú kkótun káé epwe álisikich le meefi ach chiechiéch ngeniir. Ina met emén mwán mi ásimaw ren fansoun langattam a féri. Ren fite ier, a kan isoni ekkewe lesen seni ekkewe Leenien Mas mi pwóróus usun ewe Áchechchem me án Jiowa me Jesus tong ngenikich. Fitu wiik me mwen ewe Áchechchem, a álleasefáli ekkena lesen me ekilonei popun a fókkun lamot ewe Áchechchem. Fán ekkóch a apachaalong ekkóch lesen lón met a fen isoni. A pwal álleani me ekiekiéchú ewe álleaan Paipel fán iten ewe Áchechchem. Ena mwán mi ásimaw a erá pwe a kan káé pwal och mineféén pwóróus iteiten ier lupwen a féri ena esin káé. Nge met mi lamot seni meinisin, a meefi pwe an káé a alapaaló an tong ngeni Jiowa me Jesus. Lupwen ka féri ena káé lón ena esin napanap, kopwe pwal alapaaló óm tongei Jiowa me Jesus. Epwe pwal lapóló óm kilisou ren met ra fen féri, me epwe lapóló ewe feiéch kopwe kúna seni ewe Áchechchem.

7. (a) Met Jesus a ióteki lón pwinin ewe áeúin Fááfen Ach Samol? (b) Met a ánnetatá pwe Jiowa a pélúweni án Jesus iótek?

⁷ Lón pwinin ewe áeúin Fááfen Ach Samol, Jesus a eáni eú iótek mi kkóló aúchean. A iótek usun ewe tipeeú mi aúchea lefiler me Seman we. Jesus a pwal ióteki pwe meinisin néún kewe chón káé repwe pwal usur le tipeeúfengen. (Álleani Johannes 17:20, 21.) A ffat pwe Jiowa a pélúweni án Néún na mi áchengicheng iótek. Lap seni pwal ekkewe ekkóch mwich, ewe Áchechchem a fókkun ánnetatá pwe Chón Pwáraatá Jiowa ra tipeeúfengen. Lón ena rán, fite million aramas seni sókkopaten fénú wóón unusen fénúfan, ra mwichfengen me pwári pwe ra lúkú pwe Jiowa a tiinaato Néún we. Lón ekkóch leeni, aramas seni sókkopaten fénú rese kan kochufengen lón ar fál, nge ekkóch ra meefi pwe ika a wor ena sókkun, iwe ese pwúng me rer. Nge esap ina meefien Jiowa me Jesus. Me rer pwe a fókkun lingemwarar ach tipeeúfengen atun ewe Áchechchem.

8. Ifa ewe pwóróus Jiowa a ngeni Isikiel?

⁸ Kich néún Jiowa kewe aramas, sise máirú ren ach tipeeúfengen. Jiowa a oesini usun ei tipeeúfengen lón an pwóróus ngeni Isikiel. A ereni Isikiel an epwe angei ruuofóch wok me epwe makkeei “Mwün Juta” wóón ewe efóch, me “Mwün Israel” wóón ewe efóch. Mwirin epwe afféwúfengeniir pwe repwe wiliti chék efóch wok. (Álleani Isikiel 37:15-17.) Iei met áweween me ren ewe “Questions From Readers” seni The Watchtower minen July 2016: “Jiowa a néúnéú ewe soufós Isikiel le oesini pwe néún kewe aramas repwe liwiniti ewe Fénúen Pwon me repwe wiliti sefál eú mwú mi tipeeúfengen. Ena oesini a pwal apasa pwe ekkewe chón fel ngeni Kot lón ekkewe ránin lesópwólóón repwe tipeeúfengen.”

9. Iteiten ier atun ewe Áchechchem, ifa usun sia kúna ewe tipeeúfengen Isikiel a oesini usun?

⁹ Lepoputáán ewe ier 1919, akkomw Jiowa a ekis me ekis akkótasefáli me emwichafengeni ekkewe mi kepit. Iir usun ewe wok “Mwün Juta.” Mwirin, a chóchchómmóngóló chókkewe mi poputá le fiti ekkena mi kepit. Chókkana mi eáni ewe ápilúkúlúkún manaw esemuch wóón fénúfan, iir ra usun ewe wok “Mwün Israel.” Jiowa a pwonei pwe  repwe kochufengen ekkena ruuofóch wok me “repwe wiliti efoch chök wok” lepéún. (Is. 37:19) A féri pwe ekkewe mi kepit me ekkewe ‘ekoch sip’ repwe wiliti “eu chök mwichen sip.” (Joh. 10:16; Sek. 8:23) Ikenái, ekkena ruu mwichen aramas ra tipeeúfengen me angang ngeni Jiowa. Emén chék néúr King, Jesus Kraist, ewe mi iteni néún Kot “chon angang Tafit” me ren án Isikiel we oesini. (Is. 37:24, 25) Iteiten ier atun ewe Áchechchem, atun sia mwichfengen le chechchemeni án Jesus máló, sia kúna tipeeúin ekkena ruu mwichen aramas usun met Isikiel a fen oesini. Nge met emén me emén kich sipwe tongeni féri pwe sipwe túmúnú me álisatá tipeeúin néún Kot kewe aramas?

