1. Ifa ewe weires Tafit a nóm lón?

 TAFIT a súsúfeil pwe emén a mochen nieló. Saul, ewe kingen Israel mi watte manan, a mochen nieló. Atun a nafangaw enen Tafit, a kaúló ren ewe telinimwen Nop, me ikena ie a tingorei ewe souasor nimeffóch chék fóchun pilawa. (1 Sam. 21:1, 3) Mwirin, iir me chienan kewe ra opolong lón eú féúimw are pokuwo. (1 Sam. 22:1) Pwata a ina usun nónnómun Tafit?

2. Ifa usun Saul a pwisin atolonga lón feiengaw? (1 Samuel 23:16, 17)

² Saul a fókkun lólówóiti iteféúlóón Tafit me an win lón chómmóng maun. Saul a pwal silei pwe Jiowa a fen likitaló pokiten an álleasolapa, me Jiowa a fen filatá Tafit an epwe king. (Álleani 1 Samuel 23:16, 17.) Pokiten Saul a chúen kingen Israel, iwe a wor an watteen mwichen soufiu me a chómmóng chón álisi, ina popun Tafit a súsúfeil pwe ete ninniiló. Itá Saul a tongeni ekieki pwe a tongeni eppeti án Kot fili Tafit pwe epwe king? (Ais. 55:11) Ewe Paipel ese erá, nge a ffat eú mettóch: Saul a pwisin atolonga lón feiengaw. Chókkewe mi ú ngeni Kot repwe chék lullus!

3. Met Tafit a meefi inaamwo ika a áweires nónnómun?

³ Tafit emén mwán mi tipetekison. Ese filatá an epwe kingen Israel. Nge Jiowa a fen filatá an epwe king. (1 Sam. 16:1, 12, 13) Saul a fókkun oputa Tafit. Nge Tafit ese tipi ngeni Jiowa ekkewe weires a nóm lón me ese pwal ngúnúngúnúngaw  usun nafangawen anan me an op lón ewe pokuwo. Nge atun a op lón ena pokuwo, eli fen ina ewe atun a makkeei ewe kélún mwareiti mi kapachelong kapasen ei wokisin ach ei lesen a lóngólóng wóón, mi erá: “Chókkewe mi kúkkútta Jiowa resap osupwang ren och mi múrinné.”​—Kölf. 34:10, NW.

4. Ikkefa ekkewe kapas eis sipwele pwóróus wóór, me pwata ra lamot?

⁴ A chómmóng néún Jiowa kewe chón angang lón ei fansoun mi nafangaw ener are mettóchur lón pekin aion. * A fis ena ngeni chómmóng néún Jiowa kewe chón angang, ákkáeúin atun fisin ewe pandemic. Me atun a kakkanoto ewe ‘riaffou mi lapalap,’ sia silei pwe epwe fen wekkeiresiló manawach. (Mat. 24:21, Testament Mi Fö) Ina popun, a éch ach sipwe pélúweni ekkeei rúáánú kapas eis: Ifa usun Tafit ese “osupwang ren och mi múrinné”? Pwata a lamot ach sipwe káé le chék menemenéch? Pwata sia tongeni lúkúlúk pwe Jiowa epwe túmúnúkich? Me ifa usun sia tongeni mmólnetá iei ren met epwe fis lón mwach?

5-6. Ifa usun Kölfel 23:1-6, a álisikich le weweiti weween alon Tafit we atun a erá pwe néún Jiowa kewe chón angang “resap osupwang ren och mi múrinné”?

⁵ Met weween alon Tafit atun a erá pwe néún Jiowa kewe chón angang “resap osupwang ren och mi múrinné”? Atun Tafit a makkeei Kölfel 23, a pwal néúnéú ekkena esin kapas. Ina popun, ena wokisin a tongeni álisikich le weweiti weween alon na. (Álleani Kölfel 23:1-6.) Tafit a poputááni ena wokisin ren ei kapas: “Ewe Samol mi Lapalap ai chon mas, üsap osupwang ren och mettoch.” Lón unusen ena wokisin, Tafit a féúni ekkewe mettóch mi unusen aúchea, áwewe chék ren ekkewe mettóch mi múrinné Jiowa a fang ngeni ren an mut ngeni Jiowa an epwe néún Chón Mmas. Jiowa a emmweni “won ekewe al mi pwüng,” me a  tuppwél le ákkálisi Tafit lón fansoun kinamwe me pwal lón fansoun weires. Tafit a mirititi pwe esap chék kikkinamwe manawan lón an nóm lón án Jiowa “maasies ia a mär fetil ie,” lón kapas áwewe. Fán ekkóch, eli a lichippúng, usun itá nge a feffetál “lemolun nürün mäla,” me epwe wor chón oputa. Nge pokiten Jiowa i néún Tafit Chón Mmas, iwe ese “niueiti och feiengau.”

