1-2. (a) Met Jesus a silleló ren, me ifa usun a weneiti Áchechchemen an máló? (b) Ikkefa napanapen Jesus kewe sipwe káé usur?

KA TONGENI áweweei met a fis atun Áchechchemen málóón Kraist we? Ese mwáál, lape ngenikich sia tongeni chechchemeni minne a fis atun ewe Fááfen Ach Samol. Pwata? Pokiten ese pwal kon chómmóng met a fis lón. Iwe nge, ena mwich a aúchea. Iwe, neman sipwe ekieki, ‘Pwata a chék mecheres angangen ewe Áchechchem?’

² Atun án Jesus angangen afalafal wóón fénúfan, a silleló ren an asukula aramas minne mi lamot lón ewe napanap mi ffat me mecheres ar repwe weweiti. (Mat. 7:28, 29) Pwal ina chék usun ewe kókkót Jesus a ngenikich fán iten Áchechchemen an máló, a aúchea nge a pwal mecheres angangan. Sipwe etittina ena mwéngéén Áchechchem me ekkóch ekkewe mettóch Jesus a apasa me féri. Epwe alapaaló ach aúcheani án Jesus tipetekison, pwora, me tong, me sipwe káé ifa usun sipwe tongeni alapaaló ach áppirú i.

3. Me ren Mateus 26:26-28, met masouen mwéngéén ewe Áchechchem Jesus a poputááni, me met ekkena ruu mettóch ra liosuetá?

³ Jesus a poputááni Áchechchemen an we máló lupwen a nóm ren néún kewe 11 aposel mi tuppwél. A alamota ekkewe mettóch mi fen nóm rer seni ewe Pasofer lón an poputááni ena Áchechchem mi mecheres angangan. (Álleani Mateus 26:26-28.) Ese pwal wor met a áeá me lúkún chék ewe pilawa ese lefen me ewe wain mi fen pwisin nóm rer lón ena atun. Jesus  a ereni néún kewe aposel pwe ekkena ruu mettóch ra liosuetá inisin me chchaan we mi unuséch, ewe epwele fangóló fán ásengesiir ekiseló chék. Neman ekkewe aposel rese pwal máirú ren úkúkéchún ena mwéngéfengen. Pwata?

4. Ifa usun án Jesus kapasen pesepes ngeni Marta a álisikich le weweiti ewe popun a chék mecheres angangen mwéngéén ewe Áchechchem?

⁴ Ekieki usun met a fis fitu maram mwen ena, lón aúlúngátin ierin án Jesus we angangen afalafal lupwen a ló ren chienan kewe Lasarus, Marta, me Maria. Atun ra mómmótfengen fán kinamwe, Jesus a poputá le asukul. Marta a nóm, nge a osukosuk ren an ffér chómmóng mwéngé fán iten néún we waséla mi ámmáfel. Jesus a kúna met a féri, me a áwena an ekiek fán pwetete ren an pesei le mirititi pwe fán ekkóch ese kon lamot eú watteen mwéngé mi sóssókkopat masouan. (Luk. 10:40-42) Nge lón ewe pwinin mwen án Jesus epwele fangóló manawan, a apwénúetá pwisin an na pesepes. A eáni eú kókkót mi mecheres fán iten mwéngéén ewe Áchechchem. Met ena mettóch a áiti ngenikich usun Jesus?

5. Met sia káé usun Jesus ren mecheresin kókkótun angangen ewe Áchechchem, me ifa usun a tipeeú ngeni Filipi 2:7, 8?

⁵ Jesus a pwári an tipetekison lón meinisin minne a apasa me féri. Iwe, sise máirú ren an pwáraatá watteen tipetekison lón ewe sáingoon pwinin an nóm fénúfan. (Mat. 11:29) A silei pwe epwele eáni ewe asor mi watte lamotan lap seni meinisin lón unusen uruwoon aramas, nge mwirin, Jiowa epwe amanawasefáli me epwe ngeni lingan lón láng. Inaamwo nge ese einga pwisin i ren an eáni eú kókkót mi tokorárá lón an áchechchema an we máló. Nge a fen ereni néún kewe chón káé ar repwe chechchemeni i fán eú lón eú ier ren ena kókkót mi mecheres angangan. (Joh. 13:15; 1 Kor. 11:23-25) Ena kókkót mi fich me mecheres angangan a pwári pwe Jesus esap emén mi tipetekia. Sia pwapwa pún ach we King lón láng a tipetekison.​—Álleani Filipi 2:7, 8.

