1. Ifa usun sia tongeni áeá ach fansoun fán iten Jiowa?

 SIA kan sani le áeá ach fansoun ngeni chókkewe sia tongeer. Eú pean pwúpwúlú mi pwapwa ra mmen sani le áeá ar fansoun le chiechifengen. Ekkewe sáráfé, ra sani le chiechi ngeni chiechier kewe. Me oukich meinisin, sia aúcheani ewe fansoun sia nónnómfengen me pwiich kewe Chón Kraist. Nge ewe mi kon lamot seni meinisin, sia sani le awora ach fansoun fán iten Kot. Sia tongeni féri ena ren ach iótek ngeni, ákkálleani an we Kapas, me ekilon wóón minne a tipeni me napanapan kewe mi múrinné. Ewe fansoun sia áeá fán iten Jiowa a fókkun aúchea!​—Kölf. 139:17.

2. Met a tongeni eppeti ach áeá ach fansoun fán iten Jiowa?

² Ikaamwo sia mmen aúcheani ach sipwe iótek me kákkáé Paipel, nge esap fansoun meinisin a mecheres ach sipwe féri ena. A chómmóng met sia kan féfféri lón manawach, iwe ina met epwe tongeni áweiresi ach kókkótun fel ngeni Jiowa. Ach angangen moni, ach famili, me ekkewe pwal ekkóch mettóch mi lamot sia kan fériir, ra tongeni angealó watteen ach fansoun, iwe neman sipwele meefi pwe ese chúen wor ach fansoun le iótek, káé, are ekilon.

3. Ifa pwal och mettóch a tongeni eppeti ach fansoun fán iten Jiowa?

³ A pwal wor och mettóch a tongeni angealó ach fansoun. Ika sise túmúnúéch, sia tongeni féri ekkewe mettóch ese wor ngawer, nge mi angealó ewe watteen fansoun sia tongeni áeá le apéchékkúlaló ach riri ngeni Jiowa. Áwewe chék, a éch ach  sipwe awora fansoun fán iten minen apwapwa. Iwe nge, ikaamwo ewe minen apwapwa sia filatá a múrinné nge sia áeá watteen fansoun ngeni, iwe epwele chék ekis ewe fansoun sipwe áeá lón ach fel ngeni Jiowa. A lamot sipwe chemeni pwe minen apwapwa esap ina ewe mi kon aúchea.​—SalF. 25:27; 1 Tim. 4:8.

4. Met sipwele káé lón ei lesen?

⁴ Lón ei lesen, sipwe pwóróusfengen wóón pwata a lamot ach sipwe apwúngaló met ewe mi fókkun lamot lón manawach. Sipwe pwal pwóróusfengen wóón ifa usun sia tongeni alamotaéchú ach fansoun ngeni Jiowa me pwata a múrinné ngenikich ach sipwe féri ena.

5. Ifa usun án emén sáráfé ekieki ewe kapasen emmwen lón Efisos 5:15-17 a tongeni álisi le filatá ewe manaw mi múrinné seni meinisin?

⁵ Filatá ewe manaw mi múrinné seni meinisin. Ekkewe sáráfé ra kan ekieki ifa usun repwe manaweni ewe manaw mi múrinné seni meinisin. Iwe nge, néúr kewe sense me chón ar kewe famili esap iir chón fel ngeni Jiowa neman repwe peseer ar repwe fiti college pwe repwe tongeni eáni eú angang mi múrinné me watte peioffur. Ei sókkun sukul a kan lamot ar repwe áeá watteen ar fansoun fán itan. Iwe nge, semen me inen ekkewe sáráfé me chiechier kewe lón mwichefel, neman repwe pesei ngeniir ar repwe áeá ar fansoun le angang ngeni Jiowa. Met a tongeni álisi emén sáráfé mi tongei Jiowa an epwe eáni kefil mi múrinné seni meinisin? A éch an epwe álleani Efisos 5:15-17 me ekilon wóón. (Álleani.) Mwirin an álleani ei wokisin, neman a tongeni pwisin eisini: ‘Met “letipen” Jiowa? Met sókkun kefil epwe apwapwaai letipan? Menni kefil epwe álisiei ai upwe kefiléch wóón áeáán ai fansoun?’ Chemeni pwe “ekei rän ra ngau,” me ei ótót mi nóm fán nemenien Satan epwele taló ekiseló chék. A eú alen tipachem ach sipwe áeá manawach le féri ekkewe mettóch mi apwapwaai letipen Jiowa.

