1-3. Ikkefa ekkewe weires eli a efisi án néún Jiowa kewe aramas repwe kechiw?

 INEET ewe sáingoon atun ke kechiw? Fán ekkóch sia kan kechiw pokiten sia pwapwa. Nge lape ngeni, sia kan kechiw pokiten sia letipechou. Áwewe chék, eli sia kan kechiw atun a má senikich emén attongeach. Iei makkeien emén fefin Chón Kraist itan Lorilei seni Merika: “Fán ekkóch, atun a cheme ngeniei málóón nei we nengngin, ua fókkun meefi letipechou pwe usun itá ese wor met a tongeni angasaei. Lón ekkena atun, ua kan ekieki ika upwe chúen tongeni likiitú fán ámmetekin letipei.” *

² Eli sia kan kechiw ren pwal ekkóch popun. Iei alon Hiromi, emén pioneer seni Japan: “Lón ekkóch atun, ua kan letipechou pokiten án ekkewe aramas ua afalafal ngeniir rese mochen aúseling ngeni pwóróusen ewe Paipel. Fán ekkóch, ua kan kechiw atun ua tingorei Jiowa an epwe álisiei le kúna emén mi kúkkútta ewe enlet.”

³ Ka pwal meefi ekkena esin fán ekkóch? Chómmóng leich sia pwal meefi ekkena esin. (1 Pet. 5:9) Sia mochen “angang ngeni ewe Samol mi Lapalap fän pwapwa,” nge fán ekkóch sia kechiw pokiten málóón emén attongeach, pokiten sia lichippúng, are pokiten eú osukosuk mi áweiresi ach sipwe chék tuttuppwél ngeni Kot. (Kölf. 6:6; 100:2) Met sia tongeni féri atun sia meefi ekkena sókkun?

4. Met sipwe pwóróus wóón lón ei lesen?

⁴ Sia tongeni káé seni Jesus. Fán ekkóch, a pwal fókkun meefi letipechou, iwe “a kechü.” (Joh. 11:35; Luk. 19:41;  22:44; Ipru 5:7) Sipwe pwóróusfengen wóón ekkena atun. Atun sia pwóróusfengen wóór, sipwe ppii met sia tongeni káé seni Jesus me Seman we, Jiowa. Sipwe pwal ppii met sia tongeni féri atun sia nóm lón ekkewe weires mi efisi ach sipwe kechiw.

5. Met sia káé seni Jesus ren minne a mak lón Johannes 11:32-36?

⁵ Lón ewe ier 32, chiechien Jesus we Lasarus a semmwen, iwe a máló. (Joh. 11:3, 14) A wor rúúemén fefinen Lasarus iter Maria me Marta, me Jesus a fókkun tongei ena famili. Ekkena fefin ra fókkun letipechou ren málóón mongeer na. Mwirin málóón Lasarus, Jesus a sái ngeni ewe sóópw Petania, ikewe Maria me Marta ra nóm ie. Atun Marta a rong pwe Jesus epwele war, a mwittir ló souni. Anchangei úkúkún letipechoun neminna atun a erá: “Ai Samol, are en kopwe nom ikei, mongeei we esap mäla.” (Joh. 11:21) Mwirin chék, atun Jesus a kúna án Maria me ekkewe ekkóch kechiw, “a kechü.”​—Álleani Johannes 11:32-36.

6. Pwata Jesus a kechiw atun Lasarus a máló?

⁶ Pwata Jesus a kechiw lón ena atun? Iei alon ewe puk Insight on the Scriptures: “Málóón chiechien Jesus we Lasarus me letipechoun fefinan kewe, a efisi án ‘letipan fokun mwökütüküt o weires, iwe, Jesus a kechü.’” * Eli Jesus a fen ekkekieki metekin chiechian we mi áchengicheng Lasarus atun a sessemwen me a anchangei meefian atun a tepereni pwe epwele máló. Jesus a pwal kechiw atun a kúna úkúkún letipechoun Maria me Marta ren málóón mongeer na. Ika a fen má sonuk emén chiechiom are emén chón óm famili, ese wor tipemwaramwar pwe ka pwal meefi ena esin. Ikkeei úlúngát lesen ka tongeni káé seni ena pwóróus.