⁶ Iei pélúwen ewe áeúin kapas eis mi erá: Ifa usun Tafit ese “osupwang ren och mi múrinné”? A wor ren Tafit meinisin met mi lamot ren an epwe chék ririéch ngeni Jiowa. An pwapwa ese lóngólóng wóón mettóchun aion. Tafit a menemenéch ren met Jiowa a awora. Án Jiowa efeiéchú me túmúnú, ikkena ekkewe mettóch a kon aúchea me ren.

7. Me ren Lukas 21:20-24, ifa ewe weires ekkewe popun Chón Kraist lón Jutea ra kúna?

⁷ Sia tongeni kúna úkúkún aúchean ach sipwe eáni ekiek mi pwúng usun mettóchun aion seni alon Tafit kana. Sia tongeni pwapwa ren ese lifilifil met a wor rech, nge itá esap ina met sipwe kon aúcheani lón manawach. Ina ewe mettóch mi aúchea mi lamot án ekkewe popun Chón Kraist lón Jutea repwe weweiti. (Álleani Lukas 21:20-24.) Jesus a éúréúrer pwe epwe wor eú atun ekkewe ‘sounfiu repwe pwelifeili’ ewe telinimw Jerusalem. Atun epwe fis ena, a lamot ar repwe “sütä won ekewe chuk.” Ika ra sú, repwe manaw, nge a lamot ar repwe lúkúsékúrú chómmóng mettóchur kewe. Iei alon Ewe Leenien Mas lón ekkewe ier usun ena: “Ra likitalo fonuer me imwer, rese fen ioni ekkewe pisek lon. Ra eani lukuluk won an Jiowa tumun me alillis, me ar fel ngeni a akkom mwen meinisin ekkewe mettoch mi lamot lon manauer.”

8. Ifa ewe lesen mi aúchea sia tongeni káé seni met a fis ngeni ekkewe popun Chón Kraist lón Jutea?

⁸ Ifa ewe lesen mi aúchea sia tongeni káé seni met a fis ngeni ekkewe popun Chón Kraist lón Jutea? Iei alon Ewe Leenien Mas sia kerán chék fósun: “Neman epwe wor sossot lon mwach kkan ren ukuukun ach aucheani pisek; ina ewe mettoch mi lamot ngenikich, are ewe amanau lon mwach kkan fan iten meinisin mi pekini pekin Kot? Ewer, ach ssu mi tongeni weneiti riaffou me nafangauen mettoch. Ita sipwe mmonleta le fori minne mi lamot, ussun chok pwiich kewe loom lupwen ra ssu seni Jutia.” *

9. Ifa usun án Paulus we kapasen emmwen ngeni ekkewe chón Ipru a apéchékkúlok?

⁹ Ka tongeni anchangei úkúkún weiresin án ekkena Chón Kraist likitaló arapakkan meinisin pisekiir kewe, mwékút ngeni eú mineféén leeni, me anganga tufichiir? A lamot ngeniir lúkú ren ar repwe lúkúlúk pwe Jiowa epwe álisiir ren met ar osupwang rán me rán. Nge a wor met a tongeni álisiir. Nimu ier me mwen án ekkewe chón Rom pwellifeili Jerusalem, ewe aposel Paulus a awora ekkóch kapasen emmwen mi álilliséch ngeni ekkewe chón Ipru: “Oupwe afälikemi pwe ousap manaueni eu manauen mochenian moni, nge oupwe menemenöch ren mine oua eäni. Pun Kot a apasa, ‘Ngang üsap fokun likituk, üsap pwal tümwününgau ngonuk.’ Iei mine sipwe tongeni apasa fän apilükülüköch, ‘Ewe Samol i ai Soualilis, üsap fokun niuokus, met aramas repwe tongeni föri ngeniei?’” (Ipru 13:5, 6) A mecheres ngeni chókkewe mi fen apwénúetá án Paulus na kapasen emmwen ar repwe menemenéch ren met chék a wor rer lón imwer kewe ra kerán mwékút ngeni. Ra lúkú pwe Jiowa epwe awora met ra osupwangan  rán me rán. Alon Paulus kana a alúkúlúkúkich pwe sia pwal tongeni eáni ena esin lúkúlúk.

