1-2. (a) Ineet atun sia kan chemeni emén attongeach mi máló? (b) Met Jesus a poputááni lón ewe pwinin me mwen epwele máló?

 IKAAMWO attongeach kewe ra fen máló me lóóm lóóm, nge sia chúen chechchemeniir. Ewe rán ra máló lón, ina ewe ákkáeúin atun sia kan chechchemeniir lón.

² Iteiten ier, sia fit lein ekkewe fite million aramas wóón unusen fénúfan mi mwichfengen lón áchechchemen málóón ewe emén mi fókkun áchengicheng me rech, ina i Jesus Kraist. (1 Pet. 1:8) Sia mwichfengen pwe sipwe chechchemeni ewe emén mi fangóló manawan usun eú méén kepich pwe epwe angasakicheló seni tipis me máló. (Mat. 20:28) Jesus a mochen pwe chókkewe mi tapweló mwirin repwe chechchemeni an we máló. Lón ewe pwinin me mwen epwele máló, i a poputááni eú mwéngéén lefááf mi kkóló aúchean me a allúkú ngeni néún kewe chón káé: “Oupwe föri ei pwe oupwe chechemeniei.”​—Luk. 22:19.

3. Met sipwele pwóróusfengen wóón lón ei lesen?

³ Eú kúmiin aramas mi chókúkkún mi fiti Áchechchemen án Kraist máló ra eáni ewe ápilúkúlúkún manaw lón láng. Nge mi wor fite fite million chókkewe mi eáni ápilúkúlúkún manaw wóón fénúfan ra pwal fiti. Lón ei lesen, sipwe pwóróusfengen wóón ekkewe popun pwata iir me ruu ekkena kúmiin aramas ra mwétéresiti ar repwe fiti ewe Áchechchem iteiten ier. Sipwe pwal pwóróusfengen wóón ifa usun sia kúna feiéch seni ach fiti. Iei sipwe akkomw pwóróusfengen wóón ekkóch popun pwata ekkewe mi kepit ra fiti.

4. Pwata ekkewe mi kepit ra mwéngé ewe pilawa me ún ewe wain atun ewe Áchechchem?

⁴ Iteiten ier, ekkewe mi kepit mi fiti ewe Áchechchem ra mwéngé ewe pilawa me ún ewe wain. Pwata a fichitiir ar repwe mwéngé ewe pilawa me ún ewe wain? Ren ach sipwe silei, sipwe ppii met a fis lón ewe sáingoon pwinin án Jesus nóm wóón fénúfan. Mwirin án Jesus féri ewe Pasofer, a poputááni ewe Fááfen Ach Samol. A pásini ewe pilawa me ewe wain ngeni néún kewe 11 aposel mi tuppwél me ereniir pwe repwe áni me únúmi. Jesus a fós ngeniir usun ruu pwonen etipeeú, ewe pwonen etipeeú mi fé me ewe pwonen etipeeú fán iten eú Mwú. * (Luk. 22:19, 20, 28-30) Ekkeei pwonen etipeeú ra suuki ngeni ekkena aposel me eú mwich mi kisikis eú alen ar repwe wiliti king me souasor lón láng. (Pwär. 5:10; 14:1) Ekkewe chék lusun mi kepit * chón lón ekkeei ruu pwonen etipeeú, iir repwe mwéngé ewe pilawa me ún ewe wain atun ewe Áchechchem.

5. Met ekkewe mi kepit ra silei usun ewe ápilúkúlúk ra ketiw ngeni?

⁵ Iei pwal eú popun pwata ekkewe mi kepit ra mwétéresiti ar repwe fiti ewe Áchechchem. Ar fiti a álisiir ar repwe ekieki usun ar we ápilúkúlúk. Jiowa a ngeniir eú ápilúkúlúk mi kkóló aúchean, ina ar repwe eáni eú manaw esemuch lón láng esap tongeni taló, me angangfengen me Jesus Kraist ewe mi fen manawsefál me meinisin ekkewe 144,000, nge lap seni meinisin ar repwe wesewesen nóm mwen mesen Jiowa Kot. (1 Kor. 15:51-53; 1 Joh. 3:2, Testament mi Fö) Ekkena mi kepit ra silei pwe ra ketiw ar repwe eáni ekkena esin feiéch lón láng. Nge ren ar repwe wesewesen ketiwelong lón láng, a lamot repwe akkamwéchú ar tuppwél tori máló. (2 Tim. 4:7, 8) Ekkewe mi kepit ra fókkun pwapwa atun ra ekkekieki usun ar na ápilúkúlúkún manaw lón láng. (Tit. 2:13) Nge ifa usun ren ekkewe ‘ekoch sip’? (Joh. 10:16) Ikkefa ekkóch popun ra fiti ewe Áchechchem?

