1. Met Jiowa a apasa an epwe fis lón ach ei fansoun?

JIOWA a apasa pwe lón ach ei fansoun, “engol mwän seni ekewe mwü mi sokola ar kapas repwe amwöchü lepwülün üfen eman chon Juta o üra, ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’” (Sek. 8:23) Lón ena wokisin, ena “chon Juta,” are chón Jus, a liosuetá chókkewe Kot a filiretá pwe repwe kepit ren an we ngún mi fel. Ra pwal iteni “ewe Israelin Kot.” (Kal. 6:16, Testament Mi Fö) Ekkena “engol mwän” ra liosuetá chókkewe mi eáni ápilúkúlúkún manaw esemuch wóón fénúfan. Ra silei pwe Jiowa a fen efeiéchú ena mwich mi kepit me ra meefi pwe a ina eú feiéch mi aúchea ar repwe etiir lón ar fel ngeni Jiowa.

2. Ifa usun ekkewe “engol mwän” ra ‘eti’ ekkewe mi kepit?

² Inaamwo ika ese tufich ach sipwe silei iten meinisin ekkewe mi kepit wóón fénúfan lón ei fansoun, * nge chókkewe mi ápilúkúlúkún manaw wóón fénúfan ra tongeni ‘eti’ ekkewe mi kepit. Ifa usun? Ewe Paipel a apasa pwe “engol mwän” repwe “amwöchü lepwülün üfen eman chon Juta o üra, ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’” Ena wokisin a fós usun emén chón Juta. Nge a pwal weneiti chómmóng aramas pún a néúnéú ewe kapas “etikemi.” Weween pwe ewe chón Juta esap chék emén, nge a liosuetá unusen ewe mwich mi kepit. Chókkewe rese kepit ra fiti ekkewe mi kepit lón ar angang ngeni Jiowa. Iwe nge, rese ekieki pwe ekkewe mi kepit iir néúr souemmwen,  pún ra silei pwe Jesus chék, i ewe Souemmwen.​—Mat. 23:10.

3. Ikkefa ekkewe kapas eis sipwe pélúweni lón ei lesen?

³ Pokiten a chúen wor ekkewe Chón Kraist mi kepit lein néún Kot kewe aramas lón ei fansoun, iwe neman ekkóch repwe ekieki: (1) Itá epwe ifa án ekkewe mi kepit ekiek usun pwisin iir? (2) Itá epwe met féfférúch ngeni chókkewe mi mwéngé ewe pilawa me ún ewe wain atun ewe Áchechchem? (3) Itá sipwe lólilen ika a lapóló chóchóón chón áni ewe pilawa me únúmi ewe wain? Ei lesen epwe pélúweni ekkena kapas eis.

4. Ifa ewe kapasen éúréúr lón 1 Korint 11:27-29 mi lamot ekkewe mi kepit repwe ekiekiéchú, me pwata?

⁴ A lamot ekkewe mi kepit repwe ekiekiéchú ewe kapasen éúréúr mi mak lón 1 Korint 11:27-29. (Álleani.) Atun ewe Áchechchem, ifa usun emén mi kepit a tongeni mwéngé ewe pilawa me ún ewe wain nge “lon an esap fich ngeni”? Epwe ina ika eménna a mwéngé ewe pilawa me ún ewe wain, nge a eáni ewe sókkun manaw ese tipeeú ngeni án Jiowa kewe allúk mi pwúng. (Ipru 6:4-6; 10:26-29) Ekkewe mi kepit ra mirititi pwe mi lamot ar repwe  akkamwéchú ar tuppwél ika ra mochen angei “ewe win, iei än Kot kö ren Kraist Jesus ngeni ewe manau esemüch.”​—Fil. 3:13-16.