10. Ifa ewe mettóch Paulus a káé, nge a pwal erenikich ach sipwe káé?

¹⁰ Paulus a pwal eáni ena esin kapasen emmwen ngeni Timoty, nge a pwal weneitikich. A makkeei: “Iei mine are a wor anach me üfach sipwe menemenöch ren.” (1 Tim. 6:8) A itá wewe ngeni pwe sise tongeni imweimw imw mi múrinné, mwéngé anné, are kamé úfach minefé fán ekkóch? Esap ina weween alon Paulus na. Paulus a erá pwe a lamot ach sipwe menemenéch ren met chék a wor rech. (Fil. 4:12) Ina met Paulus a káé. Ach riri ngeni ach we Kot, ina met a kon aúchea seni meinisin, nge esap pisekich kewe.​—Ap. 3:17, 18.

11. Ifa ewe lesen usun menemenéch sia káé seni alon Moses we ngeni ekkewe chón Israel?

¹¹ Minne sia ekieki pwe a lamot ngenikich, a tongeni sókkóló seni met Jiowa a silei. Iei met Moses a ereni ekkewe chón Israel mwirin ar nóm lón ewe fénúpéén ren úkúkún 40 ier: “Ewe Samol mi Lapalap ämi we Kot a afeiöchü angangen pöümi meinisin. I a tümwünü ämi saifetal lon ewe fanüapö mi watte. Ewe Samol mi Lapalap ämi we Kot a etikemi lon ekei faik ier, pwe ousap osupwang ren och mettoch.” (Tut. 2:7) Lón ánein ekkena 40 ier, Jiowa a awora ngeni ekkewe chón Israel ener we mana. Úfer kewe atun ra ló seni Isip ese fókkun mesiló. (Tut. 8:3, 4) Inaamwo ika ekkóch me lein ekkena chón  Israel ra ekieki pwe ese naf ekkena mettóch, nge Moses a áchema ngeniir pwe a fen wor rer met chék a lamot ngeniir. Jiowa epwe pwapwa ika sia chék káé le menemenéch me aúcheani pwal mwo nge ekkewe mettóch mi kisikis a awora, me sipwe weweiti pwe iir liffang me ren.

12. Met a pwári pwe Tafit a lúkúlúk wóón Jiowa, nge esap wóón pwisin i?

¹² Tafit a silei pwe Jiowa a tuppwél me a unusen chúngú chókkewe mi tongei. Inaamwo ika manawen Tafit a nóm lón feiengaw atun a makkeei Kölfel 34, nge ren an lúkú, a kúna “nöün ewe Samol mi Lapalap chon läng a nom pwelin ünükün.” (Kölf. 34:7) Eli Tafit a aléllééi néún Jiowa na chónláng ngeni emén soufiu mi nóm lón eú málámál me chék mammasa chón oputer. Inaamwo ika i emén mwán mi pwora lón maun me Jiowa a fen pwonei an epwe king, nge ese lúkúlúk wóón sipeéchún le nouti faú are tufichin le néúnéú ketilas le okkufu chón oputan. (1 Sam. 16:13; 24:12) A onómu an lúkúlúk wóón Jiowa, me lúkú pwe néún na chónláng epwe ‘angasa chokewe mi niueiti’ Kot. Pwúngún, lón ei fansoun sise tongeni ekieki pwe Jiowa epwe féri eú manaman pwe epwe túmúnúkich. Nge sia silei pwe meinisin chókkewe mi lúkúlúkú Jiowa repwe eáni manaw esemuch inaamwo ika ra máló lón ei fansoun.

13. Atun Kok seni Makok epwe maunekich, pwata usun itá me ren aramas pwe ese wor chón selánikich, nge pwata a lamot ach sisap niwokkus? (Ppii ewe sasing wóón péén.)

¹³ Ekiseló chék sipwe kúna sóssótun ach lúkúlúk wóón án Jiowa tufichin túmúnúkich. Atun Kok seni Makok, ewe mwichen mwúún aramas epwe maunei néún Kot aramas, eli sipwe ekieki pwe ra tongeni nikicheló. A lamot ach sipwe lúkúlúk pwe Jiowa a tongeni selánikich me epwe selánikich. Me ren chón ekkewe mwú pwe kich sia usun siip, ese wor chón túmúnúúr. (Is. 38:10-12) Esap wor ach pisekin maun me sise sile fiu. Chón ekkewe mwú repwe ekieki pwe a chék mecheres ar repwe okkufukich. Rese silei pwe néún Jiowa kewe chónláng ra mmólnetá le selánikich, nge kich sia silei ena pokiten a wor ach lúkú. Ewer, chón ekkewe mwú rese silei ena pokiten rese lúkú Kot. Repwe fókkun máirú atun ekkewe chónláng repwe wisen fiu fán itach!​—Pwär. 19:11, 14, 15.

