1-2. Ifa ewe mettóch mi amwarar a fis lón ewe ránin Pentikost lón ewe ier 33?

IEI met a fis lón eú sossorun Ráninfel lón Jerusalem lón ewe ránin Pentikost lón ewe ier 33. Ina epwe 120 néún Jesus chón káé ra mwichfengen lón eú ruumw asan lón eú imw. (Föf. 1:13-15; 2:1) Fitu rán me mwan, Jesus a éúréúrer ar repwe chék nóm Jerusalem pokiten repwe angei eú liffang mi kkóló aúchean. (Föf. 1:4, 5) Met a fis mwirin?

² “A müttir fis eu ngüngü seni läng mi wewe ngeni ngüngün asepwäl mi pöchökül.” Ena ngúngú a rongfeil lón unusen ewe imw. Mwirin “chön mongö usun ekkei” a pwá wóón chamwen ekkewe chón káé, me meinisin iir “ra urela ren Ngünmifel.” (Föf. 2:2-4) Fán ena napanap mi amwarar, Jiowa a ninatiw an we ngún mi fel wóón ena mwichen aramas. (Föf. 1:8) Iir chókkewe mi akkomw kepit ren án Kot we ngún mi fel * me ra angei ewe ápilúkúlúkún ar repwe eti Jesus lón láng lón an nemenem.

3. Pwata chókkewe lón ewe ránin Pentikost ra fókkun silei pwe ra fen kepit ren án Kot we ngún mi fel?

³ Ika en emén me lein néún Jesus kana chón káé mi mwichfengen lón ena ruumw asan lón ena rán, kosap tongeni ménúkaaló met ena a fis. A pwá och chéén mwéngé mi usun ngeten ekkei asen chamwom, me ka poputá le fós fósun ekis! (Föf. 2: 5-12) Ese pwal wor óm tipemwaramwar pwe ka fen kepit ren án Kot we ngún mi fel. Nge itá meinisin chókkana mi kepit ren án Kot we ngún mi fel, ra kepit fán eú napanap mi amwarar me léllé chék ewe atun ra kepit? Aapw. Pwata sia silei?

4. Itá a chék léllé ewe atun meinisin ekkewe mi kepit ra kepit lón fansoun ekkewe aposel? Áweweei.

⁴ Sipwe pwóróus wóón ineet atun emén a tongeni kepit. Esap chék ekkewe 120 som Chón Kraist ra kepit ren án Kot ngún mi fel lón ewe Pentikost lón ewe ier 33. Mwirin lón pwal chék ena rán, ina epwe 3,000 ra pwal kepit ren ewe ngún mi fel. Ra kepit lupwen ra papatais. (Föf. 2:37, 38, 41) Nge ló, ló, ló, esap meinisin Chón Kraist mi kepit ra angei ewe ngún mi fel atun ra papatais. Ekkewe chón Samaria ra papatais, iwe mwirin och fansoun repwap kepit. (Föf. 8:14-17) A pwal fókkun kkóló met a fis lón eú atun, pún Kornelius me chón leimwan ra pwal mwo nge kepit me mwen ar repwe papatais.​—Föf. 10:44-48.

5. Me ren 2 Korint 1:21, 22, met a fis lupwen emén a kepit ren án Kot we ngún mi fel?

⁵ Sipwe nengeni met a fis lupwen emén a kepit ren ewe ngún mi fel. Lupwen ekkóch ra kerán silei pwe ra fen kefil, neman a weires ar repwe weweiti pwe Jiowa a fen filiretá. Neman repwe ekieki, ‘Pwata Kot a filiei?’ Nge neman ekkóch rese meefi ina usun. Nge ese pwal lifilifil met ra meefi, nge ewe aposel Paulus a áweweei met a fis ngeni meinisin mi kepit, a erá: “Ämi oua lükü Kraist, nge Kot a pwaunikemi * pwe oupwe nöün ren an ngenikemi ewe Ngünmifel, usun i a fen pwonei. Pokiten sia eäni Ngünmifel, sia fokun silei pwe sipwe angei mine Kot a fen pwon ngeni nöün aramas.” (Ef. 1:13, 14) Ina minne, Jiowa a áeá an we ngún mi fel le affata ngeni ekkewe Chón Kraist pwe a fen filiretá. Iwe ren ena, ewe ngún mi fel a alúkúlúkú are pwonei ngeniir pwe repwe “fokun silei” pwe lón mwachkkan repwe manaw tori feilfeiló chék lón láng nge esap wóón fénúfan.​—Álleani 2 Korint 1:21, 22.