6. Ifa usun sia tongeni áppirú án Jesus tipetekison lupwen a torikich sóssót?

⁶ Ifa usun sia tongeni áppirú án Jesus tipetekison? Ren ach akkomwa feiéchún ekkewe ekkóch. (Fil. 2:3, 4) Ekiekisefáli sáingoon pwinin manawen Jesus wóón fénúfan. A silei pwe epwele riáfféú me máló, nge a pwal fókkun ekieki néún kewe aposel mi tuppwél, iir kewe repwele letipeta ren málóón. Iwe lón ena sáingoon pwiin, a áeá ena fansoun le asukuler,  apéchékkúler, me oururuur. (Joh. 14:25-31) Jesus a pwáraatá tipetekison ren an ekieki feiéchún ekkewe ekkóch lap seni pwisin feiéchún. A ifa me múrinnéén an leenien áppirú fán itach!

7. Ifa usun Jesus a pwáraatá watteen tipepwora mwirin chék an poputááni ewe Fááfen Ach Samol?

⁷ Mwirin chék án Jesus poputááni ewe Fááfen Ach Samol, a pwári watteen tipepwora. Ifa usun? Ren an etiwa met letipen Seman we ngeni, inaamwo ika a silei pwe epwe atoto ninniilóón pokiten án aramas tipimwáál ngeni pwe a turunufasa Kot. (Mat. 26:65, 66; Luk. 22:41, 42) Jesus a unusen tuppwél pwe epwe elinga iten Kot we, peni án Kot pwúúng le nemenem, me suuki ngeni chókkewe mi aier ewe ápilúkúlúkún manaw tori feilfeiló chék. Nge Jesus a pwal ammólnatá ekkewe chón tapweló mwirin ngeni met epwe pwal toriir.

8. (a) Met Jesus a ereni néún kewe aposel mi tuppwél? (b) Lón ekkewe fansoun mwirin án Jesus máló, ifa usun néún kewe chón káé ra áppirú an leenien áppirú ren an tipepwora?

⁸ Jesus a pwal pwáraatá an tipepwora ren an ese nefótófót wóón met a aúreki nge a akkomwa met mi lamot ngeni néún kewe aposel mi tuppwél. Ewe kókkót mi mecheres angangan a poputááni mwirin án Jutas towu seniir, epwe áchema ngeni chókkewe repwe wiliti néún chón káé mi kepit usun feiéchún chchaan Jesus we mi niniiló me ar kapachelong lón ewe pwonen etipeeú mi fé. (1 Kor. 10:16, 17) Jesus a ereni néún kewe chón káé met iir me Seman we ra mochen repwe féri pwe repwe tongeni tuppwél tori sópwólóón me angei ewe feiéchún feitá láng. (Joh. 15:12-15) Jesus a pwal ereni ekkewe aposel usun ekkewe sóssót repwele kúna. Mwirin, a apéchékkúler ren an ereniir ar repwe “apilükülük” pokiten i pwisin a sópwéch lón an likiitú.  (Joh. 16:1-4, 33) Fitu ier mwirin ena, néún Jesus kewe chón káé ra chúen áppirú i le pennúkú pwisin manawer me pwári tipepwora. Inaamwo ika epwe atoto riáfféú wóór, nge ra fókkun álillisfengen lefiler lón ar kewe sóssót.​—Ipru 10:33, 34.

9. Ifa usun sia tongeni áppirú Jesus ren an tipepwora?

⁹ Pwal ina chék usun, sipwe áppirú án Jesus leenien áppirú ren an tipepwora. Áwewe chék, a lamot sipwe tipepwora ren ach sipwe álisi chienach kewe Chón Kraist mi kúna riáfféúmwáál pokiten ar lúkú. Fán ekkóch, pwiich kewe ra kalapus ren och popun ese pwúng. Lupwen a fis ena, a lamot sipwe achocho le álisiir úkúkún ach tongeni, kapachelong ach sipwe fós fán iter atun ra nóm fán weires. (Fil. 1:14; Ipru 13:19) Pwal eú alen ach sipwe tongeni pwári tipepwora, ina ach sópweló le afalafal fán “pwora.” (Föf. 14:3) Sipwe usun chék Jesus le tipeppós le afalafala pwóróusen ewe Mwúún Kot, inaamwo ika aramas ra ú ngenikich me eriáfféwúmwáálikich. Nge fán ekkóch, neman sise tipepwora. Iwe ika ina, met sipwe féri?

