1-2. Pwata sia fiti ewe Áchechchem iteiten ier?

 INA EPWE 2,000 ier ra ló, Jesus a fangóló manawan fán itach me a suuk ngenikich ach sipwe tongeni kúna manaw esemuch. Lón ewe pwinin me mwen án Jesus epwele máló, a allúkú ngeni néún kewe chón káé ar repwe chechchemeni an we fangóló manawan ren ar repwe féri eú kókkótun áchechchem esap tokorárá me repwe áeá pilawa me wain.​—1 Kor. 11:23-26.

² Sia álleasochisi án Jesus allúk pokiten sia fókkun tongei. (Joh. 14:15) Iteiten ier lón ewe fansoun Áchechchem sia pwári ach kilisou ren ach awora fansoun le ekieki me ióteki usun aúchean an we máló fán itach. Sia pwal pwapwa le alapaaló ach fiti ewe angangen afalafal me etiwa chómmóng aramas ar repwe fitikich lón ena mwich mi kkóló aúchean. Sia tipeppós ach sisap mut ngeni och mettóch an epwe eppetikich le fiti ewe Áchechchem.

3. Met sipwele káé lón ei lesen?

³ Lón ei lesen, sipwe káé úlúngát mettóch néún Jiowa kewe aramas ra fókkun achocho ngeni ren ar repwe féri Áchechchemen án Jesus we máló. Ikkeei: (1) ar féri ewe Áchechchem lón ewe napanap Jesus a áiti ngeni néún kewe chón káé, (2) ar etiwa aramas ar repwe fiti ewe Áchechchem, me (3) ar fiti ewe Áchechchem inaamwo ika a áweires nónnómur.

4. Ikkefa ekkewe pwóróus mi enlet sia kan rongorong atun ewe Áchechchem, me pwata a lamot ach sipwe aúcheaniir? (Luk. 22:19, 20)

⁴ Iteiten ier atun ewe Áchechchem, sia aúseling ngeni eú afalafal mi lóngólóng wóón Paipel mi pélúwenéchú ekkóch kapas eis. Sia káé pwata a lamot ngeni aramas an epwe wor eú méén kepich me ifa usun málóón emén mwán a omusaaló tipisin chómmóng. A pwal áchema ngenikich met ewe pilawa me ewe wain ra liosuetá me ié kewe ra tongeni mwéngé me ún. (Álleani Lukas 22:19, 20.) Sia pwal ekilonei usun ekkewe feiéch mi amwarar epwe tori chókkewe mi ápilúkúlúkún kúna manaw esemuch wóón fénúfan. (Ais. 35:5, 6; 65:17, 21-23) Mi lamot sisap aúcheangawa ekkena mettóch. Chómmóng aramas rese weweiti ekkena mettóch, me rese silei úkúkún aúchean án Jesus we asor. Rese pwal féri Áchechchemen an we máló lón ewe napanap Jesus a áiti ngeni néún kewe chón káé. Pwata?

5. Ifa usun aramas ra poputá le féri áchechchemen án Jesus máló mwirin málóón lape ngeni ekkewe aposel?

⁵ Ekiseló mwirin málóón lap ngeni néún Jesus kewe aposel, ekkewe Chón Kraist chofona ra poputá le chóni ewe mwichefel. (Mat. 13:24-27, 37-39) Ra eáni “kapas chofona ar repwe atokala ekewe chon lükü Jesus pwe repwe etiir.” (Föf. 20:29, 30) Eú me lein ekkewe “kapas chofona” ekkena Chón Kraist chofona ra poputá le afalafala, ina ar erá pwe a lamot án Jesus epwe eáni an we asor iteitan, nge rese tipeeú ngeni met ewe Paipel a apasa pwe a asoresini manawan “fän eu chök, pwe epwe amorala tipisin chomong aramas.” (Ipru 9:27, 28) Lón ei fansoun, chómmóng aramas mi letip wenechar ra lúkú ena afalafal chofona. Ra chufengen lón ar fál iteitan, fán ekkóch iteiten rán, ar repwe féri met ra eita ngeni “Komunio.” b Nge ekkóch lamalam ra féri áchechchemen án Jesus máló nge esap kon iteitan, nge lape ngeniir rese kon lien weweéchúti lamotan. Eli ekkóch repwe ekieki, ‘Itá án Jesus máló a wesewesen tongeni omusaaló ai kewe tipis?’ Pwata ra eáni ena esin kapas eis? Pokiten ra fen lúkúoló alon chókkewe rese lúkú pwe án Jesus máló a tongeni omusaaló tipisin aramas. Ifa usun ekkewe Chón Kraist mi enlet ra álisi aramas le weweiti aúchean án Jesus we asor me ifa usun repwe féri ewe Áchechchem lón ewe napanap mi pwúng?