14. Met sia tongeni féri iei pwe sipwe mmólnetá ngeni met epwe fis lón mwach?

¹⁴ Met sia tongeni féri lón ei fansoun pwe sipwe mmólnetá ngeni met epwe fis lón fansoun mwach? Áeúin, a lamot sipwe eáni ekiek mi pwúng usun mettóchun aion, me mirititi pwe eú rán, sipwe lúkúsékúrú pisekich kewe. A pwal lamot ach sipwe chék menemenéch ren met mi wor rech me sipwe fókkun pwapwa pokiten a wor ach riri ngeni Jiowa. Lapólóón ach silei ach we Kot, epwe pwal ina lapólóón ach lúkúlúk wóón an tufichin túmúnúkich atun Kok seni Makok epwe maunekich.

15. Ikkefa ekkewe osukosuk ra fis ngeni Tafit lealúwélún mi áiti ngeni pwe Jiowa epwe chék ákkálisi?

¹⁵ Ikkeei met a pwal álisi Tafit me a pwal tongeni álisikich le mmólnetá ngeni ekkewe sóssót sipwe kúna. Iei alon: “Oupwe neni o nengeni pwe ewe Samol mi Lapalap a kirikiröch. Ra feiöch ätekewe mi eäni i lenien op.” (Kölf. 34:8) Ena wokisin a áweweei pwata Tafit a silei pwe a tongeni lúkúlúk wóón án Jiowa álillis. Fán chómmóng, Tafit a lúkúlúk  wóón Jiowa me an na Kot ese fókkun elichippúngú. Lealúwélún Tafit a fiu ngeni ewe re Filistia mi mwánemmong itan Koliat, me iei alon ngeni ena soufiu mi péchékkúl: “Ikenai ewe Samol mi Lapalap epwe atolongok lepei.” (1 Sam. 17:46) Mwirin, atun Tafit a angang ngeni King Saul, a pwal sótun nieló Tafit fán chómmóng. Nge “ewe Samol mi Lapalap a eti Tafit.” (1 Sam. 18:12) Pokiten Tafit a fen kúna án Jiowa álisi lón ekkewe fansoun, iwe a silei pwe a tongeni lúkúlúk pwe epwe álisi lón an kewe osukosuk lón ena atun.

16. Ifa usun sia tongeni “neni” kirekiréchún Jiowa?

¹⁶ Lapólóón ach lúkúlúk wóón án Jiowa emmwen lón ei fansoun, epwe pwal ina lapólóón ach lúkúlúk wóón an tufichin álisikich lón fansoun mwach. A lamot an epwe wor ach lúkú me tipemecheres le lúkúlúk wóón Jiowa atun sia tingorei néúch we boss ach sipwe asésé seni ach angang pwe sipwe fiti eú mwichelap, are tingorei an epwe siwili ach schedule pwe sipwe tongeni fiti meinisin ach kewe mwich me alapaaló ach fansoun lón ewe angangen afalafal. Nge ifa usun ika néúch na boss ese tipeeú ngeni ach tingor me sia towu seni ach angang? Sia lúkú pwe Jiowa esap fókkun likitikicheló me epwe chék akkawora osupwangach rán me rán? (Ipru 13:5) Chómmóng chókkewe mi angang ngeni Jiowa full-time ra tongeni apwóróusa pwóróuseer mi pwári ifa usun Jiowa a álisiir atun a fókkun lamot ngeniir an álillis. Jiowa mi tuppwél.

17. Ifa ach lesenin ier fán iten 2022, me pwata a fich?

¹⁷ Pokiten Jiowa a nónnóm rech, ese wor popun ach sipwe niwokkus ren met epwe fis lón fansoun mwach. Ach na Kot esap fókkun likitikicheló ika sia akkomwa an we Mwú lón manawach. Ewe Mwichen Soupwúngúpwúng a filatá Kölfel 34:10 pwe epwe ach lesenin ier fán iten 2022: “Chókkewe mi kúkkútta Jiowa resap osupwang ren och mi múrinné.” Ena mettóch a áchema ngenikich lamoten ach sipwe mmólnetá iei ren ekkewe mettóch mi áweires repwe fis lón fansoun mwach, me lamoten ach sipwe lúkúlúk pwe Jiowa esap fókkun likitikicheló.