6. Met mi lamot emén Chón Kraist mi kepit epwe féri ren an epwe angei ewe feiéchún feitá láng?

 ⁶ Ika emén Chón Kraist a kepit, itá a wewe ngeni pwe epwe fókkun feitá láng? Aapw. A fókkun silei pwe a fen kefilitá pwe epwe feitá láng. Iwe nge, mi lamot epwe chechchemeni ei kapasen éúréúr: “Pwii kana, oupwe fokun achocho le anüküchara ämi kö me fil, pun are oupwe föri iei usun, ousap fokun tur lon tipis.” (2 Pet. 1:10) Ina minne, inaamwo ika emén Chón Kraist mi kepit a fen kefilitá, are Kot a filatá an epwe feitá láng, nge epwe chék tongeni angei ena feiéch ika a akkamwéchú an tuppwél.​—Fil. 3:12-14; Ipru 3:1; Pwär. 2:10.

7. Ifa usun ekkewe mi kepit ra silei pwe ra fen ketiw pwe repwe feitá láng?

⁷ Nge ifa usun emén epwe silei pwe a fen ketiw an epwe feitá láng? A fókkun ffat pélúwen ena seni alon Paulus kewe ngeni chón Rom, iir kewe Kot a ‘köriir pwe repwe chon pin.’ A ereniir: “Ewe Ngün Kot a ngenikemi esap nöünikemi chon angang pwe oupwe niuokus, nge ewe Ngün a atolongakemi lon tettelin nöün Kot. Iwe, ren atufichien ewe Ngün sia kökkö ngeni Kot, ‘Sam! Semei!’ Iwe, ewe Ngünün Kot a pwäri ngeni ngünüch pwe kich sia nöün Kot kana.” (Rom 1:7; 8:15, 16) Ina minne, ren án Kot we ngún mi fel, Kot a affata ngeni ekkewe mi kepit pwe ra fen ketiw pwe repwe feitá láng.​—1 Tes. 2:12.

8. Ifa usun 1 Johannes 2:20, 27 a pwáraatá pwe ese pwal lamot án ekkewe ekkóch repwe affata ngeni ekkewe Chón Kraist mi kepit pwe iir mi kepit?

⁸ Ese fókkun wor tipemwaramwar lón ekiekin me letipen chókkewe mi kepit pwe ra fen kefil ar repwe feitá láng, pún Jiowa a fen fókkun affata ngeniir. (Álleani 1 Johannes 2:20, 27 seni Testament Mi Fö.) Pwúngún pwe a lamot ngeni ekkewe Chón Kraist mi kepit ar repwe angei káit seni Kot seni ewe mwichefel usun chék kich meinisin. Nge ese lamot ngeniir án emén epwe affata ngeniir pwe iir mi kepit. Jiowa a fen áeá an we ngún mi fel, ewe manaman mi fókkun péchékkúl lón unuselapen láng me fénúfan le wesewesen affata ngeniir pwe iir ra kepit!

9. Met sókkun siwil a fis ngeni emén lupwen a kepit usun met Efisos 1:18 a áweweei?

⁹ A weires ngeni lape ngeni néún Kot kewe aramas lón ei fansoun, ar repwe weweiti met a fis ngeni emén lupwen Kot a filatá an epwe emén mi kepit. A ina usun met ra meefi pokiten pwisin iir rese kepit. Kot a fératá aramas ar repwe manaw wóón fénúfan tori feilfeiló chék, nge esap lón láng. (Ken. 1:28; Kölf. 37:29) Nge Jiowa a filatá ekkóch ar repwe nóm lón láng. Iwe lupwen Kot a epitiir, a siwili ar ápilúkúlúk me ar ekiek, iwe iei repwele mwétéresiti ar repwe manaw lón láng.​—Álleani Efisos 1:18.