10. Met sipwe féri lón ekkewe wiik me mwen ewe Áchechchem, me pwata?

¹⁰ Sia tongeni apéchékkúla ach tipepwora ren ach ekieki usun ewe ápilúkúlúk mi suuk ngenikich pokiten án Kraist asoren méén kepich. (Joh. 3:16; Ef. 1:7) Lón ekkewe wiik me mwen ewe Áchechchem, sia tongeni alapaaló ach aúcheani ewe méén kepich. Fiti ewe kókkótun álleaan Paipel lón ena fansoun fán iten ewe Áchechchem me ekilonei fiti iótek ekkewe mettóch mi fis lón ewe fansoun Jesus a máló. Iwe, lupwen sia mwichfengen fán iten ewe Fááfen Ach Samol, epwe lapóló ach aúcheani ekkewe pilawa me wain me ewe asor mi fókkun aúchea ra liosuetá. Lupwen sia weweiti met Jesus me Jiowa ra féri fán itach me ifa  usun a atoto feiéch ngenikich me chienach kewe me aramasach, epwe péchékkúleló ach ápilúkúlúk, me amwékútúkich le likiitú fán pwora tori sópwólóón.​—Ipru 12:3.

11-12. Met sia fen káé lón ei lesen?

¹¹ Lón ei lesen, sia fen káé pwe ewe Fááfen Ach Samol a áchema ngenikich usun ewe méén kepich, nge pwal usun napanapen Jesus kewe mi echipwér, áwewe chék ren an tipetekison me tipepwora. A ifa me kilisouch ren án Jesus sópweló le pwári ekkena napanap lón wisan Souasor mi Lap lón láng, ewe mi tingor ngeni Kot fán ásengesich! (Ipru 7:24, 25) Ren ach sipwe kilisou seni enletin letipach, a lamot sipwe tuppwél le féri Áchechchemen málóón Jesus we usun met a allúkú ngenikich. (Luk. 22:19, 20) Sia kan féri ena lón ewe rán mi sereni Nisan 14, ewe rán mi lamot seni meinisin iteiten ier.

¹² Ewe kókkót mi mecheres angangan lón ewe Fááfen Ach Samol, a áiti ngenikich pwal eú napanapen Jesus, me ina ewe napanap a amwékútú i le máló fán ásengesich. Atun a nóm wóón fénúfan, a kan silleló ren ena napanap. Ifa ena napanap?

13. Ifa usun Johannes 15:9 me 1 Johannes 4:8-10 ra áweweei ewe tong Jiowa me Jesus ra pwári, me ié kewe ra kúna feiéch seni?

¹³ Jesus a unusen áppirúfichi án Jiowa tong mi lap fán itach lón meinisin an kewe féffér. (Álleani Johannes 15:9; 1 Johannes 4:8-10.) Nge lap seni meinisin, Jesus a pwisin mochen fangóló manawan fán ásengesich. Sia kúna feiéch seni ewe tong Jiowa me Néún we ra pwári ngenikich ren ena asor, ese lifilifil ika kich mi kepit are kich chón ekkewe ‘ekoch sip.’ (Joh. 10:16; 1 Joh. 2:2) Pwal ekieki usun ewe pilawa me ewe wain lón ewe Áchechchem. Ekkena mettóch ra pwári án Jesus tongei néún kewe chón káé me an ekieki nónnómur. Ifa usun?

14. Ifa usun Jesus a pwári an tongei néún kewe chón káé?

¹⁴ Jesus a pwári an tongei néún kewe chón káé mi kepit ren an poputááni eú kókkót mi mecheres angangan. A lamot ar repwe féri ewe Áchechchem iteiten ier, nge epwe sókkofesen en me nónnómur, epwe pwal mwo nge sereni ar kalapus. (Pwär. 2:10) Ra tongeni álleasochisi Jesus? Ewer!