5. Itá epwe ifa án ekkewe Chón Kraist mi kepit ekiek usun pwisin iir?

⁵ Án Jiowa we ngún mi fel a álisi néún kewe chón angang ar repwe tipetekison nge resap lamalamtekia. (Ef. 4:1-3; Kol. 3:10, 12) Ina minne, ekkewe mi kepit rese ekieki pwe ra múrinné seni ekkewe ekkóch. Rese ekieki pwe ewe ngún mi fel Jiowa a fang ngeniir epwe lap seni met a fang ngeni néún kewe pwal ekkóch chón angang. Rese meefi pwe ra weweéchúti ekkewe pwóróus mi enlet lón Paipel lap seni aramas meinisin. Resap fókkun ereni emén pwe i emén mi pwal kepit me epwe tongeni poputá le mwéngé ewe pilawa me ún ewe wain atun ewe Áchechchem. Nge ra fen tipetekison me ra silei pwe Jiowa chék a tongeni etiwa aramas ar repwe feitá láng.

6. Me ren 1 Korint 4:7, 8, itá epwe met féfférún ekkewe Chón Kraist mi kepit?

⁶ Inaamwo ika ekkewe mi kepit ra meefi pwe a eú feiéch mi aúchea ar repwe ketiw le feitá láng, nge rese ekieki pwe epwe kkóló aúchean napanapen féfférún aramas ngeniir. (Fil. 2:2, 3) Ra pwal silei pwe lupwen Jiowa a filiretá, I ese pwal esile ngeni aramas meinisin. Ina popun emén mi kepit esap máirú lupwen ekkóch rese mwittir lúkú pwe i a kepit. A weweiti pwe ewe Paipel a erenikich ach sisap mwittir lúkú alon emén pwe a angei och wis seni Kot mi kkóló aúchean. (Pwär. 2:2) Pokiten emén mi kepit ese mochen pwe aramas repwe fókkun áfánni i, ese pwal ereni chókkewe ra kerán chufengen pwe i emén mi kepit. Me ese fókkun esika ngeni ekkewe ekkóch usun ena.​—Álleani 1 Korint 4:7, 8.

7. Met chókkewe mi kepit resap féri, me pwata?

⁷ Ekkewe Chón Kraist mi kepit rese meefi pwe a lamot repwe chék nónnóm ren ekkewe pwal ekkóch mi kepit, usun itá iir chón eú kúmi mi kkóló me imuló seni ekkewe ekkóch. Rese sótun kútta pwal ekkóch mi kepit pwe repwe tongeni fós usun ar kepit are mwichfengen lón pwisin ar kúmi pwe repwe káé ewe Paipel. (Kal. 1:15-17) Esap tongeni wor tipeeúfengen lón ewe mwichefel ika ekkewe mi kepit repwe féri ekkena esin. Ar féri ena epwe ú ngeni angangen án Kot we ngún mi fel, ewe a álisi néún kewe aramas le eáni kinamwe me tipeeúfengen lefiler.​—Rom 16:17, 18.

8. Pwata a lamot kopwe túmúnúéchú féfférum ngeni chókkewe mi mwéngé ewe pilawa me ún ewe wain fán iten ewe Áchechchem? (Pwal ppii ewe footnote.)

⁸ Itá epwe ifa féfférúch ngeni pwiich kewe mi kepit? Ese pwúng an epwe kon luló án  emén mwareiti emén, inaamwo ika eménna i emén pwiin Kraist mi kepit. (Mat. 23:8-12) Lupwen ewe Paipel a fós usun ekkewe mwán mi ásimaw, a pesekich ach sipwe “apirü ar lükülük,” nge ese erenikich pwe sia tongeni féri pwe emén aramas epwe ach souemmwen. (Ipru 13:7) Pwúngún pwe Paipel a apasa pwe a fich ngeni ekkóch ar repwe angei “liwiniir fän ruu.” Nge a erá ena pokiten ra “angangöch le emweni mwichefel” me “angang weires lon ar afalafal me asukula aramas,” nge esap pokiten iir mi kepit. (1 Tim. 5:17) Sia tongeni ásáwa ekkewe mi kepit ika sia kon mwareitiir me kon áfánniir. * Nge ewe a fen kon ngaw seni ena, sia tongeni efisi ar repwe lamalamtekia. (Rom 12:3) Sise mochen féri met epwe tongeni efisi án emén me lein pwiin Kraist kewe mi kepit epwe fókkun mwáálliló ren lón ena sókkun napanap!​—Luk. 17:2.