6. Met Maria a filatá, me pwata a ina eú kefil mi múrinné?

⁶ Filatá minne mi múrinné. Fán ekkóch, ach filatá ifa usun sipwe áeáéchú ach fansoun a kapachelong ach kefil lefilen ruu mettóch ese wor ngawer. Sia tongeni kúna pwúngún ena ren met a fis atun Jesus a ló chuuri Maria me Marta. Marta a fókkun pwapwa án Jesus etto chuuriir ina minne a ammólnatá watteen mwéngé fán itan. Nge pwiin we Maria, a mwot ngeni Jesus me aúseling ngeni met a eáni asukul. Minne Marta a féri ese ngaw, iwe nge, Jesus a apasa pwe Maria “a filätä ewe mettoch mi aüchea.” (Luk. 10:38-42) Mwirin och fansoun, neman Maria a ménúkaaló met sókkun mwéngé ra ammólnatá lón ena atun, nge sia lúkú pwe ese fókkun ménúki met a káé seni Jesus. Maria a fókkun aúcheani ena mwochomwochen fansoun a nóm ren Jesus, sipwe pwal aúcheani ach fansoun ngeni Jiowa. Ifa usun sia tongeni alamotaéchú ena fansoun?

7. Pwata a fókkun lamot ach sipwe iótek, káé, me ekilon?

⁷ Chemeni pwe iótek, káé, me ekilon, iir kinikin ach fel. Lupwen sia iótek sia fóffós ngeni Semach we lón láng, ewe mi fókkun tongekich. (Kölf. 5:7) Lupwen sia káé ewe Paipel, sia káé seni Kot, ewe mi tipachem seni meinisin. (SalF. 2:1-5) Lupwen sia ekilonei ekkewe mettóch sia káé usun Jiowa,  sia ekieki napanapan kewe mi múrinné me chemeni amwararen ekkewe mettóch a mochen féri fán itach me fán iten meinisin aramas. Iei ewe mi kon múrinné seni meinisin lón áeáán ach fansoun. Met a tongeni álisikich le féri ena inaamwo ika ach fansoun mi chék aúkúk?

8. Menni lesen sia tongeni káé seni án Jesus áeá an fansoun me lón ewe fénúpéén?

⁸ Ika mi tufich, kútta eú leeni mi mosonoson me kinamwe. Ekieki án Jesus ei leenien áppirú. Me mwen an epwe poputááni an angangen afalafal wóón fénúfan, a ló lón ewe fénúpéén me nónnóm ie úkúkún 40 rán. (Luk. 4:1, 2) Lón ena leeni mi mosonoson, Jesus a iótek ngeni Jiowa me ekilon wóón minne Seman na a tipeni fán itan. An féri ena, a álisi le alúkúlúkú ngeni pwisin i ika a mmólnetá ngeni ekkewe sóssót epwele kúna. Ifa usun án Jesus leenien áppirú a tongeni álisuk? Ika en chóchóón eú famili mi chómmóng, ese mwáál epwe weires ngonuk óm kopwe kúna eú leeni mi mosonoson me lón imwom we. Ika ina, neman kopwe fen kúnékún me lúkún imwom we. Ina met Julie a féri lupwen a mochen fós ngeni Jiowa lón iótek. I me pwúlúwan we ra nóm lón eú kúkkún apartment lón France, me a áweires an epwe áláeménúló me nóm lón eú leeni esap akúrang. Iei met a apasa: “Ina minne, ua kan ló fetál lón ewe park iteiten rán. Me ikena ie ua tongeni áláeménúló, nefótófót, me wesewesen fós ngeni Jiowa.”

9. Ifa usun Jesus a pwári pwe a aúcheani an riri ngeni Jiowa inaamwo ika a chómmóng met e kan féfféri?

⁹ A chómmóng met Jesus a kan féfféri lón manawan. Atun an angangen afalafal, chómmóng aramas ra kan tapwei seni eú leeni ngeni pwal eú leeni, me iir meinisin ra mochen ar repwe chék nónnóm ren. Fán eú, “aramas meinisin seni ewe telinimw ra chufengen mwen asamen ewe imw” pwe repwe chuuri. Ikaamwo ina, nge Jesus a nochchei an epwe awora an fansoun iteitan le iótek ngeni Jiowa. Me mwen an epwe tétá akkar, a ló ngeni “eu leni ia esap wor aramas ie” pwe epwe tongeni áeá an fansoun ngeni Seman we.—Mark. 1:32-35.

10-11. Me ren Mateus 26:40, 41 met Jesus a pesei néún kewe chón káé ar repwe féri, nge met a fis?

¹⁰ Lón ewe sáingoon pwinin manawen Jesus wóón fénúfan, atun epwele much an angangen afalafal, i a pwal kútta eú leeni mi mosonoson ikewe epwe tongeni ekilon ie me iótek. A kúna ena esin leeni me lón ewe tánipiin Ketsemane. (Mat. 26:36) Lón ena atun, Jesus a ereni néún kewe chón káé och mettóch mi fókkun lamot usun iótek.