6. Met eú kúmiin chón káé Paipel ra poputá le weweiti lón ewe ier 1872?

⁶ Lón ewe ier 1870, eú kúmiin chón káé Paipel fán emmwenien Charles Taze Russell ra poputá le káéfichi ewe Paipel. Ra mochen silei ewe enlet usun aúchean án Jesus we asor me epwe itá ifa usun napanapen ar féri áchechcheman. Lón ewe ier 1872, ra weweiti seni ar káé Paipel pwe mi pwúng pwe Jesus a awora ewe méén kepich fán iten aramas meinisin. Ra esilefetálei minne ra káé lón simpung me ekkewe puk. Ekiseló mwirin, ra poputá le féri ewe Áchechchem fán eú iteiten ier usun met ekkewe popun Chón Kraist ra féri.

7. Ifa usun sia feiéch seni met ekkena chón káé Paipel ra káé fite ier lóóm?

⁷ Lón ei fansoun, sia feiéch seni met ekkena Chón Kraist mi tuppwél ra káé fite ier lóóm. Ifa usun? Jiowa a álisikich le weweiti aúchean án Jesus we asor me met a féri fán itach me aramas meinisin. (1 Joh. 2: 1, 2) Sia pwal káé pwe ewe Paipel a áiti ngenikich ekkewe ruu ápilúkúlúk fán iten chókkewe mi apwapwaai Kot, áeúin ren ekkewe ekkóch repwe eáni manaw esemuch lón láng me esap tongeni taló, me oruuan án ekkewe fiti million aramas repwe eáni manaw esemuch wóón fénúfan. A péchékkúleló ach riri ngeni Jiowa atun sia ekieki úkúkún an tongekich me ifa usun sia pwisin feiéch seni án Jesus we asor. (1 Pet. 3:18; 1 Joh. 4:9) Ina minne, sia áppirú pwiich kana lóóm ren ach etiwa aramas le fitikich le féri ewe Áchechchem lón ewe napanap Jesus a áiti ngeni néún kewe chón káé.

8. Met néún Jiowa kewe ra fen féri ren ar repwe etiwa aramas ngeni ewe Áchechchem? (Ppii ewe sasing.)

⁸ Ren fite fite ier, néún Jiowa kewe ra kan ekketiwa aramas le fiti ewe Áchechchem. Lón ewe ier 1881, pwiich kewe lón Merika ra ketiw ar repwe mwichfengen lón imwen emén pwiich lón Allegheny, Pennsylvania fán iten ena mwich mi kkóló aúchean. Mwirin, eú me eú mwichefel ra pwisin féri ewe Áchechchem. Lón March 1940, ekkewe chón afalafal ra tongeni etiwa chókkewe mi mochen aúseling lón ar kewe territory. Lón ewe 1960, ina ewe áeúin atun Bethel a awora ngeni ekkewe mwichefel taropween etiwetiw. Seni ena atun, fite billion taropween etiwetiw fán iten ewe Áchechchem ra fen einet. Pwata sia awora watteen fansoun me angang weires le etiwa aramas?