9. Ifa usun sipwe pwáraatá pwe sia súféliti chókkewe mi kepit?

⁹ Ifa usun sipwe pwári pwe sia súféliti chókkewe mi kepit me ren Jiowa? Sisap eisiniir ifa usun ra wiliti emén mi kepit. Ese pwal wor ach pwúúng ach sipwe silei ena pún a weneiti pwisin manawer. (1 Tes. 4:11; 2 Tes. 3:11) Sisap pwal ekieki pwe pwúlúwer, semer me iner, are ekkóch chón ar famili ra pwal kepit. Pún esap weween nge emén a álemwiri ena ápilúkúlúk seni an famili. Nge a angei ena seni Kot. (1 Tes. 2:12) Sipwe pwal túmúnú ach sisap eáni ekkewe sókkun kapas eis epwe tongeni eletipechowu ekkewe ekkóch. Áwewe chék, sisap eisini pwúlúwen emén mi kepit ika met meefian an epwe manaw wóón fénúfan feilfeiló chék nge pwúlúwan we ese pwal fiti. Pún lón ewe ótót sefé, sia fókkun silei pwe Jiowa epwe “ngeni ekewe mönümanau meinisin mine repwe menemenöch ren.”​—Kölf. 145:16.

10. Ifa usun a eú minen túmún ngenikich ach sisap kon eingaatá aramas?

¹⁰ Ach sise átekiatáái ekkewe mi kepit pwe usun iir mi lamot lap seni ekkewe ekkóch, a pwal ina eú minen túmún pwisin fán itach. Ifa usun? Ewe Paipel a apasa pwe ekkóch ekkewe mi kepit eli resap amwéchú ar tuppwél ngeni Kot. (Mat. 25:10-12; 2 Pet. 2:20, 21) Nge ika sia túmúnúkich seni ach kon eingaatá aramas, iwe sisap tapweló mwirin ekkewe ekkóch, pwal mwo nge mwirin ekkewe mi kepit, are chókkewe mi watte wiser lón án Jiowa we mwicheich, me chókkewe mi fen angang ngeni ren fansoun langattam. (Jut. 16) Iwe, ika ra rikiló are likitaló ewe mwichefel, esap péút senikich ach lúkú me sisap úkútiw le angang ngeni Jiowa.

11. Met a fiffis ngeni chóchóón chókkewe mi mwéngé ewe pilawa me ún ewe wain atun ewe Áchechchem?

¹¹ Ren fite fite ier, a kisikisiló chóchóón chókkewe mi mwéngé ewe pilawa me ún ewe wain atun ewe Áchechchem. Nge kukkuto chék, chóchóór a lallapóló iteiten ier. Itá a wor popun ach sipwe pwal lólilen ren ena mettóch? Aapw. Sipwe ppii ika pwata sisap lólilen.

12. Pwata ese wor popun sipwe lólilen ren chóchóón chókkewe mi mwéngé ewe pilawa me ún ewe wain atun ewe Áchechchem?

¹² “Ach Samol a silei chokewe ir nöün.” (2 Tim. 2:19) Pwiich kewe mi wisen álleani ekkewe mi mwéngé ewe pilawa me ún ewe wain atun ewe Áchechchem, rese usun Jiowa pún rese silei ika ié kewe iir mi wesewesen kepit. Iwe minne ra álleani a kapachelong chókkewe ra ekieki pwe iir mi kepit nge ren enletin esap iir mi kepit. Áwewe chék, ekkóch ra fen piin mwéngé ewe pilawa me ún ewe wain nge mwirin ra  kaúló. Ekkóch neman a semmwen lón tupwuer are a wor ar osukosuken memmeef, iwe ra lúkú pwe repwe eti Kraist le nemenem lón láng. A ffat pwe sise wesewesen silei ika fitemén mi kepit ra chúen nóm wóón fénúfan.

