1-2. (a) Met Jiowa a kúna lupwen fite million ra mwichfengen fán iten ewe Fááfen Ach Samol? (Ppii ewe sasing lúkúnpéén ei puk.) (b) Met sipwe pwóróus wóón lón ei lesen?

ANCHANGEI met Jiowa a kúna lupwen fite million wóón unusen fénúfan ra chufengen fán iten ewe Fááfen Ach Samol. Ese chék kúna úkúkún chóchóór, nge a pwal áfánni emén me emén mi fiti. Áwewe chék, a kúna chókkewe mi tuppwél le fiffiti iteiten ier. Ekkóch me leir ra fiti inaamwo ika ra kúna watteen riáfféúmwáál. Ekkóch rese kan fiti ekkewe ekkóch mwich, nge ra meefi pwe mi aúchea ar repwe fiti ewe Áchechchem. Jiowa a pwal kúna chókkewe mi kerán fiti ewe Áchechchem, neman seni chék ar mochen silei met epwe fis.

² Ese wor tipemwaramwar pwe Jiowa a pwapwa ren an kúna chómmóngun chón fiti ewe Áchechchem. (Luk. 22:19) Iwe nge, Jiowa ese kon pwal ekieki chóchóón chón fiti. A kon ekieki ewe popun ra fiti. Lón ei lesen, sipwe pwóróus wóón ei kapas eis mi watte lamotan: Pwata sise chék fiti ewe Áchechchem, nge sia pwal fiti ekkewe mwich iteiten wiik Jiowa a awora fán iten chókkewe mi tongei i?

3-4. (a) Pwata sia kan fiffiti mwich? (b) Met ach fiti mwich a pwári usuch? (c) Me ren 1 Korint 11:23-26, pwata sisap etiwaaló ewe Áchechchem?

³ Ewe ákkáeúin popun sia fiti ach kewe mwich pún iir kinikinin ach fel ngeni Kot. Sia pwal fiti pokiten Jiowa a asukulakich lón ach kewe mwich. Aramas mi tipetekia ra meefi pwe ese lamot ngeniir asukul. (3 Joh. 9) Nge kich sia sókkóló pún sia mwétéres le káit seni Jiowa me ewe mwicheich a kan áeá.​—Ais. 30:20; Joh. 6:45.

 ⁴ Ach fiffiti ekkewe mwich a pwáraatá pwe sia tipetekison me sia tipemecheres le angei káit. Lón ewe pwinin Áchechchemen án Jesus máló, sise chék fiti pokiten sia meefi pwe ina wisach nge pokiten sia tipemecheres le álleasochisi án Jesus ei allúk: “Iei met oupwe föri pwe oupwe chechemeniei.” (Álleani 1 Korint 11:23-26.) Ena mwich a apéchékkúla ach ápilúkúlúk fán iten mwachkkan me a áchema ngenikich úkúkún án Jiowa tongekich. Iwe nge, Jiowa a silei pwe ese chék naf fán eú iteiten ier ach sipwe rongorong kapasen alúkúlúk me apéchékkúl. Iwe, a awora ngenikich ekkewe mwich iteiten wiik me a pesekich ach sipwe fitiir. Ach tipetekison a amwékútúkich le álleasochis. Sia néúni fite awa iteiten wiik le ammólnatá me fiti ekkena mwich.

5. Pwata aramas mi tipetekison ra etiwa án Jiowa etiwetiw?

⁵ Iteiten ier, chómmóng aramas mi tipetekison ra etiwa án Jiowa etiwetiw le káit me ren. (Ais. 50:4) Ra pwapwaiti ewe Áchechchem, me ra poputá le fiti pwal ekkewe ekkóch mwich. (Sek. 8:20-23) Sia pwapwa le fitiir le angei káit me emmwen seni Jiowa, ach we ‘chon alilis me ach Chon Amanau.’ (Kölf. 40:17) Ese wor och mettóch mi apwapwa me lamot lap seni ach etiwa ewe etiwetiw ach sipwe káit me ren Jiowa me Jesus, Néún we mi fókkun tongei.​—Mat. 17:5; 18:20; 28:20.

6. Ifa usun tipetekison a álisi emén mwán an epwe fiti ewe Áchechchem?

⁶ Iteiten ier, sia achocho le etiwa chómmóng ngeni Áchechchemen án Jesus máló. Chómmóng aramas mi tipetekison ra kúna feiéch seni ar etiwa ach etiwetiw. Sipwe ppii pwóróusen emén. Fite ier a ló, emén mwán a angei eché taropween etiwetiw ngeni ewe Áchechchem, nge a ereni ewe chón afalafal pwe ese tongeni fiti. Iwe nge, lón pwinin ewe Áchechchem, ewe chón afalafal a máirú pokiten a kúna ewe mwán me lón ewe Leenien Mwich. Ewe mwán a fókkun mwaar ren án aramas kapong ngeni lupwen a tolong, iwe a poputá le fiffiti ach kewe mwich iteiten wiik. Nge fán chék úlúngát a etiwaaló ekkewe mwich lón unusen eú ier. Met a álisi le féri ena? Pokiten an tipetekison, a siwili an ekiek. Ewe chón afalafal mi etiwa, a erá, “I emén mi fókkun tipetekison.” A ffat pwe Jiowa a lukieto ena mwán an epwe fel ngeni, me iei a emén chón angang ngeni Kot mi papatais.​—2 Sam. 22:28; Joh. 6:44.