¹¹ Ekieki met a fis. Atun ra wareiti ewe tánipiin Ketsemane, a fen pwinimau, usun a fen  lu seni kulókun lukenipwin. Jesus a ereni néún kewe aposel ar repwe “mamasa,” me i a feiló pwe epwe iótek. (Mat. 26:37-39) Nge lepwolen an ikkiótek, iir ra annutoló. Atun a kúner pwe ra méúr a pesesefáliir ar repwe sópweló le “mamasa o iotek.” (Álleani Mateus 26:40, 41.) I a mirititi pwe a watte ar aúrek me ra mélúlú. Fán tong, Jesus a erá pwe “ewe fituk a apwangapwang.” Nge fán ruu, Jesus a pwal chúen ló iótek, nge atun a liwin a kúna pwe néún kewe chón káé ra méúr nge rese fen iótek.​—Mat. 26:42-45.

12. Met sipwe féri ika sia meefi pwe sise tongeni iótek pokiten a kon watte ach aúrek are mélúlú?

¹² Fili ewe fansoun mi fich. Neman fán ekkóch sia meefi aúrek are fókkun mélúlú ach sipwe iótek. Ika a ina usun meefiom, chemeni pwe a pwal wor chómmóng ra ina usun. Iwe, met ka tongeni féri? Ekkóch me lein chókkewe mi eéreni le iótek lepwin ra kúna pwe a mmen álilliséch ar repwe iótek lefááf ewe atun resaamwo kon mélúlú. Ekkóch ra kúna pwe napanapen inisiir atun ra iótek a kan álisiir le nefótófót, áwewe chék, ika ra mwot are fótopwúkú. Iwe nge, met kopwe féri ika ka meefi pwe kese tongeni iótek pokiten ka kon choutiw lón óm aúrek are letipengaw? Iinaawu ngeni Jiowa meefiom. Ka tongeni lúkúlúk pwe Semach na mi úméúméch a weweiti meefiom.—Kölf. 139:4.

13. Ifa usun néúch kewe phone are device ra tongeni aosukosukakich atun sia iótek, káé, are fiti mwich?

¹³ Túmúnú sonuk ekkewe mettóch epwe aosukosukok atun óm káé. Iótek esap chék ina met sia féri epwe tongeni apéchékkúlaló ach riri ngeni Jiowa. Ach káé án Kot Kapas me fiffiti ekkewe mwich ra pwal tongeni álisikich ach sipwe ririéch ngeni Kot. Mi wor met ka tongeni féri pwe kopwe alamotaéchú ewe fansoun ka áeá le káé me ewe fansoun ka áeá lón ach kewe mwich? Pwisin eisinuk, ‘Met a kan aosukosukaei atun ekkewe mwich are atun ai káé?’ Án emén kékké, email, are text wóón phone are pwal wóón ekkóch device? Lón ei fansoun, fite billion aramas ra néúnéún ekkeei sókkun device mi álilliséch. Ekkóch soukáé ra erá pwe atun sia nefótófót wóón ekkóch mettóch, nge eú phone mi nóm únúkkúch a tongeni aosukosukakich. Iei alon emén sousile, “Kese  tongeni nefótófót wóón met ke féri, óm ekiek ese nómwe ngonuk.” Me mwen poputáán ach kewe mwichelap, a kan wor pesepes ngenikich ach sipwe féri néúch kewe phone pwe esap aosukosuka ekkewe ekkóch. Kich mi pwal tongeni féri ena ngeni néúch kewe device pwe resap aosukosukakich me atai ach we fansoun ngeni Jiowa?

14. Me ren Filipi 4:6, 7, ifa usun Jiowa epwe álisikich ach sipwe nefótófót?

¹⁴ Tingorei Jiowa an epwe álisuk le nefótófót. Ika ka kúna nge óm ekiek ese nómwe ngonuk atun óm káé are fiti mwich, tingorei Jiowa an epwe álisuk. Ika ka lólilen are aúrek, ese mwáál epwe weires ngonuk óm kopwe úkútiw le ekieki usur me nefótófót wóón án Kot Kapas, nge ina met mi fókkun lamot kopwe féri. Tingor lón iótek ewe kinamwe epwe túmúnú letipom me pwal ‘ekiekum.’​—Álleani Filipi 4:6, 7.

15. Ifa eú feiéch kopwe kúna ren óm áeá óm fansoun ngeni Jiowa?

¹⁵ Ika ka awora óm fansoun le fós ngeni Jiowa, aúseling ngeni, me ekieki usun I, kopwe fókkun kúna feiéch seni. Ifa usun? Áeúin, kopwe eáni kefil mi múrinné. Ewe Paipel a alúkúlúkú ngenikich pwe “eman mi chiechi ngeni aramas mi tipachem epwe tipachemela.” (SalF. 13:20) Ina minne, atun ka áeá óm fansoun ngeni Jiowa, ewe mi tipachem seni meinisin, kopwe tipachemeló. Epwe lapóló óm weweiti ifa usun kopwe apwapwaai i me ifa usun kopwe ttii sonuk ekkewe kefil mi eletipengawa.