13. Ewe Paipel a affata ika fitemén ekkewe mi kepit repwe nóm wóón fénúfan lupwen a poputá ewe riáfféú mi lapalap?

¹³ Epwe wor ekkewe mi kepit ekis meinisin wóón fénúfan lupwen Jesus epwe war me uweireló láng. (Mat. 24:31) Ewe Paipel a apasa pwe lón ekkewe ránin lesópwólóón, epwe wor lusun ekkewe mi kepit repwe chúen nóm wóón fénúfan. (Pwär. 12:17) Nge ese affata ika fitemén leir repwe chúen nóm lupwen a poputá ewe riáfféú mi lapalap.

14. Met mi lamot sipwe weweiti usun kefilin ekkewe mi kepit usun met Rom 9:11, 16 a áiti ngenikich?

¹⁴ Jiowa a wisen fili ineet epwe filatá ekkewe mi kepit. (Rom 8:28-30) Jiowa a poputá le filatá ekkewe mi kepit mwirin án Jesus we manawsefál. Lón fansoun ekkewe aposel, usun meinisin ekkewe Chón Kraist mi enlet iir mi kepit. Nge ren fitepúkú ier mwirin ena, lape ngeni chókkewe mi erá pwe iir Chón Kraist rese wesewesen tapweló mwirin Kraist. Ikaamwo a ina usun, nge lón ekkena ier Jiowa a filatá ekkewe fitemén Chón Kraist mi enlet ar repwe kepit. Iir ra usun chék ekkewe wiich Jesus a erá pwe repwe máárfengen me ekkewe pétéwélingaw. (Mat. 13:24-30) Atun ekkewe ránin lesópwólóón, Jiowa a sópweló le filatá chókkewe repwe chóni ewe 144,000. * Ina popun, ika Kot a filatá pwe ekkóch repwe kepit me mwen chék ewe sópwólóón, sisap tipemwaramwareiti pwúngún minne a  féri. (Álleani Rom 9:11, 16.) * Sipwe túmúnú pwe site usun ekkewe chón angang lón eú án Jesus kewe kapas áwewe. Ra lal ngeni néúr we masta ren féfférún ngeni chókkewe mi kerán poputá le angang me mwen chék epwe sáreló ewe angang.​—Mat. 20:8-15.

15. Itá meinisin ekkewe mi kepit ra kapachelong lón kúmiin “ewe chon angang mi allükülük o tipachem,” ewe Mateus 24:45-47 a fós usun? Áweweei.

¹⁵ Esap meinisin chókkewe mi eáni ewe ápilúkúlúkún manaw lón láng ra kapachelong lón kúmiin “ewe chon angang mi allükülük o tipachem.” (Álleani Mateus 24:45-47.) Lón ei fansoun, Jiowa me Jesus ra chék néúnéú fitemén Chón Kraist mwán ar repwe amwéngééni are asukula chómmóng, usun chék met a fis lón fansoun ekkewe aposel. Jiowa a chék néúnéú fitemén Chón Kraist mi kepit le makkeei néún Chón Kraist we Tesin Krik. Lón ei fansoun, fitemén chék ekkewe Chón Kraist mi kepit mi eáni ewe wis ar repwe awora ngeni néún Kot kewe aramas ewe “mongö lon fansoun fich.”

16. Met ka káé seni ei lesen?

¹⁶ Met sia fen káé seni ei lesen? Jiowa a fen filatá an epwe fang ngeni lape ngeni néún kewe aramas, manaw esemuch wóón fénúfan, nge a chék fang ngeni fitemén ewe manaw lón láng le eti Jesus le nemenem. Jiowa a efeiéchú meinisin néún kewe chón angang, ewe “chon Juta” me pwal ekkewe “engol mwän.” Me a mochen pwe iir meinisin repwe chék nóm fán an allúk me akkamwéchú ar tuppwél. Mi lamot iir meinisin repwe tipetekison. Repwe angang ngeni Jiowa me repwe tipeeúfengen. Meinisin repwe túmúnú kinamween ewe mwichefel. Lón ei fansoun a chék arapoto ewe sópwólóón, amwo oukich meinisin sipwe akkangang ngeni Jiowa me tapweló mwirin Kraist usun “eu chök mwichen sip.”​—Joh. 10:16.