9-10. Ié kewe ra kúna feiéch seni ach achocho le etiwa aramas ngeni ewe Áchechchem? (Johannes 3:16)

⁹ Eú popun sia etiwa aramas le fitikich le féri ewe Áchechchem, ina ach mochen án chókkewe mi kerán fiti ar repwe silei ewe  enlet usun met Jiowa me Jesus ra fen féri fán iten kich meinisin. (Álleani Johannes 3:16.) Sia áneán pwe met ra kúna me káé atun ewe Áchechchem epwe amwékútúúr le mochen alapaaló ar sile usun Jiowa me wiliti néún chón angang. Nge mei pwal wor ekkewe ekkóch ra kúna feiéch ren ar fiti ewe Áchechchem.

¹⁰ Sia pwal etiwa chókkewe rese chúen angang ngeni Jiowa, pún sia mochen áchema ngeniir pwe Jiowa a chúen tongeer. Chómmóng ra fiti, me sia fókkun pwapwa atun sia kúner. Ar fiti ewe Áchechchem a áchema ngeniir usun apwapwaan ar angang ngeni Jiowa lón ekkewe fansoun. Áwewe chék ren pwóróusen Monica. c Atun ewe COVID-19 pandemic, a poputásefál le fiti ewe angangen afalafal. Mwirin an fiti ewe Áchechchem lón ewe 2021, a erá: “Ewe Áchechchem a fókkun aúchea me rei. Iei ewe áeúin fansoun mwirin 20 ier, ua kerán poputásefál le afalafal ngeni aramas me etiwer ngeni ewe Áchechchem. Ua féri úkúkún ai tufich le etiwa ekkewe ekkóch pokiten ua fókkun kilisou ren met Jiowa me Jesus ra fen féri fán itei.” (Kölf. 103:1-4) Ese lifilifil ika aramas ra etiwa ach etiwer are rese, nge sia achocho úkúkún ach tufich le etiwer ngeni ewe Áchechchem, ren ach silei pwe Jiowa a aúcheani ach achocho.

11. Ifa usun Jiowa a efeiéchú ach achocho le etiwa aramas ngeni ewe Áchechchem? (Akai 2:7)

¹¹ Jiowa a fókkun efeiéchú ach achocho le etiwa aramas ngeni ewe Áchechchem. Lón ewe 2021, inaamwo ika mi aúkúk met sia tongeni féri pokiten COVID-19 pandemic, nge a wor 21,367,603 chón fiti, epwe kerán ina ach tikeri ena úkúkún chóchó. Ena nampa a lap seni chóchóón Chón Pwáraatá Jiowa wóón unusen fénúfan fán ruu! Nge Jiowa ese chék ekieki chóchóón chón fiti, nge a pwal áfánni emén me emén leir. (Luk. 15:7; 1 Tim. 2:3, 4) Sia tongeni lúkúlúk pwe Jiowa a áeá ei angangen etiwa aramas ren ach sipwe tongeni kúna chókkewe mi letipwenechar.​—Álleani Akai 2:7.

12. Met a tongeni áweiresi ach sipwe fiti ewe Áchechchem? (Ppii ewe sasing.)

¹² Jesus a apasa pwe lón ekkewe ránin lesópwólóón sipwe kúna sókkopaten weires, áwewe chék án chón ach famili ú ngenikich, riáfféúmwáál, maun, málapalap, me metakkan. (Mat. 10:36; Mark. 13:9; Luk. 21:10, 11) Fán ekkóch, ekkena mettóch ra áweiresi ach sipwe féri Áchechchemen án Jesus we máló. Met pwiich kewe ra féri pwe repwe fiti inaamwo ra nóm fán ekkena esin weires, me ifa usun Jiowa a álisiir?