16. Ifa usun ach áeá ach fansoun ngeni Jiowa a émúrinnéló tufichich le asukula aramas?

¹⁶ Oruuan, kopwe emén sense mi múrinné. Atun sia káé ngeni emén lón Paipel, eú me lein ekkewe mettóch mi fókkun lamot sia kan achocho ngeni, ina ach sipwe álisi an epwe ririéch ngeni Jiowa. Lapólóón ach ikkiótek ngeni Jiowa me káé usun i, pwal ina péchékkúlelóón ach tongei i me lapólóón tufichich le áiti ngeni néúch we chón káé an epwe tongei i. Ina met Jesus a féri. I a fós usun Jiowa lón ewe esin napanap mi pwári tong me ena a álisi néún kewe chón káé ar repwe pwal tongei Jiowa.​—Joh. 17:25, 26.

17. Pwata iótek me káé ra apéchékkúlaló ach lúkú?

¹⁷ Aúlúngátin, óm lúkú epwe péchékkúleló. Ekieki met a fis atun ka tingor án Kot emmwen, ourur, me álillis. Iteiten án Jiowa a pélúweni óm kana iótekin tingor, óm lúkú a péchékkúleló. (1 Joh. 5:15) Met a pwal tongeni apéchékkúlaló óm lúkú? Pwisin káé. Chechchemeni pwe, “än eman lükülük a pop seni an rongorong ewe kapas.” (Rom 10:17) Iwe nge, ren an epwe péchékkúleló ach lúkú,  mi wor met mi lamot sipwe pwal féri me lúkún káé. Met ena?

18. Áweweei pwata a lamot ach sipwe ekilon.

¹⁸ A lamot sipwe ekilon wóón met sia kákkáé. Ekieki pwóróusen ewe chón makkeei Kölfel 77. I a riáfféú pún a meefi pwe i me ekkewe chón Israel rese chúen nóm fán án Jiowa chen. An aúreki ena, a efisi an esap mémméúr lepwin. (Wokisin 2-8) Met a féri? A ereni Jiowa: “Üpwe ekieki usun om kewe föför meinisin o ekiek won om kewe föför mi amwarar.” (Wokisin 12) Ewer, ena soumakken kélfel a silefichi usun ekkewe mettóch Jiowa a féri fán iten néún aramas me lóóm, nge iei met a chúen ekieki: “Kot a manlükala an epwe kirikiröch? Ifa usun, an song a aükätiu an tong?” (Wokisin 9) Ena soumakken kélfel a ekilon wóón met Jiowa a féri, me ifa usun a pwári tong me úméúméch ngeni néún kewe aramas lóóm. (Wokisin 11) Met mwirilóón? I a lúkúlúk pwe Jiowa esap likitaló néún aramas. (Wokisin 15) Ina met epwe pwal fis ngonuk, óm lúkú epwe péchékkúleló atun ka ekilonei met Jiowa a féri fán iten néún kewe aramas me met a féri fán pwisin itom.

19. Ifa pwal eú feiéch sipwe kúna ika sia áeá ach fansoun ngeni Jiowa?

¹⁹ Ewe arúáánún, nge mi kon aúchea, óm tong ngeni Jiowa epwe péchékkúleló. Tong, ina ewe napanap epwe fókkun amwékútuk le álleasochisi Jiowa, pennúkúóló mochenum pwe kopwe apwapwaai i, me likiitú fán ese lifilifil sóssót epwe toruk. (Mat. 22:37-39; 1 Kor. 13:4, 7; 1 Joh. 5:3) Ese fókkun wor och mettóch epwe kon aúchea seni án emén epwe ririéch ngeni Jiowa.​—Kölf. 63:1-8.

20. Ifa usun kopwe awora fansoun fán iten iótek, káé, me ekilon?

²⁰ Chemeni pwe iótek, káé, me ekilon iir kinikinin ach fel. Kopwe áppirú Jesus le kútta eú leeni mi mosonoson are kinamwe pwe kopwe áeá óm fansoun ngeni Jiowa. Ésúsonuk ekkewe mettóch ese kon pwal lamot mi tongeni aosukosukok. Tingorei Jiowa an epwe álisuk óm kopwe nefótófót wóón óm fel ngeni, áwewe chék atun ka iótek, káé, me ekilon. Ika ka achocho le alamotaéchú óm fansoun iei, Jiowa epwe fang ngonuk manaw esemuch lón ewe ótót séfé.—Mark. 4:24.