1-2. Met ewe chónláng a ereni ekkewe fefin lupwen ra nóm ren peiasen Jesus we, me ifa ewe kapasen éúréúr Jesus a pwisin ngeniir?

LESOSSORUSICHIN ewe rán Nisan 16, ier 33, ekkóch fefin iir chón fel ngeni Kot, ra fetál ngeni peiasen Jesus Kraist we fán ar letipechou, ikewe a fen peiaseló ren úkúkún 36 awa a ló. Ra ammólnatá minen apwokkus me lé fán iten ewe somá, nge lupwen ra feiliiti ewe peias ra máirú pún a péén! Emén chónláng a ereni ekkewe chón káé pwe Jesus a fen manawsefál seni máló me a apasa: “Epwe akomwola mwemi Kalilea, ikenan oupwe küna i.”​—Mat. 28:1-7; Luk. 23:56; 24:10.

² Mwirin án ekkena fefin feil seni ewe peias, Jesus a pwisin chuuriir me éúréúrer: “Oupwe feila o üreni pwii kewe pwe repwe feila Kalilea, ikenan repwe künaei.” (Mat. 28:10) Ewe áeúin mettóch Jesus a féri mwirin an manawsefál, ina an akkóta ar repwe mwichfengen me néún kewe chón káé. Lón ena mwich a ngeniir ekkóch kapasen éúréúr mi fókkun lamot.

3-4. Pwata sia tongeni apasa pwe ewe allúk mi mak lón Mateus 28:19, 20 ese chék weneiti ekkewe aposel? (Ppii ewe sasing wóón péén.)

³ Álleani Mateus 28:16-20. Lón ena mwich Jesus a akkóta, a ereni néún kewe chón káé usun ewe angang mi aúchea repwele féri lón ena atun, nge pwal ina ewe angang sia féfféri lón ei fansoun. Jesus a apasa: “Oupwe feila o asoulängala chon ekewe mwü meinisin, . . . oupwe afalafaleer pwe repwe aleasochisi meinisin mine üa allük ngenikemi.”

⁴ Jesus a mochen pwe meinisin chón tapweló mwirin repwe afalafal. Ese chék allúkú ngeni néún kewe 11 aposel mi tuppwél.  Ifa usun sipwe lúkú ena? Esap chék ekkewe aposel ra nóm wóón ena chuuk lón Kalilea lupwen Jesus a allúkú pwe repwe asoulengaaló aramas. Pwata sia silei? Chemeni alon ewe chónláng ngeni ekkewe fefin, a erá: “Oupwe küna i [lón Kalilea].” Ina minne, ekkewe fefin mi tuppwél ra pwal nóm lón ena mwich. Nge esap chék iir. Ewe aposel Paulus a apasa pwe Jesus a “pwä ngeni lap seni limupükü chon lükü i lon eu chök fansoun.” (1 Kor. 15:6) Ia ekkena nimepúkú aramas ra mwichfengen ie?

5. Met sia káé seni 1 Korint 15:6?

⁵ A wor popun mi múrinné ach sipwe lúkú pwe lón 1 Korint 15:6 Paulus a fós usun ewe mwich a fis lón Kalilea, ewe mi mak lón Mateus sópwun 28. Pwata? Áeúin, lape ngeni néún Jesus kewe chón káé iir chón Kalilea. Ina popun, epwe mecheres ngeni chómmóng ar repwe chufengen wóón eú chuuk lón Kalilea lap seni lón eú imw lón Jerusalem. Oruuan, mwirin án Jesus manawsefál ra fen chufengen me néún kewe 11 aposel lón eú imw lón Jerusalem. Ika Jesus a mochen allúkú ngeni chék néún kewe aposel ar repwe afalafal me asoulengaaló aramas, iwe a tongeni chék éúréúrer atun ar na chufengen me Jerusalem me ese pwal lamot an epwe ereniir me ekkewe fefin me pwal ekkewe ekkóch ar repwe chufengen lón Kalilea.​—Luk. 24:33, 36.