10. Met weween án emén “upsefäl”? (Pwal ppii ewe footnote.)

¹⁰ Lupwen ekkewe Chón Kraist ra kepit ren án Kot we ngún mi fel, ra “upsefäl.” * Jesus a pwal apasa pwe epwe fókkun weires ngeni emén mi kepit an epwe áweweei ngeni emén ese kepit meefian ren an “upsefäl” are ‘up seni ngünmifel.’​—Joh. 3:3-8.

11. Áweweei ewe siwil a fis lón ekiekin emén lupwen a kepit.

¹¹ Met sókkun siwil a fis lón ekiekin ekkewe Chón Kraist mi kepit? Me mwen án Jiowa etiwa ekkena Chón Kraist ar repwe feitá láng, ra eáni ewe ápilúkúlúkún manaw esemuch wóón fénúfan. Ra mwétéresiti ewe fansoun Jiowa epwe amóeló féfféringaw meinisin me ewilaaló  fénúfan ngeni eú paratis. Eli ra fen anchangei ar repwe etiwasefáli emén chón ar famili are chiechier mi fen máló. Nge mwirin ar kepit, a poputá le siwil ar ekiek. Pwata? Esap pokiten rese chúen menemenéch ren ar ápilúkúlúkún manaw wóón fénúfan. Ese siwil ar ekiek pokiten ra meefi letipechou are kúna watteen riáfféú. Me rese meefi pwe epwe echchipwang manawer wóón fénúfan tori feilfeiló. Nge Jiowa a áeá an we ngún mi fel le siwili napanapen ar ekiek me siwili ar we ápilúkúlúk, ewe ra fen piin aúcheani.

12. Me ren 1 Petrus 1:3, 4, met meefien ekkewe Chón Kraist mi kepit usun ar ápilúkúlúk?

¹² Emén mi fen kepit neman epwe meefi pwe ese fich ngeni ei feiéch mi aúchea. Nge ese fókkun wor an tipemwaramwar pwe Jiowa a fen fili. Letipan a ur ren pwapwa me kilisou lupwen a ekieki an ápilúkúlúkún manaw lón láng.​—Álleani 1 Petrus 1:3, 4.

13. Met meefien ekkewe mi kepit usun manawer wóón fénúfan?

¹³ Iwe, itá a wewe ngeni pwe ekkewe mi kepit ra mochen máló? Paulus a pélúweni ena kapas eis. A erá pwe inisiir inisin aramas a usun chék eú imwen siamú me a apasa: “Lupwen sia nom lon imwach imwen siamü, sia ngüngü fän ach weires. Esap wewen pwe sia mochen towu seni inisich me fanüfan, nge sia mochen pwe inisich me läng epwe pwilipwil woch, pwe mine a mämmä epwe wili ngeni manau.” (2 Kor. 5:4) Ese péút seni ekkewe mi kepit ar pwapwaiti manaw, me rese mochen manawer epwe chék mwittir much. Nge ra pwapwaiti manawer me mochen áeá eú me eú ránin manawer le angang ngeni Jiowa fitifengen me chón ar famili me chiechier kewe. Nge ese lifilifil met ra féri, nge ra chék chechchemeni ar ápilúkúlúk mi ling fán iten mwachkkan.​—1 Kor. 15:53; 2 Pet. 1:4; 1 Joh. 3:2, 3; Pwär. 20:6.