7. Ifa usun minne sia káé lón ekkewe mwich me álleani lón ewe Paipel ra tongeni álisikich le tipetekison?

⁷ Minne sia káé lón ekkewe mwich me álleani lón ewe Paipel, ra tongeni álisikich le tipetekison. Ach kewe mwich lón ekkewe wiik me mwen ewe Áchechchem, ra kan menlapei án Jesus leenien áppirú me an tipetekison ren an fangóló manawan pwe eú asoren méén kepich. Nge lón ekkewe fitu rán me mwen ewe Áchechchem, mi éch sipwe álleani ekkewe pwóróus lón Paipel mi weneiti málóón Jesus me an manawsefál. Minne sia káé lón ekkena mwich me ekkewe pwóróus lón Paipel, ra alapaaló ach aúcheani minne Jesus a féri fán itach. A amwékútúkich le áppirú an tipetekison me féri letipen Jiowa, pwal mwo nge fán weires.​—Luk. 22:41, 42.

8. Ifa usun Jesus a pwári an tipepwora?

⁸ Sia pwal achocho le áppirú Jesus lón an tipepwora. Ekieki usun ewe tipepwora a pwári fitu rán mwen an we epwele máló. A fókkun silei pwe ekiseló chék ekkewe chón  oputa repwe ásáwa, awata, me nieló. (Mat. 20:17-19) Inaamwo, nge a tipemecheres le máló. Lupwen a tori ena atun, a ereni néún kewe chón káé mi tuppwél mi nóm ren Ketsemane: “Oupwe pwätä, ousipwe feila. Nengeni iei i ewe mwän mi afangamäei!” (Mat. 26:36, 46) Nge lupwen ewe pwiin aramas ra feito fán pisekin efeiengaw pwe repwe aresini, a feilitiir me pwári pwe i Jesus, me a ereni ekkewe soufiu ar repwe mut ngeni ekkewe aposel ar repwe feiló. (Joh. 18:3-8) A ifa me watteen tipepworaan Jesus! Lón ei fansoun, Chón Kraist mi kepit me pwal ekkewe ekkóch siip ra achocho le áppirú Jesus lón an tipepwora. Ifa usun?

9. (a) Pwata a lamot tipepwora ren ach sipwe fiffiti ekkewe mwich iteitan? (b) Ifa usun ach leenien áppirú a apéchékkúla pwiich kewe mi kalapus pokiten ar lúkú?

⁹ Ren ach sipwe fiti ekkewe mwich iteitan, neman mi lamot ngenikich tipepwora pokiten weiresin nónnómuch. Ekkóch chienach kewe Chón Kraist ra fiti mwich inaamwo ika ra letipeta, letipechou, are semmwen. Pwal ekkóch ra fiti mwich fán pwora inaamwo ika ar famili are ewe mwú a áweiresiir. Ekieki ifa usun ach leenien áppirú a apéchékkúla pwiich kewe mi kalapus pokiten ar lúkú. (Ipru 13:3) Lupwen ra rongorong pwe sia chúen angang ngeni Jiowa inaamwo ika sia kúna weires, a apéchékkúler ar repwe likiitú lón ar lúkú, tipepwora, me tuppwél. A pwal fis ena ngeni aposel Paulus. Lupwen a kalapus lón Rom, a pwapwa lupwen a rongorong pwóróusen chienan kewe Chón Kraist mi angang ngeni Kot fán tuppwél. (Fil. 1:3-5, 12-14) Ekiseló mwen are mwirin chék án Paulus musowu, a makkeei néún we taropwe ngeni ekkewe chón Ipru. Lón ena taropwe, a pesei ekkena Chón Kraist mi tuppwél ar repwe “sopwela le tongfengen,” me resap úkú seni ar mwimmwichfengen.​—Ipru 10:24, 25; 13:1.

10-11. (a) Ié kewe sipwe etiwer ngeni ewe Áchechchem? (b) Ifa ewe popun sipwe etiwer me ren Efisos 1:7?

¹⁰ Sia pwári tipepwora lupwen sia etiwa aramasach kewe, chienach chón angang, me chón óruch ngeni ewe Áchechchem. Pwata sia etiwer? Pún sia fókkun kilisou ren minne Jiowa me Jesus ra féri fán itach, iwe, sia fókkun mochen etiwa aramas ar repwe pwal fiti ewe Áchechchem. Sia mochen repwe káé ifa usun ra pwal tongeni kúna feiéch seni án Jiowa “ümöümöch” mi somwoló ren ewe méén kepich.​—Álleani Efisos 1:7; Pwär. 22:17.