6. Ifa usun Mateus 28:20 a pwári pwe ewe allúk usun asoulengaaló aramas a pwal weneiti lón ei fansoun, me ifa usun a pwénúetá ena allúk iei?

⁶ Ekieki usun ewe aúlúngátin popun mi lamot. Án Jesus allúkú ar repwe asoulengaaló aramas ese chék weneiti ekkewe popun Chón Kraist. Pwata sia silei? Jesus a asopwaló an kewe kapasen éúréúr ngeniir ren an apasa: “Ngang üpwe etikemi fansoun meinisin tori lesopolan fanüfan.” (Mat. 28:20) Usun chék met Jesus a apasa, pwe lón ei fansoun a chómmóng ra féri ewe angangen asukula aramas le wiliti néún chón káé. Ekieki mwo! Arapakkan 300,000 aramas ra papatais iteiten ier me wiliti Chón Pwáraatá Jiowa, me ra wiliti néún Jesus chón káé!

7. Met sipwele pwóróus usun iei, me pwata?

⁷ Chómmóng mi káé Paipel ra feffeitá me papatais. Iwe nge, ekkóch chókkewe sia káé ngeniir ewe Paipel iteitan, usun ra pireir le wiliti néún Jesus chón káé. Ra sani le káé, nge rese feffeitá me papatais. Kich meinisin mi kákkáé ngeni aramas ewe Paipel, sia mochen álisiir le apwénúetá minne ra káé me wiliti néún Jesus chón káé. Ei lesen epwe pwóróus wóón ifa usun sipwe tongeni álisi néúch chón káé le tongei Jiowa me feffeitá lón pekin lúkú. Pwata a lamot ach sipwe pwóróus wóón ena? Pokiten eli epwe wor ewe atun sipwe filatá ika sipwe chúen sópweló le káé ngeniir are sisap.

8. Pwata fán ekkóch a weires ach sipwe álisi néúch kewe chón káé le tongei Jiowa?

⁸ Jiowa a mochen pwe aramas repwe angang ngeni pokiten ra tongei. Ina minne, sia achocho le álisi néúch kewe chón káé le weweiti pwe Jiowa a fókkun tongei emén me emén iir. Sia mochen álisiir le kúna pwe Jiowa “i semen ekewe mi mäsen me chon tümwünün ekewe fefin mi mä pwülüer.” (Kölf. 68:5) Lupwen néúch kewe chón káé ra mirititi úkúkún án Kot tongeer, iwe repwe pwal poputá le tongei. Neman a weires ngeni ekkóch chón káé ar repwe ekieki pwe Jiowa emén Sam mi tong pokiten pwisin semer kewe rese kan pwári pwe ra tongeer. (2 Tim. 3:1, 3) Iwe, atun sia káé ngeniir, sipwe menlapei napanapen Jiowa kewe mi echipwér. Álisiir le weweiti pwe ach Kot a mochen pwe repwe kúna manaw esemuch, me a mmólnetá le álisiir le kúna ena. Met sia pwal tongeni féri?

9-10. Ikkefa ekkewe puk sipwe néúnéú le káé ngeni aramas, me pwata?

 ⁹ Néúnéú ekkewe puk Met ewe Paipel A Wesewesen Apasa? me Oupwe Chék Nóm lón ewe Tongen Kot. Ekkena puk ra ákkáeúin ffér pwe epwe álisikich le achchúngú letipen néúch kewe chón káé. Áwewe chék, lón ewe Paipel A Apasa sópwun 1, a pélúweni ekkeei kapas eis: Itá Kot ese tongekich me chúngúkich?, Met meefien Kot usun ekkewe mettóch rese pwúng?, me Ka tongeni arap ngeni Jiowa? Nge, ewe puk Tongen Kot epwe álisi ekkewe chón káé le weweiti ifa usun ar apwénúetá ekkewe kapasen emmwen lón Paipel a tongeni émúrinnéló manawer me álisiir le arap ngeni Jiowa. Inaamwo ika ka fen káé ekkena puk ngeni pwal ekkóch aramas, nge kopwe pwal ammólnaéchúetá atun kopwe káé ngeni emén me emén noum kewe chón káé pwe epwe weneiti minne mi lamot ngeni.