13. Ifa usun Jiowa a efeiéchú án Artem pwora me tipeppós le féri ewe Áchechchem atun a nóm lón imwen kalapus?

¹³ Kalapus: Pwiich kewe mi nóm lón kalapus ra féri úkúkún ar tufich pwe repwe féri Áchechchemen án Jesus we máló. Áwewe chék ren pwóróusen Artem. Lón ewe 2020 fansoun ewe Áchechchem, a kalapus lón eú kúkkún ruumw 183 square feet, nge mi tongeni kuuch nimmén chón kalapus lón. Inaamwo ika a kalapus nge a tufichin angei ekkóch mettóch an epwe áeá fán iten ewe pilawa me ewe wain lón ewe Áchechchem, me a akkóta an epwe pwisin eáni ewe afalafal. Nge chienan kewe chón kalapus ra kan soun ottek me ún suupwa. Met Artem a féri? A tingorer ika ra tongeni ar resap mwo ottek me ún suupwa ren chék úkúkún eú  awa atun ewe Áchechchem. Artem a máirú, ren án chienan kana tipeeú ngeni an na tingor. Artem a erá: “Ua eisiniir ika ua tongeni fós ngeniir usun ewe Áchechchem.” Inaamwo ra erá pwe rese mochen rongorong, nge mwirin ar kúna me rong án Artem féri ewe Áchechchem, ra eisini usun.

14. Ifa usun néún Jiowa kewe aramas ra achocho pwe repwe tongeni féri ewe Áchechchem inaamwo a wor pandemic?

¹⁴ COVID-19 pandemic. Pokiten ewe pandemic, iwe néún Jiowa kewe aramas rese tongeni fiti ewe Áchechchem lón féúféún aramas. Nge ena mettóch ese eppeti ar féri ewe Áchechchem. d Ekkewe mwichefel mi wor ar Internet ra féri ewe Áchechchem wóón Internet. Nge ifa usun ren ekkewe fite million ese wor ar Internet? Lón ekkóch fénú, ekkewe keangen ofesilap ra akkóta pwe aramas repwe katol ekkewe afalafal wóón TV are aúseling wóón reitio. Pwal och, ekkewe keangen ofesilap ra record ewe afalafal lón lap seni 500 fós pwe pwal mwo nge chókkewe ra nóm towau ra tongeni féri ewe Áchechchem.  Iwe, pwiich kewe mi tuppwél ra akkóta ar repwe uwei ena afalafal mi record ngeni pwiich kana.

15. Met ka tongeni káé seni pwóróusen ei chón káé Paipel itan Sue?

¹⁵ Koput seni chón ach famili. Met a kon áweiresi ekkóch ar repwe fiti ewe Áchechchem, ina án chón ar famili ú ngeniir. Áwewe chék ren pwóróusen emén chón káé itan Sue. Lón ewe 2021, eú rán me mwen ewe Áchechchem, Sue a ereni ewe chón káé ngeni pwe ese tongeni fiti ewe Áchechchem pún chón an we famili ra ú ngeni. Ewe chón káé ngeni a álleani ngeni Lukas 22:44, me a áwewe ngeni pwe atun sia kúna weires, sipwe áppirú Jesus ren an seppiti Jiowa lón an iótek me unusen lúkúlúk wóón. Sorotá, Sue a ammólnatá ewe pilawa me ewe wain, me mwirin a katol ewe lesenin rán mi kkóló aúchean wóón jw.org. Lón ena pwinin, atun Sue a chék ákkáláemén lón ruumwan a aúseling ngeni ewe Áchechchem wóón néún we phone. Mwirin, Sue a mak ngeni ewe mi wisen káé ngeni, me erá: “Ka fókkun apéchékkúlaei nánew. Ua féri úkúkún ai tufich le fiti ewe Áchechchem, me Jiowa a álisiei. Ua fókkun pwapwa me meefi kilisou!” Óm lúkú pwe Jiowa epwe tongeni pwal álisuk ika ka nóm lón ena esin sóssót?

16. Pwata sia lúkúlúk pwe Jiowa epwe efeiéchú ach achocho le fiti ewe Áchechchem? (Rom 8:31, 32)

¹⁶ Jiowa a fókkun aúcheani ach achocho le féri Áchechchemen án Jesus we máló. Sia tongeni lúkúlúk pwe epwe efeiéchúkich atun sia pwári ach aúcheani met a fen féri fán itach. (Álleani Rom 8:31, 32.) Ina minne, ousipwe tipeppós me fiti ewe Áchechchem lón ei ier, me féri úkúkún ach tufich le alapaaló ach angang ngeni atun ewe fansoun Áchechchem.