¹¹ Lupwen sia pwári ach tipepwora ren ach mwichfengen, sia pwári pwal eú napanap mi múrinné, ina ewe napanap Kot me Néún we ra kan pwáppwári.

12. (a) Ifa usun ach kewe mwich ra alapaaló ach tongei Jiowa me Jesus? (b) Met 2 Korint 5:14, 15 a pesekich le féri lón ach áppirú Jesus?

¹² Ach tongei Jiowa me Jesus a achchúngúkich le fiti mwich. Iwe minne sia káé  seni ekkewe mwich, a alapaaló ach tongeer. Ekkewe mwich ra kan áchechchema ngenikich usun minne ra fen féri fán itach. (Rom 5:8) Ewe Áchechchem a ákkáeúin áchema ngenikich usun alóllóólun ar tong, pwal mwo nge ngeni chókkewe resaamwo aúcheani ewe méén kepich. Pokiten watteen ach kilisou, sia achocho le áppirú Jesus lón manawach iteiten rán. (Álleani 2 Korint 5:14, 15.) Pwal eú, a chúng letipach le mochen mwareiti Jiowa ren an awora ewe méén kepich. Ach memmeef seni letipach lón ach kewe mwich, ina eú alen ach sipwe tongeni mwareiti i.

13. Ifa usun sia tongeni pwári alóllóólun ach tongei Jiowa me Néún we? Áweweei.

¹³ Sia tongeni pwári alóllóólun ach tongei Jiowa me Néún we ren ach tipemecheres le pennúkúóló ese lifilifil met fán iter. Fán chómmóng, a lamot ach sipwe pennúkú met pwe sipwe tongeni fiti ach kewe mwich. Chómmóng mwichefel ra kan mwich lekuniolun eú rán sia kan angang lón, iwe neman sia fen pekkus. Me a pwal fis eú mwich lón weekend atun fansoun án ekkóch asésé. Jiowa a áfánni ach fiti mwich inaamwo ika sia pekkus? Ewer! Ren enletin, lapólóón weiresin ach féri ena, epwe pwal ina lapólóón án Jiowa aúcheani ewe tong sia pwári fán itan.​—Mark. 12:41-44.

14. Ifa usun Jesus a isetiw eú leenien áppirú ren an pwári ewe esin tong mi pennúkúóló pwisin mochenin?

¹⁴ Jesus a isetiw eú leenien áppirú ngenikich ren an pwári ewe esin tong mi pennúkúóló pwisin mochenin. Ese chék tipemecheres le máló fán iten néún kewe chón káé, nge iteiten rán a pwal akkomwa feiéchúr. Áwewe chék, a awora fansoun ngeni néún kewe chón káé inaamwo ika a pekkus are weires letipan. (Luk. 22:39-46) A nefótófót wóón an álisi ekkewe ekkóch, nge esap wóón met aramas repwe féri fán itan. (Mat. 20:28) Lupwen a ina úkúkún ach tongei Jiowa me pwiich kewe, sipwe achocho úkúkún ach tongeni le fiti ewe Fááfen Ach Samol me pwal án ewe mwichefel kewe ekkóch mwich.

15. Ié kewe sia ákkáeúin mochen álisiir?

¹⁵ Sia chóni ewe chék eú mwicheichen pwipwi án ekkewe Chón Kraist mi enlet, me sia pwapwaiti le awora fansoun úkúkún ach tufich le etiwa aramas ese lifilifil ar repwe  fitikich. Iwe nge, sia ákkáeúin mochen álisi chókkewe mi “nom lon ewe familien chon lükülük” nge rese chúen mwimmwich are akkafalafal. (Kal. 6:10) Sia ánnetatá ach tongeer ren ach peseer ar repwe fiti ach kewe mwich, ákkáeúin ewe Áchechchem. Usun chék Jiowa me Jesus, a chúng letipach lupwen emén leir a liwiniti Jiowa, Semach we mi tong me néúch Chón Mmas.​—Mat. 18:14.

16. (a) Ifa usun sia tongeni apéchékkúlafengenikich, me ifa usun ach kewe mwich repwe álisikich? (b) Pwata ikkeei ekkewe fansoun mi fich ach sipwe chechchemeni alon Jesus lón Johannes 3:16?

¹⁶ Lón ekkan wiik sipwele feil ngeni, sipwe achocho le etiwa chómmóng ngeni ewe Áchechchem lekuniolun Enimu, April 19, 2019. (Ppii ewe pwóór “ Kopwe Etiwer?”) Lón unusen ei ier, sia mochen achocho le apéchékkúlafengenikich ren ach fiffiti meinisin ekkewe mwich Jiowa a awora fán itach. Atun sia feffeil ngeni sópwólóón ei ótót, mi lamot ngenikich ach kewe mwich pwe sipwe chék ákkeáni tipetekison, tipepwora, me tong. (1 Tes. 5:8-11) Sipwe pwári ren unusen letipach ach kilisou ren án Jiowa me Néún we tongeásinikich!​—Álleani Johannes 3:16.