¹⁰ Iwe nge, met kopwe féri ika ewe chón káé a sani och pwóróus lón pwal eú néúch kewe puk nge ese kapachelong lón ach we Pwórun Asukul? Neman ka tongeni pesei an epwe pwisin  álleani ena pwóróus, pwe ka tongeni sópweló le káé ngeni lón ewe Paipel A Apasa are Tongen Kot.

11. Itá ineet sipwe poputá le iótek lepoputáán me lesópwólóón ach káé, me ifa usun sipwe álisi néúch chón káé le weweiti lamoten ena?

¹¹ Poputááni ewe káé ren iótek. Neman mwirin ach poputá le káé ngeni emén ren fitu wiik, a fókkun múrinné ika sipwe mwittir poputááni me asopwaló ach káé ren iótek ika mi tufich. Mi lamot sipwe álisi ewe chón káé le mirititi pwe sia chék tongeni weweiti án Kot we Kapas ren álillisin An we ngún mi fel. Ekkóch chón afalafal ra áwewe ngeni néúr chón káé ewe pwóróus usun iótek ren ar álleani James 1:5, ewe mi erá: “Are eman leimi a osun tipachem, epwe tüngor ngeni Kot.” Mwirin, ewe chón afalafal a eisini ewe chón káé, “Ifa usun sia tongeni tingorei Kot tipachem?” Iwe ese mwáál ewe chón káé epwe tipeeú ngeni lamoten ach sipwe iótek ngeni Kot.

12. Ifa usun sipwe néúnéú Kölfel 139:2-4 le álisi néúch kewe chón káé le émúrinnélóói ar kewe iótek?

¹² Áiti ngeni noum we chón káé ifa usun epwe iótek. Alúkúlúkú ngeni pwe Jiowa a mochen rongorong an kewe iótek seni alóllóólun letipan. Áwewe ngeni pwe lón ach pwisin fós ngeni Jiowa lón iótek, sia tongeni uwawu unusen masouen letipach ngeni, kapachelong ekkewe mettóch sise pwal tongeni pwári ngeni aramas. Chechchemeni pwe Jiowa a fen silei alóllóólun masouen letipach. (Álleani Kölfel 139:2-4.) Sia tongeni pesei le tingor án Kot álillis le siwili och ekiek ese pwúng, me pworacho ngeni ekkewe féffér mi ngaw a fen eérenaaló le féfféri. Áwewe chék, eli emén chón káé mi fen káé ren och fansoun, a chúen fókkun sani le féri apwapwaan án ekkewe lamalam chofona ráninipin. A silei pwe ese pwúng, nge ren enletin a chúen sani le féri ekkóch mettóch lón ekkena ráninipin. Pese ngeni an epwe pwár ngeni Jiowa wesewesen meefian, me tingormaú an álillis pwe epwe tongei minne Kot a tongei.​—Kölf. 97:10.

13. (a) Pwata a lamot sipwe mwittir etiwa néúch chón káé le fiti mwich ika mi tufich? (b) Ifa usun sipwe álisi néúch chón káé le meefi kinamwe lón ach we Leenien Mwich?

¹³ Ika mi tufich mwittir etiwa noum we chón káé ngeni ekkewe mwich. Met ewe chón káé a rong me kúna lón ach kewe mwich a tongeni amwékútú le angang ngeni Jiowa me feffeitá. Fichi ngeni ewe video Met A Fiffis lón ewe Leenien Mwich? me etiwa le fituk le ló mwich. Ika mi tufich, álisi an epwe tongeni tikeri ewe Leenien Mwich. A éch ika kopwe kan etiwa sókkopaten chón afalafal ar repwe fituk lón ámi káé. Ika ina, iwe noum we chón káé epwe tongeni sissilei chón ewe mwichefel, me ese mwáál epwe meefi kinamwe lupwen a fiti ach kewe mwich.