6. Pwata ekkewe ekkóch siip ra fiti ewe Áchechchem iteiten ier?

⁶ Ekkewe ekkóch siip rese mwéngé ewe pilawa me ún ewe wain, nge ra chúen pwapwa le fiti ewe Áchechchem. Lón ewe ier 1938, iei ewe áeúin atun chókkewe mi eáni ewe ápilúkúlúkún manaw wóón fénúfan ra ketiw ar repwe fiti ewe Áchechchem. The Watchtower minen March 1, 1938, a apasa: “A fókkun pwúng me fich án ekkewe [ekkóch siip] repwe fiti ena esin mwich me kúna met a fis. . . . Itá epwe pwal iei eú fansoun mi apwapwa ngeniir.” Chókkewe mi ketiw le fiti eú apwúpwúlú ra pwapwa, pwal ina usun ekkewe ekkóch siip, ra pwapwa ar fiti ewe Áchechchem inaamwo ika rese mwéngé ewe pilawa me ún ewe wain.

7. Pwata ekkewe ekkóch siip ra kan mwétéresiti ar repwe aúseling ngeni ewe afalafal atun ewe Áchechchem?

⁷ Ekkewe ekkóch siip ra pwal ekieki usun ar we ápilúkúlúk. Ra mwétéresiti ar repwe aúseling ngeni ewe afalafal atun ewe Áchechchem, mi menlapei met Kraist me chienan kewe 144,000 repwe féri fán iten aramas mi tuppwél atun ar Nemenem Úkúkún Engeréú Ier. Fán emmwenien ar we King Jesus Kraist, chókkewe repwe nemenem seni láng  repwe álillis lón angangen fférsefálin fénúfan an epwe wiliti eú paratis me álisi aramas ar repwe unuséchúló. A ifa me apwapwaan ngeni ekkewe fite million chón fiti ewe Áchechchem le anchangei pwénútáán ekkewe oesini lón Paipel, áwewe chék ekkewe lón Aisea 35:5, 6; 65:21-23; me Pwärätä 21:3, 4. Ar anchangei ar nóm lón ewe paratis fengen me chókkewe iir mi fókkun tongeer, epwe apéchékkúlaló ar we ápilúkúlúk fán iten mwachkkan me úppós lón ar angang ngeni Jiowa.​—Mat. 24:13; Kal. 6:9.

8. Ifa pwal eú popun ekkewe ekkóch siip ra fiti ewe Áchechchem?

⁸ Iei pwal eú popun pwata ekkewe ekkóch siip ra fiti ewe Áchechchem. Ra mochen pwári ar tongei me álisatá ekkewe mi kepit. Án Kot Kapas a fen oesini pwe ekkewe mi kepit me chókkewe mi eáni ápilúkúlúkún manaw wóón fénúfan repwe angangfengen. Iei sipwele ppii ifa usun.

9. Lón ewe oesini lón Sekaraia 8:23, met meefien ekkewe ekkóch siip ngeni ekkewe mi kepit?

⁹ Álleani Sekaraia 8:23. A mmen chúng letipach ren ei oesini mi áweweei meefien ekkewe ekkóch siip ngeni pwiir kewe mi kepit. Ewe “chon Juta,” me pwal chókkewe ‘Kot a etiir,’ ra wewe ngeni ekkewe lusun mi kepit. (Rom 2:28, 29) Ekkewe “engol mwän seni ekewe mwü mi sokola ar kapas,” ra wewe ngeni ekkewe ekkóch siip. Ar “amwöchü lepwülün üfen” ekkewe mi kepit, a wewe ngeni ar fitipacheer fán tuppwél lón ewe fel mi enlet. Ina minne, lón ewe pwinin Áchechchem, ekkena ekkóch siip ra pwári ar echeni ekkewe mi kepit ren ar fitiir le mwichfengen.