10. Ifa usun sipwe álisatá tipeeúin néún Kot kewe aramas?

¹⁰ Ifa ewe áeúin alen ach sipwe tongeni álisatá tipeeúin néún Kot kewe aramas? Ina ren ach achocho le tipetekison. Lupwen Jesus a nóm wóón fénúfan, a ereni néún kewe chón káé pwe mi lamot repwe tipetekison. (Mat. 23:12) Fán chómmóng aramas lón ei fénúfan ra ekieki pwe ra aúchea lap seni ekkewe ekkóch. Nge ika sia tipetekison, iwe sipwe súféliti pwiich kewe mi wisen emmweni ewe mwichefel me sipwe álleasochisi ar emmwen. Iwe, ina chék atun epwe fis tipeeúfengen lón ewe mwichefel. Nge met mi fókkun  lamot, ika sia tipetekison, Jiowa epwe pwapwa rech, pokiten a “ü ngeni chon lamalamtekia kana, nge a ümöümöch ngeni chon tipetekison kana.”​—1 Pet. 5:5.

11. Ifa usun ach ekkekieki usun ewe pilawa me wain atun ewe Áchechchem a álisikich le álisatá tipeeú?

¹¹ Ifa ewe oruuen alen ach sipwe álisatá ewe tipeeú? Ina ren ach ekkekiekifichi usun met ewe pilawa me wain ra liosuetá. Mi lamot sipwe féri ei me mwen ewe Áchechchem nge ákkáeúin lón ena pwinin. (1 Kor. 11:23-25) Ewe pilawa ese wor lefen lón a liosuetá inisin Jesus mi unuséch, ewe a asoresini fán itach. Ewe wain mi par a liosuetá chchaan we. Nge mi lamot sipwe féri pwal och mettóch me lúkún ach chék weweiti ekkeei pwóróus mi lamot. Mi lamot sipwe chechchemeni pwe án Jesus we méén kepich a áiti ngenikich ekkewe ruu alen tong mi lamot seni meinisin. Jiowa a fang Néún we fán ásengesich, me Jesus a tipemecheres le fang pwisin manawan fán itach. Lupwen sia ekieki usun ar tong, epwe amwékútúkich le tongeer. Me ach tong ngeni Jiowa epwe apéchékkúla ach tipeeúfengen.

12. Ifa usun Jesus a affata pwe Jiowa a mochen ach sipwe omusaaló tipis ren an we kapas áwewe usun ewe king me néún kewe chón angang?

¹² Ifa ewe aúlúngátin alen ach sipwe álisatá ewe tipeeú? Ina ren ach tipemecheres le omusaaló tipisin aramas. Ach féri ena a pwáraatá pwe sia kilisou ren án Jiowa omusaaló pwisin ach kewe tipis ren án Jesus asor. Jesus a eáni eú kapas áwewe usun emén king me néún kewe chón angang pwe epwe áiti ngeni aramas ewe popun a lamot ach sipwe omusaaló tipis. Kese mochen álleani Mateus 18:23-34 me pwisin eisinuk: ‘A chúng letipei le féri met Jesus a áiti ngeniei? Ngang mi mosonottam me kirekiréch ngeni pwii kewe? Ua tipemecheres le omusaaló tipisin chókkewe mi asongaei?’ Mi pwúng pwe mi wor ekkóch tipis ra chou seni ekkewe ekkóch. Me pokiten sise unuséch, a wor ekkóch tipis mi fókkun weires ngenikich ach sipwe omusereló. Nge án Jesus kapas áwewe a áiti ngenikich met Jiowa a mochen ach sipwe féri. (Álleani Mateus 18:35.) A affata pwe Jiowa esap omusaaló ach kewe tipis ika sise omusaaló tipisin pwiich kewe mi enletin aier. Ina ewe mettóch mi lamot sipwe ekiekifichi usun. Ren ach sipwe túmúnú me álisatá ach tipeeú mi aúchea, mi lamot sipwe omusaaló tipis usun met Jesus a áiti ngenikich.