14. Met a tongeni amwékútú emén chón káé le feffeitá lón an lúkú?

¹⁴ Sia achocho le álisi néúch chón káé le feffeitá lón an lúkú. (Ef. 4:13) Lupwen emén a erá pwe a mochen káé rech ewe Paipel, neman a chék mochen silei ifa usun an káé epwe pwisin álisi. Nge lupwen an tong ngeni Jiowa epwe lapóló, ese mwáál epwe poputá le ekieki ifa usun epwe pwal tongeni álisi ekkewe ekkóch, kapachelong chón ewe mwichefel. (Mat. 22:37-39) Atun a fich, kosap pireir le fós usun wisach le álisatá án Kot angang ren ach eáni asor.

15. Ifa usun sia tongeni álisi emén chón káé le féri minne mi pwúng atun a ppiitá osukosuk?

¹⁵ Áiti ngeni noum chón káé met epwe féri lupwen a ppiitá osukosuk. Áwewe chék, noum we chón káé a fen emén chón afalafal esaamwo papatais, nge a erenuk pwe a mángaw ren emén chón ewe mwichefel. Kosap  pwal ereni ika ién leir a pwúng are mwáál, nge kopwe fen áwewe ngeni met ewe Paipel a apasa ren met itá epwe féri. A tongeni omusaaló tipisin, nge ika ese tongeni likitaló, iwe epwe fós ngeni eménna fán kirekiréch, me achocho le ‘pwinisefäli.’ (Apépé ngeni Mateus 18:15.) Álisi noum we chón káé le ammólnatá met epwe apasa. Áiti ngeni áeáán ewe JW Library^® app, ewe Research Guide for Jehovah’s Witnesses, me jw.org^® pwe epwe silei ifa usun epwe ataweei ewe osukosuk. Ika a silei ifa usun epwe ataweei ar osukosukfengen me ekkewe ekkóch me mwen an papatais, iwe ese mwáál epwe tongeni ririéch ngeni chón ewe mwichefel mwirin an papatais.

16. Ifa échún óm etiwa ekkóch chón afalafal le fituk lón óm káé?

¹⁶ Etiwa ekkóch chón ewe mwichefel me ewe chónemmwen mi wisen sáifetál le fituk lón óm káé. Pwata? Me lúkún ekkewe popun sia fen pwóróus usur, ekkóch chón afalafal ra tongeni álisi noum we chón káé lón ekkóch mettóch kese pwisin tongeni féri. Áwewe chék, noum we chón káé a resin achocho le úkú seni suupwa nge ese tongeni. Iwe, ka tongeni uwei emén chón afalafal mi fen unusen úkú seni an úkkún suupwa, nge akkomwan a kan sóssót le úkú seni nge a chék ttur fán fite. Chienom chón afalafal a tongeni awora ekkóch kapasen éúréúr epwe álilliséch ngeni noum we chón káé. Ika kese kon lien kinamwe le káé ngeni noum we chón káé ika emén pwiich mi ásimaw a fituk, iwe kopwe tingorei an epwe wisen emmweni ewe káé. Lupwen ka etiwa ekkewe ekkóch le fituk lón óm káé, iwe noum we chón káé epwe tongeni kúna feiéch seni sileien ekkewe ekkóch. Chechchemeni pwe sia achocho le álisi an epwe feffeitá lón an lúkú.

17-18. Itá met kopwe ekieki lupwen ka ekiekin úkútiw le káé ngeni noum we chón káé?