10. Met Jiowa a féri pwe epwe pwénútá ewe oesini lón Isikiel 37:15-19, 24, 25?

¹⁰ Álleani Isikiel 37:15-19, 24, 25. Jiowa a apwénúetá ei oesini ren an atufichi án ekkewe mi kepit me ekkewe ekkóch siip repwe fókkun angangfengen fán tipeeú. Ei oesini a fós usun ruuofóch wok. Chókkewe mi eáni ewe ápilúkúlúkún manaw lón láng, iir ra usun ewe wok “Mwün Juta” (ewe einang ekkewe kingen Israel ra kefil seni), nge chókkewe mi eáni ápilúkúlúkún manaw wóón fénúfan, iir ra usun ewe wok “Mwün Israel.” * Jiowa epwe etipeeúfengeni ekkena ruu kúmiin aramas pwe repwe wiliti “efoch chök wok.” Weween repwe angangfengen lón tipeeú fán emmwenien ar we emén chék King, Kraist Jesus. Iteiten ier, ekkewe mi kepit me ekkewe ekkóch siip ra fiti ewe Áchechchem, esap lón ruu mwichen aramas mi imufesen, nge lón “eu chök mwichen sip” fán emmwenien “eman chon mas.”​—Joh. 10:16.

11. Ifa usun “ekewe sip” mi mak lón Mateus 25:31-36, 40, ra álisatá pwiin Kraist kewe?

¹¹ Álleani Mateus 25:31-36, 40. “Ekewe sip” Jesus a fós usun, ra wewe ngeni ekkewe chón pwúng lón ekkewe ránin lesópwólóón mi eáni ewe ápilúkúlúkún manaw wóón fénúfan, weween ekkewe ekkóch siip. Ra tuppwél le álisatá pwiin Kraist kewe mi chúen nóm wóón fénúfan, ren ar ákkáeúin álisiir lón ewe watteen angang mi fis wóón unusen fénúfan, ina ewe angangen afalafal me álisi aramas ar repwe wiliti Chón Kraist.​—Mat. 24:14; 28:19, 20.

12-13. Ikkefa pwal ekkóch mettóch ekkewe ekkóch siip ra féri mi pwári pwe ra álisatá pwiin Kraist kewe?

¹² Iteiten ier lón ekkewe wiik me mwen ewe ránin Áchechchem, ekkewe ekkóch siip ra unusen álisatá pwiin Kraist kewe ren ar fiti  eú angangen etiwetiw wóón unusen fénúfan pwe repwe etiwa aramas ngeni ewe Áchechchem. (Ppii ewe pwóór “ Ka Akkóta Óm Kókkót fán Iten ewe Áchechchem?”) Ra pwal túmúnúfichi pwe mettóch meinisin fán iten ewe Áchechchem epwe mmólnetá inaamwo ika ese wor emén me lón ar mwichefel epwe mwéngé ewe pilawa me ún ewe wain. Iir ra fókkun pwapwa le féri ekkena mettóch pwe repwe álisatá pwiin Kraist kewe. Ra silei pwe Jesus a fókkun aúcheani minne ra féri ngeni pwiin kewe mi kepit pwe usun itá nge ra féri ngeni pwisin i.​—Mat. 25:37-40.

¹³ Ikkefa pwal ekkóch popun oukich meinisin, ekkewe mi eáni ápilúkúlúkún manaw lón láng me eáni ápilúkúlúkún manaw wóón fénúfan, ousia fiti ewe Áchechchem?

14. Ifa usun Jiowa me Jesus ra pwári watteen ar tong ngenikich?

¹⁴ Sa mmen kilisou ren ewe tong Jiowa me Jesus ra pwári ngenikich. Jiowa a pwáraaló an tongekich lón chómmóng napanap. Nge ewe mi kon lap seniir meinisin, ina an tiinaato Néún we mi áchengicheng an epwe riáfféú me máló fán itach. (Joh. 3:16) Jesus a pwal pwári úkúkún watteen an tongekich ren an tipemecheres le fangóló manawan fán itach. (Joh. 15:13) Sise fókkun tongeni liiwini ngeni Jiowa me Jesus ewe úkúkún tong ra pwár ngenikich. Nge sia tongeni pwári ach kilisou ngeniir ren napanapen manawach rán me rán. (Kol. 3:15) Sia pwal fiti ewe Áchechchem pwe sia mochen ekieki usun ar tongekich me pwal pwári ach tong ngeniir.