13. Ifa usun sipwe túmúnú ewe kinamwe lefilach me álisatá ewe tipeeú?

¹³ Lupwen sia omusaaló tipis, sia túmúnú an epwe chék wokkor kinamwe lefilach me pwiich kewe. Ewe aposel Paulus a erá pwe mi lamot sipwe achocho le túmúnú an epwe chék wokkor ach tipeeúfengen me kinamwefengen. (Ef. 4:3) Ina minne, atun ewe Áchechchem, ákkáeúin lón ena pwinin, ekiekiéchú usun féfférum ngeni ekkewe ekkóch. Pwisin eisinuk: ‘A ffat ngeni chókkewe mi sissile ei pwe use amwéchú ai song ngeni chókkewe mi asongaei? Aramas ra tongeni kúna pwe ua achocho le efisatá kinamwe me álisatá tipeeúfengen?’ Sipwe ekieki usun ekkena kapas eis mi lamot.

14. Ifa usun sipwe pwáraatá pwe sia ‘songomang o omusamusfengen lefilach lon tong’?

¹⁴ Ifa ewe arúáánún alen ach sipwe álisatá ewe tipeeú? Ina ren ach áppirú án Jiowa pwáraatá tong. (1 Joh. 4:8) Esap mwo nge fán eú ach sipwe erá ei fán iten pwiich kewe, “Mi lamot ai upwe tongeer pokiten iir chiechiei lón pekin lúkú, nge ren enletin ii use saniir”! Ika a ina usun ach ekiek, iwe  sise apwénúetá án Paulus kapasen fén pwe sipwe ‘songomang o omusamusfengen lefilach lon tong.’ (Ef. 4:2, Testament Mi Fö) Nengeni pwe Paulus ese chék erá pwe mi lamot sipwe ‘songomang o omusamusfengen lefilach.’ Nge a pwal sópweló le apasa pwe mi lamot sipwe féri ena “lon tong.” A áiti ngenikich pwe a lamot tong. A wor sókkopaten aramas lón ach mwichefel, nge Jiowa a paniiretó meinisin ngeni i. (Joh. 6:44) Ina minne, mi lamot sipwe mirititi ekkewe chómmóng popun mi múrinné ach sipwe tongeer. Ika mi fich ngeni pwiich kewe án Kot tong, iwe itá pwata sipwe tongeni erá pwe ese fich ngeniir ach tong? Mi lamot sipwe fókkun mochen tongeer lón ewe napanap Jiowa a mochen ach sipwe tongeer lón.​—1 Joh. 4:20, 21.

15. Ifa usun sia silei pwe epwe fis ewe sáingoon Áchechchem?

¹⁵ Eú rán sipwe fiti ewe sáingoon Áchechchem. Pwata sia silei? Paulus a ereni ekkewe Chón Kraist mi kepit pwe lupwen ra chechchemeni án Jesus máló iteiten ier, ra “asilefeili mälan ach Samol tori epwe war.” (1 Kor. 11:26) Jesus a pwal fós usun an “feito” lón an we oesini usun ewe fansoun sópwólóón. Iei met a erá lupwen a fós usun ewe riáfféú mi lapalap epwele war: “Asisilen Nöün Aramas epwe pwäla fän läng, nge aramas meinisin won fanüfan repwe kechü, lupwen repwe küna Nöün Aramas epwe feito won kuchu fän manaman me ling mi lapalap. Iwe, epwe tinala nöün kewe chon läng fän tikin rappwa mi leüömong, pwe repwe amwichafengeni afilian kana seni lepelien fanüfan me rüanü, seni esopun läng tori esopun.” (Mat. 24:29-31) Jesus epwe “amwichafengeni afilian kana” lupwen a uweatá láng meinisin ekkewe Chón Kraist mi kepit wóón fénúfan. Epwe fis ena mwirin poputáán ewe riáfféú mi lapalap mwen epwe fis ewe maunen Armaketon. Lón ena maun, Jesus fitifengen me meinisin ekkewe 144,000 repwe maun ngeni ekkewe kingen fénúfan me repwe okkufuur. (Pwär. 17:12-14) Ewe sáingoon Áchechchem sipwe fiti, ina ewe epwe fis me mwen án Jesus epwe “feito” pwe epwe emwichafengeni ekkewe mi kepit.

16. Pwata kopwe fókkun achocho le fiti ewe Áchechchem?

¹⁶ Kopwe fókkun achocho le fiti ewe Áchechchem lón March 31, 2018. Me tingorei Jiowa an epwe álisuk le féri wisom pwe epwe wokkor tipeeúin néún kewe aramas. (Álleani Kölfel 133:1.) Eú rán, sipwe fiti ewe sáingoon Áchechchem. Nge ren mwo iei, sipwe pwári ach aúcheani apwapwaan ewe tipeeú mi nóm rech iteiten ier atun ewe Áchechchem.