¹⁷ Ika noum we chón káé ese feffeitá me féri siwil lón manawan, iwe neman kopwe pwisin eisinuk: ‘Itá upwe úkútiw le káé ngeni nei we chón káé?’ Me mwen kopwe filatá met kopwe féri, mi lamot kopwe ekieki usun tufichin eménna. Ekkóch aramas ra mmang le feffeitá lap seni ekkewe ekkóch. Pwisin eisinuk: ‘Nei we chón káé a feffeitá ekis me ekis lóngólóng wóón tufichin me nónnómun?’ ‘A poputá le “aleasochisi” are apwénúetá minne a fen káé?’ (Mat. 28:20) Neman epwe ttam án emén chón káé feffeitá lón an lúkú, nge mi lamot epwe ekis me ekis féri siwil lón manawan.

¹⁸ Nge met sipwe féri ika sia fen káé ngeni emén ren och fansoun, nge ese pwári pwe a aúcheani an káé? Áwewe chék, noum we chón káé a fen áwesi ewe puk Paipel A Apasa me neman a pwal mwo nge poputá le káé ewe puk Tongen Kot, nge esaamwo nge fiti mwaren eú mwich, are pwal mwo nge ewe Áchechchem! Fán chómmóng a kan atai ámi káé ren och popun ese kon lamot. Ika a ina usun noum we  chón káé, iwe mi lamot kopwe fós ngeni fán wenechar. *

19. Met kopwe tongeni ereni noum we chón káé usun itá ese aúcheani an káé Paipel, iwe met a lamot kopwe ekieki?

¹⁹ Ka tongeni poputá ren óm eisini, ‘Met a kon áweiresi óm kopwe wiliti emén Chón Pwáraatá Jiowa?’ Neman epwe erá, ‘Ua sani ai kákkáé Paipel, nge usap tongeni wiliti emén Chón Pwáraatá Jiowa!’ Ika ina an ekiek nge ka fen káé ngeni ren och fansoun, iwe mi chúen wor popun óm kopwe sópweló le káé ngeni? Iwe nge, neman noum we chón káé epwe kerán pwár ngonuk ewe popun ese feffeitá. Áwewe chék, neman a meefi pwe esap fókkun tongeni fiti ewe angangen afalafal imw me imw. Iwe iei ka silei meefian, iwe ka tongeni silei ifa usun kopwe álisi.

20. Ifa usun ach weweiti Föför 13:48 a tongeni álisikich le mirititi ika sipwe sópweló le káé ngeni emén are fen úkútiw?

²⁰ A mmen elichippúng pwe ekkóch chón káé ra usun ekkewe chón Israel lón fansoun Isikiel we. Iei met Jiowa a ereni Isikiel usur: “Nengeni, ka chök usun eman souköl me rer mi ngiöch le köl kölün amümü, ika usun eman mi silelap le ettiki pisekin ettik, pun ra aüselinga om kapas, nge resap fokun aleasochis ngeni.” (Is. 33:32) Epwe weires ach sipwe ereni emén pwe sisap chúen káé ngeni. Iwe nge, ese “chüen langatam ach fansoun.” (1 Kor. 7:29) Mi lamot sipwe kútta ekkewe aramas mi pwáraatá pwe “letiper a páái ngeni ar repwe etiwa ewe enlet mi atoto manaw esemuch,” lap seni ach sipwe áeá ach fansoun le káé ngeni chókkewe rese feffeitá lón ar lúkú.​—Álleani Föför 13:48 seni ewe footnote. *

21. Ifa ewe lesenin ier fán iten 2020, me pwata a fich ena?

²¹ Ach lesenin ier atun 2020 a álisikich le nefótófót wóón ach sipwe lipwákéchúló lón ach angangen asukula aramas le wiliti néún Jesus chón káé. A áiti ngenikich ekkóch án Jesus kewe kapas a apasa atun ewe mwichfengen mi lamot wóón eú chuuk lón Kalilea, a erá: Oupwe feiló me asukula aramas . . . pwe repwe wiliti chón tapwoto mwiri, me papataisiir.​—Mat. 28:19.