A WOR eféú faú mi mak wóón lón ewe Bible Lands Museum lón Jerusalem minen lóóm mi ffér lón ekkewe ier lefilen 700 ngeni 600 mwen Kraist. Ra kúna ena faú me lón ewe pokuwo leenien peias kkan ngeni Hepron lón Israel. Iei makkan: “Anúmamaú Hagaf néún Hagav me ren Yahweh Sabaot.” Ifa usun ena mak a álisatá pwúngún alon Paipel? A pwári pwe iten Kot we Jiowa mi mak lón ekkewe rúáánú mesen mak YHWH lón fósun Ipru me lóóm, aramas me lóóm ra sissilei me ra kan nénnéúnéú iteiten rán. Ren enletin, atun aramas ra chufengen me op lón ekkena pokuwo, ra kan makkeei iten Kot wóón etippen ekkena pokuwo fengen me pwisin iter kewe mi iteit seni iten Kot we.

Iei met Dr. Rachel Nabulsi seni ewe University of Georgia, a apasa usun ekkena mak: “Án ewe it YHWH pwá fán fite lón ekkena mak, a lamot. . . . Ekkena mak me minne a mak lón [Paipel], ra áiti ngenikich lamoten ena it YHWH lón manawen ekkewe chón Israel me Juta.” Ena mettóch a álisatá Paipel ikewe a mak iten Kot we YHWH lón fósun Ipru fán fitengeréú. Fán chómmóng aramas ra kan apachaalong iten Kot we mi pin lón pwisin iter kewe.

Ewe kapas “Yahweh Sabaot,” mi mak wóón eféú faú, a wewe ngeni “Jiowa mi unusen manaman.” Iwe usun itá fán chómmóng aramas me lóóm ra kan néúnéú iten Kot we me ewe mwuten kapas “Jiowa mi unusen manaman.” Ena mettóch a álisatá án Paipel néúnéú ena mwuten kapas “Jiowa mi unusen manaman,” ewe mi mak lap seni 250 lón ewe Tesin Ipru, nge ákkáeúin lón makkeien Aisea, Jeremaia, me Sekaraia kewe.