14. Met ese ánnetatá ika emén a kepit ren án Kot we ngún mi fel?

¹⁴ Eli ka ekieki ika ka fen kepit ren án Kot we ngún mi fel. Ika ina, ekieki usun ekkeei kapas eis mi lamot. A fókkun péchékkúl óm mochen féri letipen Jiowa? Ka meefi pwe ka fókkun tinikken lón ewe angangen afalafal? Ka wesewesen pwapwaiti le káé Paipel me “ekiekin Kot mi alolol”? (1 Kor. 2:10) Ka meefi pwe Jiowa a fen efeiéchuk pún a fókkun uwaéch óm angangen afalafal? A fókkun alóllóól óm tongei aramas me meefi pwe wisom óm kopwe álisiir le wiliti chón angang ngeni Jiowa? A fen fis lón manawom chómmóng mettóch mi ánnetatá pwe Jiowa a fen álisuk? Ika pélúwen meinisin ekkena kapas eis me reom “ewer,” iwe, itá a ánnetatá pwe ka fen ketiw óm kopwe feitá láng? Aapw, esap ina weween. Pwata? Pokiten meinisin néún Kot chón angang ra tongeni eáni ekkena esin memmeef, ese lifilifil ika iir mi kepit are rese kepit. Me ren án Jiowa ngún mi fel, a tongeni fang ena esin manaman ngeni meinisin néún kewe chón angang, ese lifilifil ika iir mi kepit are rese kepit. Ren enletin, ika ka tipemwaramwar ika ka fen kepit ren ewe ngún mi fel, iwe ena esin memmeef a wewe ngeni pwe kese fen kepit. Chókkewe mi kepit me ren Jiowa rese tipemwaramwar ika iir mi kepit are rese kepit! Ra fen silei!

15. Ifa usun sia silei pwe esap meinisin mi angei án Kot we ngún mi fel ra fen kefilitá le feitá láng?

¹⁵ Lón ewe Paipel, a wor chómmóng pwóróusen aramas mi tuppwél mi angei án Jiowa we ngún mi fel nge rese eáni ewe ápilúkúlúkún manaw lón láng. Ewe ngún mi fel a emmweni Tafit. (1 Sam. 16:13) Ewe ngún mi fel a álisi le weweiti ekkewe mettóch mi alóllóól usun Jiowa, me a emmweni an epwe makkeei ekkóch kinikinin ewe Paipel. (Mark. 12:36) Inaamwo ika a ina usun, nge aposel Petrus a  apasa pwe Tafit “esap püsin feitä läng.” (Föf. 2:34) Johannes Soupapatais a pwal “ur ren Ngünmifel.” (Luk. 1:13-16) Jesus a erá pwe ese pwal wor emén mi lap seni Johannes, nge mwirin a erá pwe Johannes ese pwal kapachelong lein chón ewe Mwúún láng. (Mat. 11:10, 11) Jiowa a áeá an we ngún mi fel le ngeni ekkena mwán ewe manaman le féri ekkewe mettóch mi amwarar, nge ese áeá le filiretá le manaw lón láng. A itá wewe ngeni pwe rese kon lien tuppwél usun chókkewe mi kefilitá le nemenem lón láng? Aapw. A chék wewe ngeni pwe Jiowa epwe amanawasefáliir lón Paratis wóón fénúfan.​—Joh. 5:28, 29; Föf. 24:15.

16. Ifa ewe feiéch lape ngeni néún Kot kewe chón angang ra ápilúkúlúkú?

¹⁶ Lape ngeni néún Kot kewe chón angang lón ei fansoun rese eáni ewe ápilúkúlúkún manaw lón láng. Ra mwétéresiti ar repwe nónnóm wóón fénúfan fán nemenien án Kot we Mwú usun chék ren Apraham, Sara, Tafit, Johannes Soupapatais me pwal chómmóng aramas lón fansoun lóóm.​—Ipru 11:10.

17. Ikkefa ekkewe kapas eis sipwe pwóróusfengen wóón lón en lesen mwirin ei?

¹⁷ Pokiten ekkóch ekkewe mi kepit ra chúen nóm lein néún Kot kewe aramas lón ei fansoun, iwe a tongeni ppiitá ekkóch kapas eis. (Pwär. 12:17) Áwewe chék, itá epwe ifa ekiekin ekkewe mi kepit usun pwisin iir? Ika emén lón óm we mwichefel a poputá le áni ewe pilawa me ún ewe wain lón ewe Áchechchem, itá epwe ifa féfférum ngeni eménna? Ifa usun ika a lallapóló chóchóón chókkewe mi erá pwe iir mi kepit? Itá kopwe pwal lólilen ren? Sipwe pélúweni ekkena kapas eis lón en lesen mwirin ei.