7. Met sia káé usun Jiowa atun Jesus a kechiw ren an tongei chiechian kewe?

⁷ Jiowa a weweiti meefiom. Jesus a “wesewesen lapalapeni lapalapen” Seman we.  (Ipru 1:3) Atun Jesus a kechiw a pwári meefien Jiowa usun málóón emén attongeach. (Joh. 14:9) Ika a fen má sonuk emén attongeom, ka tongeni lúkúlúk pwe Jiowa ese chék kúna chúúpwúlúm, nge a pwal enletin meefi an tongeok. A mochen echikara tatakkisin letipom.​—Kölf. 34:18; 147:3.

8. Pwata sia tongeni lúkúlúk pwe Jesus epwe amanawasefálietá attongeach kewe mi máló?

⁸ Jesus a mochen amanawasefáli attongeom kewe. Me mwen chék án Jesus we kechiw, a alúkúlúkú Marta ren an erá: “Mongeom we epwe manausefälitä.” Marta a lúkú Jesus. (Joh. 11:23-27) Pokiten Marta i emén chón fel ngeni Jiowa mi tuppwél, iwe a silei usun pwóróusen chókkewe iir mi manawetá ren án ekkewe soufós Elias me Elisa amanawasefáliir fitepúkú ier ra ló. (1 King 17:17-24; 2 King 4:32-37) Me eli a pwal rong pwóróusen chókkewe Jesus a amanawasefáliir. (Luk. 7:11-15; 8:41, 42, 49-56) Ka pwal tongeni lúkúlúk pwe kopwe kúnasefáli attongeom kewe mi máló. Án Jesus kechiw atun a oururu chiechian kewe mi letipeta, a pwári pwe a fókkun mochen amanawatá ekkewe mi máló.

9. Ifa usun sia tongeni áppirú Jesus le álisi chókkewe mi chúúpwúl? Apwóróusa eú pwóróus.

⁹ Ka tongeni álisi chókkewe iir mi chúúpwúl. Jesus ese chék fiti Marta me Maria le kechiw, nge a pwal aúseling ngeniir me oururuur. Sia pwal tongeni féri ena ngeni chókkewe mi chúúpwúl. Iei alon Dan, emén mwán mi ásimaw lón Australia: “Mwirin málóón pwúlúwei we, a lamot ngeniei álillis. Chómmóng ekkewe Chón Kraist mwán me pwúlúwer kewe ra chék mómmólnetá le aúseling ngeni meefiei lerán me lepwin. Ra chék mut ngeniei ai upwe pwári ai letipechou, me rese sáw atun ua kechiw. Ra álisiei le ataweei ekkóch ai angang, áwewe chék, ra télú wai we tarakú, kamé ngeniei mettóchui, me kuk enei atun ua meefi pwe use tufichin pwisin féri ekkena mettóch. Me aua kan iótekfengen fán chómmóng. Ra pwári pwe iir chiechi mi enlet me pwiich mi ‘nom rech pwe epwe alisikich lon fansoun riaföü.’”​—SalF. 17:17.

10. Áweweei minne a fis lón Lukas 19:36-40.

¹⁰ Jesus a wareiti Jerusalem lón ewe Nisan 9, ier 33. Atun a arap ngeni ena telinimw, eú mwichen aramas ra ámeresaaló úfer kewe wóón ewe al pwe repwe etiwato pokiten i néúr king. Ina ewe fansoun mi fókkun apwapwa. (Álleani Lukas 19:36-40.) Ina popun eli néún kewe chón káé rese ekieki pwe epwe fis ei mettóch ei wokisin a fós usun, a apasa: “Jesus a feila o arap ngeni ewe telinimw Jerusalem. Nge lupwen an küna, a kechüeiti.” Jesus a fós usun ekkewe mettóch mi alólilen repwele fis ngeni aramasen Jerusalem ekiseló chék.​—Luk. 19:41-44.

11. Pwata Jesus a kechiweiti aramasen ewe telinimw Jerusalem?

¹¹ Jesus a letipechou pokiten a silei pwe lape ngeni ekkewe chón Jus resap etiwa pwóróusen ewe Mwú. Iwe pokiten ena, Jerusalem epwe taló me meinisin ekkewe chón Jus iir mi manawewu seni talóón ena telinimw repwe slave. (Luk. 21:20-24) A elichippúng pwe usun met Jesus a fen erá pwe lape ngeni aramas rese etiwa. Met meefien lape ngeni aramas lón leeniom we usun pwóróusen ewe Mwú? Ika a chék chókúkkún aramas mi etiwa óm achocho le afalafal ngeniir usun ewe enlet, iwe met ka tongeni káé seni pwóróusen ewe atun Jesus a kechiweiti chón ewe telinimw Jerusalem? Pwal ikkeei úlúngát lesen sia tongeni káé.

