EWE popun kapas mi afféú ngeni “woken” lón ewe Paipelin Ótót Séfé, a tongeni wewe ngeni fitu sókkun waa. (Féf. 8:​28, 29, 38) Iwe nge, ussun itá ena re Itiopia a wawa efóch woken mi watte seni ekkewe woken aramas ra wawa lón maun are atun kitir. Ikkeei ekkóch popun pwata sia erá ena.

Ena re Itiopia a wiseni eú wis mi watte me a sái towaw. I “emén mwán mi wor an nemenem fán Kandeisia, ewe kiwinen Itiopia, me a wisen túttúmúnú meinisin pisekin neminna kewe mi aúchea.” (Féf. 8:27) Ewe fénú Itiopia lón fansoun lóóm, a nóm ikewe Sudan me éérún Isip ra nóm ia lón ei fansoun. Inaamwo iká ena mwán ese wawa efóch chék waa fán iten unusen an sái, nge ese mwáál a uwei chómmóng mettóch mi aúchea fán iten an sái towaw. Ekkóch ekkewe woken aramas ra wawa le uwei aramas wóór lón fansoun ekkewe aposel, ina ekkewe woken mi wor féféú taian me imwan. Me ren ewe puk Acts—An Exegetical Commentary a erá: “A watte ewe leenien iseis pisek me pwal ekkóch mettóch wóón ena woken, a kinamwe án aramas wawa le sái, me eli ra pwal tongeni sái towaw wóón.”

Ewe re Itiopia a állea atun Filip a pwereló ren. A mak lón ena pwóróus pwe “Filip a ssáló únúkkún me a rong [án ewe néúwis] ákkálleani puken ewe soufós Aisea.” (Féf. 8:30) Ekkewe woken aramas ra wawa le sái towaw rese mwittir ssá. Ina popun ena néúwis a tongeni állea me Filip a tongeni tikeri ena woken atun a ssá wóón pechen.

Ewe re Itiopia a “pesei Filip an epwe tétá me móót ren.” (Féf. 8:31) Chókkewe mi wawa ekkewe woken fán iten kitir, ra kan chék útá. Iwe nge, a wor leenien ewe néúwis me Filip le mómmóót wóón ewe woken ena néúwis a wawa le sái.

Pokiten minne a mak lón Féffér sópwun 8 me pwal ekkóch pwóróusen uruwo, a pwá lón néúch kewe puk kukkuto chék sasingin án ewe re Itiopia wawa efóch woken mi watte nge esap ekkewe woken aramas ra kan wawa lón maun are atun ra kitir.