15-16. Ifa usun ekkóch ra tongeni féri ewe Fááfen Ach Samol inaamwo ika a weires nónnómur?

¹⁵ Seni lóóm tori lón ach ei fansoun, Chón Kraist mi enlet ra achocho le féri Áchechchemen málóón Jesus. Ra fiti ewe kókkót fán iten ewe Fááfen Ach Samol úkúkún ar tongeni, nge fán ekkóch a fókkun weires nónnómur. Ekieki pwóróusen ekkóch. Atun chienach we Harold King a áláeménúló lón kalapus me China, a ekiekietá ifa usun epwe tongeni féri ewe Áchechchem. A féri fán monomon ekkewe mettóch epwe áeá atun ewe Áchechchem seni met mi fen wor ren. A pwal achocho le esilla ewe rán ewe Áchechchem epwe sereni. Lupwen a tori ena fansoun, a kél, iótek, me eáni eú afalafal seni Paipel lón an áláeménúló.

¹⁶ Iei pwal eú pwóróus. Fitemén chienach Chón Kraist fefin ra nóm lón eú imwen fétek atun ewe Oruuen Maunen Fénúfan, nge ra féri ewe Fááfen Ach Samol inaamwo ika ra tongeni ninniiló ren. Iwe nge, pokiten ese weires kókkótun ewe mwéngé, iwe ra tongeni féri ewe Áchechchem lemonomon. Ra erá: “Aua etieppachfengen le útá únúkkún eú leenien puun peche mi éppwél ngeni eché mangak mi pwech nge ra nóm ekkewe pilawa me wain wóón. Aua chék néúnéú efóch kantel, pún ika aua néúnéú tengki, epwe pwá met  aua féri. . . . Aua apasasefáli ekkewe pwon aua eáni ngeni Semach we ám aupwe áeá unusen ám péchékkúl le álisatá letelóón pwúngún itan we mi pin.” A ifan me péchékkúlen ar lúkú! Me a pwal ifa me watteen án Jesus tong lupwen a atufichikich le féri ewe Áchechchem pwal mwo nge lupwen a weires nónnómuch!

17. Ikkefa ekkewe kapas eis sia tongeni eisini pwisinkich?

¹⁷ Atun sia arap ngeni fisin ewe Áchechchem, a éch ach sipwe eisinikich ekkeei kapas eis: ‘Ifa usun upwe tongeni alapaaló ai áppirú án Jesus pwári tong? Ua kan akkomwa met mi lamot ngeni chienei kewe chón angang ngeni Jiowa lap seni met mi lamot ngeniei? Ua kon kéúkúngaw ngeni chienei kewe Chón Kraist are ua weweiti úkúngawer?’ Sipwe ákkáppirú Jesus ren ach eáni “eu chök memef,” are meefieni meefien pwiich kewe.​—1 Pet. 3:8.

18-19. (a) Met sia tongeni lúkúlúkú? (b) Met ka tipeppós le féri?

¹⁸ Ekiseló chék, sisap chúen féri Áchechchemen án Kraist we máló. Lupwen Jesus epwe “war” atun ewe riáfféú mi lapalap, epwe uwei ngeni láng ‘afilian kewe,’ iwe sisap chúen féri ewe Áchechchem.​—1 Kor. 11:26; Mat. 24:31.

¹⁹ Pwal mwo nge mwirin ach wes le féfféri ewe Áchechchem, sia tongeni lúkúlúkú pwe néún Jiowa kewe aramas repwe pwapwa le chemeni ena mwich mi mecheres angangan, mi áchema ewe sókkun tipetekison, tipepwora, me tong mi kon lap seni meinisin met aramas ra tongeni pwári. Ese mwáál lón ena fansoun chókkewe mi fen piin féri ena mwich mi amwarar repwe apwóróusa ngeni chókkewe repwe manaw lón ena atun. Nge ren ach sipwe kúna feiéch iei seni ena mwich, a lamot ach sipwe tipeppós le áppirú án Jesus tipetekison, tipepwora, me tong. Ika ina, iwe sia tongeni lúkúlúk pwe sipwe angei feiéchúch we me ren Jiowa.​—2 Pet. 1:10, 11.