12. Met sia tongeni káé usun Jiowa seni án Jesus kechiweiti chókkewe a afalafal ngeniir?

 ¹² Jiowa a chúngú aramas. Án Jesus kechiw a áchema ngenikich úkúkún án Jiowa chúngú aramas. “Esap mochen pwe eman epwe pöütmwälila, nge a fen mochen pwe meinisin repwe ekieksefäl.” (2 Pet. 3:9) Lón ei fansoun, sia pwári pwe sia tongei aramas ren ach akkachocho le álisiir le káé pwóróus allimen ewe Mwúún Kot.—Mat. 22:39. *

13-14. Ifa usun Jesus a pwári an tongei aramas, me ifa usun sia tongeni ámááraatá ena napanap?

¹³ Jesus a angang weires lón ewe angangen afalafal. A pwári an tongei aramas ren an sópweló le asukuler iteiten fansoun a suuk ngeni. (Luk. 19:47, 48) Met a amwékútú le féri ena? Jesus a meefi an tongeer. Fán ekkóch, a chómmóng chókkewe mi mochen aúseling án Jesus afalafal pwe iwe “esap wor än Jesus me nöün kewe chon kaiö fansoun ar repwe mongö.” (Mark. 3:20) Me atun emén mwán a mochen fós ngeni Jesus lepwin, a tipemecheres le fós ngeni. (Joh. 3:1, 2) Lape ngeni chókkewe mi aúseling ngeni Jesus me mwan, rese wiliti néún chón káé, nge a fen unus met meinisin ra fen rongorong usun i. Lón ei fansoun, sia mochen suuki ngeni meinisin alen ar repwe pwal rong ewe pwóróus allim. (Föf. 10:42) Ren ach sipwe féri ena, eli a lamot ach sipwe ekkesiwili napanapen ach afalafal.

¹⁴ Kopwe tipemecheres le féri siwil. Ika sia chék akkafalafal lón ekkewe atun sia filatá le afalafal lón, eli sisap sereni ekkóch chókkewe iir mi mochen káé usun ewe pwóróus allim. Iei alon emén pioneer itan Matilda: “Ám me pwúlúwei we, aua kan ló afalafal ngeni aramas lón sókkopaten fansoun. Aua kan afalafal lesossorusich lón ekkewe leenien business. Me leolowas aua kan afalafal wóón ekkewe al ren ám áeá ewe cart, pwe ina atun a chómmóng aramas ra feilfetál. Me lekuniol, aua kúna pwe a chómmóng aramas ra nóm lón imwer kewe.” Itá sisap chék afalafal lón ekkewe atun sia sani, nge a lamot ach sipwe tipemecheres le ekkesiwili ach schedule le afalafal lón ekkewe atun sia tongeni sereni  chómmóng aramas. Ika sia féri ena, sia tongeni lúkúlúk pwe Jiowa epwe pwapwa rech.

15. Met a fis lón ewe sáingoon pwinin manawen Jesus wóón fénúfan usun met a mak lón Lukas 22:39-44?

¹⁵ Lón ewe pwinin Nisan 14, ier 33, Jesus a ló lón ewe tánipiin Ketsemane. Me ikena ie, a iinaawu masouen letipan ngeni Jiowa. (Álleani Lukas 22:39-44.) Lón ekkena atun mi fókkun áweires, Jesus a “iotek o tüngor fän mwelian mi leüömong, a pwal kechü ngeni Kot.” (Ipru 5:7) Met Jesus a ióteki lón ena sáingoon pwinin me mwen an we epwele máló? A iótek ngeni Jiowa me tingorei an epwe apéchékkúla le chék tuttuppwél ngeni me féri letipan. Jiowa a aúseling án néún na iótekin sié me a tiinaaló emén chónláng an epwe apéchékkúla.