15. Pwata ekkewe mi kepit me ekkewe ekkóch siip ra fókkun aúcheani ewe liffang ewe méén kepich?

¹⁵ Sia fókkun aúcheani ewe liffang ewe méén kepich. (Mat. 20:28) Ekkewe mi kepit ra fókkun aúcheani ewe méén kepich pún ina alen ar we ápilúkúlúk mi amwarar. Pokiten ar lúkú án Kraist we asor, Jiowa a erá iir aramas pwúng me i a mwuutiir pwe repwe néún. (Rom 5:1; 8:15-17, 23) Ekkewe ekkóch siip ra pwal aúcheani ewe méén kepich. Pokiten ar lúkú án Kraist we asor, ra úéch mwen mesen Kot, ra tongeni angang ngeni i, me eáni ewe ápilúkúlúk ar repwe “towu seni ewe riaföü mi lapalap.” (Pwär. 7:13-15) Eú alen án ekkewe mi kepit me ekkewe ekkóch siip pwári ar kilisou ren ewe méén kepich, ina ar fiti ewe Áchechchem iteiten ier.

16. Ifa pwal eú popun ach sia fiti ewe Áchechchem?

¹⁶ Pwal eú popun pwata sia fiti ewe Áchechchem, pwe sia mochen álleasochisi Jesus. Ese lifilifil ika met ach ápilúkúlúk fán iten mwachkkan, emén me emén kich sia mochen álleasochisi án Jesus ei allúk lón ewe pwinin a poputááni ewe Áchechchem, a apasa: “Iei met oupwe föri pwe oupwe chechemeniei.”​—1 Kor. 11:23, 24.

17. Ifa usun ewe Áchechchem a álisikich le ririéch ngeni Jiowa?

¹⁷ A lapóló ach ririéch ngeni Jiowa. (Jas. 4:8) Sa fen káé me lón ei lesen pwe ewe Áchechchem a suuki ngenikich alen ach sipwe ekkekieki usun ewe ápilúkúlúk Jiowa a ngenikich me ekilonei watteen an we tong a pwári ngenikich. (Jer. 29:11; 1 Joh. 4:8-10) Atun sia ekilonei ach we ápilúkúlúk mi núkúchar lón mwachkkan me án Kot tong enlet ngenikich, sia apéchékkúlaló ach tong ngeni Jiowa me ach riri ngeni i.​—Rom 8:38, 39.

18. Ach ekilon wóón án Jesus leenien áppirú a amwékútúkich le féri met?

¹⁸ A lapóló ach mochen áppirú án Jesus  leenien áppirú. (1 Pet. 2:21) Lón ekkewe rán me mwen ewe ránin Áchechchem, sia nefótófót wóón ekkewe pwóróus lón Paipel mi fósun ewe sáingoon wiiken án Jesus nóm wóón fénúfan, an máló, me an manawsefál. Nge lón ewe pwinin Áchechchem, ewe afalafal a áchema ngenikich án Jesus tong ngenikich. (Ef. 5:2; 1 Joh. 3:16) Lupwen sia álleani pwóróusen án Jesus pennúkúóló pwisin mochenin me ekilon wóón, sia mochen “föföri usun mine Jesus a föföri.”​—1 Joh. 2:6.

19. Met a tongeni álisikich an epwe chék sópwósópwóló ach chiechi ngeni Kot?

¹⁹ A lapóló ach mochen sópweló ach chiechi ngeni Jiowa. (Jut. 20, 21) Ach achocho úkúkún ach tufich le álleasochisi i, epinaaló itan we, me apwapwaai letipan, ina met epwe álisikich ach sipwe chék chiechiéch ngeni i. (SalF. 27:11; Mat. 6:9; 1 Joh. 5:3) Ach fiti ewe Áchechchem a álisikich ach sipwe tipeppós le manaweni manawach iteiten rán lón ewe napanap mi pwári ngeni Jiowa pwe sia mochen chiechi ngeni tori feilfeiló chék.

20. Ikkefa ekkóch popun sia fiti ewe Áchechchem?

²⁰ Ese lifilifil ika sia eáni ewe ápilúkúlúkún manaw esemuch lón láng are wóón fénúfan, nge a wor popun mi aúchea ach sia fiti ewe Áchechchem. Iteiten ier atun sia mwichfengen lón ena ránin, sia chechchemeni málóón ewe emén kich mi fókkun tongei, ina i Jesus Kraist. Nge lap seni meinisin, sia chechchemeni ewe féfférún tong mi lapalap, ewe tong Jiowa a pwár ngenikich ren an fangoto Néún we usun eú méén kepich. Lón ei ier, ewe Áchechchem epwe fis lefááfin Enimu April 15, 2022. Sia tongei Jiowa me Néún we, ina minne, ach fiti áchechchemen án Jesus máló, ina met epwe kon aúchea me rech lap seni mettóch meinisin.