16. Pwata Jesus a weires atun a iótek lón ewe tánipiin Ketsemane?

¹⁶ Ese wor tipemwaramwar pwe Jesus a kechiw atun a iótek lón ewe tánipiin Ketsemane pokiten a fókkun riáfféú ren án aramas ekieki pwe i emén mi ésúfélúngawa iten Kot we. A pwal silei úkúkún aúchean an epwe chék tuttuppwél me peni itéchún iten Seman we. Met ka tongeni káé seni án Jesus kechiw, ika ka pwal nóm fán weires ren óm kúna sóssótun óm tuppwél ngeni Jiowa? Pwal ikkeei úlúngát lesen sia tongeni káé.

17. Met sia tongeni káé usun Jiowa seni an pélúweni án Jesus kewe iótekin sié?

¹⁷ Jiowa a aúseling ngeni óm kewe iótekin sié. Jiowa a aúseling ngeni án Jesus kewe iótekin sié. Pwata? Pokiten an tuttuppwél ngeni me eitéchú itan we, ina met a kon aúchea me ren. Jiowa epwe pwal pélúweni ach kewe iótekin sié ika ach tuttuppwél ngeni me eitéchú itan we, ina met a kon aúchea me rech.​—Kölf. 145:18, 19.

18. Pwata sia tongeni erá pwe Jesus i ewe esin chiechi mi kirekiréch me weweiti meefiach?

¹⁸ Jesus a weweiti meefiom. Atun sia nóm lón aúrek, sia kan pwapwa atun a wor emén chienach mi weweiti meefiach, nge ákkáeúin emén mi fen piin nóm lón ewe esin weires sia nóm lón. Jesus, i ena sókkun chiechi. A silei memmeefin letipechou me memmeefin ach nóm lón osupwang. A weweiti ach kewe  apwangapwang me epwe nochchei ach sipwe angei ewe álillis mi lamot “lon fansoun ach osupwang.” (Ipru 4:15, 16) Usun chék án Jesus etiwa án ewe chónláng álillis lón ewe tánipiin Ketsemane, a pwal lamot ach sipwe tipemecheres le etiwa án Jiowa álillis mi kawor ese lifilifil ika seni eú néúch kewe puk, eú video, eú afalafal, are ren án emén mwán mi ásimaw are emén chienach lón ewe mwichefel chuurikich.

19. Ifa usun kopwe tongeni péchékkúl atun ka kúna weiresin sóssótun óm tuppwél ngeni Kot? Apwóróusa eú pwóróus.

¹⁹ Jiowa epwe ngonuk an we “kinamwe.” Ifa usun Jiowa a kan apéchékkúlakich? Atun sia iótek, sipwe angei “än Kot kinamwe mi tekia seni ach tongeni weweiti.” (Fil. 4:6, 7) Ena kinamwe Jiowa a ngenikich, epwe ekinamwei letipach me afatafataéchú ekiekich. Áwewe chék, a pwúng ena ren pwóróusen emén Chón Kraist fefin itan Luz. Iei alon: “Fán chómmóng, ua kan meefi tipitipingaw. Fán ekkóch, ena memmeef a efisi ai upwe ekieki pwe Jiowa ese tongeei. Nge atun a ppiitá ena memmeef, ua mwittir ereni Jiowa meefiei. Iótek a ekinamweei.” Ena pwóróus a áiti ngenikich pwe iótek a tongeni ekinamwekich.

20. Ikkefa ekkewe lesen sia káé seni án Jesus kechiw?

²⁰ A ifa me péchékkúletáán letipach me álilliséchún ekkewe lesen sia káé seni án Jesus kechiw! Ekkena lesen ra áchema ngenikich ach sipwe álisi chiechiach kewe iir mi letipeta me lúkúlúk pwe Jiowa me Jesus repwe álisikich atun a má senikich emén attongeach. Pokiten Jiowa Kot me Jesus Kraist ra pwári ewe napanap mi echipwér tong, a pwal amwékútúkich le afalafal me asukula aramas fán tong. Sia kúna oururun letipach ren ach silei pwe Jiowa me Néún we mi áchengicheng ra weweiti meefiach, silei ach kewe apwangapwang, me ra mochen álisikich le likiitú. Amwo sipwe sópweló le apwénúetá met sia fen káé tori ewe rán Jiowa epwe apwénúetá an ei pwon mi amwarar an ‘epwe talüpwasei chönün mas seni won mesach meinisin’!​—Pwär. 21:4.